E Balor Práctico dje Bon Nobo pa Bo Comunidad

DEN e mundu djawe hopi bes nos ta tende e opinion aki: “E principionan di cristianismo no ta práctico. Nan simplemente lo no duna resultado den e sociedad complicá djawe.” Sin embargo, den un informe di un combersacion cu a tuma lugá entre e ex-gobernante británico di India, Lord Irwin, i e lider hindú Mohandas K. Gandhi, a ser expresá un opinion bastante distinto. Nan ta bisa cu Lord Irwin a puntra Gandhi kico e ta pensa cu lo resolvé e problemanan entre Gran Bretania i India. Gandhi a coge un Bijbel i a habrié na Mateo capítulo 5 i a bisa: “Ora bo pais i esun di mi obra na armonia cu e siñansanan cu Cristo a trece den e Sermon Riba Ceru, nos lo a solucioná no e problemanan di nos paisnan so, sino esnan di henter mundu.”

E sermon ei ta papia tocante busca spiritualidad i ser di genio suave, pacífico, misericordioso, un stimadó di husticia. E sermon no ta condená matamentu so sino tambe e ta condená keda rabiá cu otro hende, no solamente adulterio sino pensamentunan inmoral tambe. E ta contra divorcio di un forma iresponsabel cu ta kibra famia i ta pone yu bira víctima. E ta bisa nos: ‘Stima asta esnan cu no ta gusta bo, duna na esnan den necesidad, stop di husga otronan sin misericordia, trata otronan manera bo kier pa nan trata bo.’ Si un hende aplicá tur e consehonan aki, lo e ricibí tremendo beneficio. Mas tantu hende den bo comunidad pone nan na práctica, mas mihó bo comunidad ta bira!

Testigonan di Jehova ta yuda den esaki. Bijbel ta siña nan respetá matrimonio. Nan yunan ta haña entrenamentu den principio hustu. Ta ser enfatisá con importante famia ta. Famianan uní ta un bendicion pa bo comunidad, i asta pa bo pais. Historia ta yen di ehempel di podernan mundial cu a sak den otro ora e laso di famia a bira swak i ora inmoralidad a aumentá. Mas hende individual i famia ser influenciá dor di Testigonan di Jehova pa biba segun principio cristian, ménos delincuencia, inmoralidad i crímen lo bo tin den bo comunidad.

Un dje problemanan mas grandi cu ta plaga comunidad i nacionnan ta prehuicio racial. Na contraste, apostel Pedro a bisa: “Mi ta percibí cu Dios no ta parcial, sino cu den tur nacion e hende cu ta tem’é i ta obra husticia ta aceptabel p’e.” I Pablo a skirbi: “No tin ni hudiu ni griego, no tin ni esclabo ni liber, no tin ni homber ni muher; pasobra boso tur ta un solo persona den union cu Cristo Jesus.” (Echonan 10:34, 35; Galationan 3:28) Testigonan di Jehova ta aceptá esaki. Hende di tur rasa i color ta biba i traha huntu na nan sede mundial, na e sucursalnan, i den e congregacionnan.

Na África tin cierto tribu cu no por ta huntu sin clash. Sin embargo, na e asambleanan di Testigonan di Jehova na África tin hende di hopi diferente tribu ta come, hospedá i adorá huntu den armonia completo i den compañerismo caluroso. Funcionarionan di gobiernu ta keda sorprendí ora nan mira esaki. E korant di New York Amsterdam News di 2 di augustus 1958, a duna un comentario riba un ehempel dje efecto unificador di cristianismo berdadero. E comentario tabata basá riba loke nan a observá na e asamblea internacional mencioná anteriormente caminda mas cu un cuart miyon Testigo a reuní na New York City.

“Tur caminda tabatin hende color scur, color cla i oriental, di tur posicion social di bida i di tur parti di mundu, cu a mescla libremente i cu alegria . . . E Testigonan adoradó for di 120 pais a biba i adorá huntu den pas, mustrando mericano con fácil ta pa haci esei. . . . E asamblea ta un briyante ehempel di cu hende por traha i biba huntu den unidad.”

Hopi hende kisas ta bisa cu e principionan di cristianismo no ta práctico pa e mundu moderno aki. Sin embargo, kico otro a duna resultado of lo duna resultado? Principionan cristian por tin berdadero balor si hende den bo comunidad aplicá nan awor, i e principionan aki lo ta e base pa uni tur ‘nacion, tribu, pueblo i hende’ rond mundu bou di mando di e Reino di Dios riba humanidad.—Revelacion 7:9, 10.

[Komentario na página 23]

Hende di tur rasa i color ta traha huntu

[Komentario na página 24]

Cristianismo ta práctico. Kico otro a duna resultado?