Un Bida di Siguridad Duradero

SI BO tin keintura haltu, probablemente bo ta bebe un píldora pa pasa e dolor di cabes i kisas ta pone un sacu cu ijs pa baha e keintura. Pero maske e píldora i e sacu di ijs por haci e síntomanan un poco mas soportabel, nan no ta kita e causa di bo keintura. I si bo problema di salú ta grave, bo mester di tratamentu di un dokter experenciá.

Humanidad ta sufri di un keintura persistente, esta insiguridad. Miéntras tantu nos ta tuma medidanan debidamente pa aliviá e síntomanan desagradabel, pero un cura por bini solamente di un persona cu por haci un diagnósis extenso di nos situacion. I ningun persona conocé humanidad mihó cu nos Creador, Jehova Dios. E sa cu bida ta insigur debí na problemanan cu a bini riba nos.

Un Comienso Sigur Tirá Afó

E Palabra di Dios ta splica cu Jehova a crea e promé pareha humano perfecto i a pone nan den un ambiente sigur. Nan tabata liber di ansiedad. Dios su propósito tabata pa hende biba pa semper den un paradijs, den pleno siguridad. E promé alrededor di hende a consistí di “tur palu deseabel na bista i bon pa cuminda.” Ripará cu Dios a percurá pa nan necesidadnan físico. Mescos ta conta pa nan necesidadnan emocional, ya cu e alrededor ei a ser describí como “deseabel na bista.” No tin duda cu esaki a nificá cu Dios a pone e promé pareha den un alrededor cu a sigurá nan di un bida stabil i liber di problema.—Génesis 2:9.

Adam cu Eva a rechasá Dios su gobernacion soberano i amoroso, treciendo asina sintimentunan di duda, miedu, bergwensa, culpabilidad i insiguridad den nan bida. Despues di rechasá Dios, Adam a admití cu e “tabatin miedu.” E promé hendenan a tapa nan mes i a sconde for di nan amoroso Creador, cu ken, te n’e momento ei, nan tabatin un relacion cerá i bon.—Génesis 3:1-5, 8-10.

Jehova su propósito original no a cambia. Bijbel ta declará cu nos Creador ta un Dios amoroso, cu pronto lo permití hende obediente restorá e tera na un condicion paradísico i biba den siguridad pa semper. Mediante profeta Isaías, Dios ta primintí: “Mi ta creando shelu nobo i un tera nobo; . . . hubilá i sea gososo pa semper.” (Isaías 65:17, 18) Apostel Pedro ta bisa tocante e shelu nobo i tera nobo aki: “Den esakinan husticia lo tin cu biba.”—2 Pedro 3:13.

Con esaki lo ser lográ? Mediante un gobiernu cu Jehova a establecé. Esaki ta e Reino cu Jesucristo a bisa su siguidónan pa pidi p’e den oracion: “Nos Tata cu ta den shelu, laga bo nomber sea santificá. Laga bo reino bini. Laga bo boluntad sosodé, mescos cu den shelu, tambe riba tera.”—Mateo 6:9, 10.

E Reino di Dios lo reemplasá gobiernunan humano i lo goberná amorosamente pa realisá Dios su propósito pa henter e tera. (Daniel 2:44) E duda, miedu, bergwensa, culpabilidad i insiguridad cu a plaga humanidad desde e dianan di Adam lo disparcé. Segun Bijbel, e Reino ei ta tras di porta. Asta awor, den nos mundu insigur, tin un grado di siguridad disponibel pa esnan cu ta anhelá pa Dios su Reino bini.

Duna Asuntunan Spiritual Prioridad

David tabata un sirbidó di Dios cu tabata sa kico ta miedu i afliccion. I tog David a skirbi, manera nos por lesa na Salmo 4:8: “Den pas lo mi subi cama i tambe drumi, pasobra abo so, O Jehova, ta hací mi biba den siguridad.” Jehova a duna David un sintimentu di siguridad, aunke tabatin biaha cu David a hañ’é den hopi problema. Nos por siña algu di esaki? Con nos por haña un midí di siguridad asta den un mundu insigur?

Considerá e relato di Génesis tocante Adam cu Eva. Ki ora nan a perde e sintimentu di siguridad? Tabata na momento cu nan a benta nan relacion personal cu e Creador un banda i a nenga di biba na armonia cu su propósito pa humanidad. P’esei, si nos boltu e proceso aki dor di drenta den un relacion cerá i personal cu Jehova i purba biba na armonia cu su boluntad, asta awor nos por disfrutá di hopi mas siguridad cu sin dje lo por tabata posibel.

Siña conocé Jehova mediante un studio di Bijbel ta yuda nos comprendé e nificacion di bida. Asina so nos ta comprendé ken nos ta i pakico nos ta aki. Un bida sigur ta posibel ora nos stima Dios, conocé su propósito pa humanidad i ta comprendé cua ta nos papel den esaki. Un homber cu yama Paul a descubrí esaki basta aña pasá.

Paul a nace i a crece riba un dje islanan net dilanti e costa di Alemania. Dor cu su mayornan a pasa den Guera Mundial II, su famia no tabata interesá den religion. Paul ta bisa di su mes tempu e tabata hóben: “Mi no a kere den nada i no tabata respetá niun hende. Mi tabata manda mi tristesa abou cu alcohol, i tabata bebe di mas dos of tres biaha pa siman. No tabatin siguridad den mi bida.”

Un dia Paul a papia cu un Testigo di Jehova. Paul a discutí mashá, pero un cos cu e Testigo a bisa a pon’é pensa. “Nada no ta bin di su mes.” Cu otro palabra, tur cos cu nos ta mira rond di nos den naturalesa mester tin un Creador.

“Mi a keda pensa hopi riba esei, i mester a bai di acuerdo.” Di manera cu Paul a studia Bijbel cu Testigonan di Jehova i a siña conocé Jehova. E ta admití: “Fuera di mi mayornan, Jehova tabata e promé persona den mi bida cu a haci algu pa mi.” Paul a bautisá como Testigo na 1977 i ta bisa: “Awor mi sa kico e propósito di bida realmente ta. Mi ta disfrutá di biba na armonia cu Jehova su boluntad. Mi ta sintí mi sigur, ya cu no tin nada cu por pasa cu mi of cu mi famia cu Jehova no por drecha den futuro.”

Kico nos por siña dje experencia aki? Paul a vence su insiguridad—un carga emocional—dor di concentrá, no riba rikesa material, sino riba asuntunan spiritual. El a desaroyá un relacion estrecho cu e Creador. Miyones di Testigo di Jehova ta disfrutá di un relacion asina. Esaki ta duna nan un forsa interno cu ta yuda nan desplegá un spiritu di sacrificio propio ora di trata cu otro hende. Ora nan ta yama na cas di hende, Testigonan di Jehova ta usa nan mes tempu pa yuda otro hende haci nan bida mas sigur, dor di concentrá riba asuntunan spiritual. Pero e Testigonan ta haci mas cu predicá so.

“Resa na Boso Dios, Jehova”

Na juli 1997 ora e Riu Oder a inundá áreanan grandi di nort Europa, Testigonan di Jehova na Alemania a tende dje situacion deplorabel di hende den e pais bisiña di Polonia. Kico nan por a haci? Testigonan individual na Berlin i den stadnan alrededor a mustra un generosidad maraviyoso dor di contribuí cu un donacion di mas cu 200.000 florin den un par di dia.

Testigonan cu tabatin experencia den trabou di construccion a biaha seis ora riba caminda—cubriendo nan mes gastunan—for di Berlin pa e region rond di Wrocław, Polonia. Den un pueblito, hopi cas a ricibí basta daño. E cas di un famia Testigo tabata pará den awa di mas cu 6 meter haltu. E yu muher tabatin plan di casa e siguiente luna i bai biba cu su esposo den e cas ei. Kico por a haci pa drecha e cas i yuda e famia, cu a perde casi tur cos?

Ora e awanan a baha, un bisiña a bisa den un tono di mofa: “Di con boso no ta resa na boso Dios, Jehova, anto mira si e ta bin yuda boso?” E bisiña a keda masha babucá ora e siguiente dia vários vehículo for di Alemania a para dilanti cas dje famia Testigo! Un grupo di hende straño a baha for dje vehículonan i a cuminsá haci reparacion n’e cas. E bisiña a puntra: “Ken nan ta? Ken ta paga pa e materialnan?” E famia Testigo a splica cu esakinan tabata nan rumannan spiritual i cu e bishitantenan aki tabata paga pa e materialnan. E habitantenan dje pueblito a para mira cu asombro con e cas tabata ser renobá. Por cierto, e casamentu a tuma lugá riba e fecha planeá.

E famia aki a descubrí cu pertenecé na e hermandad internacional di Testigonan di Jehova ta trece, no solamente beneficionan spiritual, sino tambe un grado di siguridad den un mundu insigur. Nan no tabata e úniconan cu a experenciá esaki. Den henter e área afectá, reparacion a ser hací na cas i Salon di Reino di Testigonan di Jehova. Anto nan no a lubidá nan bisiñanan cu no ta Testigo. A haci hopi trabou tambe riba nan cas, loke e hendenan a apreciá mashá.

Husticia, Trankilidad i Siguridad

Ora por fin un keintura haltu bai i nos recobrá nos salú bek, ki gradicidu nos ta n’e dokter cu a yuda nos! Ora e Reino di Dios kita, una bes pa semper, e keintura di insiguridad cu ta afectá humanidad, ki gradicidu nos lo ta na nos Creador! Sí, e ta esun cu ta primintí nos bida den “berdadero husticia, trankilidad i siguridad te na tempu indefiní.” Esta un prospecto maraviyoso!—Isaías 32:17.

[Komentario na página 10]

Nos por aliviá un carga emocional dor di concentrá, no riba rikesa material, sino riba asuntunan spiritual

[Plachi na página 8]

Dios ta primintí di trece un mundu nobo unda tur hende lo biba den siguridad duradero