Fábrika di Morto
DI UN ESKRITOR DI SPIÈRTA! NA ALEMANIA
MITTELWERK, segun algun hende, tabata e fábrika supteráneo mas grandi na mundu. E tabata situá den e Serunan Harz di Alemania, mas o ménos 260 kilometer zùitwèst di Berlin. E kompleho di 20 kilometer largu tabata konsistí di tùnelnan enorme kobá na pia di un seru. Di 1943 pa 1945, míles di prezu di kampo di konsentrashon a traha komo katibu den e tùnelnan aki. Den kondishonnan horibel, nan a ser fòrsá pa traha arma pa e Estado Nazi.
Ma no ta kualke simpel arma e obreronan katibu aki tabata traha. Ta misilnan konosí komo rakèt V-1 i V-2 tabata sali for di e fábrika aki! Nan tabata transportá e rakètnan aki for di Mittelwerk pa sitionan di lansamentu, prinsipalmente na Fransia i Hulanda. For di e lugánan ei nan tabata lansa e rakètnan sin tripulashon aki rumbo pa blankonan na Bèlgika, Inglatera i Fransia, kaminda nan tabata dal i eksplotá. E nazinan a asta kere ku nan por a yega asina leu di traha un rakèt dje potente ei ku lo por a krusa Oséano Atlántiko ku un bòm i yega te New York. Pa ora ku segundo guera mundial a kaba, sentenáres di misil V-1 i V-2 a dal statnan europeo. Sin embargo, esakinan tabata apénas un frakshon di e kantidat di misil ku e nazinan a traha i spera di usa kontra nan enemigunan. I nunka un di nan a yega New York.
Un Distinshon Amargo
Unabes e guera a pasa, bastante sientífiko i tékniko aleman ku a yuda diseñá e misilnan V-1 i V-2 a bandoná Alemania. Nan a bai ku nan ekspertisio den teknologia di rakèt, i a usa esaki den e paisnan kaminda nan a bai biba. Un di e sientífikonan ei tabata Wernher von Braun. El a muda bai Merka kaminda el a yuda desaroyá e rakèt Saturno ku a hiba hende luna.
Awe, nèt banda di kaminda e fábrika Mittelwerk tabata, tin un monumento di kampo di konsentrashon na memoria di e 60.000 hendenan ku tabata será einan. Fuera di a traha den e tùnelnan húmedo i friu, hopi di e prezunan a biba tambe den nan. Nada straño anto ku segun algun kálkulo, kasi 20.000 prezu a pèrdè nan bida den nan. Awe, hende ku ta bishitá e museo konmemorativo por tuma un tour ku un guia dor di e tùnelnan. Ainda bo por mira yen di piesa di misil bentá abou riba flur ku nan a bai laga pa mas ku 60 aña kaba. E revista After the Battle ta duna e misilnan di Mittelwerk e siguiente distinshon amargo: “E [rakètnan] V1 i V2 ta e úniko armanan ku a kobra mas bida ora di traha nan ku ora di usa nan.”
[Plachi na página 23]
Un potrèt di 1945 ku ta mustra misilnan V-1 riba tròli
[Rekonosementu]
Quelle: Dokumentationsstelle Mittelbau-Dora
[Plachi na página 23]
Bishitantenan ta pasa dor di e tùnelnan den kua ainda bo por mira yen di piesa di misil bentá abou riba flur