Kiko Sientífikonan No Sa?

Sientífikonan a studia práktikamente tur loke nan por a studia di nos universo. Pero asina mes, tin hopi pregunta importante ku nan no por kontestá.

Sientífikonan por splika kon nos universo i bida a kuminsá? E kontesta simpel ta nò. Algun hende ta bisa ku e sientífikonan ku ta studia nos universo por splika su orígen. Sinembargo, Marcelo Gleiser, profesor di astronomia na Dartmouth College ku ta un agnóstiko, a bisa: “Nos no a logra splika e orígen di e universo mes.”

Di mes manera, un artíkulo den e revista Science News a bisa lo siguiente tokante e orígen di bida: “Kisas ta imposibel pa haña sa kon bida realmente a kuminsá riba tera. Mayoria di piedra i fosil ku por mustra loke realmente a tuma lugá durante e promé dianan di tera su eksistensia a disparsé hopi tempu pasá.” For di e komentarionan ei, nos por mira ku siensia no a logra di kontestá e pregunta: Kon e universo i bida a kuminsá?

Pero kisas bo ta puntra bo mes, ‘Si bida riba tera a ser diseñá, ken a diseñ’é?’ Kisas bo a hasi bo mes e preguntanan akí tambe: ‘Si tin un Kreador sabí i amoroso, dikon e ta permití su kriaturanan humano sufri? Dikon tin asina tantu religion? Dikon e ta permití su adoradónan hasi asina tantu kos malu?’

Siensia no por kontestá e preguntanan ei. Pero esei no ke men ku bo no por haña kontesta satisfaktorio. De echo, hopi hende a haña kontesta satisfaktorio den Beibel.

Si bo ke haña sa dikon algun sientífiko ku a tuma tempu pa studia Beibel ta bisa ku nan ta kere den un Kreador, bai na jw.org. Buska e seri di vidio “Punto di Bista Tokante e Orígen di Bida.”

Siensia i Beibel a konvensé nan

Georgiy N. Koidan, kímiko

“Mi trabou ta enserá pone diferente kímiko huntu pa forma molekül. Ta komo si fuera bo ta hunga ahedres: Bo mester plania bo stapnan adelantá. Si bo bula un stap, e molekül por plama for di otro. Aunke mi trabou ta kompliká, e ta simpel kompará ku e míles di reakshonnan kímiko ku ta tuma lugá den un sèl bibu pa produsí molekül kímiko kompliká. Esei ta pone mi kere ku mester tin un Dios ku sa mas tokante kímika ku nos.”

“Ora mi a studia Beibel, mi a realisá ku e no ta manera otro buki. Beibel a keda kompletá mas ku 2.000 aña pasá, pero te ku awe su konseho ta práktiko. Loke Beibel ta bisa tokante kon pa resolvé problema den famia, na trabou i ku otro hende ta ègt funshoná. Mi a yega na e konklushon ku konseho asina bon mester a bini di un persona mas inteligente ku hende.”

Yan-Der Hsuuw, èmbriólogo

“Segun ku un èmbrio ta desaroyá, tur sèl mester kooperá ku otro pa transformá algun sèl den nèrvio, múskulo, wesu, sanger i otro tehido pa nan por forma un hende. Ainda nos no ta komprondé eksaktamente kon e mekanismo ku ta pone sèl bira un èmbrio ta funshoná. Den mi opinion, mester tabatin un persona inteligente ku a diseñá bida.”

“E manera ku Salmo 139:15 i 16 ta deskribí kon un èmbrio ta krese den barika di un mama, ta hopi similar na loke sientífikonan a deskubrí den e último dékadanan. Kon por ta posibel ku e eskritor ei por a skirbi asina detayá kiko ta sosodé a ménos ku e Kreador a revelá esei na dje?”

Wak e vidio Rocío Picado Herrero: Un Maestra di Kímika Ta Splika Dikon E Ta Kere den Dios. Buska tema di e vidio riba jw.org.