Apendix

Testigonan di Jehova e desafio kirurgico/etico

Reimprimí cu permit dje Asociacion Médico Mericano fo’i The Journal of the American Medical Association (JAMA), 27 di november, 1981, Volúmen 246, No. 21, página 2471, 2472. Copyright 1981, Asociacion Médico Mericano.

Dokternan ta enfrentá un desafio special ora di trata Testigonan di Jehova. Miembronan dje fe aki tin conviccionnan religioso profundo contra aceptacion di sanger homólogo of autólogo total, cel corá di sanger empaketá, cel blancu di sanger empaketá of plaketa. Hopi lo permití e uso di ekipo cardiaco-pulmonar, di diálisis of di otro tipo parecido (cu no ta funcioná cu sanger), si e circulacion pafó dje curpa no wordu interumpí. Personal médico no tin nodi preocupá tocante e posibilidad di por wordu tené responsabel, pasobra e Testigonan lo tuma pasonan hurídico adecuado pa libra nan di responsabilidad pa nan nengamentu informá di sanger. Nan ta aceptá líkido reemplasante cu no ta contené sanger. Usando esakinan i otro técnicanan masha cuidadoso, dokternan ta efectuando tur clase di operacion grandi riba pashent Testigo adulto i tambe menornan. Esaki a resultá den desaroyo di un norma di tratamentu dje pashentnan aki cu ta na armonia cu e principio di tratamentu dje “persona henter.” (JAMA 1981;246:2471-2472)

DOKTERNAN ta enfrentá un desafio aumentante cu ta un cuestion importante di salú. Tin mas cu mei miyon Testigo di Jehova na Merca cu no ta aceptá transfusion di sanger. E cantidad di Testigonan i esnan cu ta asociá cu nan ta creciendo. Aunke anteriormente, hopi dokter i funcionario di hospital a considerá nengamentu di un transfusion como un problema legal i a busca autorisacion di corte pa procedé segun loke nan a kere tabata médicamente consehabel, literatura médico di tempu reciente ta revelá cu un cambio notabel di actitud ta tumando lugá. Esaki talbes ta un resultado di mas experencia kirúrgico cu pashentnan cu tin nivel di hemoglobina masha abou i por reflehá tambe mas reconocimentu dje principio legal di consentimentu informá.

Awor, un cantidad grandi di cirugia prepará di antemano i casonan di trauma cu ta enbolbé tantu Testigonan menor i esnan adulto ta ser efectuá sin transfusion di sanger. Recientemente, algun representante di Testigonan di Jehova a reuní cu personal kirúrgico i administrativo na algun dje centronan médico di mas grandi dje pais. E reunionnan aki a mehorá e comprendimentu entre un i otro i a yuda resolvé cuestionnan tocante recobramentu di sanger, transplante i evitamentu di confrontacion médico/legal.

POSICION DJE TESTIGONAN RIBA TERAPIA

Testigonan di Jehova ta aceptá tratamentu médico i kirúrgico. En realidad, hopi di nan ta dokter, asta ciruhano. Pero e Testigonan ta hende profundamente religioso kendenan ta kere cu transfusion di sanger ta prohibí pa nan dor di pasashinan bíblico manera: “Solamente carni cu su alma—su sanger—bo no mester come” (Génesis 9:3-4); “[Bo mester] drama su sanger i cubri’é cu tera” (Levítico 17:13-14); i “Abstené boso di . . . fornicacion i di loke ta sofocá i di sanger” (Echonan 15:19-21).¹

Aunke e versículonan ei no ta expresá den términonan médico, e Testigonan ta considerá cu nan ta excluí transfusion di sanger total, cel corá di sanger empaketá i plasma, i tambe e suministro di cel blancu di sanger i plaketa. Sin embargo, e comprendimentu religioso dje Testigonan no ta prohibí absolutamente e uso di componentenan manera albúmina, globulina inmunológico i preparacion hemofílico; cada Testigo mester dicidí individualmente si e por aceptá esakinan.²

E Testigonan ta kere cu mester deshací di sanger sacá for dje curpa, di manera cu nan no ta aceptá auto-transfusion of sanger wardá di antemano. Tambe nan tin obhecion contra di técnicanan pa colectá sanger durante operacion of suministro di sanger delegá cu ta enbolbé sanger wardá. Sin embargo, hopi Testigo ta permití e uso di aparato pa haci dialisis i ekipo cardiaco-pulmonar (cu no ta funcioná cu sanger) i tambe ora sanger wordu recobrá durante operacion sin cu e circulacion pafó dje curpa wordu interumpí; e dokter mester consultá cu e pashent individual pa averiguá ki impulso su concenshi ta dun’é.²

E Testigonan no ta kere cu e Bijbel ta comentá directamente riba transplante di órgano; pues, cada Testigo individualmente tin cu dicidí riba transplante di cornea, nir of otro tehido.

OPERACION GRANDI TA POSIBEL

Aunke hopi biaha dokternan a nenga di trata Testigonan pa motibu cu nan posicion riba e uso di producto di sanger a parce di “mara man dje dokter,” awendia hopi dokter a opta pa considerá e situacion como djis un complicacion mas cu ta desafiá nan abilidad. Ya cu e Testigonan no ta oponé líkido pa reemplasá coloide of cristaloide, ni electrocauteria, anestesia hipotensivo³ ni hipotermia, e métodonan aki a ser empleá exitosamente. E aplicacionnan actual i futuro di hetastarch,⁴ injeccion intravenoso di dósis grandi di dextran di heru,^5,6 i e “cuchú sónico”⁷ ta prometedor i no tin oposicion religioso contra nan uso. Ademas, si un cierto substituto pa sanger tratá cu fluor (Fluosol-DA) cu a ser desaroyá recientemente resultá di ta liber di peliger i efectivo,⁸ su uso lo no ta na conflicto cu creensia dje Testigonan.

Na 1977, Ott i Cooley⁹ a informá di 542 operacion cardiovascular efectuá riba Testigonan sin transfusion di sanger i a concluí cu e procedura aki por ser hací “cu un rísico aceptablemente abou.” Como contesta riba nos solicitud, Cooley recientemente a haci un repaso estadístico di 1.026 operacion, 22% riba menornan, i a determiná “cu e rísico di operacion riba pashent dje grupo di Testigonan di Jehova no tabata substancialmente mas haltu cu p’e otronan.” Di igual manera, Dr. Michael E. DeBakey a laga sa “cu den e gran mayoria di situacionnan [enbolbiendo Testigonan] e rísico di operacion sin e uso di transfusion di sanger no ta mas grandi cu den pashent riba kende nos ta usa transfusion di sanger” (comunicacion personal, mart 1981). E literatura tambe ta contené registro di éxito den caso di operacion grandi, tantu urológico¹⁰ como ortopédico.¹¹ E dokternan G. Dean MacEwen i J. Richard Bowen ta skirbi cu e fusion espinal “a ser lográ exitosamente riba 20 [Testigo] menor” (informacion no-publicá, augustus 1981). Nan ta agregá: “E ciruhano mester establecé e filosofia di respet pa derecho dje pashent di nenga un transfusion di sanger, pero tog efectuá proceduranan kirúrgico den un manera cu ta permití siguridad p’e pashent.”

Herbsman¹² ta informá bon éxito den casonan, incluyendo di algun hóben, “den cua tabatin pérdida traumático severo di sanger.” E ta admití cu “e Testigonan ta den un situacion un tiki mas desbentahoso ora ta trata di necesidad di sanger. No obstante, ta basta claro tambe cu nos tin alternativanan pa reemplasá sanger.” Remarcando cu hopi ciruhano no a sinti nan totalmente liber pa aceptá Testigonan como pashent pa “temor di consecuencianan legal,” e ta mustra cu esaki no ta un preocupacion válido.

PREOCUPACION LEGAL I CASO DI MENORNAN

E Testigonan ta firma gustosamente e formulario dje Asociacion Médico Mericano cu ta libra dokter i hospital di responsabilidad,¹³ i mayoria Testigo ta cana cu un tarheta di “Aviso na personal Médico” fechá i firmá pa testigonan, cu a ser prepará den consulta cu autoridadnan médico i legal. E documentonan aki ta obligatorio p’e pashent (of su herederonan) i ta ofrecé proteccion na dokternan, ya cu e hues Warren Burger a afirmá cu un keho di tratamentu robes “lo parce di falta apoyo” caminda e renuncia aki a ser firmá. Ademas, comentando riba esaki den un análisis di “tratamentu médico obligatorio i libertad religioso,” Paris¹⁴ a skirbi: “Un comentarista cu a examiná e literatura a informá, ‘Mi no por a haña ningun autoridad pa e declaracion cu e dokter lo por incurí den responsabilidad . . . criminal . . . dor di keda sin forsa un transfusion riba un pashent cu no kier esei.’ E rísico ta parce mas bien e producto di un mente hurídico fértil cu un posibilidad real.”

Cuido di esnan menor ta presentá e mayor preocupacion, hopi biaha resultando den accion hurídico contra mayornan mediante uso di leynan relacioná cu neglishamentu di yu. Pero hopi dokter i abogado cu sa dje casonan aki enbolbiendo Testigonan, ta cuestioná tal accionnan, pasobra nan ta kere cu mayornan Testigo ta busca bon cuido médico pa nan yunan. Siendo cu nan no ta hui di nan responsabilidad di mayor of pas’é pa un hues of cualkier otro hende, e Testigonan ta insta pa tuma principio religioso di nan famia na consideracion. Dr. A.D. Kelly, ex-secretario dje Asociacion Médico Canades, a skirbi¹⁵ cu “mayor di menornan i e famianan mas yegá dje pashentnan inconciente ta poseé e derecho di interpretá e boluntad dje pashent. . . . Mi no tin admiracion pa trámite di un corte ficticio cu ta reuní 2’or di mardugá pa kita un mucha for di custodia di su mayornan.”

Ta un echo establecí cu mayornan tin bos den e cuido di nan yunan, manera por ehempel ora nan ta enfrentá e posibilidadnan di rísico of beneficio di cirugia, tratamentu mediante radiacion of kimoterapia. Pa motibunan moral cu ta bai fuera dje cuestion di rísico di transfusion,¹⁶ mayornan Testigo ta pidi pa usa terapia cu no ta ser prohibí religiosamente. Esaki ta na armonia cu e principio médico di trata “e persona completo,” no pasando por haltu dje daño sico-social duradero di un procedura invasor cu ta violá creensia fundamental di un famia. Hopi biaha, centronan grandi rond e pais cu ya tabatin experencia cu Testigonan awor ta aceptá e pashentnan cu ser transferí na nan for di institucionnan cu no kier trata e Testigonan, asta casonan pediátrico.

E DESAFIO DJE DOKTER

Ta comprendibel cu dunamentu di asistencia médico na Testigonan di Jehova por parce di presentá un dilema p’e dokter cu ta dedicá na conservá bida i salú mediante uso di tur técnica na su disposicion. Den un editorial introductorio na un seri di artículo tocante cirugia grandi riba Testigonan, Harvey¹⁷ a admití, “Mi ta haña e creensianan ei cu por interferí den mi trabou ferfelu.” Pero, el a agregá: “Talbes nos ta lubidá demasiado fácil cu cirugia ta un arte cu ta dependé dje técnica personal di indivíduonan. Técnica por ser mehorá.”

Profesor Bolooki¹⁸ a tuma nota di un informe pertubador cu un dje hospitalnan di trauma di mas activo den Dade County, Florida, tabatin un “norma general di nenga di trata” e Testigonan. El a señalá cu “mayoria procedura kirúrgico den e grupo di pashent aki ta asociá cu ménos rísico cu sa presentá normalmente.” El a agregá: “Aunke ciruhano por sinti cu nan ta wordu privá di un instrumento di medicina moderno . . . mi ta convencí cu dor di operá e pashentnan aki nan lo siña masha hopi.”

En bes di considerá e pashent Testigo un problema, mas i mas dokter ta aceptá e situacion como un desafio médico. Enfrentando e desafio nan a desaroyá pa e grupo di pashent aki un norma di tratamentu cu ta ser aceptá den hopi centro médico den henter e pais. N’e mesun tempu e dokternan aki ta proveendo e clase di cuido cu ta resultá den lo mihor p’e bienestar completo dje pashent. Manera Gardner i otronan¹⁹ ta observá: “Ken lo ser beneficiá si e enfermedad corporal dje pashent ser curá pero su bida spiritual cu Dios, manera e ta mir’é, ser comprometé, cua ta hiba na un bida sin nificacion i kisas pió cu morto mes?”

E Testigonan ta reconocé cu, desde un punto di bista médico, nan conviccion na cua nan ta tene firmemente, por parce di agregá un midí di rísico i lo por complicá nan caso. P’e motibu ei, nan generalmente ta manifestá mas gratitud pa e cuido cu nan ta recibí. Huntu cu e elementonan vital di fe profundo i un deseo intenso pa biba cu nan tin, nan ta cooperá gustosamente cu dokternan i personal médico. Pues, tantu pashent como dokter ta uní den enfrentá e desafio único aki.

REFERENCIANAN

1. Testigonan di Jehova i e cuestion di sanger. Brooklyn, NY, Watchtower Bible and Tract Society, 1977, pág. 1-64.

2. The Watchtower 1978;99 (15 di juni):29-31.

3. Anestesia hipotensivo ta facilitá cirugia di heup, MEDICAL NEWS. JAMA 1978;239:181.

4. Hetastarch (Hespan)—un substancia nobo pa expandé plasma. Med Lett Drugs Ther 1981;23:16.

5. Hamstra RD, Block MH, Schocket AL:Dextran intravenoso di heru den medicina clínico. JAMA 1980;243:1726-1731.

6. Lapin R: Operacion grandi riba Testigonan di Jehova. Contemp Orthop 1980;2:647-654.

7. Fuerst ML: E ‘cuchú sónico’ no ta daña e vasonan sanguineo. Med Trib 1981;22:1,30.

8. Gonzáles ER: E historia di ‘sanger artificial.’: Fluosol, un beneficio special p’e Testigonan di Jehova. JAMA 1980;243:719-724.

9. Ott DA, Cooley DA: Cirugia cardiovascular riba e Testigonan di Jehova. JAMA 1977;238:1256-1258.

10. Roen PR, Velcek F: Cirugia urológico extenso sin transfusion di sanger. NY State J Med 1972;72:2524-2527.

11. Nelson CL, Martin K, Lawson N, i otronan: Reemplaso total di heup sin transfusion di sanger. Contemp Orthop 1980;2:655-658.

12. Herbsman H: Tratando e Testigonan di Jehova. Emerg Med 1980;12:73-76.

13. Medicolegal Forms With Legal Analysis. Chicago, American Medical Association, 1976, pág. 83.

14. Paris JJ: Tratamentu médico obligatorio i libertad religioso: Ley di ken mester prevalecé? Univ San Francisco Law Rev 1975;10:1-35.

15. Kelly AD: Aequanimitas Can Med Assoc J 1967; 96:432.

16. Kolins J: Morto debí na transfusion di sanger. JAMA 1981;245:1120.

17. Harvey JP: Un cuestion di abilidad. Contemp Orthop 1980;2:629.

18. Bolooki H: Tratamentu di Testigonan di Jehova: Ehempel di bon cuido. Miami Med 1981;51:25-26.

19. Gardner B, Bivona J, Alfonso A, i otronan: Operacion grandi riba Testigonan di Jehova. NY State J Med 1976;76:765-766.