‘Un Monumento Dediká na Nada Ménos ku Diabel’

DI E KORESPONSAL DI SPIÈRTA! NA SPAÑA

DEN e stat di Madrid, Spaña, tin un estatua ekstraordinario. Su aparensia i su título⁠—⁠El Ángel Caído⁠—⁠kisas no ta sorprendé un hende ku wak e aribariba. Sin embargo, un eksaminashon ta revelá ku e ta un monumento dediká na onor di nada ménos ku Satanas e Diabel!

Hende ku bishitá Spaña, un pais tradishonalmente katóliko, ta ferwagt di mira estatua di angel òf “santu,” pero no unu dediká na e gobernante di e demoñonan. No opstante, Ricardo Bellver, un eskultor spañó ku a biba den siglo 19, a disidí di kibra ku tradishon. E tabata konosé e poema largu di John Milton titulá Paradeis Pèrdí, ku a deskribí kon Satanas a ser saká for di shelu debí na su orguyo i rebelion. Na 1874, Bellver a kompletá un estatua ku a representá e kaida dramátiko aki.

Bellver no a presentá Diabel paresido na un bestia ku kachu, di akuerdo ku e representashonnan tradishonal di Satanas. Al kontrario, el a imaginá ku e gobernante di e demoñonan tabata un angel bunita pero korupto na momentu ku el a ser tirá abou for di shelu. (Revelashon 12:⁠9) I esaki ta mas na armonia ku loke Beibel mes ta bisa.a

Kiko e hendenan di Madrid a pensa di un estatua asina? Segun un historiadó di arte, algun di nan a keda di shòk pa e idea di traha un estatua dediká na Satanas. Sin embargo, gobièrnu spañó a finansiá e estatua, i esaki a gana dos premio pa mérito artístiko, unu na Madrid i e otro den e Ekshibishon Internashonal di Paris na 1878. Arte a triunfá riba tradishon, i pa 1879 nan a pone e estatua di bròns impreshonante den parke Retiro.

Den nos sosiedat aktual ku no ta religioso, e estatua aki dediká na Satanas no ta molestiá masha hende. María Isabel Gea ta deklará den su obra Curiosidades y Anécdotas de Madrid: “E stat di Madrid mester sinti su mes orguyoso di ta e úniko stat na mundu ku a dediká un monumento nada ménos ku na Diabel.” Ounke esaki por ta asina, poko di e míles di hendenan ku ta pasa dor di parke Retiro tur djadumingu, ta paga tinu na e estatua.

Asina tambe, poko hende awe ta realisá ku Satanas ta e fuente invisibel di hopi problema na mundu. (Revelashon 12:12) Pero en bista di e manera bon kla ku e Skritura ta papia di dje, hende ku ta studia Beibel no ta duda di su eksistensia ni di su influensia. Hesus a resistí Satanas su tentashonnan tribí. Tambe el a deskribí e kriatura spiritual malbado aki komo “un gañadó i e tata di mentira,” i komo ‘un matadó ku no a para den e bèrdat.’​—⁠Huan 8:44; Mateo 4:​1-11.

Awe ku mundu ta sufriendo mas kalamidat ku nunka, ta masha importante pa resistí e influensia di e angel frustrá aki ku a ser tirá abou.b (Santiago 4:⁠7) Miéntras tantu, amantenan di e bèrdat i hustisia por haña un konsuelo sabiendo ku e echo ku a saka Satanas for di shelu ta un preludio di su derota inminente ora ku Kristu “destruí e obranan di Diabel.”​—⁠1 Huan 3:⁠8.

[Nota]