Capítulo 54

E “berdadero pan di cielo”

E DIA promé berdaderamente tabata yen di sosodimento. Jesús a alimenta miles di hende milagrosamente anto a scapa for di esfuerzo dje pueblo pa hacié rey. E anochi ei el a camna riba lamá bruto di Galilea; a salba Pedro, cu a cuminza sink ora el a camna riba lamá bruto; i Jesús a calma lamá pa salba su disípelnan di naufragio.

Awor e hendenan cu Jesús a alimenta milagrosamente nortoost di Lamá di Galilea a hayé cerca Capernaum i a puntra: “Ki ora bo a yega aki?” Jesús a squalnan i a bisa cu nan a bin buské solamente pasobra nan tabata spera mas cuminda gratis. El a consehánan pa traha, no pa cuminda cu ta perece, sino pa cuminda cu ta permanece pa bida eterna. P’sei, e pueblo a puntra: “Kico nos mester haci pa obra e obranan di Dios?”

Jesús a menciona un obra so di mayor balor. El a splica: “Esaki ta e obra di Dios, pa boso eherce fe den esun cu Esei a manda.”

Sin embargo, e pueblo no a eherce fe den Jesús, apesar di tur milagro cu el a haci. Increíblemente, asta despues di tur cos maraviyoso cu el a haci, nan a puntra: “Kico, anto, bo ta haci como siñal, pa nos miré i kere den bo? Ki obra bo ta haci? Nos antepasadonan a come maná den desierto, net manera ta pará skirbí, ‘El a dúnanan pan di cielo pa come.’”

Jesús a responde na nan pidimento di un siñal, haciendo claro e Fuente di tal percuracion milagroso, bisando: “Moisés no a duna boso pan di cielo, ma mi Tata sí ta duna boso e berdadero pan di cielo. Pasobra e pan di Dios ta esun cu a baha foi cielo i ta duna bida na mundo.”

E pueblo a bisa, “Señor, semper dúnanos e pan ei.”

Jesús a splica: “Mi ta e pan di bida. Ken cu ta acudi na mi nunca lo haya hamber, i ken cu ta eherce fe den mi nunca lo haya sed. Pero, mi a bisa boso, Boso asta a mirámi i toch boso no ta kere. Tur loke e Tata ta dunámi lo bini cerca mi, i ken cu ta bini cerca mi lo mi no corré di ningun manera; pasobra mi a baha foi cielo pa haci, no mi boluntad, sino e boluntad di esun cu a mandámi. Esaki ta e boluntad di esun cu a mandámi, pa mi no perde nada di tur loke el a dunámi sino pa mi resusité ne último dia. Pasobra esaki ta e boluntad di mi Tata, cu tur hende cu ta mira e Yiu i ta eherce fe den dje mester tene bida eterna.”

Anto e hudíonan a cuminza murmura contra Jesús pasobra el a bisa, “Mi ta e pan cu a baha foi cielo.” Nan a mira den dje no mas cu un yiu di mayornan humano i p’sei nan a keha mescos cu hende di Nazaret, bisando: “Esei no ta Jesús e yiu di José, kende su tata i mama nos conoce? Di ki manera e ta bisa awor, ‘Mi a baha foi cielo’?”

Jesús a contesta: “Stop di murmura entre boso. Ningun hende por bini cerca mi amenos cu e Tata, cu a mandámi, ta atraé; i lo mi resusité ne último dia. E ta pará skirbí den e Profetanan, ‘I nan tur lo ta siñá di Jehova.’ Tur esnan cu a tende dje Tata i a siña ta bini cerca mi. No cu algun hende a mira e Tata, fuera di esun cu ta di Dios; esei a mira e Tata. Cu mayor berdad mi ta bisa boso, Ken cu kere tin bida eterna.”

Sigiendo, Jesús a repiti: “Mi ta e pan di bida. Boso antepasadonan a come maná den desierto i toch a muri. Esaki ta e pan cu ta baha foi cielo, di manera cu hende por come di dje i no muri. Mi ta e pan bibo cu a baha foi cielo; si hende come dje pan aki lo e biba pa semper.” Sí, door di eherce fe den Jesús, esun cu Dios a manda, hende por tene bida eterna. Ningun maná, ni ningun otro pan, por duna esei!

Aparentemente e discusion tocante e pan di cielo a cuminza poco tempo despues cu e pueblo a haya Jesús cerca Capernaum. Pero, el a sigi, yegando su culminacion despues ora Jesús tabata siña den e sinagoga di Capernaum. Juan 6:25-51, 59; Salmo 78:24; Isaías 54:13; Mateo 13:55-57.

▪ Kico a sosode promé cu e splicacion di Jesús dje pan di cielo?

▪ Den bista di loke Jesús a caba di haci, pakico e pidimento di siñal tabata tanto inapropiado?

▪ Pakico hudío a murmura ora Jesús a bisa cu e ta e berdadero pan di cielo?

▪ Unda e discusion tocante e pan di cielo a tuma lugar?