Buska Pa Sa E bèrdat

Kiko Ta e Problema?

Mayoria di bes un persona tin prehuisio pasobra e tin informashon robes. Konsiderá e siguiente ehèmpelnan:

Algun doño di trabou ta kere ku hende muhé no por hasi trabou sientífiko òf tékniko.
Durante Edat Medio na Europa, e hudiunan a ser akusá falsamente di venená e posnan di awa i asina kousa un epidemia. Bou di e régimen Nazi, atrobe e hudiunan a ser akusá falsamente. Pero e biaha akí, nan a kulpa nan di a kousa e krísis ekonómiko na Alemania. Den ámbos kaso, e hudiunan a bira víktima di prehuisio ekstremo, i te den nos tempu tin prehuisio kontra e hudiunan debí na e mentiranan ei.
Hopi hende ta kere ku tur hende ku limitashon físiko ta tristu òf amargá.

Hende ku ta kere e mentiranan ei ta purba di haña ehèmpel pa hustifiká nan manera di pensa. I nan ta konvensí ku tur hende ku no ta di akuerdo ku nan ta robes.

Prinsipio di Beibel

“No ta bon pa hende ta sin konosementu.”—PROVERBIONAN 19:2.

Kiko e versíkulo akí ta siña nos? Si nos no buska pa sa e bèrdat, nos lo tuma mal desishon. Si nos ta kere den mentira i no den loke ta bèrdat, nos lo husga hende robes.

Dikon Ta Importante pa Buska pa Sa e Bèrdat?

Ora nos siña konosé un persona bon, nos lo no kere kos robes ku hende ta papia di dje. I ora nos haña sa ku e kosnan negativo ku hende ta bisa di un sierto grupo ta mentira, nos lo kuestioná loke nan ta bisa di otro grupo tambe.

Ehèmpel di Bida Real: Jovica (Zùitost Europa)

Jovica, kende nos a menshoná kaba, a skucha henter su bida kon su paisanonan, notisia i programa di televishon ta duna informashon negativo tokante un grupo di hende estranhero. Jovica a bisa: “Mi tabatin prehuisio, i asta rabia riba e hendenan ei. Mi a pensa ku mi tabatin bon motibu pa sinti asina.

Pero ora mi tabata den ehérsito, mi a haña mi obligá di biba i traha ku sòldá di e grupo minoritario ei. Ku tempu, mi a siña konosé nan. Mi a asta siña nan idioma i skucha nan músika. Mi a kuminsá bai bon ku nan, i mi opinion di nan a kambia kompletamente. Pero mi sa ku mi sintimentunan negativo por bini bèk. P’esei, mi ta evitá di skucha notisia ku ta papia malu di nan. Ademas, mi no ta wak pelíkula òf komedia ku ta hasi bofon di nan. Mi sa ku prehuisio por hiba na rabia i odio.”

Kiko Bo Por Hasi?

No generalisá. Si bo tende hende ta bisa sierto kos negativo di un grupo di hende, esei no ke men ku tur hende di e grupo ei ta asina.
Rekonosé ku bo no sa tur kos tokante otro hende.
Purba di haña informashon for di un fuente konfiabel.