Hóbennan Sa Puntra . . .

Con Mi Por Bira Mas Cerá cu Mi Welonan?

“Tur mi dos welonan ta gusta conta historia. Nan historianan ta yuda mi comprendé mi propio sintimentunan.”—Joshua.

UN TEMPU tabata normal pa miembronan di famia di vários generacion biba hopi cerca di otro—hopi bes den e mésun cas. Tabata un custumber pa bo tin asociacion estrecho cu bo welonan.

Awendia distancia grandi kisas ta separá hóbennan for di nan welonan. Ademas, un cantidad creciente di famia a plama for di otro debí na divorcio. The Toronto Star a informá cu “welonan tambe por bira víctima di divorcio i ser prevení di mira nan nietunan stimá.” Den otro casonan, e problema ta cu hopi hóben simplemente tin un punto di bista negativo di hende di edad, pensando cu e grandinan aki ta hende cu no ta comprendé e tempu moderno, cu punto di bista, norma i interesnan cu ta diferente for di esnan di nan. Kico ta e resultado? Hopi hóben simplemente no tin un relacion asina cerá cu nan welonan manera lo mester tabata.

Esaki ta di lamentá. Manera e artículo anterior den e seri aki a mustra, un relacion cerá cu bo welonan—foral si nan ta teme Dios—ta saludabel, beneficioso i placentero.a Un mucha muher tiener cu yama Rebekah ta bisa di su welonan: “Ora nos ta huntu, semper nos tin cos di hari.” Un hóben cu yama Peter tambe ta bisa: “Mi no tin miedu di conta nan ki mi ta sinti of kico ta mi plannan. Tin biaha mi ta sinti mi mas cómodo cu nan, cu huntu cu mi mayornan. Mi ta sinti cu mi por papia tur cos cu mi welonan.”

Kico di abo? Podisé bo tabata cerá cu bo welonan tempu bo tabata chikitu. Pero awor cu bo ta tiener, kisas bo no a haci mashá pa nutri e relacion ei recientemente. Si esei ta e caso, e principio dje conseho bíblico na 2 Corintionan 6:11-13 lo por aplicá bon den e situacion aki, esta, “hancha” bo cariño pa nan. E pregunta ta: Con?

Tuma Iniciativa

“Hancha” ta encerá tuma algun iniciativa. Al fin i al cabo, Bijbel ta bisa: “No retené loke ta bon for di esnan na ken bo ta deb’é, ora ta sosodé cu ta den poder di bo man pa hacié.” (Proverbionan 3:27) Ora bo tabata mas yong podisé bo no tabatin masha “poder” pa haci algu n’e relacion cu bo welonan. Pero awor cu bo ta mas grandi, kisas asta un hóben adulto, lo bo por ripará cu tin un cantidad di paso apropiado cu bo por tuma.

Por ehempel, si bo welonan ta biba den cercania, lo bo por hacié un custumber pa bishitá nan regularmente. Esei lo ta laf? Wel podisé, si bo cai sinta cu bo boca cerá. P’esei, cuminsá un combersacion! Over di kico bo por papia? E principio bíblico na Filipensenan 2:4 ta útil. E ta bisa nos pa ‘no vigilá cu interes personal nos mes asuntunan so, sino tambe cu interes personal den asuntu dje otronan.’ Cu otro palabra, mustra un interes personal den bo welonan. Laga nan papia di e cosnan cu ta interesá nan. Con nan ta sinti? Kico nan a haci? Kisas nan ta gusta papia di pasado. P’esei, puntra nan con bida tabata tempu nan tabata yong. Of con bo tata of mama tabata tempu e tabata yong? Si bo welonan ta cristian, puntra nan kico a atraé nan n’e berdad di Bijbel.

Hopi bes welonan tin un abundancia di historia di famia, i probablemente nan ta mas cu dispuesto pa entretené bo cu historianan fasinante. Sí, asta lo bo por haci esaki un proyecto agradabel. Purba entrevistá bo welonan, kisas tumando nota of graba nan riba tape of video. Si bo no sa precis kico pa puntra, laga bo mayornan yuda bo formulá preguntanan apropiado. Probablemente lo bo siña hopi cos cu lo yuda bo comprendé bo welonan, bo mayornan i asta bo mes mihó. Joshua ta relatá: “Mi dos welonan ta gusta conta historia. Nan historianan ta yuda mi comprendé mi propio sintimentunan.”

Pero no lubidá cu bo welonan ta hopi interesá tambe den bo bida i actividadnan. Ora bo conta nan loke bo ta haciendo, bo ta invitando nan pa ta parti di bo bida. Definitivamente esaki lo laga boso bira mas cerá cu otro. Un hóben na Francia cu yama Igor ta bisa: “Ami cu mi wela ta gusta sinta bebe kofi den un cafetaria, papiando di loke nos tur dos a haci recientemente.”

Kico Nos Por Haci Huntu?

Una bes cu boso a cuminsá combersá, kisas siguientemente boso por haci algun cos huntu. Cu un poco planeamentu di antemano, lo bo descubrí tur sorto di actividad na cua boso por participá huntu. E hóben Dara ta corda: “Mi dos welanan a siña mi cushiná, tambe con pa conserbá cos den bleki, hinca cos na fornu, cria mata i hardineria.” Amy a djoin su welonan ora di ‘get-together’ familiar i durante vakansi. Dependiendo di nan edad, tin welonan cu ta bastante activo. Aaron ta gusta hunga golf cu su wela. Joshua ta pisca i haci hopi trabou rond di cas huntu cu su welonan.

Si bo welonan ta adoradó di Jehova, lo ta specialmente agradabel pa participá huntu cu nan den rasgonan di adoracion di Jehova, manera papia cu otro hende tocante Bijbel. Igor tabatin chens di biaha huntu cu su wela pa un congreso internacional di Testigonan di Jehova na Polonia. “Tabata un experencia inolvidabel cu nos a pasa huntu, i ainda nos ta gusta papia over di dje,” e ta bisa. Mester admití sí cu no ta tur welo ta den condicion pa move asina. Tog ta bale la pena pa pasa tempu huntu cu nan.

Un Herencia Spiritual

Den tempu bíblico, un señora cu yama Loida a hunga un papel importante den yuda su nietu Timoteo bira un homber di Dios sobresaliente. (2 Timoteo 1:5) No ta un sorpresa cu hopi welo cristian ta hunga un papel similar awe. Joshua ta bisa di su welonan: “Nan a sirbi Jehova mas aña cu mi tin na bida i p’esei mi tin un respet profundo pa nan, no solamente como mi welonan sino como wardadónan di integridad.” Amy ta bisa: “Semper mi welonan ta bisa cu mira mi sirbi Jehova fielmente ta duna nan hopi goso i felicidad. Sin embargo, ta nan excelente ehempel i celo pa Jehova como pionero [evangelisadó di tempu completo] a animá mi pa sigui den mi sirbishi di pionero.”

Chris ta papia di su wela como “e persona cu mas a motivá mi pa studia i crece na madures.” E ta agregá: “Nunca lo mi lubidá e manera cu el a bisa cu ‘nos tin cu haci nos best pa Jehova.’” Pedro su welonan a hunga un papel importante foral den su desaroyo spiritual. E ta bisa: “Nan experencia a yuda mi masha hopi. Semper mi welonan tabata hiba mi bai predicá cu nan, i mi ta apreciá esei mashá.” Sí, bira mas cerá cu welonan temeroso di Dios por yuda bo sirbi Dios mas plenamente.

Welonan Cu Ta Biba Leu

Kico si bo welonan ta biba hopi leu? Si ta posibel, purba bishitá nan regularmente. Entre e bishitanan ei, haci loke bo por pa mantené contacto. Hornan ta mira su welonan tres bes pa aña so, pero e ta bisa: “Tur diadomingo mi ta bel nan.” Dara, cu tambe ta biba leu for di su welonan, ta bisa: “Nan ta interesá den mi bida, i nos ta bel of E-mail otro casi tur siman.” Maske E-mail i yamada di telefon tin nan lugá, no balotá e poder di un carta skirbí na man manera ántes. Hopi hóben a keda sorprendí cu nan welonan a warda tur carta cu e hóbennan aki a skirbi nan desde nan infancia. Bo por lesa i bolbe lesa un carta, i apreci’é. Pues haci sigur di skirbi!

Hopi bes welonan tin un amor special pa nan nietunan. (Proverbionan 17:6) Tin hopi manera pa desaroyá i mantené un relacion cerá cu bo welonan, sea cu nan ta biba cerca of leu. Por fabor, purba haci tur bo esfuerso.

[Nota]