Medicina Moderno Con Haltu E Por Yega?

DEN paisnan caminda palu di apel ta crece, mucha homber ta siña for di chikitu cu si nan kier logra haña un fruta cu ta fuera di nan alcanse den un palu di apel haltu, nan por yega dor di subi riba scouder di un amiguitu. Den e campo di medicina, algu similar a tuma lugá. Investigadónan médico a logra alcansá un nivel cada bes mas haltu dor di para riba scouder di dokter i otro profesionalnan médico eminente di pasado.

Entre e médiconan di ántes ei tabatin hombernan bon conocí manera Hipócrates i Pasteur, i tambe hombernan manera Vesalio i William Morton, cu ta nombernan desconocí pa hopi hende. Kico e hombernan ei a haci pa medicina moderno?

Den tempu antiguo e métodonan di cura hopi bes no tabata científico sino a encerá principalmente supersticion i ritonan religioso. E buki The Epic of Medicine (E Leyenda di Medicina), editá dor di dr. Felix Marti-Ibañez, ta bisa: “Pa combatí malesa . . . , e mesopotamionan a recurí na un mescla di medicina i religion, ya cu nan a kere cu malesa tabata nan castigu for dje diosnan.” Medicina egipcio, cu a sigui djis despues, tambe tabata basá riba religion. Pues, for di principio, hende a mira médiconan cu un cierto admiracion religioso.

Den su buki The Clay Pedestal (E Pedestal di Klei), dr. Thomas A. Preston ta remarcá: “Hopi creencia di hende antiguo a laga nan marca riba e práctica di medicina cu t’ei te dia djawe. Un dje creencianan ei tabata cu malesa ta fuera di control dje pashent, i cu solamente via e poder mágico dje dokter tabatin speransa di recuperacion.”

Poniendo Fundeshi

Sin embargo, cu tempu e práctica di medicina a bira mas i mas científico den su forma di cura hende. E médico científico principal di antigwedad tabata Hipócrates. El a nace rond di aña 460 P.E.C. riba e isla griego Kos, i hopi hende ta consider’é como e tata di medicina occidental. Hipócrates a pone e base pa abordá medicina di un forma racional. El a rechasá e idea cu malesa tabata castigu di un dios, argumentando cu tabatin un causa natural. Por ehempel, pa hopi tempu hende a yama epilepsia un malesa sagrado pasobra nan a kere cu solamente e diosnan por a cur’é. Pero Hipócrates a skirbi: “Pa loke ta e malesa yamá Sagrado: ta parce mi cu absolutamente e no ta mas divino ni mas sagrado cu otro malesanan, sino mas bien tin un causa natural.” Tambe Hipócrates tabata e promé médico cu nan sa di dje cu a observá e síntomanan di vários malesa i a registrá nan como futuro referencia.

Siglonan despues, Galen, un dokter griego cu a nace na aña 129 E.C., tambe a haci investigacion científico inovativo. Basá riba análisis di cadaver di hende i bestia, Galen a producí un buki di instruccion riba anatomia cu dokternan a usa pa siglonan! Andreas Vesalio, cu a nace na Bruselas na aña 1514, a skirbi e buki Tocante e Structura dje Curpa Humano. E buki a haña oposicion, ya cu el a contradicí hopi dje conclusionnan di Galen, pero el a pone e fundeshi pa anatomia moderno. Segun e buki Die Grossen (E Grandinan), Vesalio a bira dor di esei “un dje investigadónan médico mas importante di tur pueblo i di tur tempu.”

Cu tempu a keda demostrá cu Galen su teorianan tocante curason i circulacion di sanger tambe tabata inválido.a E dokter ingles William Harvey a pasa añanan ta analisá cadaver di bestia i para. El a observá con e valvenan di curason ta funcioná, el a midi e volúmen di sanger den cada seccion dje curason, i a calculá e cantidad di sanger den e curpa. Na aña 1628 Harvey a publicá su descubrimentunan den un buki cu yama Tocante e Movecion dje Curason i Sanger den Bestia. Hende a critik’é, opon’é, atak’é i insult’é. Pero su obra tabata un punto di cambio significativo den medicina: hende a descubrí e sistema circulatorio dje curpa!

Di Barberia pa Cirugia

Riba tereno di cirugia tambe ciencia tabata bai dilanti cu stapnan grandi. Durante Edad Medio, hopi bes ta barbero tabata haci cirugia. No ta un sorpresa anto cu tin hende ta bisa cu e tata di cirugia moderno tabata e frances di siglo 16, Ambroise Paré, un barbero-ciruhano pionero cu a sirbi cuater rey di Francia. Paré a inventá vários instrumento kirúrgico tambe.

Un dje problemanan principal cu ainda tabata confrontá ciruhano di siglo 19 tabata cu nan no por a verdoof e dolor di operacion. Pero na aña 1846 un ciruhano dentista cu yama William Morton a habri caminda pa e uso amplio di anestesia durante operacion.b

Na aña 1895, miéntras cu e físico aleman Wilhelm Röntgen tabata haci experimento cu coriente, el a nota cu rayonan ta pasa dor di carni pero no dor di wesu. E no tabata sa e orígen dje rayonan, p’esei el a yama nan ‘X rays,’ un nomber cu a pega na ingles. (Na hulandes e ta röntgenstralen.) Segun e buki Die Großen Deutschen (Alemannan Famoso), Röntgen a bisa su casá: “Hende lo bisa: ‘Röntgen a bira loco.’” I asina a pasa. Pero su descubrimentu a revolucioná cirugia. Awor ciruhanonan por a wak den e curpa sin tin cu corta habrié.

Venciendo Malesa

Atrabes di siglonan, malesanan contagioso manera pokken cada bes a causa epidemia, teror i morto. Ar-Rāzī, un perso di siglo 9 cu algun hende ta considerá como e dokter mas grandi dje mundu islámico dje tempu ei, a skirbi e promé descripcion médico exacto di pokken. Pero tabata siglonan despues cu un dokter británico cu yama Edward Jenner a descubrí un manera pa cur’é. Jenner a ripará cu una bes un persona a haña ‘koepokken’—un malesa inofensivo—el a bira immuun pa pokken. Basá riba e observacion aki, Jenner a usa materia di cueru infectá cu koepokken pa desaroyá un vacuna contra pokken. Esei tabata na aña 1796. Mescos cu otro inovadornan promé cuné, hende a criticá i oponé Jenner. Pero e descubrimentu cu el a haci dje proceso di vacunacion cu tempu a hiba na eliminacion dje malesa i a ekipá medicina cu un poderoso herment nobo.

E frances Louis Pasteur a usa vacunacion pa combatí rabia (hondsdolheid) i miltvuur (un malesa contagioso). Tambe el a duna prueba cu microbio ta hunga un papel clave den causa malesa. Na aña 1882, Robert Koch a identificá e microbio cu ta causa tuberculósis, describí dor di un historiadó como “e malesa mortal mas grandi di siglo 19.” Rond di un aña despues, Koch a identificá e microbio cu ta causa cólera. E revista Life ta bisa: “E obra di Pasteur i Koch a introducí e ciencia di microbiologia i a hiba na avancenan den inmunologia, sanidad i higiena cu a haci mas pa aumentá e duracion di bida humano cu cualkier otro avance científico dje último 1.000 añanan.”

Medicina di Siglo 20

Na principio di siglo 20, medicina a haña su mes pará riba scouder dje dokternan aki i otro profesionalnan médico briyante. Desde e tempu ei padilanti a haci avancenan médico na un paso rápido; djis pa mencioná un par: insulina pa diabétis, kimoterapia pa cancer, tratamentu di hormon pa trastornonan di klir, antibiótica pa tuberculósis, clorokina pa cierto tipo di malaria, diálisis pa malesanan di nir, i tambe operacion di curason habrí i transplante di órgano.

Pero awor cu nos ta pará na drempel di siglo 21, con cerca medicina ta dje meta di garantisá “un nivel aceptabel di salú pa tur hende na mundu”?

Un Meta Fuera di Alcanse?

Mucha ta siña cu subi riba scouder di un amiguitu no semper ta yuda nan yega na tur apel. Tin biaha e apelnan mas dushi ta te den top dje palu, ketu bai fuera di alcanse. Asina tambe medicina a bai di un logro pa otro, mas i mas haltu. Pero e logro mas cotisá—bon salú pa tur hende—ta keda fuera di alcanse te den top dje palu.

P’esei, aunke na 1998 e Comision Europeo a informá cu “europeonan nunca promé a disfrutá di asina un bida largu i salú,” e raport a agregá: “Un di cada cincu persona lo muri prematuramente promé cu edad di 65 aña. Cancer lo ta responsabel pa un 40% dje mortonan aki, malesanan cardiovascular pa un 30% mas . . . Mester percurá mihó proteccion contra menasanan nobo di salú.”

E revista aleman tocante salú Gesundheit a informá na november 1998 cu malesanan contagioso manera cólera i tuberculósis ta presentá un menasa creciente. Di con? Antibiótica “ta perdiendo nan efectividad. Mas i mas bacteria ta resistente na por lo ménos un remedi comun; en realidad, hopi bacteria ta resistente na vários remedi.” No ta malesa bieu so ta biniendo bek, sino malesa nobo tambe manera AIDS a aparecé. E publicacion aleman farmacéutico Statistics ’97 ta recordá nos: “Pa dos tercer parti di tur enfermedad conocí—mas o ménos 20.000—no tin niun manera pa trata e causa te asina leu.”

Terapia di Gene Ta e Solucion?

Ta cierto cu hende ta sigui desaroyá terapianan inovativo. Por ehempel, hopi hende ta di opinion cu kisas ingenieria of manipulacion genético ta contené e clave pa mihó salú. Despues cu na Merca dokternan manera dr. W. French Anderson a haci investigacion durante añanan ’90 di siglo 20, terapia di gene a ser describí como “e campo nobo di investigacion médico mas popular i excitante.” E buki Heilen mit Genen (Cura cu Gene) ta bisa cu usando e terapia di gene “ciencia médico lo por ta na drempel di un desaroyo pionero. Esaki ta e caso foral cu tratamentu di enfermedadnan cu te cu awor tabata incurabel.”

Científiconan ta verwagt cu despues di tempu nan lo por cura malesanan genético heredá dor di inyectá pashentnan cu gene corectivo. Asta lo por laga celnan perhudicial, manera cel di cancer, destruí nan mes. Ya caba ta posibel pa haci análisis genético pa wak si un persona tin tendencia pa cierto enfermedad. Tin hende ta bisa cu e siguiente desaroyo lo ta farmacogenomia, esta, ahustá remedi p’e cuadra cu un pashent su composicion genético. Un investigadó prominente ta di opinion cu un dia dokternan lo por “diagnosticá e enfermedad di nan pashentnan i duna nan e debido segmento di DNA pa cura nan.”

Sin embargo, no ta tur hende ta convencí cu terapia di gene ta ofrecé e “cura milagroso” pa futuro. En realidad, segun un encuesta, hende kisas lo no kier mes pa analisá nan composicion genético. Hopi hende tambe tin miedu cu terapia di gene lo por ta un metementu peligroso cu naturalesa.

Ta tempu lo mustra si manipulacion genético of otro métodonan di medicina di alto tecnologia lo cumpli cu nan promesanan extravagante. Sin embargo, tin motibu pa evitá demasiado optimismo. E buki The Clay Pedestal ta describí un ciclo bon conocí: “Un terapia nobo ta sali, nan ta aclam’é na reunionnan médico i den revistanan profesional. Su creadornan ta bira personanan famoso den e profesion, i medionan di comunicacion ta aclamá e adelanto. Despues di un periodo di euforia i di testimonionan bon documentá pa apoyá e tratamentu maraviya, ta cuminsá un desilusion gradual, cu ta dura di un par di luna pa un par di década. Anto nan ta descubrí un remedi nobo, i di un dia pa otro, e ta remplasá esun bieu, cu rápidamente ta ser bandoná como inútil.” Sí, hopi remedi cu mayoria dokter a bandoná como ineficas, tabata tratamentu standard no muchu tempu pasá.

Aunke awe hende no ta otorgá dokternan e státus religioso cu nan tabata duna médiconan den antigwedad, tin un tendencia cerca algun hende pa atribuí poder casi divino na dokter i profesionalnan médico i nan ta imaginá cu sigur científiconan lo descubrí un cura pa tur e malesanan di humanidad. Sin embargo, lamentablemente realidad no ta alcansá e ideal aki. Den su buki How and Why We Age (Con i Pakico Nos Ta Bira Bieu), dr. Leonard Hayflick ta comentá: “Na aña 1900, 75 porciento dje hendenan na Merca a muri promé cu nan a yega e edad di sesent’i cincu aña. Awe, e estadística ta casi lo contrario: rond di 70 porciento di hende ta muri despues di edad di sesent’i cincu aña.” Kico a causa e cambio remarcabel aki den duracion di bida? Hayflick ta splica cu esei “tabata pa gran parti debí na e reduccion den morto di yu recien nací.” Awor suponé cu ciencia médico lo por eliminá e causanan principal di morto cerca hende di edad: malesa di curason, cancer i atake celebral. Esei lo haci hende inmortal? No. Dr. Hayflick ta remarcá cu asta e ora ei, “mayoria hende lo biba te rond di shen aña.” E ta agregá: “E hendenan aki di shen aña lo no ta inmortal. Pero di kico nan lo muri? Simplemente nan lo bira mas i mas débil te ora morto dal aden.”

Apesar dje mihó esfuersonan di ciencia médico, eliminá morto ta fuera di alcanse di medicina. Di con esaki ta asina? I e meta di bon salú pa tur hende ta un soño imposibel?

[Nota]

[Komentario na página 4]

“Hopi creencia di hende antiguo a laga nan marca riba e práctica di medicina cu t’ei te dia djawe.”—The Clay Pedestal

[Plachi na página 4, 5]

Hipócrates, Galen i Vesalio a pone fundeshi di medicina moderno

[Rekonosementu]

Isla Kos, Grecia

Cortesia di Libreria Nacional di Medicina

Obra di palu di A. Vesalio trahá dor di Jan Steven von Kalkar, sacá for di Meyer’s Encyclopedic Lexicon

[Plachi na página 6]

Ambroise Paré tabata un barbero-ciruhano pionero cu a sirbi cuater rey di Francia

E dokter perso Ar-Rāzī (man robes), i e dokter británico Edward Jenner (man drechi)

[Rekonosementu]

Paré i Ar-Rāzī: Cortesia di Libreria Nacional di Medicina

For dje buki Great Men and Famous Women

[Plachi na página 7]

E frances Louis Pasteur a proba cu microbio ta causa malesa

[Rekonosementu]

© Institut Pasteur

[Plachi na página 8]

Asta si por a eliminá e causanan principal di morto, behes tog lo a resultá den morto