Kiko Nos Por Siña for di Beibel?

Nos universo semper a eksistí?

Génesis 1:1 ta bisa: “Na prinsipio Dios a krea e shelunan i tera.”

Promé ku aña 1950, hopi sientífiko konosí tabata kere ku nos universo semper a eksistí. Pero a base di loke nan a deskubrí resientemente, mayoria di sientífiko ta rekonosé awor ku nos universo tabatin un komienso.

Kon tera tabata originalmente?

Génesis 1:2 i 9 ta bisa ku ora tera a ser kreá, e tabata “sin forma i bashí,” tapá ku awa.

Sientífikonan ta di akuerdo ku e deskripshon ei. Biólogo Patrick Shih a bisa ku nos planeta a kuminsá ku “un atmósfera ku no tabatin oksígeno pa por a hala rosea . . . E tabata parse un esena di un pelíkula di siensia fikshon.” E revista Astronomy a bisa: “Investigashon resien ta mustra ku na prinsipio planeta Tera tabata kubrí ku awa, kasi bo no por a mira tera.”

Kon nos atmósfera a kambia atraves di tempu?

Génesis 1:3-5 ta indiká ku ora lus a kuminsá penetrá dor di e atmósfera, e fuente di e lus no tabata visibel for di superfisie di tera. Ta mas despues solo i luna a bira visibel for di riba tera.—Génesis 1:14-18.

Smithsonian Environmental Research Center a bisa ku na prinsipio nos atmósfera a permití solamente lus dòf yega riba tera. El a sigui bisa: “Drùpel di metan den aire a kubri e tera resien kreá ku un neblina.” Despues, “e neblina di metan a kita i shelu a bira blou.”

Den ki órden sernan bibu a kuminsá aparesé riba tera?

Génesis 1:20-27 ta bisa ku piská a ser krea promé, despues para, despues bestia ku ta biba riba tera i finalmente hende. Sientífikonan ta kere ku piská tabat’ei hopi promé ku e promé mamíferonan i ku hende a bini muchu mas despues.

Kiko Beibel No Ta Bisa?

Algun hende ta bisa ku Beibel no ta na armonia ku loke sientífikonan a deskubrí. Sinembargo, hopi bes hende ta bisa e kosnan ei pasobra nan no ta komprondé loke Beibel realmente ta bisa.

Beibel no ta bisa ku nos universo òf tera ta eksistí pa solamente 6.000 aña. Mas bien, e ta djis bisa ku nos universo i tera a ser kreá “na prinsipio.” (Génesis 1:1) Beibel no ta bisa eksaktamente kuantu tempu pasá esei tabata.

Beibel no ta bisa ku tur bida riba tera a ser kreá den seis dia di 24 ora. Mas bien, e ta usa e palabra “dia” pa referí na un periodo di tempu. Por ehèmpel, Génesis kapítulo 1 ta papia di seis periodo di tempu ku ta ser yama “dia.” Beibel ta bisa ku e kreashon di nos planeta i di bida riba nos planeta–ku a sosodé durante e seis periodonan di tempu menshoná na Génesis kapítulo 1—a tuma lugá den e periodo di tempu ku Beibel ta yama “e dia ku SEÑOR Dios a traha tera i shelu.” (Génesis 2:4) Pues, kada un di e seis ‘dianan’ di kreashon ku Dios a usa pa prepará tera i krea bida riba dje por ta periodo di tempu hopi largu.

Beibel no ta bisa ku sernan bibu no por eksperensiá kambio atraves di tempu. E buki di Génesis ta bisa ku bestia a ser kreá “segun nan sorto.” (Génesis 1:24, 25) E palabra “sorto” den Beibel no ta un término sientífiko, pero e por referí na un variedat grandi di organismo bibu. Pues, bou di un “sorto” bo por haña diferente espesie òf variedat. Pa e motibu ei, tin kambio ku por tuma lugá den un “sorto” atraves di tempu den e mesun área ku ta resultá den diferente variedat òf espesie. Pero nan ta keda kai bou di mesun “sorto.”

Kiko abo ta pensa?

Manera nos a mira mas promé, Beibel ta splika na un manera simpel i eksakto kon nos universo a kuminsá, kon tera tabata originalmente i kon bida a kuminsá. Pues, no ta posibel tambe ku Beibel a identifiká korektamente Esun ku a krea tur e kosnan ei? Encyclopædia Britannica ta bisa: “Ku orígen di bida [komo] resultado di un suseso sobrenatural,” no ta bai kontra di konosementu sientífiko aktual.”a