Balornan Moral Cu Ta Merecé Respet

Atrabes di historia, homber i muhernan balente a tuma un posicion contrario cu e concepto popular di nan tempu. Nan a wanta tirania político, religioso i racial, hopi bes entregando nan bida pa nan causa.

E CRISTIANNAN di promé tabatin particularmente hopi curashi. Durante e persecucionnan severo dje promé tres siglonan, hopi di nan a ser matá dor dje romanonan pagano dor cu nan a nenga di adorá e emperador. Algun biaha, un altar a ser trahá den un arena. Pa haña nan libertad, e cristiannan tabatin cu solamente kima algun granito di censia como reconocimentu dje naturalesa divino dje emperador. Sin embargo, poco di nan a comprometé. E mayoria a preferá di muri mas bien cu renunciá nan fe.

Den tempu moderno, Testigonan cristian di Jehova ta tuma un posicion similar en cuanto neutralidad político. Por ehempel, nan posicion firme apesar dje oposicion nazista ta parti di registro histórico. Promé i durante e segundo guera mundial, rond di un cuart dje Testigonan aleman a perde nan bida, principalmente den camponan di concentracion, debí cu nan a permanecé neutral i a nenga di bisa “Heil Hitler.” Muchanan chikitu a ser separá violentamente for di nan mayornan Testigo. Apesar di presion, hóbennan a permanecé firme i a nenga di contaminá nan mes cu siñansanan no-bíblico cu otro hende a purba forsa riba nan.

E Saludo di Bandera

Awe Testigonan di Jehova generalmente no ta e obheto di persecucion cruel asina. No obstante, tin biaha ta surgi malcomprendementu como resultado dje decision conciencial di Testigonan hóben pa no participá den ceremonianan patriótico, manera e saludo di bandera.

Yunan di Testigonan di Jehova ta ser siñá pa no desanimá otronan pa saludá e bandera; esei ta pa cada persona dicidí. Sin embargo, e posicion dje Testigonan mes, ta firme: Nan no ta saludá e bandera di ningun nacion. Esaki siguramente no ta intencioná pa indicá falta di respet. Nan ta respetá e bandera di cual sea e pais cu nan ta biba den, i nan ta mustra e respet aki dor di obedecé e leynan dje pais. Nunca nan ta enbolbé nan mes den ningun clase di actividad anti-gubernamental. De facto, Testigonan ta kere cu gobiernonan humano actual ta constituí un “areglo di Dios” cu El a permití pa existí. Pues nan ta considerá cu nan ta bou di mandamentu divino pa paga belasting i respetá tal “autoridadnan superior.” (Romanonan 13:1-7) Esaki ta na armonia cu Cristo su famoso declaracion: “Duna bek na César loke ta pertenecé na César—i na Dios loke ta pertenecé na Dios.”—Mateo 22:21, Jerusalem Bible católico.

‘Pero pakico, anto,’ algun hende por puntra, ‘Testigonan di Jehova no ta onra e bandera dor di salud’é?’ Esei ta pasobra nan ta considerá saludo di bandera como un acto di adoracion, i adoracion ta pertenecé na Dios; nan concenshi no ta permití nan duna adoracion na ningun hende of na ningun cos excepto na Dios. (Mateo 4:10; Echonan 5:29) P’esei, nan ta apreciá ora educadornan ta respetá e conviccion aki i ta permití muchanan Testigo pa biba di acuerdo cu nan creencianan.

No ta straño cu Testigonan di Jehova no ta e úniconan cu ta kere cu saludo di bandera ta relacioná cu adoracion, manera e siguiente comentarionan ta mustra:

“E promé banderanan tabata casi puramente di un caracter religioso. . . . Ta parce cu semper e yudansa di religion a ser buscá pa duna santidad na banderanan nacional.” (Letra cursivo ta di nos.)—Encyclopædia Britannica.

“Mescos cu e crus, e bandera ta sagrado. . . . E reglanan i reglamentunan relacioná cu e actitud di hende pa cu normanan nacional ta usa palabranan fuerte i expresivo, manera, ‘Sirbishi n’e Bandera,’ . . . ‘Reverencia p’e Bandera,’ ‘Debocion n’e Bandera.’ ” (Letra cursivo ta di nos.)—The Encyclopedia Americana.

“Cristiannan a nenga di . . . haci sacrificio n’e deidad dje emperador [romano]—mas of ménos loke ta ekivalente awe na nenga di saludá e bandera of ripití e huramentu di lealtad.”—Those About to Die (1958), Daniel P. Mannix, página 135.

Un bes mas, Testigonan di Jehova no tin intencion di falta respet pa ningun gobierno of su gobernantenan dor di nenga di saludá e bandera. Ta solamente cu nan lo no, den un acto di adoracion, buig pa of saludá un imágen cu ta representá e Estado. Nan ta consider’é similar n’e posicion tumá den tempu bíblico dor di tres homber hebreo hóben kende a nenga di buig dilanti e estatua trahá riba e sabana di Dura dor dje rey babilónico Nabucodonosor. (Daniel, capítulo 3) Pues anto, miéntras otronan ta saludá i ta primintí lealtad, yunan di Testigonan di Jehova ta ser siñá pa sigui nan concenshi bíblicamente entrená. Pues, silenciosamente i respetuosamente nan ta keda sin participá. Pa motibunan similar, muchanan Testigo ta scoge pa no participá ora cu himno nacional ta ser cantá of tocá.

E Derecho di Mayornan

Awendia mayoria pais ta respetá e derecho di mayornan pa duna nan yunan instruccion religioso na armonia cu nan conviccionnan. Tur religion ta apoyá e derecho aki, manera ta ser ilustrá dor dje ley canónico cu ainda ta vigente den e Iglesia católico: “Siendo cu nan a duna bida na nan yunan, mayornan ta bou dje obligacion masha estricto pa educá nan, i nan tin e derecho pa haci esei; p’e motibu ei ta keda primeramente na e mayornan pa percurá educacion cristian pa nan yunan di acuerdo cu e doctrina di Iglesia.”—Canon 226.

Testigonan di Jehova no ta pidi pa nada mas cu esei. Como mayornan amoroso, nan ta purba hinca berdadero balornan cristian den nan yunan i ta inculcá den nan amor pa próhimo i respet pa propiedad di otro hende. Nan ta deseá pa sigui e conseho cu apostel Pablo a duna e cristiannan den Efeso: “Mayornan, no trata boso yunan di tal manera cu boso ta haci nan rabia. En bes di esei, cria nan cu disiplina i instruccion cristian.”—Efesionan 6:4, Today’s English Version.

Casnan Dividí Religiosamente

Den algun famia, solamente un mayor ta un Testigo di Jehova. Den un situacion asina, e mayor Testigo ta ser animá pa reconocé e derecho dje mayor cu no ta Testigo pa tambe instruí e yunan conforme cu su conviccionnan religioso. Muchanan cu ta ser exponí na diferente punto di bista religioso ta experenciá poco efecto, of ningun mes.a Den práctica, tur mucha mester dicidí cua religion nan lo sigui. Naturalmente, no tur hóben ta scoge pa sigui e principionan religioso di nan mayornan, sea Testigo di Jehova of no.

E Derecho di Mucha pa Tin Libertad di Concenshi

Ta bon pa bo sa tambe cu Testigonan di Jehova ta atribuí hopi importancia na e concenshi cristian di cada persona. (Romanonan, capítulo 14) E Congreso riba e Derechonan di Mucha, adoptá dor dje Asamblea General di Nacionnan Uní na 1989, a reconocé e derecho di un mucha pa tin “libertad di pensamentu, concenshi i religion” i e derecho “pa expresá su opinion libremente i pa otronan tuma e opinion ei na consideracion den cualkier asuntu of procedura cu ta afectá e mucha.”

No tin dos mucha exactamente mescos. P’esei, bo por razonablemente spera algun variacion den e decisionnan cu Testigonan hóben of otro alumnonan ta tuma ora ta trata di cierto actividadnan i asignacionnan na scol. Nos ta confia cu bo tambe lo concordá cu e principio di libertad di concenshi.

[Nota]

[Kuadro na página 20]

Respet, Pero No Adoracion

Un mainta na un scol na Cánada, un hobencita Testigo di 11 aña di edad yamá Terra a ripará cu e maestro a hiba un compañera di klas pafó pa algun rato. Poco despues, e maestro discretamente a pidi Terra pa compañ’é n’e oficina dje hoofd di scol.

Ora el a drenta e oficina, Terra inmediatamente a mira cu e bandera canades tabata habrí riba e lesenar dje hoofd di scol. E maestro a manda Terra scupi riba e bandera. E kier men cu ya cu Terra no tabata canta e himno nacional ni tabata saludá e bandera, no tabatin motibu pakico lo e no scupi riba e bandera si e ser ordená pa haci esei. Terra a nenga, splicando cu aunke Testigonan di Jehova no ta adorá e bandera, nan ta respet’é.

Ora nan a bolbe bek den klas, e maestro a anunciá cu el a caba di realisá un experimento cu dos alumno, instruyendo nan pa scupi e bandera. Aunke e promé alumno sí tabata participá den e ceremonianan patriótico, tog el a scupi riba e bandera ora el a ser ordená pa haci esei. Sin embargo, aunke Terra no tabata canta e himno of tabata saludá e bandera, el a nenga pa desonr’é den e manera aki. E maestro a trece n’e atencion dje alumnonan cu di nan dos, Terra tabata esun cu a demostrá e debido respet.

[Kuadro na página 24]

Algun Principio Moral cu Testigonan di Jehova Ta Sigui

Relacioná cu balornan moral, Testigonan di Jehova ta siña nan yunan pa keda separá di conducta, prácticanan of asta actitudnan cu, aunke nan ta comun den e mundu djawe, por causa daño na nan mes of na otronan. (Santiago 1:27) Pues nan ta informá nan yunan tocante e peligernan di droga i di otro prácticanan, manera humamentu i abuso di alcohol. (Proverbionan 20:1; 2 Corintionan 7:1) Nan ta kere den e importancia di onestidad i diligencia. (Efesionan 4:28) Nan ta siña nan yunan pa evitá palabranan vulgar. (Efesionan 5:3, 4) Tambe nan ta siña nan pa biba di acuerdo cu principionan bíblico en cuanto moralidad sexual i pa tin respet pa autoridad i pa otro hende su persona i propiedad. (1 Corintionan 6:9, 10; Tito 3:1, 2; Hebreonan 13:4) Sinceramente nan ta kere cu bibando segun e principionan ei ta den e mihó interes di nan yunan.

[Plachi na página 19]

Testigonan di Jehova ta purba di hinca balornan cristian den nan yunan

[Plachi na página 21]

“Duna bek na César loke ta pertenecé na César—i na Dios loke ta pertenecé na Dios”

—Mateo 22:21, Jerusalem Bible

[Plachi na página 23]

Tres homber hebreo hóben a nenga di buig dilanti un estatua trahá dor dje rey babilónico Nabucodonosor

[Plachi na página 25]

Muchanan ta ser animá pa mustra interes den otro hende