5. Sufrimentu Lo Kaba Un dia?

Dikon Ta Importante pa Sa e Kontesta?

Si nos sa ku sufrimentu lo kaba un dia, nos lo mira bida na un manera mas positivo i nos lo haña un mihó punto di bista di Dios.

Pensa Riba Esaki

Hopi hende ke kaba ku sufrimentu, pero no tin muchu kos ku nan por hasi. Tuma nota di lo siguiente:

Aunke tin avanse riba tereno di medisina, . . .

• atake di kurason ta keda e kousa prinsipal di morto.

• kanser ta mata miónes di hende tur aña.

• “malesa kontagioso ta sigui afektá humanidat. Algun di e malesanan akí tabata eksistí kaba, otronan ta nobo i tin algun ku a bini bèk.” Esei ta loke Dr. David Bloom a skirbi den e revista Frontiers in Immunology.

Aunke tin prosperidat ekonómiko den algun pais, . . .

• tur aña miónes di mucha ta muri. Esei hopi bes ta pasa na e lugánan unda hende pober ta biba.

• míles di miónes di hende ta biba sin e fasilidatnan sanitario adekuá.

• sientos di miónes di hende no tin akseso na awa limpi pa bebe.

Aunke hende sa mas tokante derecho humano, . . .

• na hopi pais, ainda tin trafikashon di hende. Segun un informe di Nashonnan Uní, ta posibel ku e paisnan ku no ta kombatí e problema akí “no sa kiko ta pasando òf nan no tin e rekursonan pa persiguí e hendenan enbolbé den esaki.”

  PA HAÑA SA MAS

  Bai na jw.org i wak e vidio Kiko e Reino di Dios Ta?

Loke Beibel Ta Bisa

Dios ta interesá den nos.

E ta sinti duele ora e mira nos sufri.

“[Dios] no a despresiá, ni a aboresé e aflikshon di esun ku ta afligí; tampoko e no a skonde su kara p’e; ma ora ku el a sklama na dje pa yudansa, el a tende.”​—SALMO 22:24.

“Tira tur boso inkietut riba dje, pasobra e ta interesá den boso.”​—1  PEDRO 5:7.

Sufrimentu lo no keda pa semper.

Beibel ta primintí ku Dios lo kaba ku sufrimentu.

Dios lo “seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas.”​—REVELASHON 21:3, 4.

Dios lo eliminá tur loke ta pone nos sufri.

Lo e hasi esaki mediante su Reino. Beibel ta deskribí e Reino akí komo un gobièrnu real.

“E Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo . . . E mes lo dura pa semper.”​—DANIEL 2:44.