Preguntanan Cu Hende Interesá Ta Haci Hopi Bes

Si Dios ta amor, di con e ta permití maldad?

DIOS ta permití maldad, i miyones di hende riba tera ta practicá esaki deliberadamente. Por ehempel, nan ta declará guera, ta tira bom riba mucha, ta destrosá tera, i ta causa hamber. Miyones di hende ta huma i ta haña cancer di pulmon, ta practicá adulterio i ta ser contagiá cu malesanan transmití sexualmente, ta bebe demasiado alcohol i ta haña cirósis di higra, etcétera. E hendenan aki no ta deseá di berdad pa bin un fin na maldad. Tur loke nan kier ta pa eliminá e castigu cu esaki ta trece cuné. Ora nan cosechá loke nan a sembra, nan ta sclama: “Pakico ami?” I nan ta culpa Dios, manera Proverbionan 19:3 ta bisa: “Lokura di un hende ta ruiná su kaminda, i den su kurason e ta bira razu kontra SEÑOR.” (Beibel Santu) I si Dios pone fin na e maldad cu nan ta haci, nan lo protestá pasobra nan a perde nan libertad pa hacié!

E motibu principal cu Jehova ta permití maldad ta pa contestá Satanas su desafio. Satanas e Diabel a bisa cu Dios no por pone hende riba tera cu lo keda leal na Dje bou di prueba. (Job 1:6-12; 2:1-10) Jehova ta permití Satanas keda pa dun’é un oportunidad pa duna prueba di su desafio. (Éxodo 9:16) Awe Satanas ta sigui trece calamidad pa pone hende bai contra Dios, segun cu e ta purba di duna prueba di su desafio. (Revelacion 12:12) Apesar di esei, Job i Jesus a warda integridad. Cristiannan berdadero djawe ta haciendo mescos.—Job 27:5; 31:6; Mateo 4:1-11; 1 Pedro 1:6, 7.

Mi tin gana di kere den un paradijs terenal caminda hende ta biba pa semper, pero esei no ta muchu bon pa kere?

No segun Bijbel. E ta parce muchu bon pa kere djis pasobra humanidad a conocé maldad pa asina tantu siglo. Jehova a crea tera i a bisa humanidad pa yen’é cu homber i muher hustu cu lo a cuida e flora i fauna i preservá su beyesa en bes di destruyé. (Mira página 12 i 17.) No ta e Paradijs primintí ta muchu bon pa kere aden; ta e condicion tristu cu nos ta biba aden actualmente ta demasiado malu pa sigui asina. Paradijs lo remplas’é.

Con mi por contestá hende cu ta haci bofon di Bijbel i ta bisa cu e ta un mito i no ta científico?

Fe den e promesanan aki no ta un asuntu di credulidad. “Fe ta sigui loke a tende.” Dor di studia e Palabra di Dios, su sabiduria ta bira mas bisto i fe ta crece.—Romanonan 10:17; Hebreonan 11:1.

Arkeologia bíblico ta confirmá pa un gran parti cu historia bíblico ta exacto. Ciencia genuino ta armonisá cu Bijbel. Hopi tempu promé cu eruditonan seglar a descubrí e siguiente echonan, nan tabata den Bijbel caba: e secuencia di e etapanan di desaroyo cu e tera a pasa aden, cu tera ta rondó, cu e ta cologá den espacio riba nada, i cu para ta migra.—Génesis, capítulo 1; Isaías 40:22; Job 26:7; Jeremías 8:7.

Cumplimentu di profecia ta mustra cu Bijbel ta inspirá. Daniel a predicí di antemano cu podernan mundial lo lanta i cai, i tambe e tempu cu Mesías lo a presentá i lo a ser matá. (Daniel, capítulo 2, 8; 9:24-27) Awe, otro profecianan mas ta hañando cumplimentu, loke ta mustra cu nos ta biba den “e último dianan.” (2 Timoteo 3:1-5; Mateo, capítulo 24) Hende no sa kico tin den futuro. (Isaías 41:23) Pa mas confirmacion, mira e bukinan E Bijbel—e Palabra di Dios of e palabra di hende? i Ta Existí un Creador Cu Ta Interesá den Bo? (na spañó), publicá dor di Watchtower Bible and Tract Society.

Con mi por siña contestá preguntanan bíblico?

Ta importante pa bo studia Bijbel i meditá riba dje, i na e mésun momento pidi pa e spiritu di Dios dirigí bo. (Proverbionan 15:28; Lucas 11:9-13) “Si cualkier un di boso tin deficiencia en cuanto sabiduria,” Bijbel ta bisa, “lagu’é sigui pidi Dios, pasobra e ta duna generosamente na tur i sin tira na cara, i lo e ser duná na dje.” (Santiago 1:5) Tambe, ta bale la pena pa consultá publicacionnan cu ta yuda bo studia Bijbel. Mayoria bes yudansa di otro hende ta necesario, manera ora Felipe a studia cu e homber di Etiopia. (Echonan 8:26-35) Testigonan di Jehova ta conducí studio di Bijbel grátis cu hende interesá na nan casnan. Sinti bo liber pa pidi e servicio aki.

Di con asina hopi hende ta oponé Testigonan di Jehova i ta bisa mi pa no studia cu nan?

Jesus su predicacion a enfrentá oposicion, i el a bisa cu nan lo persiguí su siguidónan tambe. Ora Jesus su siñansanan a impresioná algun hende, opositornan religioso tabata puntra: “Boso no a ser engañá tambe, no? Ningun dje gobernantenan ni e fariseonan no a pone fe den dje, no?” (Juan 7:46-48; 15:20) Hopi di esnan cu consehá bo pa no studia cu Testigo, sea no ta bon informá of nan tin prehuicio. Studia cu e Testigonan i mira pa bo mes si bo comprendimentu di Bijbel ta aumentá of no.—Mateo 7:17-20.

Di con Testigonan ta bishitá hende cu tin nan mes religion?

Dor di haci esaki nan ta sigui Jesus su ehempel. El a bai cerca hudiu. E hudiunan tabatin nan mes religion, pero den hopi manera esaki a desviá for di e Palabra di Dios. (Mateo 15:1-9) Tur nacion tin un cierto forma di religion, sea ta e asina yamá religionnan cristian of no-cristian. Ta di vital importancia pa hende tin creencia cu ta conforme cu Dios su propio Palabra, i e esfuerso cu e Testigonan ta haci pa yuda nan den esaki ta un muestra di amor pa próhimo.

Testigonan ta kere cu nan religion ta e único cu ta bon?

Cada hende cu ta tuma su religion na serio ta pensa cu esun di dje ta esun bon. Si no ta asina, di con lo e ta den dje anto? Cristiannan ta ser spiertá: “Haci sigur di tur cos; tene duru na loke ta excelente.” (1 Tesalonicensenan 5:21) Un persona mester haci sigur cu e Scritura ta apoyá su creencia, pasobra ta un fe berdadero so tin. Efesionan 4:5 ta confirmá esaki ora e ta mencioná “un Señor, un fe, un bautismo.” Jesus no a bai di acuerdo cu e manera fácil i moderno di pensa, di cu tin hopi caminda, hopi religion i cu tur ta hiba na salbacion. En bes di esei el a bisa: “Smal ta e porta i pertá e caminda cu ta hiba na bida, i poco ta esnan cu ta hañ’é.” Testigonan di Jehova ta kere cu nan a hañ’é. Sino nan lo a busca un otro religion.—Mateo 7:14.

Nan ta kere cu nan ta e úniconan cu lo ser salbá?

No. Miyones di hende cu a biba den siglonan pasá i cu no tabata Testigo di Jehova lo bin bek via di un resureccion cu e oportunidad di biba. Hopi hende cu ta na bida awor kisas lo tuma nan posicion pa e berdad i husticia ainda promé cu e “tribulacion grandi,” i haña salbacion. Ademas, Jesus a bisa cu nos no mester husga otro. Nos ta mira aparencia; Dios ta mira curason. E ta mira cu precision i ta husga cu misericordia. El a laga e asuntu di husgamentu den man di Jesus, no den nos man.—Mateo 7:1-5; 24:21; 25:31.

Ki contribucion financiero ta ser sperá di esnan cu ta asistí na e reunionnan di Testigonan di Jehova?

Relacioná cu contribucion di placa, apostel Pablo a bisa: “Laga cada un haci net manera el a determiná den su curason, no di mala gana ni bou di obligacion, pasobra Dios ta stima un dunadó alegre.” (2 Corintionan 9:7) Nunca nan no ta pasa colect na Salonnan di Reino i auditorionan di congreso di Testigonan di Jehova. Nan ta pone cahanan di contribucion pa cualkier hende cu ta deseá di contribuí por haci esei di un manera cumbiniente. Ningun hende no sa kico otronan ta duna ni si nan ta duna. Tin hende por duna mas cu otro; tin hende no por duna nada. Jesus a mustra cua ta e punto di bista corecto ora el a duna un comentario riba e caha di contribucion na e tempel na Jerusalem i esnan cu tabata contribuí: Loke ta conta ta loke bo por duna i e spiritu di duna, no e cantidad di placa.—Lucas 21:1-4.

Si mi bira un Testigo di Jehova, lo mi tin cu predicá mescos cu nan?

Ora un hende yena cu e conocimentu di e Paradijs terenal primintí bou di e Reino di Cristo, lo e deseá di compartié cu otro hende. Abo tambe lo deseá di haci esei. Ta bon nobo e ta!—Echonan 5:41, 42.

Haci esaki ta un manera importante pa demostrá cu bo ta un disipel di Jesucristo. Den Bijbel Jesus ta ser yamá “e testigo fiel i berdadero.” Ora e tabata riba tera el a predicá: “E reino di shelu a yega cerca,” i el a manda su disipelnan pa haci e mésun cos. (Revelacion 3:14; Mateo 4:17; 10:7) Mas despues, Jesus a manda su siguidónan: “Bai pues, i haci disipel di hende di tur nacion, . . . siñando nan.” Tambe el a predicí cu promé cu e fin, “e bon nobo aki dje reino lo ser predicá den tur e tera habitá como testimonio pa tur nacion.”—Mateo 24:14; 28:19, 20.

Tin hopi manera pa declará e bon nobo aki. Combersacion cu amigu i hende conocí hopi bes ta habri caminda pa haci esei. Algun di nan ta predicá dor di skirbi carta of dor di usa telefon. Otronan ta post literatura cu tin informacion cu, segun nan, un conocí lo ta specialmente interesá den dje. Pa motibu cu nan no kier pasa ningun hende por alto, Testigonan ta bai di cas pa cas cu e mensahe.

Bijbel ta haci e invitacion caluroso aki: “E spiritu i e bruid ta sigui bisa: ‘Bin!’ I laga ken cu ta tende bisa: ‘Bin!’ I laga ken cu tin sed bini; laga ken cu kier tuma e awa di bida grátis.” (Revelacion 22:17) Conta otro hende tocante e Paradijs riba tera i su bendicionnan ta algu cu mester ser hací di buena gana; e mester sali for di un curason yen di deseo pa compartí e bon nobo aki.

Nos tin sigur cu bo tin mas pregunta tocante Testigonan di Jehova i nan creencianan. Kisas algun cuestion ta controversial. Nos lo tin gana di contestá bo preguntanan. E espacio den e foyeto aki ta limitá, i p’esei nos ta invitá bo pa haci pregunta na e Testigonan local. Bo por haci esei na nan reunionnan na Salon di Reino of ora nan bishitá bo na bo cas. Of kisas bo por manda bo preguntanan pa Watch Tower, usando e adres mas cumbiniente mencioná aki bou.