Mustra e Balor Práktiko

SEA bo ta papiando ku un persona so òf ku un públiko grandi, no ta sabí pa asumí ku bo oyente(nan) lo ta interesá den bo tema djis pasobra e ta interesá abo. Bo mensahe ta importante, pero si bo no mustra su balor práktiko, ta difísil pa bo tene e atenshon di bo ouditorio pa hopi tempu.

Esaki ta konta asta pa un ouditorio den Salòn di Reino. Kisas nan ta skucha bo ora bo usa un komparashon òf konta un eksperensia ku nan no a yega di tende ainda. Pero nan por stòp di skucha bo ora bo ta papia di algu ku nan sa kaba, foral si bo no amplia riba e informashon ei. Bo tin ku yuda nan mira pakiko loke bo ta bisando ta di berdadero benefisio pa nan i kon e por benefisiá nan.

Beibel ta animá nos pa pensa riba loke ta práktiko, esta, loke ta sabiduria sano. (Pro. 3:21) Yehova a usa Huan Boutista pa dirigí hende na e “sabiduria práktiko di e hustunan.” (Luk. 1:17, NW) E sabiduria aki ta basá riba un temor sano di Yehova. (Sal. 111:10) Hende ku ta apresiá e sabiduria aki ta haña yudansa pa enfrentá bida ku éksito awor i gara e bida berdadero: bida eterno den futuro.—1 Tim. 4:8; 6:19.

Kon pa Hasi un Diskurso Práktiko. Pa bo diskurso ta práktiko, bo mester pensa tantu riba e informashon komo riba bo ouditorio. No mira bo ouditorio komo simplemente un grupo di hende. Mira e personanan individual i e famianan. Por tin mucha chikí, teenager, adulto i algun hende di edat. Tambe por tin hende resien interesá i esnan ku a kuminsá sirbi Yehova promé ku bo a nase. Tin di nan por ta spiritualmente madurá; otronan kisas ainda ta ser influensiá mashá dor di sierto aktitut i práktika di mundu. Puntra bo mes: ‘Kon e informashon ku mi ta bai trata lo por benefisiá esnan den ouditorio? Kon mi por yuda nan komprondé loke mi kier bisa?’ Bo por disidí di konsentrá riba solamente un òf dos di e gruponan ya menshoná, pero sin lubidá e otronan kompletamente.

Ke tal si bo parti ta pa trata un siñansa básiko di Beibel? Kiko bo por hasi pa e diskurso ei benefisiá un ouditorio ku ya kaba ta kere den e siñansa? Purba hasi nan konvikshon mas firme. Kon? Dor di rasoná riba e evidensia bíbliko ku ta apoy’é. Tambe bo por profundisá nan apresio pa e siñansa bíbliko ei dor di splika nan kon e ta kuadra ku otro bèrdatnan bíbliko i ku Yehova su personalidat. Usa ehèmpelnan—si ta posibel, eksperensianan di bida real—pa mustra kon un komprondementu di e siñansa aki a benefisiá otro hende i a influensiá nan punto di bista di futuro.

No limitá e aplikashon práktiko na un par di komentario kòrtiku den e konklushon di bo diskurso. For di ora bo kuminsá ku bo parti, kada persona den bo ouditorio mester sinti ku “esaki ta p’ami.” Unabes bo a pone e fundeshi ei, sigui mustra ki balor práktiko e informashon tin segun ku bo ta desaroyá kada punto prinsipal di e kurpa di e diskurso i tambe den e konklushon.

Ora bo ta mustra kon e informashon ta apliká, hasié na un manera ku ta kuadra ku prinsipionan bíbliko. Kiko esaki kier men? Wèl, e kier men ku nos tin ku hasié na un manera amoroso i mustrando komprenshon. (1 Ped. 3:8; 1 Huan 4:8) Asta ora apòstel Pablo tabata trata ku problemanan difísil ku a surgi den e kongregashon na Tesalónika, el a hasi sigur di enfatisá e aspektonan positivo di e progreso spiritual di su rumannan kristian einan. Tambe el a ekspresá e konfiansa ku nan lo tin e deseo di hasi loke ta korekto. (1 Tes. 4:1-12) Esta un bon ehèmpel pa imitá!

E meta di bo diskurso ta pa stimulá partisipashon den e trabou di prediká i siña e bon nobo na otronan? Krea entusiasmo i apresio pa e privilegio aki. Pero segun bo ta hasi esei, kòrda ku no ta tur hende por hasi mes tantu, i Beibel ta tene kuenta ku esei. (Mat. 13:23) No laga bo rumannan sinti nan mes kulpabel. Hebreonan 10:24 ta animá nos pa “stimulá otro pa stima i hasi bon obra.” Si nos stimulá otro pa stima, e resultado lo ta obranan basá riba un bon motivashon. En bes di obligá e rumannan obedesé, rekonosé ku Yehova kier pa nos promové “obedensia [pa medio] di fe.” (Rom. 16:26) Ku esaki na mente, nos ta trata na fortalesé nos mes fe i tambe e fe di nos rumannan.

Yuda Otro Hende Mira e Balor Práktiko. Ora bo ta duna testimonio na otro hende, bo mester enfatisá e balor práktiko di e bon nobo. Pa bo por hasi esei bo mester sa kiko ta preokupá e hendenan den bo teritorio. Kon bo por haña sa esei? Skucha notisia na radio òf na televishon i wak e titularnan di korant. Tambe ta importante pa animá e hendenan pa papia ora nos ta kòmbersá ku nan i skucha loke nan ta bisa. Kisas bo ta ripará ku nan ta luchando ku problemanan grave: podisé nan a pèrdè trabou, nan no tin moda di paga hür, nan ta lucha ku malesa, morto di un famia, kriminalidat, nan ta sufri inhustisia na man di un persona den outoridat, nan matrimonio ta kibrá, nan no tin kontròl riba nan yunan chikí, etcetera. Beibel por yuda nan? Klaru ku sí.

Ora bo kuminsá un kòmbersashon, probablemente bo tin un tema na mente. Sin embargo, si e persona indiká ku tin un otro asuntu ta preokup’é, no vasilá pa papia tokante loke ta interes’é, i si no por e ora ei, ofresé pa bolbe bèk ku algun informashon práktiko. Naturalmente nos ta evitá di “mete den asuntu di otro hende,” pero gustosamente nos ta kompartí ku nan e konseho práktiko ku Beibel ta duna. (2 Tes. 3:11) Pues ta bisto ku loke lo impreshoná hende mas tantu ta konseho bíbliko ku ta toka nan bida.

Si hende no por mira kon nos mensahe ta toka nan personalmente, mesora nan lo por para e kòmbersashon. Asta ora nan laga nos papia mes, si nos no mustra nan e balor práktiko di e mensahe, ta probabel ku lo e tin masha tiki efekto riba nan bida. Di otro banda, si nos mustra nan kon práktiko nos mensahe ta, nos kòmbersashon lo por trese un kambio desisivo den nan bida.

Ora nos ta kondusí studio di Beibel, enfatisá e balor práktiko di e informashon na tur momentu. (Pro. 4:7) Nos mester yuda e studiantenan komprondé e konsehonan, e prinsipionan i e ehèmpelnan bíbliko ku ta mustra nan kon pa kana den e kaminda di Yehova. Enfatisá e benefisionan ku nan lo risibí si nan hasi esei. (Isa. 48:17, 18) Esaki lo motivá e studiantenan pa hasi e kambionan nesesario den nan bida. Kultivá den nan amor pa Yehova i un deseo di agrad’é, i laga e motivashon pa apliká e Palabra di Dios sali di nan kurason.