Capítulo Binti
Jehova Ta Rey
1, 2. (a) Ken lo sinti e furia di Jehova? (b) Huda lo keda sin haña castigu, i con nos por sa esei?
BABILONIA, Filistea, Moab, Siria, Etiopia, Egipto, Edom, Tiro, Asiria—nan tur lo sinti Jehova su furia. Isaías a profetisá e calamidadnan cu lo bini riba e nacionnan i stadnan hostil aki. Pero, kico di Huda? E habitantenan di Huda lo keda sin haña castigu pa nan proceder pecaminoso? E registro histórico ta contestá rotundamente cu no!
2 Wak kico a pasa cu Samaria, capital di Israel su reino di dies tribu. E nacion ei no a cumpli cu su pacto cu Dios. E no a keda leu for dje prácticanan inmoral dje nacionnan rond di dje. Mas bien, e habitantenan di Samaria “a sigui haci cos malu pa ofendé Jehova . . . P’esei Jehova a rabia mashá cu Israel, di manera cu el a kita nan for di su bista.” Kitá obligatoriamente for di su tera, “Israel a bai for di su propio suela den exilio na Asiria.” (2 Reynan 17:9-12, 16-18, 23; Oséas 4:12-14) Loke a pasa cu Israel no ta pinta muchu bon pa Huda, su hermano reino.
Isaías Ta Predicí e Desolacion di Huda
3. (a) Di con Jehova ta bandoná Huda su reino di dos tribu? (b) Kico Jehova ta determiná pa haci?
3 Algun rey di Huda tabata fiel, pero e mayoria no. Asta bou di un rey fiel, manera Jotan, e pueblo no a kita completamente for di adoracion falsu. (2 Reynan 15:32-35) E maldad di Huda ta yega na un culminacion durante e reinado dje rey Manases cu gusta drama sanger, kende segun tradicion hudiu, ta asesiná fiel profeta Isaías dor di laga zag e na pida-pida. (Compará cu Hebreonan 11:37.) E rey malbado aki “a sigui seducí Huda i e habitantenan di Jerusalem pa haci pió cu e nacionnan cu Jehova a eliminá for di dilanti e yunan di Israel.” (2 Crónicanan 33:9) Bou di Manases su gobernacion, e pais ta bira asta mas contaminá cu tempu e cananeonan tabata control’é. P’esei, Jehova ta declará: “Ata mi ta bai trece un calamidad riba Jerusalem i Huda, di cua ken cu tende di dje tur su dos oreanan lo fluit. . . . Simplemente lo mi limpia Jerusalem mescos cu un hende ta limpia un conchi sin orea, limpi’é i bir’é boca abou. I realmente lo mi bandoná e resto di mi herencia i lo mi duna nan den man di nan enemigunan, i nan lo bira simplemente botin i cos pa plunder pa tur nan enemigunan, pa motibu cu nan a haci loke tabata malu den mi bista i tabata ofendé mi continuamente.”—2 Reynan 21:11-15.
4. Kico Jehova lo haci cu Huda, i con e profecia aki ta cumpli?
4 Mescos cu un conchi cu hende ta bira boca abou, lagando tur su contenido basha abou, asina lo haci e pais bashí di su habitantenan. Atrobe e binidero desolacion di Huda i Jerusalem ta tópico di un profecia di Isaías. E ta cuminsá: “Mira! Jehova ta haci e tera bashí i ta lagu’é desolá, i el a troce e cara di dje i a plama su habitantenan.” (Isaías 24:1) E profecia aki ta cumpli ora Babilonia su ehército invasor bou di rey Nabucodonosor ta destruí Jerusalem i su tempel i ora caba cu gran parti dje habitantenan di Huda via spada, hamber i pest. Mayoria sobrebibiente hudiu ta ser hibá prezu Babilonia, i e poconan cu keda atras ta hui bai Egipto. Asina e tera di Huda ta keda destrosá i sin niun hende den dje. Ni sikiera bestia doméstico ta keda. E tera bashí ta bira un desierto cu ruinanan tristu, i solamente para cu bestia salbahe ta biba einan.
5. Lo tin hende cu lo keda sin ricibí Jehova su huicio? Splica.
5 Lo tin hende den Huda cu lo ricibí trato preferencial durante e binidero huicio? Isaías ta contestá: “Mester ta mescos pa e pueblo cu pa e sacerdote; mescos pa e sirbidó cu pa su doño; mescos pa e criá muher cu pa su señora; mescos pa e cumpradó cu pa e bendedó; mescos pa esun cu ta duna fiansa cu pa esun cu ta fia; mescos pa esun cu ta tuma interes cu pa esun cu ta paga interes. Sin falta lo haci e tera bashí i sin falta lo e ser di plunder, pasobra Jehova mes a papia e palabra aki.” (Isaías 24:2, 3) Rikesa i privilegionan di sirbishi di tempel lo no haci niun diferencia. Lo no tin niun excepcion. E tera ta asina corumpí cu ken cu sobrebibí tin cu bai den exilio, sea ta sacerdote, criá of doño, cumpradó of bendedó.
6. Di con Jehova ta kita su bendicion for dje tera?
6 Pa no tin niun malcomprendimentu, Isaías ta describí con completo e binidero desaster lo ta, i ta splica e motibu di esaki: “E tera ta di luto, el a caba na nada. E tera productivo a marchitá, el a caba na nada. Esnan haltu dje pueblo dje tera a marchitá. I e tera mes a ser contaminá bou di su habitantenan, pasobra nan a pasa por haltu dje leynan, cambia e regla, kibra e pacto di duracion indefiní. P’esei e maldicion mes a come e tera, i ta considerá esnan cu ta habit’é culpabel. P’esei e cantidad di habitante dje tera a mengua, i masha poco hende mortal a sobra.” (Isaías 24:4-6) Ora cu a duna e israelitanan e tera di Canan, nan a hañ’é “un tera cu ta abundá cu lechi i miel.” (Deuteronomio 27:3) Pero asina mes, nan a sigui dependé di Jehova su bendicion. Si nan a obedecé su statuto i mandamentunan fielmente, e tera lo a “duna su producto,” pero si nan a pasa por haltu di su ley i mandamentunan, lo ta ‘pornada nan lo a gasta’ nan esfuerso pa cultivá e tera i lo e ‘no duna su producto.’ (Levítico 26:3-5, 14, 15, 20) Jehova su maldicion lo “a come e tera.” (Deuteronomio 28:15-20, 38-42, 62, 63) Awor Huda tin cu verwagt e maldicion ei.
7. Den ki caso e pacto di Ley lo tabata un bendicion pa e israelitanan?
7 Un 800 aña promé cu e tempu di Isaías, e israelitanan a cera boluntariamente un pacto cu Jehova i a bai di acuerdo pa biba conforme cuné. (Éxodo 24:3-8) E pacto di Ley ei a stipulá cu si nan a obedecé Jehova su mandamentunan, nan lo a experenciá su bendicion ricu, pero si nan a kibra e pacto, nan lo a perde su bendicion i ser hibá prezu dor di nan enemigunan. (Éxodo 19:5, 6; Deuteronomio 28:1-68) E pacto di Ley aki, duná via Moises, lo a keda na vigor pa un tempu indefiní, no specificá. Lo el a protehá e israelitanan te ora cu e Mesías a aparecé.—Galationan 3:19, 24.
8. (a) Con e pueblo “a pasa por haltu dje leynan” i a “cambia e regla”? (b) Den ki manera ‘esnan haltu a marchitá’ promé?
8 Pero e pueblo a “kibra e pacto di duracion indefiní.” Nan a ignorá e leynan cu Dios a duna. Nan a “cambia e regla,” dor di sigui prácticanan legal distinto for di esnan cu Jehova a duna. (Éxodo 22:25; Ezekiel 22:12) P’esei, e pueblo lo ser kitá for dje tera. Lo no tin misericordia den e binidero huicio. Ora Jehova kita su proteccion i fabor, ta “esnan haltu”—esnan di noblesa—lo ta entre e proménan cu lo “marchitá.” Esaki a cumpli ora cu segun e destruccion di Jerusalem tabata acercá, promé e egipcionan i despues e babilonionan a haci e reynan di Huda reynan subordiná. Mas despues, rey Joakin i otro miembronan dje famia real tabata entre e proménan hibá prezu Babilonia.—2 Crónicanan 36:4, 9, 10.
Alegria Ta Bandoná e Pais
9, 10. (a) Ki papel agricultura ta hunga den Israel? (b) Kico ta nificá cada hende ‘sintá bou di su mes mata di wijndruif i su mes palu di figu’?
9 E nacion di Israel ta un sociedad di agricultura. For di tempu cu e israelitanan a drenta e Tera Primintí, nan bida tabata drei rond di cultivá e tera i cria bestia. P’esei agricultura ta ocupá un lugá importante den e leynan duná na Israel. E ley a manda pa tene un sosiegu sabático obligatorio pa e tera cada shete aña pa permitié recuperá su fertilidad. (Éxodo 23:10, 11; Levítico 25:3-7) E tres fiestanan anual cu e nacion mester a celebrá, ta cai pareu cu temporadanan agrícola.—Éxodo 23:14-16.
10 Den e pais tin yen di cunucu di wijndruif. E Scritura ta mencioná biña, un producto di palu di wijndruif, como un don di Dios cu “ta haci e curason di hende mortal alegrá.” (Salmo 104:15) Cada hende ‘sintá bou di su mes mata di wijndruif i su mes palu di figu,’ ta indicá prosperidad, pas i siguridad bou di Dios su mando hustu. (1 Reynan 4:25; Mikéas 4:4) Un bon temporada di wijndruif ta ser considerá un bendicion i ta un motibu pa canta i alegrá. (Huesnan 9:27; Jeremías 25:30) Lo contrario tambe ta berdad. Ora e matanan di wijndruif marchitá of no producí wijndruif i e cunucunan di wijndruif bira mondi di sumpiña, esei ta evidencia cu Jehova a kita su bendicion, i ta un periodo di gran tristesa.
11, 12. (a) Con Isaías ta ilustrá e consecuencianan di Jehova su huicio? (b) Ki futuro scur Isaías ta describí?
11 Apropiadamente anto, Isaías ta usa cunucu di wijndruif i nan fruta pa ilustrá e consecuencianan cu lo tin ora Jehova kita su bendicion for dje pais: “E biña nobo a bai lamentá, e mata di wijndruif a marchitá, tur esnan di curason contentu a cuminsá suspirá. E gran alegria di tamborin a stop, e boroto di esnan sumamente contentu a para, e gran alegria dje arpa a stop. Nan ta bebe biña sin cancion; e bebida cu ta haci burachi ta bira marga pa esnan cu beb’é. A kibra e pueblo desolá; a cera tur cas pa no drenta. Tin un gritu di angustia den caya debí na falta di biña. Tur goso a disparcé; e gran alegria dje tera a bai. Den e stad a laga un situacion asombroso atras; nan a aplastá e porta te ora el a keda un simpel monton di ruina.”—Isaías 24:7-12.
12 Tamborin i arpa ta instrumentnan agradabel usá pa alabá Jehova i expresá goso. (2 Crónicanan 29:25; Salmo 81:2) Durante e tempu aki di castigu divino lo no tende nan música. Lo no tin cosecha gososo di wijndruif. Lo no tin zonido contentu den e ruinanan desolá di Jerusalem, cu su porta ‘aplastá te ora el a keda un simpel monton di ruina’ i cu su casnan ‘cerá,’ di manera cu niun hende no por drenta. Ki un futuro scur pa habitante di un pais cu di naturalesa tabata asina fértil!
Un Resto Ta “Sclama di Goso”
13, 14. (a) Kico Jehova su ley ta bisa tocante cosecha? (b) Con Isaías ta usa e ley tocante cosecha pa ilustrá cu algun hudiu lo sobrebibí Jehova su huicio? (c) Aunke un periodo scur di prueba ta na caminda, di kico hudiunan fiel por ta sigur?
13 E israelitanan ta recogé olijfi dor di bati e palunan cu bara pa asina e fruta cai. Segun e Ley di Dios, nan no tabatin mag di bolbe bai piki e olijfinan cu a sobra na e takinan. Tampoco nan no tabatin mag di piki e wijndruif cu a sobra despues di a cosechá nan cunucu di wijndruif. E resto dje cosecha mester a keda pa hende pober piki, “pa e residente stranhero, pa e mucha homber sin tata i pa e biuda.” (Deuteronomio 24:19-21) Basando su mes riba e leynan bon conocí aki, Isaías ta ilustrá e echo consolador cu lo tin sobrebibiente di Jehova su binidero huicio: “Asina lo bira meimei dje tera, entre e pueblonan, manera ora bati e palu di olijfi, manera ora di piki sobrá despues cu caba di recogé wijndruif. Nan mes lo hisa nan bos, nan lo sclama di goso. Den e superioridad di Jehova nan sigur lo dal un gritu for di laman. P’esei den e region di lus nan tin cu glorificá Jehova, riba e islanan di laman e nomber di Jehova, e Dios di Israel. For di extremidad di tera tin melodia cu nos a tende: ‘Decoracion p’e Hustu!’”—Isaías 24:13-16a.
14 Mescos cu ta keda algun fruta na palu of na rama despues di cosecha, asina tambe lo resta algun hudiu despues cu Jehova ehecutá huicio, e “sobrá despues cu caba di recogé wijndruif.” Manera ta pará skirbí na versículo 6, e profeta a papia caba di esakinan, bisando cu “masha poco hende mortal a sobra.” Tog, pa poco cu nan ta, lo tin sobrebibiente dje destruccion di Jerusalem i Huda, i despues un resto lo bolbe for di cautiverio pa bolbe habitá e pais. (Isaías 4:2, 3; 14:1-5) Aunke esnan di curason onrado lo pasa den un periodo scur di prueba, nan por tin sigur cu lo tin liberacion i goso nan dilanti. E sobrebibientenan lo mira con Jehova su palabra profético ta realisá i nan lo reconocé cu Isaías tabata un profeta berdadero di Dios. Nan lo yena cu goso ora nan bira testigo di cumplimentu dje profecianan di restoracion. For di tur lugá na cua nan a ser plamá—sea ta e islanan di Mediteráneo den West, Babilonia den “e region di lus” (caminda solo ta sali, Oost), of cualkier otro lugá leu—nan lo alabá Dios pasobra nan a ser protehá, i nan lo canta: “Decoracion p’e Hustu!”
Niun Hende Lo Scapa Jehova Su Huicio
15, 16. (a) Con Isaías ta sinti pa loke lo sosodé cu su pueblo? (b) Kico lo pasa cu e habitantenan infiel dje pais?
15 Pero, pa awor ta muchu trempan pa alegrá. Isaías ta trece su contemporáneonan bek n’e tempu actual, bisando: “Ma ami ta bisa: ‘Pa mi tin flakesa, pa mi tin flakesa! Ai di mi! E traidornan a trata cu traicion. Asta cu traicion e traidornan a trata na un manera traicionero.’ Miedu i e buracu i e trampa ta riba bo, habitante dje tera. I tin cu sosodé cu ken cu hui pa e zonido dje cos cu e tin miedu di dje lo cai den e buracu, i ken cu subi sali for di paden dje buracu lo ser cogé den e trampa. Pasobra e bentananan di ariba realmente lo habri, i e fundeshi di tera lo sagudí. E tera a rementá completamente, a sagudí e tera completamente, a pone e tera tambaleá completamente. E tera ta move completamente insigur manera un homber burachi, i el a zwai bai-bin manera un casita di vigilancia. I su transgresion a bira pisá riba dje, i e tin cu cai, di manera cu lo e no bolbe lanta.”—Isaías 24:16b-20.
16 Isaías ta masha tristu pa loke lo pasa cu su pueblo. E condicionnan cu e ta mira rond di dje ta lagu’é sinti malu i afligí. Hende traicionero ta abundá i ta hinca miedu den e habitantenan dje pais. Ora Jehova kita su proteccion, e habitantenan infiel di Huda lo experenciá teror di dia i anochi. Nan lo ta insigur di nan bida. Nan lo no scapa e desaster cu lo bini riba nan pasobra nan a bandoná e mandamentunan di Jehova i a ignorá su sabiduria divino. (Proverbionan 1:24-27) Calamidad lo bini maske esnan traicionero den e pais ta purba convencé e pueblo cu tur cos lo bai bon i ta usa falsedad i engaño pa hiba nan den un caminda rumbo pa destruccion. (Jeremías 27:9-15) Enemigunan di pafó lo drenta i plunder nan i hiba nan como prezu. Tur esaki ta angustiá Isaías mashá.
17. (a) Di con lo no ta posibel pa scapa? (b) Ora cu Jehova los su poder di ehecutá huicio for di shelu, kico lo sosodé cu e tera?
17 Pero tog, e profeta tin e obligacion di declará cu lo no tin scapatorio. Unda cu hende purba hui bai, lo gara nan. Tin di nan kisas ta scapa un calamidad, pero un otro lo gara nan: niun caminda nan lo no ta sigur. Nan lo ta mescos cu un bestia cu nan ta yag riba dje; e no ta cai den un buracu pero tog nan ta gar’é den un trampa. (Compará cu Ámos 5:18, 19.) Jehova lo los su poder di ehecutá huicio for di shelu i lo sagudí e fundeshi dje tera. Mescos cu un homber burachi, e tera ta tambaleá i cai, pisá di culpa i sin por lanta atrobe. (Ámos 5:2) Jehova su huicio ta definitivo. Destruccion i ruina total lo asotá e tera.
Jehova Lo Reina den Gloria
18, 19. (a) Na kico “e ehército di haltura” kisas ta referí, i con esakinan ta ser cerá “den kashot”? (b) Den ki manera probablemente Jehova lo duna atencion na “e ehército di haltura” “despues di hopi dia”? (c) Den ki manera Jehova ta duna atencion na “e reynan di suela”?
18 Awor e profecia di Isaías ta abarcá un periodo mas largu, señalando na e realisacion final dje propósito di Jehova: “Tin cu sosodé riba e dia ei cu Jehova lo dirigí su atencion na e ehército di haltura den haltura, i riba e reynan di suela riba suela. I sigur lo reuní nan huntu manera ora ta reuní prezunan den buracu, i cera nan den kashot; i despues di hopi dia lo duna nan atencion. I luna yen a keda tur na bergwensa, i solo lombrante a haña bergwensa, pasobra Jehova di ehércitonan a bira rey den ceru di Síon i den Jerusalem i dilanti di su ancianonan cu gloria.”—Isaías 24:21-23.
19 “E ehército di haltura” kisas ta referí na e “gobernantenan [demoño] dje mundu dje scuridad aki, . . . e mal forsanan spiritual den e lugánan celestial.” (Efesionan 6:12) Nan tabatin un influencia poderoso riba e potencianan mundial. (Daniel 10:13, 20; 1 Juan 5:19) Nan meta ta pa apartá hende for di Jehova i su adoracion puru. Esta bon nan ta logra seducí Israel pa sigui e prácticanan corupto dje nacionnan bisiña i dje manera ei a haci nan merecedor di Dios su huicio! Pero Satanas i su demoñonan tin cu duna cuenta na Dios ora cu finalmente e dirigí su atencion na nan i na e gobernantenan riba tera—“e reynan di suela riba suela”—cu nan a influenciá pa bai contra Dios i kibra su leynan. (Revelacion 16:13, 14) Papiando simbólicamente, Isaías ta bisa cu lo recogé nan i “cera nan den kashot.” “Despues di hopi dia,” kisas ora Satanas i su demoñonan (pero no “e reynan di suela riba suela”) ser librá temporalmente na fin di Jesucristo su Reinado di Mil Aña, Dios lo trece riba nan e castigu final cu nan merecé.—Revelacion 20:3, 7-10.
20. Den ki manera i na ki tempu Jehova ta “bira rey” tantu den tempu antiguo como tempu moderno?
20 Pues e parti aki dje profecia di Isaías a laga e hudiunan cu un maraviyoso garantia. Na Jehova su debido tempu, lo e causa e caida di antiguo Babilonia i restorá e hudiunan na nan patria. Na aña 537 P.E.C., ora e ta demostrá su poder i soberania den e manera aki na fabor di su pueblo, di berdad lo por bisa nan: “Bo Dios a bira rey!” (Isaías 52:7) Den tempu moderno, Jehova “a bira rey” na aña 1914 ora el a instalá Jesucristo como Rey den Su Reino celestial. (Salmo 96:10) Tambe el “a bira rey” na aña 1919 ora el a demostrá e poder di su reinado dor di libra Israel spiritual for di cautiverio di Babilonia e Grandi.
21. (a) Den ki manera ‘luna yen lo keda tur na bergwensa i solo lombrante lo haña bergwensa’? (b) Ki yamada resonante lo tin su cumplimentu mas grandioso?
21 Jehova lo bolbe “bira rey” ora e trece un fin na Babilonia e Grandi i e resto dje sistema di cosnan malbado aki. (Zacarías 14:9; Revelacion 19:1, 2, 19-21) Despues di esei, Jehova su gobernacion di Reino lo ta asina maraviyoso cu ni luna yen briyante ni solo radiante di merdia lo por igualá su gloria. (Compará cu Revelacion 22:5.) Nan lo tin bergwensa, na moda di papia, di compará nan mes cu e glorioso Jehova di ehércitonan. Jehova lo ta Rey supremo. Su omnipotencia i su gloria lo ser manifestá na tur. (Revelacion 4:8-11; 5:13, 14) Ki un prospecto maraviyoso! Na e tempu ei, e yamada di Salmo 97:1 lo resoná rond mundu den su cumplimentu mas grandioso: “Jehova mes a bira rey! Laga tera ta gososo. Laga e hopi islanan alegrá.”
[Plachi na página 262]
Lo no tende música ni alegria mas den e pais
[Plachi na página 265]
Algun hende lo sobrebibí e huicio di Jehova, mescos cu fruta ta keda na un palu despues di cosecha
[Plachi na página 267]
Isaías ta masha tristu pa loke lo sosodé cu su pueblo
[Plachi na página 269]
Ni solo ni luna lo igualá e gloria di Jehova