Korte Supremo Ta Duna un Veredikto na Fabor di Libertat di Ekspreshon

E DIA DESISIVO tabata 17 di yüni 2002, ora ku Korte Supremo a publiká su motivashon hurídiko. Kiko tabata e desishon? Titularnan di korant a duna di konosé e resultado. The New York Times a proklamá: “Korte Ta Eliminá Restrikshon Riba Bishita di Testigunan di Yehova.” The Columbus Dispatch di Ohio a deklará: “Korte Superior Ta Anulá Rekisito di Pèrmit.” The Plain Dealer di Cleveland, Ohio, a bisa simplemente: “Hende Ku Ta Kana Hasi Petishon No Mester di O.K. di Gobièrnu.” E página di remitido di e korant USA Today a proklamá: “Triunfo pa Libertat di Ekspreshon.”

E desishonnan di e kortenan menor kontra Testigunan di Yehova a ser anulá ku 8 voto pro i 1 kontra! Hues John Paul Stevens a skirbi e veredikto titulá Opinion di Korte, ku a konsistí di 18 página. E desishon a ratifiká e protekshon ku e Promé Enmienda ta brinda na e sirbishi públiko di Testigunan di Yehova. Den e opinion skirbí e huesnan a splika ku e Testigunan no a buska un pèrmit, pasobra nan ta haña ku “nan ta risibí nan outoridat di prediká for di Skritura.” Anto kaba e huesnan a sita e testimonio ku e Testigunan a skirbi den e resúmen di nan kaso: “Nos ta sinti ku si nos bai buska pèrmit serka un munisipio pa nos por prediká, esei ta kasi un insulto kontra Dios.”

E Opinion di Korte a deklará: “Pa mas ku 50 aña, e Korte a anulá restrikshonnan kontra distribushon di pamfleta i hasimentu di petishon di kas pa kas. No ta puru kasualidat ku mayoria di e kasonan aki den historia tabatin di haber ku kuestionnan relashoná ku e Promé Enmienda, presentá dilanti korte dor di Testigunan di Yehova, komo ku nan religion ta manda nan buska miembro di kas pa kas. Manera nos a tuma nota den e kaso Murdock Versus Pennsylvania, . . . (1943), Testigunan di Yehova ta ‘bisa ku nan ta sigui e ehèmpel di Pablo, siñando “públikamente i di kas pa kas.” Echonan 20:20. Nan ta interpretá den sentido literal e òrdu den e Skritura ku ta bisa: “Bai den henter mundu i prediká e evangelio na tur kriatura.” Marko 16:15. Hasiendo esei nan ta kere ku nan ta obedesé un mandamentu di Dios.’”

Anto e Opinion a bolbe sita for di e kaso di 1943: “Segun e Promé Enmienda, e forma di aktividat religioso aki tin e mesun importansia ku adorá den iglesia i prediká for di prekstul. E tin e mesun derecho di risibí protekshon ku e métodonan mas aseptá i tradishonal di praktiká religion.” Sitando un kaso di 1939, e Opinion a deklará: “Si imponé un sensura mediante un pèrmit, lo ta imposibel pa un hende distribuí pamfleta libremente i sin estorbo. I esei ta menasá nèt e fundeshi di e garantianan konstitushonal.”—Lèter skùin ta di nan.

Korte e ora ei a menshoná un punto importante: “E kasonan ta demostrá ku e esfuersonan ku e Testigunan di Yehova a hasi pa resistí lei ku ta kontra libertat di ekspreshon no tabata un lucha pa nan derecho so.” E Opinion a splika ku Testigu di Yehova “no ta e úniko ‘hòmber chikí’ ku ta kore peliger di ser silensiá dor di leinan manera esnan di e Pueblito [di Stratton].”

E Opinion a sigui bisa ku e ordenansa “ta un insulto—no solamente kontra e balornan ku e Promé Enmienda ta protehá, sino tambe kontra e konsepto di un sosiedat liber—den e sentido ku ora un siudadano ta deseá di tene un kòmbersashon normal i habrí ku otro hende, e tin ku informá gobièrnu promé di su deseo di papia ku su bisiñanan i despues optené un pèrmit pa hasi esei. . . . Un lei ku ta rekerí un pèrmit pa partisipá den un kòmbersashon asina ta un desviashon drástiko for di nos herensia nashonal i tradishon konstitushonal.” Despues e Opinion a papia di “e efekto sumamente perhudisial di e lei ku ta rekerí un pèrmit asina.”

Menasa di Kriminalidat

Kiko di e punto di bista ku e pèrmit ta un protekshon kontra ladron i otro kriminal? Korte a argumentá: “Apesar ku nos ta rekonosé ku tin motibu pa preokupá tokante e asuntunan aki, nos desishonnan anterior ta mustra klaramente ku mester tin un balansa entre e preokupashonnan aki i e efekto ku e leinan ei tin riba e derechonan di e Promé Enmienda.”

E Opinion di Korte a sigui bisa: “No ta parse probabel ku e echo ku kriminalnan no tin pèrmit lo prevení nan di bati na porta i kuminsá kòmbersá riba tópikonan ku no ta kai bou di e ordenansa. Por ehèmpel, nan lo por puntra kon pa yega na un adrès òf pidi pa fia telefòn, . . . òf nan lo por registrá bou di nòmber falsu sin haña kastigu.”

Refiriendo atrobe na verediktonan di Korte den dékada di 1940, e huesnan a skirbi: “E palabranan usá den e motivashonnan di sentensianan den e era di Segundo Guera Mundial, ku repetidamente a skapa e demandante [Sosiedat Watch Tower] su miembronan religioso di prosesonan hudisial di mente será, a reflehá e Korte su evaluashon di e libertatnan di Promé Enmienda ku ta impliká den e kaso aki.”

Kiko tabata e desishon final di e Korte? “Nos ta anulá e sentensia di e Korte di Apelashon, i ta manda e kaso bèk pa e sigui wòrdu tratá na armonia ku e opinion aki. Esaki ta nos instrukshon.”

Pues, e fin di e asuntu tabata, manera e korant Chicago Sun-Times a deklará: “Korte Ta Respaldá Testigunan di Yehova,” i esei ku un mayoria di 8 kontra 1.

Kiko di Futuro?

Kon Testigunan di Yehova den e kongregashon bisiña di Wellsville a konsiderá e viktoria aki den Korte Supremo? Nan sigur no tin motibu pa broma tokante e viktoria aki a kosto di e habitantenan di Stratton. E Testigunan no ta karga renkor kontra e bon hendenan di e pueblito. Gregory Kuhar, un Testigu lokal, a bisa: “No tabata nos deseo pa bai korte. Ta e ordenansa mes tabata klaramente robes. Loke nos a hasi no tabata simplemente pa nos, pero pa tur hende.”

Echo ta mustra ku e Testigunan a hasi un esfuerso spesial pa no provoká e hendenan lokal. Gene Koontz, un otro Testigu, a splika: “E último biaha ku nos a prediká den Stratton tabata dia 7 di mart 1998, mas ku kuater aña pasá.” El a agregá: “Ami mes nan a yega di bisa mi ku lo mi wòrdu arestá. Nos tabatin hopi informe atraves di añanan di polis ku a menasá di arestá nos. Anto ora nos tabata pidi nan pa mustra nos e ordenansa pretu riba blanku, nunka nos no tabata haña kontesta.”

Koontz a agregá: “Nos ta preferá di tin un bon relashon ku nos bisiñanan. Si algun di nan no kier pa nos bishitá nan, nos ta respetá nan desishon. Pero tin otronan ku ta amabel i ku kier kòmbersá tokante Beibel.”

Gregory Kuhar a splika: “Nos no a sigui ku e kaso aki djis pa provoká e pueblo di Stratton. Simplemente nos kier a establesé hurídikamente e libertat di ekspreshon ku nos tin di akuerdo ku e Konstitushon.”

El a sigui bisa: “Ku tempu nos ta spera di por bai Stratton bèk. Gustosamente lo mi kier ta e promé pa bati na un porta ora nos bolbe. Di akuerdo ku e mandamentu di Kristu, nos tin ku bolbe.”

E resultado di e kaso “Watchtower Versus Pueblito di Stratton” tabatin efektonan di largu alkanse. Despues di a tende di e desishon di Korte Supremo, vários funshonario di munisipionan merikano a rekonosé ku nan no por a usa ordenansanan lokal mas pa restringí e trabou di evangelisá di Testigunan di Yehova. Te ku e fecha aki, e problemanan di prediká di kas pa kas a keda solushoná den aproksimadamente 90 komunidat na Merka.

[Kuadro na página 9]

“TESTIGUNAN DI YEHOVA A BOLBE LOGR’É”

Charles C. Haynes, erudito i direktor di programanan di edukashon na e Sentro di Promé Enmienda, a skirbi e palabranan sitá ariba na e Web site Freedom Forum, bou di e título “E Libertat di Religion.” Haynes a sigui bisa: “Siman pasá [e Testigunan] a logra nan di 48 viktoria den Korte Supremo, un seri ekstraordinario di kasonan ku na un manera signifikativo a ekspandé protekshon di e Promé Enmienda pa tur merikano.” El a spièrta: “Kòrda esaki: Si gobièrnu por restringí e libertat di un religion, e tin poder pa restringí e libertat di kualkier religion—òf di tur religion. . . . Naturalmente, hende tin e derecho di keda sin skucha—i di sera porta. Pero gobièrnu no mester tin e outoridat di disidí ken tin mag di bati na porta. Pues aplouso pa Korte Supremo.”

Haynes ta konkluí: “Nos tur tin ku yama Testigunan di Yehova danki. Maske kuantu biaha hende insultá nan, kore ku nan for di stat, òf asta ataká nan físikamente, nan ta sigui lucha pa nan (i pues pa nos) libertat di religion. I ora nan gana, ta nos tur a gana.”

[Kuadro/Plachinan na página 10, 11]

LOKE PRENSA A BISA DI E VEREDIKTO DI KORTE SUPREMO

◼ “Korte Ta Respaldá Testigunan di Yehova; No Mester di Pèrmit pa Sirbishi di Kas pa Kas

Semper nan tabata kere ku Dios ta respaldá nan den nan aktividat di bati na porta komo Testigunan di Yehova. Awor nan tin e respaldo di Korte Supremo merikano tambe.”—Chicago Sun-Times, 18 di yüni 2002.

◼ “Triunfo pa Libertat di Ekspreshon

E siguiente biaha ku algun Testigu di Yehova interumpí bo sena, lo ta bon si bo gradisí nan. Ku nan dedikashon persistente i balente na prinsipionan religioso, e denominashon no tradishonal aki di apénas 1 mion miembro [na Merka] probablemente a hasi mas ku kualkier otro institushon pa garantisá libertat di ekspreshon pa merikanonan individual. . . .

Pa e Testigunan, baimentu di korte supremo a bira manera un kustumber. Den mas ku 24 kaso atraves di 65 aña, nan a lucha ku éksito kontra e tirania di e mayoria.”—USA TODAY, 18 di yüni 2002.

◼ “Buska Apoyo di Kas pa Kas Deklará Komo Derecho Konstitushonal. Veredikto Ta un Viktoria pa Testigunan di Yehova

Korte Supremo merikano a dikta djaluna ku polítikonan, gruponan religioso, patfendernan i otronan tin un derecho konstitushonal di bai di kas pa kas pa promové nan kousa sin ku nan tin ku pidi pèrmit promé serka outoridatnan lokal.”—San Francisco Chronicle, 18 di yüni 2002.

◼ “Korte Supremo: Bo No Por Stroba Testigunan di Yehova ni Patfendernan di Bati na Porta

WASHINGTON—Korte Supremo a dikta awe ku Konstitushon ta protehá e derecho di misioneronan, polítikonan i otronan pa bati na porta sin ku nan tin ku buska pèrmit promé serka outoridatnan lokal. . . .

Ku 8 voto pro i 1 kontra, korte a rasoná ku e derecho di libertat di ekspreshon di e Promé Enmienda ta inkluí e derecho di hiba un mensahe direktamente na un hende su porta.”—Star Tribune, Minneapolis, 18 di yüni 2002.

[Plachi na página 9]

Hues Stevens

[Rekonosementu]

Stevens: Collection, The Supreme Court Historical Society/Joseph Bailey