Bo Ta Spar of Ta Malgastá Energia?
DJE CORESPONSAL DI SPIERTA! NA GRAN BRETANIA
NA Merca tur aña hende ta malgastá energia calculá na un balor di un mil miyon dollar, suficiente pa percurá coriente pa un stad tamaño di Chicago. Con nan ta malgast’é? Aparatonan manera computer, fax mashin, video, television, CD player, i asta aparato pa traha kofi, ta keda riba ‘standby.’ Ta haci esaki pa nan oloshi sigui cana, pa mantené nan memoria i pa mustra nan posicion, of djis pa nan ta cla pa usa mesora.
Na Gran Bretania nan ta calculá cu e energia anual cu tal aparato pará pornada ta usa, ta crea mei miyon ton di gas cu ta keinta e atmósfera, dor dje extra produccion di coriente eléctrico. E gasnan aki ta drenta den atmósfera i por ta pone cu e planeta ta bira mas cayente. Segun e korant di Londen The Times: “Pa na moda cu e ideologia di protehá e medio ambiente ta entre consumidónan hóben, poco di nan ta mira e coneccion entre produccion di coriente i e keintamentu dje planeta.”
Por lo general hende no ta realisá cu hopi aparato electrónico ta usa casi mes tantu coriente riba standby cu ora nan ta den pleno uso. Por ehempel, un sistema di satélite di television kisas ta usa 15 watt ora e ta den uso i solamente 1 watt ménos ora e ta riba standby. Mal diseño tambe ta hunga un papel. Un CD player cu nan a test, a usa 28 watt riba standby, pero un otro modelo cu rasgonan similar a usa 2 watt so. Pero awor nan a diseñá un chip nobo di computer cu, segun nan ta bisa, por reducí e consumo di standby di 10 watt pa 1 watt of te asta 0,1 watt so. Nan ta spera cu den e lucha continuo contra polucion, fabricantenan rond mundu cu tempu lo usa e chip aki, cu ta costa 2,50 dollar, como un componente standard. Miéntras tantu, kico abo por haci?
E minister británico di medio ambiente ta comentá: “E cantidad di coriente cu cada aparato ta usa por parce basta tiki. Pero como cu ta 60 miyon hende tin riba e islanan aki [Gran Bretania] e ta acumulá bira basta hopi.” Ta obvio cu no por paga artículonan di cas manera frishider. Pero ta bon pa bo tin e custumber di paga lus cu no tin mester i paga otro aparato en bes di laga nan riba standby. Esaki no solamente lo spar bo placa, sino tambe ta yuda spar nos planeta di polucion innecesario.