Parti 11

E Fundeshi dje Mundu Nobo Ta Ser Formá Awor

1, 2. Cumpliendo cu profecia bíblico, kico ta sosodiendo dilanti nos mes wowonan?

LOKE tambe ta maraviyoso ta e echo cu e fundeshi di Dios su mundu nobo ta ser formá awor aki mes, na mes tempu cu Satanas su mundu ta degenerá. Dilanti nos mes wowonan, Dios ta recogiendo hende for di tur nacion i formando nan den e fundeshi di un sociedad terenal nobo cu pronto lo reemplasá e mundu desuní djawe. Den e Bijbel, na 2 Pedro 3:​13, e sociedad nobo aki ta ser yamá “un tera nobo.”

² Profecia bíblico tambe ta bisa: “Den e parti final dje dianan [e tempu den cua nos ta biba awor] . . . , hopi hende siguramente lo bai i bisa: ‘Boso bin, pueblo, i laga nos subi na e ceru di Jehova [su adoracion berdadero], . . . i lo e instruí nos tocante su camindanan i nos lo cana den su pasonan.’”​—Isaías 2:​2, 3.

3. (a) Entre ken e profecia di Isaías ta ser cumplí? (b) Con e último buki dje Bijbel ta comentá riba esaki?

³ E profecia ei awor ta ser cumplí entre esnan cu ta someté nan na ‘Dios su camindanan i ta cana den su pasonan.’ E último buki dje Bijbel ta papia dje sociedad internacional di hende stimador di pas aki como “un multitud grandi . . . for di tur nacion i tribu i pueblo i lenga,” un berdadero hermandad mundial sirbiendo Dios unídamente. Tambe e Bijbel ta bisa: “Esakinan ta esnan cu ta sali for dje tribulacion grandi.” Esta, nan lo sobrebibí e fin dje sistema malbado di cosnan aki.​—Revelacion 7:​9, 14; Mateo 24:3.

Un Berdadero Hermandad Internacional

4, 5. Pakico e hermandad mundial di Testigonan di Jehova ta posibel?

⁴ Miyones di Testigo di Jehova sinceramente ta purba di biba na armonia cu Dios su instruccion i camindanan. Nan speransa di bida eterno ta ancrá den Dios su mundu nobo. Dor di hiba nan bida diario den obedencia na Dios su leynan, nan ta mustr’é nan bon boluntad di someté nan na su manera di goberná tantu awor i den e mundu nobo. Tur caminda, sin importá nan nacionalidad of rasa, nan ta obedecé e mesun normanan​—esnan señalá dor di Dios den su Palabra. Ta p’esei nan ta un berdadero hermandad internacional, un sociedad di mundu nobo trahá dor di Dios.​—Isaías 54:13; Mateo 22:​37, 38; Juan 15:​9, 14.

⁵ Testigonan di Jehova no ta tuma e crédito debí cu nan ta un hermandad mundial único. Nan sa cu esaki ta e resultado di Dios su poderoso spiritu obrando riba hende cu ta someté nan na su leynan. (Echo 5:​29, 32; Galatio 5:​22, 23) Esei ta obra di Dios. Manera Jesus a bisa, “e cosnan imposibel cerca hende ta posibel cerca Dios.” (Lucas 18:27) Pues e Dios cu a haci e universo permanente posibel ta esun cu tambe ta haci posibel e permanente sociedad di mundu nobo.

6. Pakico por yama e hermandad di Testigonan di Jehova un milager moderno?

⁶ Pues, Jehova su manera di goberná den e mundu nobo por ser mirá caba den loke e ta produciendo den e fundeshi pa e mundu nobo cu awor ta ser formá. I loke el a haci cu su Testigonan ta, den un sentido, un milager moderno. Pakico? Pasobra el a edificá Testigonan di Jehova den un berdadero hermandad mundial, unu cu nunca por ser kibrá dor di interesnan divisivo nacional, racial of religioso. Mientras e cantidad dje Testigonan ta miyones i nan ta biba den mas cu 200 pais, nan ta mará huntu manera un so den un banchi inkebrantabel. E hermandad mundial aki, único den tur historia, en berdad ta un milager moderno​—obra di Dios.​—Isaías 43:​10, 11, 21; Echo 10:​34, 35; Galatio 3:28.

Identificando e Pueblo di Dios

7. Con Jesus a bisa lo por a identificá su berdadero siguidornan?

⁷ Con por ser determiná mas aleu ken ta e pueblo cu Dios ta usando como e fundeshi pa su mundu nobo? Wel, ken ta cumpli cu Jesus su palabranan na Juan 13:​34, 35? El a declará: “Mi ta duna boso un mandamentu nobo, cu boso stima un e otro; mescos cu ami a stima boso, cu boso tambe stima un e otro. Dor di esaki tur lo sa cu boso ta mi disipelnan, si boso tin amor entre boso mes.” Testigonan di Jehova ta kere Jesus su palabra i ta actua segun nan. Manera Dios su Palabra ta instruí, nan “tin amor intenso un pa otro.” (1 Pedro 4:8) Nan “ta bisti [nan mes] cu amor, pasobra esei ta un banchi perfecto di union.” (Colosense 3:14) Pues amor fraternal ta e “lijm” cu ta tene nan huntu mundialmente.

8. Con 1 Juan 3:​10-12 ta identificá Dios su pueblo mas aleu?

⁸ Tambe, 1 Juan 3:​10-12 ta bisa: “E yunan di Dios i e yunan dje Diabel ta keda bisto via e echo aki: Tur hende cu no ta ocup’é cu husticia no ta originá cu Dios, tampoco esun cu no ta stima su ruman. Pasobra esaki ta e mensahe cu boso a tende desde e principio, cu nos mester tin amor un pa otro; no manera Cain, cu a originá cu e malbado i a mata su ruman.” Pues, Dios su pueblo ta un hermandad mundial no-violento.

Un Otro Rasgo Identificador

9, 10. (a) Dor di cua trabou Dios su sirbidornan lo a ser identificá den e último dianan? (b) Con Testigonan di Jehova a cumpli cu Mateo 24:14?

⁹ Tin un otro manera pa identificá Dios su sirbidornan. Den su profecia tocante fin dje mundu, Jesus a conta di hopi cos cu lo a marca e periodo di tempu aki como e último dianan. (Mira Parti 9.) Un rasgo básico dje profecia aki ta ser mencioná den su palabranan na Mateo 24:14: “E bon nobo di reino aki lo ser predicá den tur e tera habitá pa un testimonio na tur nacion; anto e fin lo yega.”

¹⁰ Nos a mira e profecia ei ser cumplí? Sí. Desde cu e último dianan a cuminsá na aña 1914, Testigonan di Jehova a predicá e bon nobo di Dios su Reino rond mundu den e manera cu Jesus a ordená, esta, na cas dje hendenan. (Mateo 10:​7, 12; Echo 20:20) Miyones di Testigo ta bishitá hende den tur nacion pa papia cu nan tocante e mundu nobo. Esaki a pone cu bo a ricibí e foyeto aki, ya cu e trabou di Testigonan di Jehova ta incluí imprenta i distribucion di biyones di pida di literatura tocante Dios su Reino. Bo sa di cualkier otro persona cu ta predicá tocante Dios su Reino di cas pa cas rond mundu? I Marco 13:10 ta mustra cu e trabou di predicamentu i siñamentu aki mester ser hací “promé,” promé cu e fin bin.

Contestando e di Dos Cuestion Grandi

11. Kico mas Testigonan di Jehova ta logra dor di someté nan na Dios su gobernacion?

¹¹ Dor di someté nan na Dios su ley i principionan, Testigonan di Jehova ta logra un otro cos. Nan ta mustra cu Satanas tabata un mentiroso ora el a pretendé cu hende no por ser fiel na Dios bou di prueba, asina contestando e di dos cuestion grandi, cua ta enbolbé integridad humano. (Job 2:​1-5) Siendo un sociedad di miyones di hende for di tur nacion, e Testigonan ta demostrá, como un solo cuerpo, lealtad na Dios su gobernacion. Aunke nan ta hende imperfecto, nan ta sostené Dios su banda dje cuestion di soberania universal, apesar di presion satánico.

12. Dor di nan fe, ken e Testigonan ta imitá?

¹² Awe, e miyones di Testigonan di Jehova aki ta agregá nan testimonio na e fila largu ei di otro testigonan den tempu di pasado kendenan a demostrá lealtad na Dios. Algun di nan tabata Abel, Noe, Job, Abraham, Sara, Isaac, Jacob, Débora, Ruth, David i Daniel, djis pa mencioná un par. (Hebreo, capítulo 11) Nan ta, manera e Bijbel ta bisa, un ‘nubia grandi di testigonan fiel.’ (Hebreo 12:1) Esakinan i otronan, incluyendo e disipelnan di Jesus, a mantené integridad na Dios. I Jesus mes a percurá e ehempel di mas grandi dor di mantené integridad perfecto.

13. Cua palabranan di Jesus tocante Satanas a resultá di ta berdad?

¹³ Esaki ta proba cu loke Jesus a bisa tocante Satanas na e lidernan religioso ta berdad: “Pero awor boso ta busca pa matá mi, un homber cu a conta boso e berdad cu mi a tende for di Dios. . . . Boso ta for di boso tata e Diabel i boso ta deseá di haci e deseonan di boso tata. Esun ei tabata un matador ora el a cuminsá i e no a para firme den e berdad, pasobra berdad no ta den dje. Ora e ta papia e mentira, e ta papia segun su mes disposicion, pasobra e ta un mentiroso i e tata di mentira.”​—Juan 8:​40, 44.

Kico Bo Ta Scoge?

14. Kico ta sosodiendo awor cu e fundeshi dje mundu nobo?

¹⁴ E fundeshi dje mundu nobo cu awor ta ser formá dor di Dios den e sociedad internacional di Testigonan di Jehova ta birando mas i mas fuerte. Cada aña cientos di miles di hende ta usa nan boluntad liber, basá riba conocementu exacto, pa aceptá Dios su gobernacion. Nan ta bira parti dje sociedad di mundu nobo, ta sostené e banda di Dios dje cuestion di soberania universal i ta proba cu Satanas ta un mentiroso.

15. Cua trabou di separacion Jesus ta haciendo den nos dia?

¹⁵ Dor di scoge Dios su gobernacion, nan ta cualificá pa ser poné na e “man drechi” di Cristo segun cu e ta separá “e carnénan” for di “e cabritunan.” Den su profecia tocante e último dianan, Jesus a profetisá: “Tur nacion lo ser reuní dilanti dje i lo e separá hende un for di otro, mescos cu un wardador ta separá carné for di cabritu. I lo e pone e carnénan na su man drechi, ma e cabritunan na su man robes.” E carnénan ta hende humilde cu ta asociá cu i apoyá Cristo su rumannan, sometiendo nan na Dios su gobernacion. E cabritunan ta hende cabesura cu ta rechasá Cristo su rumannan i no ta haci nada pa apoyá Dios su gobernacion. Cu ki resultado? Jesus a bisa: “Esakinan [e cabritunan] lo bai pa cortamentu eterno, pero esnan hustu [e carnénan] pa bida eterno.”​—Mateo 25:31-46.

16. Kico bo mester haci si bo kier biba den e binidero Paradijs?

¹⁶ Berdaderamente, Dios ta interesá den nos! Masha pronto lo e percurá un paradijs terenal deleitabel. Bo kier biba den e Paradijs ei? Si ta asina, mustra bo aprecio pa Jehova su percuracionnan dor di siña tocante dje i actua segun loke bo ta siña. “Boso busca Jehova, mientras e por ser hañá. Yam’é mientras cu e ta resultá di ta cerca. Laga e hende malbado bandoná su caminda i e hende perhudicial su pensamentunan; i lagu’é bolbe na Jehova, ken lo tin misericordia di dje.”​—Isaías 55:​6, 7.

17. Pakico no tin tempu pa perde den scoge ken nos ta sirbi?

¹⁷ No tin tempu pa perde. E fin dje sistema bieu aki ta masha cerca. Dios su Palabra ta consehá: “No stima ni mundu ni loke ta den mundu. Si cualkier persona ta stima mundu, e amor dje Tata no ta den dje . . . Además, mundu ta pasa forbij i tambe su deseo, pero esun cu ta haci e boluntad di Dios ta permanecé pa semper.”​—1 Juan 2:​15-17.

18. Cua curso di accion lo haci posibel pa bo por mira padilanti cu confiansa na biba den Dios su maraviyoso mundu nobo?

¹⁸ Dios su pueblo awor ta ser entrená pa bida eterno den e mundu nobo. Nan ta siñando e abilidadnan spiritual i di otro tipo necesario pa desaroyá un paradijs. Nos ta instá bo pa scoge Dios como Gobernante i apoyá e trabou salbador di bida cu e ta laga ser hací rond dje tera awe. Studia e Bijbel cu Testigonan di Jehova i yega na conocé e Dios cu realmente ta interesá den bo i cu lo trece un fin na sufrimentu. Dje manera aki bo tambe por bira parti dje fundeshi dje mundu nobo. Anto bo por mira cu confiansa padilanti na gana Dios su fabor i biba pa semper den e maraviyoso mundu nobo ei.

[Plachi na página 31]

Testigonan di Jehova tin un berdadero hermandad internacional

[Plachi na página 32]

E fundeshi di Dios su mundu nobo ta ser formá awor