Lès 8

Un Bida di Famia Cu Ta Agradá Dios

Cua ta e posicion di e esposo den e famia? (1)

Con un esposo mester trata su esposa? (2)

Ki responsabilidadnan un tata tin? (3)

Cua ta e papel dje esposa den e famia? (4)

Kico Dios ta rekerí di mayornan i di yunan? (5)

Kico ta e punto di bista dje Bijbel tocante separacion i divorcio? (6, 7)

1. Bijbel ta bisa cu un esposo ta e cabes di su famia. (1 Corintionan 11:3) Un esposo mester tin solamente un esposa. Nan mester ta debidamente casá di acuerdo cu ley.—1 Timoteo 3:2; Tito 3:1.

2. Un esposo mester stima su esposa mescos cu e ta stima su mes. E mester trat’é manera Jesus ta trata su siguidornan. (Efesionan 5:25, 28, 29) Nunca e mag di dal su esposa of maltrat’é den ningun manera. Mas bien, e mester mustr’é onor i respet.—Colosensenan 3:19; 1 Pedro 3:7.

3. Un tata mester traha duru pa percurá pa su famia. E mester percurá cuminda, paña i cas pa su esposa i yunan. Un tata mester percurá tambe pa e necesidadnan spiritual di su famia. (1 Timoteo 5:8) E ta hiba e delantera den yuda su famia siña tocante Dios i Su propósitonan.—Deuteronomio 6:4-9; Efesionan 6:4.

4. Un esposa mester ta un bon yudante pa su esposo. (Génesis 2:18) E mester yuda su esposo den siña i entrená nan yunan. (Proverbionan 1:8) Jehova ta rekerí pa un esposa cuida su famia amorosamente. (Proverbionan 31:10, 15, 26, 27; Tito 2:4, 5) E mester tin respet profundo pa su esposo.—Efesionan 5:22, 23, 33.

5. Dios ta rekerí di yunan pa nan obedecé nan mayornan. (Efesionan 6:1-3) E ta spera di mayornan cu nan ta instruí i ta corigí nan yunan. Mayornan mester dedicá tempu na nan yunan i studia e Bijbel cu nan, percurando pa nan necesidadnan spiritual i emocional. (Deuteronomio 11:18, 19; Proverbionan 22:6, 15) Mayornan nunca mag disipliná nan yunan den un manera severo of cruel.—Colosensenan 3:21.

6. Ora esposo i esposa tin dificultad pa bai bon cu otro, nan mester trata na aplicá conseho bíblico. Bijbel ta urgi nos pa mustra amor i pa ser pordonador. (Colosensenan 3:12-14) E Palabra di Dios no ta animá pa separá como un manera pa resolvé problemanan chikitu. Pero un esposa lo por scoge pa bandoná su esposo si (1) e ta nenga obstinadamente pa mantené su famia, (2) e ta asina violento cu e salú i bida dje esposa ta na peliger, of (3) su oposicion extremo ta hacié imposibel pa e esposa adorá Jehova.—1 Corintionan 7:12, 13.

7. Esposo i esposa mester ta fiel na otro. Adulterio ta un picá contra Dios i contra bo casá. (Hebreonan 13:4) Relacion sexual pafó di matrimonio ta e único base bíblico pa divorcio cu ta permití un hende pa bolbe casa atrobe. (Mateo 19:6-9; Romanonan 7:2, 3) Jehova ta odia ora hende ta divorciá sin base bíblico i ta casa cu otro persona.—Malakías 2:14-16.

[Plachi na página 16, 17]

Dios ta spera di mayornan pa nan instruí nan yunan i corigí nan

[Plachi na página 17]

Un tata amoroso ta percurá pa su famia den sentido material i spiritual