Lès 9

Dios Su Sirbidornan Mester Ta Limpi

Pakico nos mester ta limpi den tur sentido? (1)

Kico ta nificá pa ta spiritualmente limpi? (2) moralmente limpi? (3) mentalmente limpi? (4) físicamente limpi? (5)

Cua clase di abla sushi nos mester evitá? (6)

1. Jehova Dios ta limpi i santu. E ta spera di su adoradornan pa nan permanecé limpi—spiritualmente, moralmente, mentalmente i físicamente. (1 Pedro 1:16) Nos mester haci berdadero esfuerso pa keda limpi den bista di Dios. Nos ta biba den un mundu impuru. Tambe nos tin un lucha contra nos mes tendencianan pa haci malu. Pero nos no mester entregá.

2. Limpiesa Spiritual: Si nos kier sirbi Jehova, nos no por sigui pega na ningun dje siñansanan of custumbernan di religion falsu. Nos mester sali for di religion falsu i no apoy’é den ningun manera. (2 Corintionan 6:14-18; Revelacion 18:4) Una bes cu nos a siña e berdad tocante Dios, nos mester tene cuidou pa hende cu ta siña falsedad no gaña nos.—2 Juan 10, 11.

3. Limpiesa Moral: Jehova kier pa su adoradornan comportá nan mes manera cristiannan berdadero na tur momento. (1 Pedro 2:12) E ta mira tur cos cu nos ta haci, asta loke nos ta haci den secreto. (Hebreonan 4:13) Nos mester evitá inmoralidad sexual i otro prácticanan impuru dje mundu aki.—1 Corintionan 6:9-11.

4. Limpiesa Mental: Si nos ta yena nos mente cu pensamentunan limpi i puru, nos conducta tambe lo ta limpi. (Filipensenan 4:8) Pero si nos keda pensa riba cosnan impuru, esei lo resultá den echonan perverso. (Mateo 15:18-20) Nos mester evitá formanan di entretenimentu cu por susha nos mente. Nos por yena nos mente cu pensamentunan limpi dor di studia e Palabra di Dios.

5. Limpiesa Físico: Debí cu nan ta representá Dios, cristiannan mester mantené nan curpa i paña limpi. Nos mester laba nos mannan despues di a bai w.c., i nos mester laba nan promé cu come of atendé cu cuminda. Si bo no tin un sistema di riolering adecuado, mester dera sushi di w.c. (Deuteronomio 23:12, 13) Kedando físicamente limpi ta contribuí na un bon salú. Un cas cristian mester ta na ordu i limpi tantu paden como pafó. E mester resaltá den e comunidad como un bon ehempel.

6. Abla Limpi: Sirbidornan di Dios semper mester papia e berdad. Mentirosonan lo no drenta e Reino di Dios. (Efesionan 4:25; Revelacion 21:8) Cristiannan no ta usa palabra malu. Nan no ta scucha of conta chistenan of cuentanan sushi. Pa motibu di nan abla limpi, nan ta sobresalí na trabou of na scol i den e becindario como diferente.—Efesionan 4:29, 31; 5:3.

[Plachi na página 19]

Dios su sirbidornan mester ta limpi den tur sentido