Kiko Beibel Ta Bisa Tokante Spiritismo?

HOPI hende no ta kere den kosnan sobrenatural. Nan ta bisa ku kosnan sobrenatural i spiritismo ta un invento di eskritornan di guion di pelíkula. Pero Beibel tin un otro punto di bista. Beibel su spièrtamentu tokante okultismo ta mashá kla mes. Por ehèmpel, Deuteronomio 18:10 pa 13 ta bisa: “Entre boso no mag wòrdu hañá . . . ningun hende ku ta praktiká adivinashon òf ku ta praktiká bruheria, òf ku ta pronostiká, òf ku ta praktiká magia, ni ningun hende ku ta plega hende, òf ku ta montadó òf spiritista, òf ku ta konsultá ku e mortonan.” Dikon nò? E teksto ta sigui bisa: “Ken ku hasi e kosnan akí ta un abominashon na SEÑOR . . . Bo mester ta perfekto dilanti di SEÑOR bo Dios.”

Dikon Beibel ta kondená kategórikamente tur forma di spiritismo?

UN ORÍGEN HOPI MALU

Beibel ta bisa nos ku hopi tempu promé ku Dios a krea Tera, el a krea miónes di kriatura spiritual, esta angel. (Yòb 38:4, 7; Revelashon 5:11) El a duna kada angel boluntat liber, esta, e kapasidat pa skohe entre bon i malu. Algun di nan a skohe pa rebeldiá kontra Dios i nan a bandoná shelu pa bin kousa problema riba Tera. Komo konsekuensia, Tera “tabata yen di violensia.”—Génesis 6:2-5, 11; Hudas 6.

Beibel ta bisa ku e angelnan malbado ei tin hopi influensia riba hende i ku nan ta gaña miónes di hende. (Revelashon 12:9) Nan ta asta probechá di e echo ku di naturalesa hende ta kurioso pa haña sa kiko lo sosodé den futuro.—1 Samuel 28:5, 7; 1 Timoteo 4:1.

Ta bèrdat ku hende sa haña e impreshon ku algun poder sobrenatural ta yuda nan. (2 Korintionan 11:14) Pero e realidat ta ku e angelnan malbado ei ta purba di siega mente di hende pa nan no haña sa e bèrdat tokante Dios.—2 Korintionan 4:4.

P’esei, segun Beibel, kontakto ku spiritu malbado no ta rekreo inofensivo sino algu peligroso. Pa e motibu ei, kon algun hende ku kier a bira disipel di Hesus a reakshoná ora nan a haña sa e bèrdat tokante spiritunan malbado? Wèl, Beibel ta bisa ku “esnan ku tabata praktiká magia a trese nan bukinan huntu i a kima nan,” maske esei a nifiká ku nan a pèrdè hopi plaka.—Echonan 19:19.

Awe tambe, hopi hende a disidí ku nan no ke tin nada di haber ku aktividatnan òf entretenimentu ku ta relashoná ku spiritismo. Por ehèmpel, tempu Mariaa tabatin 12 aña, aparentemente e por a pronostiká sierto peliger òf kosnan ku ta bai pasa. E tabata lesa karta pa e muchanan na skol, i komo ku tur loke e tabata bisa a sosodé, el a bira sumamente interesá den spiritismo.

Maria a pensa ku ta Dios a dun’é un don pa yuda otro hende. “Pero algu tabata preokupá mi,” el a atmití. “Pasobra mi tabata por a lesa karta pa otro hende pero no pa mi mes, maske mi tabatin gana di sa mi mes futuro.”

Maria tabata tur konfundí pasobra e no por a haña kontesta pa e tantísimo preguntanan ku e tabatin, i p’esei el a resa na Dios. Despues el a haña kontakto ku Testigunan di Yehova i a kuminsá studia Beibel ku nan. Anto el a siña for di Beibel ku no ta Dios a dun’é e kapasidat pa pronostiká futuro. Tambe el a siña ku esnan ku ke tin un amistat ku Dios mester deshasí di tur opheto ku tin di haber ku spiritismo. (1 Korintionan 10:21) Kiko tabata e resultado? Maria a tira tur su ophetonan i bukinan ku tin di haber ku spiritismo afó. Awor, e ta kompartí e bèrdatnan ku el a siña for di Beibel ku otro hende.

Tempu Michael tabata un tiner, e tabata gusta lesa buki ku tin kuentanan tokante hende ku tin poder sobrenatural. El a bisa: “Mi tabata gusta identifiká mi mes ku e héroenan di mi edat ku tabata eksplorá mundu imaginario òf di fantasia.” Pokopoko Michael a kuminsá lesa buki tokante magia i ritonan satániko. El a atmití: “Mi tabata kurioso, i esei a pone ku mi kier a lesa buki i wak pelíkula ku tabatin di haber ku e kosnan ei.”

Sinembargo, loke Michael a siña den su kurso di Beibel a yud’é mira kon importante ta pa wak bon kiko e ta lesa. El a bisa: “Mi a traha un lista di tur e kosnan ku tin di haber ku spiritismo ku mi tabatin i mi a tira nan tur afó. Mi a siña un lès importante. Na 1 Korintionan 10:31 Beibel ta bisa ku nos mester ‘hasi tur kos pa e gloria di Dios.’ Pues, e pregunta ku mi ta hasi mi mes tur ora ta si loke mi ta lesa ta algu ku Dios ta konsiderá komo malu. Si ta asina, esaki no ta pa e gloria di Dios i mi ta evit’é.”

Pues e komparashon di Beibel ku un lampi ta na su lugá. E ta e úniko fuente di lus ku ta desenmaskará spiritismo i okultismo. (Salmo 119:105) Pero no ta esei so Beibel ta hasi. E tin un promesa maravioso tambe. Kiko esei ta? Wèl, ku pronto lo tin un mundu liber di e poder di spiritu malbado. Esta un bon influensia esei lo tin riba humanidat! Por ehèmpel, Salmo 37:10 i 11 ta bisa: “Aki poko tempu e malbado lo no t’ei mas; maske kuantu bo buska su lugá, e lo no t’ei. Ma e humildenan lo heredá e tera, i lo deleitá nan mes den pas abundante.”