Loke Jesus Ta Awor

AUNKE ta interesante pa sa con Jesus su aparencia tabata, ta muchu mas vital pa determiná kico e ta awor i na unda e ta. Ki papel e ta hunga den Dios su propósito pa e famia humano?

Historia seglar no por duna nos e contestanan. Por haña nan solamente den e documento cu Dios a laga skirbi p’e beneficio di buscadónan dje berdad. Esei ta Bijbel Santu, of e Scritura Sagrado, e buki mas ampliamente distribuí den historia di mundu.

Bijbel no ta djis un buki mas cu hende como autor. Aunke Dios a usa hende pa skirbi Bijbel, ta e tabata e berdadero autor: “Tur Scritura ta inspirá di Dios i ta probechoso pa siña, pa reprendé, pa rectificá cosnan, pa disipliná den husticia, p’e homber di Dios por ta plenamente competente, completamente ekipá pa tur bon obra.”—2 Timoteo 3:16, 17.

Apostel Pablo a reconocé e Scritura como tal, pasobra el a skirbi: “Ora boso a ricibí e palabra di Dios, cu boso a tende for di nos, boso a acept’é, no como palabra di hende, sino, como loke e berdaderamente ta, como palabra di Dios.”—1 Tesalonicensenan 2:13.

Dios ta e Creador todopoderoso dje universo, cu su miles di miyones di galaxia i miles di miyones di strea den cada galaxia. Esta un poder impresionante e tin pa a crea tur esei! Esun Todopoderoso cu a traha e universo asombroso, sigur-sigur por a laga skirbi un buki cu lo a sirbi como un guia confiabel pa cualkier hende cu ta busca e berdad.

Loke Bijbel Ta Bisa

E Palabra di Dios ta exponé e eror di tur e teoria i speculacionnan tocante Jesus. Tuma nota di algun detaye cu e ta duna di dje:

• Un cantidad incontabel di aña pasá, Dios a traha Jesus como su promé i único creacion directo den shelu, promé cu angel i e universo físico. Ta p’esei e yama Dios su “Yu unigénito.” Tur otro creacion a ser trahá mediante e Yu aki, Dios su “obrero maestro,” den su existencia prehumano.—Juan 3:16; 6:38; 8:58; Proverbionan 8:30; Colosensenan 1:16.

• Un 2.000 aña pasá, Dios a transferí e bida di Jesus pa matris di un bírgen hudiu pa e nace como hende. Asta awor, cu e proceso di inseminacion artificial, hende por haci algu cu den algun sentido ta similar cu esaki.—Mateo 1:18; Juan 1:14.

• Jesus tabata hopi mas cu djis un bon hende. Como adulto, el a reflehá e personalidad amoroso, compasivo i hustu di su Tata celestial, Jehova Dios, perfectamente.—Juan 14:9, 10; Hebreonan 1:3; 1 Juan 4:7-11, 20, 21.

• Como representante di Dios riba tera, Jesus a percurá pa hende pober i oprimí, i tog no a descriminá hende ricu. Cu respaldo di Dios su poderoso spiritu santu, Jesus a cura enfermonan milagrosamente i asta a lanta hende morto. Cu obranan maraviyoso asina, el a demostrá na escala chikitu loke e ta bai haci na escala mundial despues cu e lanta for di morto pa bida den shelu i bira Rey dje Reino celestial di Dios.—Mateo 11:4-6; Lucas 7:11-17; Juan 11:5-45.

• Ta e Reino celestial di Dios ei ta loke Jesus a siña su siguidónan pidi p’e den oracion i pone promé den nan bida. Una bes e cuminsá reina plenamente, “lo e aplastá i pone un fin na tur e reinonan aki [cu ta existí awe], i e mes lo permanecé pa tempu indefiní.” E ora ei, e Reino lo ta e único gobiernu na tera. E ta e único speransa pa humanidad afligí.—Daniel 2:44; Mateo 6:9, 10.

• Dios tabata Jesus su Tata i Jesus tabata fiel na Dios. Pues ora nan a mat’é, e tabata un homber perfecto. El a ofrecé su bida perfecto na Dios boluntariamente como un sacrificio di rescate pa recobrá loke Adam a perde ora el a rebelá contra Dios. Asina Jesus a habri caminda pa bida eterno pa tur cu ehercé fe den dje.—Juan 3:16; Romanonan 3:23, 24; 1 Juan 2:2.

• Como Rey celestial nombrá pa Dios, Jesus lo efectuá Dios su propósito pa eliminá maldad for di riba cara di tera i hiba humanidad te na perfeccion di mente i curpa. E ora ei humanidad lo biba den pas i felicidad den un paradijs riba tera, cu bon bibienda i cuminda na abundancia pa tur. Malesa, tristesa i morto lo ta cos di pasado. Asta e mortonan lo haña resureccion i tin e oportunidad di biba pa semper riba tera.—Génesis 1:26-28; 2:8; Salmo 37:10, 11, 29; Proverbionan 2:21, 22; Isaías 25:6; 65:21-23; Lucas 23:43; Echonan 24:15; Revelacion 21:3, 4.

Pues, Bijbel ta bisa nos masha cla cu Jesus ta e figura central den Dios su propósito pa establecé un mundu nobo di husticia aki riba tera. Debí na e papel vital cu e ta hunga, tabata na su lugá pa Jesus bisa: “Ami ta e caminda i e berdad i e bida. Ningun hende ta yega n’e Tata sino pa medio di mi.”—Juan 14:6; 2 Pedro 3:13.

Un Gobernante Yen di Compasion

Hende humilde ta deseá pa Jesus ta nan gobernante den e mundu nobo. Anto esta un gobernante distinto i placentero lo e ta! Un manera cu el a mustra esaki tabata dor dje obranan asombroso di curacion cu el a efectuá tempu e tabata riba tera. (Mateo 15:30, 31) Pero ripará tambe e clase di gobernante cu lo e ta.

Pa cuminsá, considerá loke gobernante dje mundu aki a haci den pasado. Historia ta mustra cu atrabes di siglonan, hopi bes nan tabata cruel i sin heful. Nan a hiba nan pueblo den cantidad di guera, atrocidad, inkisicion i masacre. Den e siglo 20 aki so, mas cu 100 miyon hende a muri den guera.

Ripará e contraste entre e actitud i accionnan di gobernante dje mundu aki, i e actitud i accionnan di Jesus den su manera di trata cu hende pober, oprimí i impotente: “Ora el a mira e multitudnan, el a haña duele di nan, pasobra nan tabata soyá i plamá manera carné sin wardadó.” P’esei el a bisa nan: “Bini cerca mi, boso tur cu ta afaná i cargá, i lo mi refrescá boso. Tuma mi yugo riba boso i siña di mi, pasobra mi ta di genio suave i humilde di curason, i boso lo haña refrescamentu pa boso alma. Pasobra mi yugo ta suave i mi carga ta leve.”—Mateo 9:36; 11:28-30.

Cuantu compasion Jesus tabatin pa hende! Den esaki el a imitá su Tata celestial. Jesus tabata e personificacion di amor, i el a siña su disipelnan pa nan tin entre nan un amor berdadero, fundá riba principio. Pues, nan no tabatin mag di laga rasa, nacionalidad, posicion económico, religion di ántes ni nada otro interferí cu nan unidad internacional. (Juan 13:34, 35; Echonan 10:34, 35) Sí, Jesus a stima hende asina tantu cu el a duna su bida pa nan. (Efesionan 5:25) E ta e clase di gobernante cu e mundu aki tin mester i lo haña.

Awor Jesus Ta un Rey “Nèchi”

E Palabra profético di Dios ta yuda nos comprendé cu actualmente Jesus ta un Rey poderoso den shelu. E salmista a profetisá tocante dje: “Bo ta realmente mas nèchi cu e yunan di hende. . . . Den bo splendor sigui bai padilanti te na éxito; core den e causa dje berdad i humildad i husticia . . . Bo a stima husticia i ta odia maldad. Ta p’esei Dios, bo Dios, a ungí bo cu e zeta di hubilacion.”—Salmo 45:2, 4, 7.

Como Rey celestial ungí dor di Dios, Jesus a haña e comision pa drenta den accion pa expresá su amor pa husticia i su odio pa maldad. Pues, Bijbel ta describié como un vencedor inmortal, e “Rey di reynan,” cu pronto lo ehecutá tur Dios su enemigunan. Ademas, lo e restorá tera bek na condicionnan paradísico i hiba humanidad rescatabel na perfeccion.—Revelacion 19:11-16.

Jesus su papel nobo lo no ta esun di un ‘Mesías den sufrimentu’ cu opositornan ta bofoná, bati i mata. Mas bien, su papel nobo ta esun di un “Dios Poderoso,” e gobernante di tera. (Isaías 9:6) Pa mayoria gobernante humano esaki ta mal noticia, pasobra pronto nan reino lo ser aplastá i destruí, manera Daniel 2:44 ta profetisá. Dios lo usa Cristo como ehecutor i “siguramente lo kibra rey na pida-pida riba dia di su rabia. Lo e ehecutá huicio entre e nacionnan.”—Salmo 110:5, 6.

Isaías a profetisá cu ora Cristo haci esaki, lo e “spanta hopi nacion. Reynan lo cera nan boca p’e.” Di con? “Pasobra realmente nan lo mira loke [nan confidentenan religioso] no a conta nan, i nan tin cu dirigí nan atencion na loke nan no a tende.”—Isaías 52:15.

Nan Lo “Kosechá Warwarú”

Isaías a profetisá cu lidernan religioso lo neglishá nan deber. Por ehempel, nan no ta siña nan tou e berdad di Bijbel, sino e doctrinanan no-bíblico di tormento eterno den candela di fiernu, trinidad di tres dios den un i inmortalidad di alma. Tur esakinan ta di orígen pagano. Tambe, clero a apoyá tur e gueranan di nan nacionnan, asta ora esei a nificá mata hende di nan mes religion. Esaki ta un violacion directo dje mandamentunan di Dios.—1 Juan 2:3, 4; 3:10-12; 4:8, 20, 21.

Ademas, clero ta ofrecé nan tounan cosnan cu ta bunita pa mira, pero cu no ta nificá nada pa Dios, manera imágennan religioso, bistí di pastor, catedral costoso i cuadronan dorná cu conceptonan pagano, incluyendo e krans di lus dje dios di solo. Nan ta haci esaki maske Dios a manda su sirbidónan: “Apartá boso, apartá boso, sali for di ei, no mishi cu nada impuru . . . , boso cu ta cargando e hermentnan di Jehova.”—Isaías 52:11; 2 Corintionan 6:14-18.

Esnan cu ta bisa cu nan ta representá Dios, pero cu ta violá su mandamentunan i ta siña otronan pa haci mescos, lo cosechá loke nan a sembra. Nan lo haña un huicio adverso i lo paga e prijs ora Dios destruí e sistema di cosnan aki. Manera profeta Oséas a bisa, “nan ta sembra bientu i ta kosechá warwarú.”—Oséas 8:7, Editorial Evangélica; mira tambe Revelacion 17:1-3, 15, 16.

Hende Onrado Ta Siña e Berdad

E echo cu clero ta malrepresentá Dios i Jesus, no ta stroba hende onrado di siña e berdad tocante Jesus. Den promé siglo, esei no a sosodé, pasobra Paul Barnett ta skirbi den The Two Faces of Jesus (E Dos Caranan di Jesus): “Cristo no ta un parakaidista cu a djis cai for di shelu den historia, sin cu el a ser anunciá.” Sí, e tempu ei profecia bíblico a “anunciá” e Mesías cu exactitud, loke a duna su disipelnan leal confirmacion di su binida. Awe tin muchu mas evidencia cu ta anunciá e echo cu Dios a autorisá Jesus pa reina como e glorioso “Rey di reynan” den shelu.—Mateo 24:3-13; 2 Timoteo 3:1-5, 13.

Sí, “e bon nobo aki dje reino [di Dios cu Cristo como gobernante] lo ser predicá den tur e tera habitá como testimonio pa tur nacion; i e ora ei e fin lo yega.” (Mateo 24:14) Testigonan di Jehova ta haciendo esaki. Nan ta mas cu cincu miyon na cantidad den henter mundu. Di manera cu esnan cu kier conocé e berdadero Jesus por haci esaki. (Juan 10:14; 1 Juan 5:20) I pa sobrebibí “e tribulacion grandi” cu pronto lo baha riba tera, ta vital pa conocé i obedecé Jesus.—Revelacion 7:9-14; Juan 17:3; 2 Tesalonicensenan 1:6-10.

P’esei, cu muchu gustu Testigonan di Jehova lo yuda bo examiná e descripcion atractivo dje Yu di Dios hañá den Bijbel.

[Plachi na página 9]

Cristo den poder di Reino lo eliminá maldad

[Plachi na página 10]

Bou dje reinado amoroso di Cristo, e tera aki lo bira un paradijs