MUNDU TA UN KÁOS

1 | Kuida Bo Salú

DIKON ESEI TA IMPORTANTE?

Un krísis òf un desaster por afektá hende su salú sea direktamente òf indirektamente.

Ora hende tin ku trata ku situashon difísil, nan por haña strès, i si nan keda ku strès pa un tempu largu, hopi bes nan ta bira malu.
Ora un krísis tuma lugá, por ta difísil pa hospital duna bon kuido. Pasobra nan mester trata hopi hende malu pareu, i kisas nan no tin sufisiente ekipo médiko òf remedi.
Ora un kalamidat tuma lugá, por ta difísil pa hende paga pa e kosnan ku nan ègt tin mester di dje, manera kuminda i kuido médiko.

Loke Ta Bon pa Bo Sa

Problema serio di salú i strès por laga bo tuma mal desishon, i esei por stroba bo di hasi kos ku ta bon pa bo salú. Komo resultado, bo por bira asta mas malu.
Si bo no trata un problema di salú, e por bira pió i e por asta pone bo bida na peliger.
Si bo kuida bo salú, lo bo ta mihó prepará pa tuma bon desishon ora un krísis òf kalamidat tuma lugá.
Sin importá si bo ta riku òf pober, tin kos ku bo por hasi pa kuida bo salú.

Loke Bo Por Hasi Awor

Un persona sabí ta mira peliger i ta hasi loke e por pa evitá nan ora esei ta posibel. Esaki ta konta pa nos salú tambe. Hopi bes bo por baha bo chèns di bira malu si bo mantené bon higiena i tene bo kas limpi. Prevení ta mihó ku kura.

“Ora nos tene nos kas limpi, nos ta gasta ménos plaka na dòkter i remedi.”—Andreas.a

a A kambia algun nòmber den e revista akí.

KIKO BO POR HASI?—Algun Sugerensia Práktiko

Loke bo por hasi pa kuida bo salú den tempu di krísis i kalamidat

MANTENÉ BON HIGIENA

Mantené bon higiena

Beibel ta bisa: “Un hende sabí ta mira peliger, i e ta evit’é.” (Proverbionan 22:3) Purba di antisipá kiko por pone bo salú na peliger i evitá nan.

Laba bo man regularmente ku habon i awa, spesialmente promé ku bo mishi ku kuminda òf despues ku bo bai baño.
Limpia i desinfektá bo kas regularmente, spesialmente superfisie i opheto ku bo ta mishi kuné hopi.
Ora ku ta posibel, purba di mantené distansia físiko for di un persona ku tin un malesa kontagioso.

KOME KUMINDA SALUDABEL

Kome kuminda saludabel

Beibel ta bisa: “Ningun hende hamas a odia su mes kurpa; ma e ta aliment’é i trat’é ku masha kariño.” (Efesionan 5:29) Nos ta mustra ku nos ta stima nos kurpa ora nos tene kuenta ku loke por afektá nos salú.

Bebe hopi awa.
Kome diferente tipo di fruta i bèrdura.
Limitá e kantidat di salu, suku i kuminda vèt ku bo ta kome.
No usa tabako, no bebe demasiado alkohòl i no usa droga.

“Pa nos evitá di bira malu, nos ta purba di kome saludabel, sino nos lo gasta e tiki plaka ku nos ta gana na dòkter i remedi. Nos ta preferá di usa nos plaka pa kumpra kuminda saludabel.”—Carlos.

HASI EHERSISIO I SOSEGÁ SUFISIENTE

Hasi ehersisio

Beibel ta bisa: “Un poko sosiegu ta mihó ku hopi trabou duru i korementu tras di bientu.” (Eklesiástes 4:6) Nos mester traha, pero nos mester di sufisiente sosiegu tambe.

Keda aktivo. Bo por kuminsá kana regularmente. Si bo ta aktivo, esei por mehorá bo salú asta si bo ta di edat, desabilitá òf tin limitashon pa motibu di un malesa króniko.
Sosegá

Sosegá sufisiente. Si bo no sosegá sufisiente, bo por haña mas strès i por ta difísil pa bo konsentrá. Ku tempu, esei por hiba na problema serio di salú.
Pone un orario pa bai drumi, i tene bo mes na dje. Purba di drumi i lanta na e mesun orario tur dia.
Evitá di wak televishon òf usa aparato elektróniko riba kama.
Evitá kuminda pisá, kafeina i alkohòl promé ku bo bai drumi.

“Mi ta haña ku e kantidat di tempu ku mi ta drumi ta afektá tur aspekto di mi salú. Si mi no drumi sufisiente, tin biaha mi ta haña doló di kabes, i mi ta sinti mi kurpa steif. Pero ora mi drumi sufisiente, mi ta sinti ku mi por trata ku kiko ku presentá. Mi tin hopi energia, i mi ta bira malu hopi ménos.”—Justin.