Beibel Realmente Ta “Inspirá di Dios”?

ABO ta kere ku Dios ta e outor di Beibel? Òf bo ta kere ku e ta un buki ku ta kontené pensamentu di hende?

Asta hende ku ta yama nan mes kristian ta sigui debatí riba e pregunta akí. Por ehèmpel, un enkuesta ku nan a hasi na Merka na aña 2014 ta indiká ku mayoria di hende ku ta yama nan mes kristian a bai di akuerdo ku “di un òf otro manera Beibel tin di haber ku Dios.” Pero, di otro banda, mas o ménos 1 di kada 5 hende ku nan a entrevistá ta haña ku Beibel ta un buki di “kuenta di antigwedat, leyenda, historia i di norma i balor ku hende a skirbi.” Henter e debate akí ta pone hende puntra nan mes ta kiko Beibel ke men ora e bisa ku e ta “inspirá di Dios.”—2 Timoteo 3:16.

KIKO E PALABRANAN “INSPIRÁ DI DIOS” TA NIFIKÁ?

Beibel ta konsistí di 66 buki chikitu i rònt di 40 hende a skirbié durante un periodo di mas o ménos 1.600 aña. Pero si ta hende a skirbi Beibel, ta kon e por ta “inspirá di Dios”? Ku poko palabra, e ekspreshon “inspirá di Dios” ta nifiká ku ta Dios ta e Fuente di e informashon ku tin den e Skritura. Beibel mes ta bisa: “Hende a papia di parti di Dios segun ku spiritu santu tabata guia nan.” (2 Pedro 1:21) Ku otro palabra, Dios a usa su forsa aktivo, esta, spiritu santu, pa transmití su mensahe na e eskritornan di e bukinan di Beibel. Nos por kompará esaki ku un komersiante ku ta bisa su sekretario kiko pa skirbi den un karta. E karta ta di esun ku a bisa kiko pa skirbi i no di esun ku a skirbié.

Algun eskritor di Beibel a tende Dios su mensahe mediante un angel. Otronan a haña vishon di Dios. I den algun kaso Dios a duna su mensahe mediante soño. Aunke tin biaha Dios a laga e eskritornan usa nan propio palabranan pa skirbi su mensahe, na otro okashonnan el a bisa nan presis kiko pa skirbi. Pero di tur manera, ta e pensamentunan di Dios e eskritornan a transmití i no esnan di nan mes.

Pero ki prueba tin ku ta Dios a inspirá e eskritornan di Beibel? Laga nos wak tres evidensia ku ta konvensé nos ku Beibel ta un buki di Dios.