Ki Efekto Teknologia Tin Riba Bo Abilidat Pa Siña?

Konstantemente hende mester siña, sea ta pa skol, trabou òf otro motibu. Teknologia por yuda nos ora nos ta siña. Nunka promé den historia tabata asina fásil pa haña asina tantu informashon sin ku bo tin ku sali for di bo kas òf lanta for di bo stul.

Sinembargo, hopi hende ku ta usa teknologia frekuentemente a tuma nota di lo siguiente:

Nan tin difikultat pa konsentrá ora nan ta lesa.
Nan ta ser distraí fásilmente.
Masha lihé nan ta sinti nan laf ora nan ta nan so.

LOKE TA BON PA BO SA

Un mucha muhé tiner ta hasi yen di kos pareu. E ta manda mensahe riba su telefòn, ta vidio call su amiga i ta usa su kòmpiuter i un buki pa siña.

LESAMENTU

Hende ku ta usa aparatonan elektróniko frekuentemente tin biaha no tin pasenshi pa lesa henter un artíkulo òf buki. Pues, nan ta les’é lihé lihé pa haña un idea general di loke nan ta lesa.

No ta malu pa lesa algu lihé lihé ora bo mester haña un kontesta mesora pa un pregunta. Pero esaki no ta un bon manera pa lesa si bo ke komprondé algu bon.

PENSA RIBA ESAKI: Bo tin pasenshi pa lesa artíkulonan largu? Dikon lo bo komprondé mihó si bo tuma bo tempu pa lesa algu bon?—PROVERBIONAN 18:15.

KONSENTRASHON

Algun hende ta purba di usa teknologia pa hasi dos kos pareu. Por ehèmpel, tin hende ta manda mensahe pa nan amigunan miéntras ku nan ta studia. Pero e ora ei nan no ta pone bon atenshon na ningun di e dos kosnan ku nan ta hasi, i nan lo no hasi niun di nan bon, spesialmente ora tur dos kos ta rekerí konsentrashon.

Ta bèrdat ku ta difísil pa konsentrá i evitá distraishon, pero bo esfuerso lo ta bale la pena. Wak kiko un hóben ku yama Grace a bisa: “Lo bo hasi ménos fout i lo bo haña ménos strès. Mi a siña ku ta mihó pa konsentrá riba un kos i evitá e distraishon ku ta bini ora bo hasi yen di kos pareu.”

PENSA RIBA ESAKI: Teknologia ta hasié mas difísil pa bo konsentrá i kòrda loke bo ta studia?—PROVERBIONAN 17:24.

ORA BO TA BO SO

Tin hende no gusta ta nan so i p’esei nan ta usa teknologia pa entretené nan mes. Un señora ku yama Olivia a atmití: “Mi ta sinti mi laf si mi keda 15 minüt sin wak mi telefòn, tablet òf televishon.”

Sinembargo, ora un persona ta su so e ta haña oportunidat pa pensa òf meditá. I esei ta hopi importante ora un persona ta siña, sea e ta hóben òf hende grandi.

PENSA RIBA ESAKI: Ora bo ta bo so, bo ta usa e tempu ei pa pensa?—1 TIMOTEO 4:15.

KIKO BO POR HASI?

PENSA KON BO TA USA TEKNOLOGIA

Den ki manera teknologia por yuda bo siña mihó? Kon teknologia por stroba bo di konsentrá i siña?

PRINSIPIO DI BEIBEL: “Retené sabiduria sano i diskreshon [esta, kapasidat di pensa].”—PROVERBIONAN 3:21.

PUNTRA BO MES . . .

Ora mi ta riba un aparato elektróniko ta difísil pa mi lesa un artíkulo largu? Si esei ta e kaso, kiko ta distraí mi?
Kiko mi por hasi pa limitá òf eliminá e distraishonnan ei?

Sugerensia: Purba di lesa un paragraf promé, i despues tiki tiki bo ta lesa mas paragraf. Lesa na bos abou pa asina bo por konsentrá riba loke bo ta lesa.

Mi ta tuma sufisiente tempu pa pensa riba loke mi a lesa?

Sugerensia: Usa e último dies minütnan di e tempu ku bo apartá pa studia pa repasá loke bo a siña.

Ki ora mi ta sinti ku mi tin ku hasi dos kos pareu?
Kiko mi por hasi pa konsentrá riba un kos so i no riba dos kos pareu?

Sugerensia: Ora bo ta studia, warda tur kos ku por distraí bo pa asina bo por konsentrá riba loke bo ta lesa.

PRINSIPIO DI BEIBEL: “Atkerí sabiduria! Atkerí komprondementu!”—PROVERBIONAN 4:5.