Kon pa Prepará Diskurso pa Kongregashon

E PROGRAMA di Skol di Ministerio Teokrátiko a ser prepará pa benefisio di henter e kongregashon. Tambe na e otro reunionnan di kongregashon i na asamblea- i kongresonan e rumannan ta presentá informashon balioso. Si bo tin ku presentá un parti den un di e programanan aki, bo a haña un responsabilidat serio. Apòstel Pablo a konsehá e superintendente kristian Timoteo pa paga bon tinu na su siñansa. (1 Tim. 4:16) E personanan presente na reunionnan kristian a apartá tempu balioso—i tin bes a hasi masha hopi esfuerso—pa ta presente pa risibí instrukshon den asuntunan ku tin di haber ku nan relashon ku Dios. Komo ku ta un gran privilegio di por duna tal instrukshon, kon bo por hasié bon?

Puntonan Sobresaliente di Lesamentu di Beibel

E sekshon aki di e skol ta basá riba e lesamentu di Beibel programá pa kada siman. Bo mester enfatisá e importansia ku e informashon tin pa nos awe. Manera Nehemías 8:8 ta informá, Èsdras i su kompañeronan a lesa públikamente for di e Palabra di Dios, i a splik’é “pa duna e nifikashon” i yuda e hendenan komprond’é. Ora bo ta enkargá ku puntonan sobresaliente di Beibel bo tambe tin chèns di hasi meskos.

Kon bo mester prepará e diskurso aki? Si ta posibel, lesa e porshon asigná di Beibel un siman òf mas di antemano i pensa riba e nesesidatnan di bo kongregashon. Hasi orashon na Yehova tokante e asuntu aki. Ki konsehonan, kua ehèmpelnan òf kua prinsipionan den e porshon aki di e Palabra di Dios ta apliká na e nesesidatnan ei?

Investigashon ta esensial. E Watchtower Library riba CD-ROM òf e Indèks di Publikashonnan Watch Tower ta disponibel den un idioma ku bo ta komprondé? Si ta asina, hasi bon uso di nan. Dor di investigá kiko a ser publiká riba e versíkulonan ku bo a skohe pa konsentrá ariba, lo bo por haña informashon históriko ku ta klarifiká nan, splikashon di e kumplimentu di profesianan, análisis di loke sierto versíkulonan ta revelá tokante Yehova òf aklarashon di prinsipionan bíbliko. No purba amplia riba demasiado punto. Ta mihó bo konsentrá riba un par di versíkulo i splika nan bon.

E asignashon aki tambe ta duna bo e oportunidat di pidi e ouditorio pa komentá riba e benefisionan ku nan a saka di e lesamentu di Beibel di e siman ei. Kiko nan a topa ku lo benefisiá nan den nan studio personal i di famia òf den nan sirbishi òf estilo di bida? Ki kualidatnan Yehova a demostrá den su trato ku hende i nashonnan? Kiko e ouditorio a siña ku a fortalesé nan fe i duna nan mas apresio pa Yehova? En bes di konsentrá riba detayenan tékniko i kompliká, enfatisá e nifikashon i balor práktiko di e puntonan ku bo a skohe.

Diskurso di Instrukshon

Esaki ta basá riba un artíkulo di E Toren di Vigilansia òf Spièrta! òf por ta un sekshon di un buki. Den mayoria kaso tin mas ku sufisiente informashon pa e tempu asigná. Kiko e asignashon aki ta eksigí di bo? Wèl, pa e diskurso aki bo mester ta un maestro, kier men, bo no mester djis kubri e informashon. Un superintendente mester tin “kapasidat pa siña hende.”—1 Tim. 3:2.

Kuminsá ku studia e informashon asigná. Buska e tekstonan bíbliko i meditá. Purba hasi esei hopi promé ku e fecha di bo diskurso. Kòrda ku e rumannan ta ser animá pa lesa e informashon di antemano. E idea no ta pa bo djis repasá òf duna un resúmen di e informashon, sino pa mustra kon pa aplik’é. Usa puntonan di e informashon ku ta al kaso, den un manera ku realmente lo benefisiá e kongregashon.

Meskos ku kada mucha tin su propio personalidat, kada kongregashon tin su karakterístikanan úniko. Un mayor ku ta eduká su yu bon no ta djis bis’é kiko ta e reglanan moral. Mas bien, e ta rasoná ku e yu, i ta tene kuenta ku e yu su karakter i ku e problemanan ku e yu ta konfrontá. Asina tambe, maestronan den e kongregashon ta sòru pa nan haña sa kiko ta e nesesidatnan di e grupo ku nan ta papia kuné i ta trata esei. Sin embargo, un maestro huisioso lo no usa ehèmpelnan ku lo brongosá un persona den ouditorio. Lo e indiká kiko ta e benefisionan ku e kongregashon ya kaba ta disfrutando di dje dor ku nan ta kana den e kaminda di Yehova, i resaltá konseho bíbliko ku lo yuda e kongregashon superá e problemanan ku nan ta konfrontá.

Bon manera di siña ta toka kurason di esnan den ouditorio. Djis menshoná echo no ta sufisiente; bo tin ku mustra tambe e balor di e echonan presentá. Bo mester ta sinseramente interesá den esnan ku ta skucha bo. Wardadónan spiritual mester konosé e tou i tene na mente e problemanan ku vários ruman ta konfrontá, pasobra asina nan lo por animá nan ku palabranan ku ta reflehá komprenshon, kompashon i empatia.

Bon maestronan sa ku un diskurso mester tin un meta bon kla definí. Mester presentá e informashon di tal manera ku e puntonan klave ta sobresalí i lo ser kòrdá. E ouditorio mester por bai kas ku ideanan práktiko ku lo influensiá nan bida.

Reunion di Sirbishi

Ora bo tin ku duna diskursonan basá riba un artíkulo di Nos Ministerio di Reino bo ta haña bo ku un otro reto. Aki no ta kuestion di djis skohe loke ta mas apropiá, sino hopi bes bo tin ku transmití tur e informashon programá n’e ouditorio. Yuda e ouditorio komprondé kon e tekstonan bíbliko ta apoyá e konsehonan ku nan ta haña. (Tito 1:9) E tempu ta limitá, i den mayoria kaso esei lo no permití bo agregá mas informashon.

Por sosodé tambe ku lo bo tin ku duna un diskurso ku no ta basá riba un artíkulo den Nos Ministerio di Reino. Podisé e asignashon ta referí na un artíkulo di E Toren di Vigilansia òf bo mester traha un diskurso for di un par di frase kòrtiku. Ta keda na abo komo maestro pa presentá e informashon asigná den kuadro di e nesesidatnan di e kongregashon. Kisas bo tin ku usa un ilustrashon kòrtiku i al kaso òf konta un eksperensia ku ta pas. Kòrda ku bo meta no ta pa djis papia riba e tema, sino present’é di tal manera ku e ta yuda e kongregashon kumpli ku e trabou ku e Palabra di Dios ta deskribí i haña goso den hasi esei.—Echo. 20:20, 21.

Segun bo ta prepará bo asignashon, pensa riba e sirkunstansianan di e personanan ku ta forma e kongregashon. Elogiá nan pa loke nan ta hasiendo kaba. Mustra nan kon dor di pone na práktika e sugerensianan ku e informashon programá ta duna, nan por bira mas efikas i sinti nan mes mas kontentu den sirbishi di vèlt.

Bo asignashon ta inkluí un demostrashon òf entrevista? Si ta asina, bo mester prepar’é hopi tempu di antemano. Kisas bo tin gana di djis enkargá un otro persona ku esei, pero no ta semper esaki ta produsí e mihó resultado. Te kaminda ta posibel, train e demostrashon òf entrevista promé ku e dia di reunion, i hasi sigur ku nan ta ser presentá di un manera ku ta duna realse n’e instrukshon.

Asamblea- i Kongresonan

Ku tempu kisas nan ta pidi ruman hòmbernan ku tin ekselente kualidatnan spiritual i ku ta oradó i maestro efikas pa partisipá den e programa di un asamblea òf kongreso. E tipo di reunionnan aki ta realmente okashonnan spesial pa edukashon teokrátiko. Un asignashon asina por bini den forma di un manuskrito òf diskurso pa ser lesá, un boskeho òf skema, instrukshonnan pa supervisá un drama bíbliko ku tin aplikashon moderno òf un paragraf ku ta duna bo instrukshon pa bo diskurso. Ora bo haña e privilegio di sirbi den un programa asina, studia e informashon ku bo risibí bon te ora ku bo ta komprondé dikon e ta balioso.

E ruman asigná ku un diskurso basá riba manuskrito mester lesa e informashon manera e ta pará skirbí, sin usa otro palabra òf kambia e órden di e informashon. E ta studi’é pa sa bon kla kiko ta e puntonan prinsipal i kon nan ta wòrdu spliká. E ta train lesa na bos haltu te ora ku e por presentá e diskurso ku e debido énfasis, entusiasmo, bondat, sintimentu, sinseridat i konvikshon. Tambe e ta sòru pa su volúmen i intensidat ta adekuá pa un ouditorio grandi.

Si un diskurso ta basá riba un boskeho, e oradó tin e responsabilidat di desaroyá e informashon pegando estrechamente na e boskeho. En bes di djis lesa algun frase for di e boskeho durante e diskurso òf prepar’é den forma di un diskurso lesá, e oradó mester ekspresá su mes ku naturalidat i sintimentu. Ta importante pa e mantené su mes na e tempu ku e boskeho ta stipulá ya ku asina e por presentá kada punto prinsipal ku klaridat, hasiendo bon uso di e ideanan i tekstonan bíbliko ku ta apoyá nan. Si te na ora mes e agregá algun punto ku e mes ta gusta, esakinan no mester bai a kosto di loke ta den e boskeho. Klaru ku ta e Palabra di Dios ta e fundeshi di nos instrukshon. Ansianonan kristian tin e responsabilidat di “prediká e palabra.” (2 Tim. 4:1, 2) P’esei un oradó mester duna atenshon spesial na e tekstonan bíbliko menshoná den e boskeho, usando nan pa rasoná i mustra kon nan ta apliká.

No Posponé Bo Preparashon

Bo ta sirbi den un kongregashon kaminda tin hopi oportunidat di duna diskurso? Kon bo por duna e debido atenshon na nan tur? Dor di no prepará bo partinan na último ora.

Pa un diskurso realmente benefisiá e kongregashon ta nesesario pa bo pensa riba dje di antemano. P’esei, kustumbrá lesa e informashon asina ku bo risibí un asignashon. Di e manera ei, lo bo por pensa riba dje segun ku bo ta atendé bo otro aktividatnan. Durante e dianan òf simannan promé ku bo duna bo diskurso, kisas bo ta tende komentarionan ku ta yuda bo mira kua ta e mihó manera pa apliká e informashon. Òf podisé ta surgi situashonnan ku ta mustra kon oportuno e informashon ta. Ta tuma tempu pa lesa i meditá riba bo asignashon asina ku bo hañ’é, pero esaki ta tempu bon invertí. Ora ku por fin bo kai sinta pa prepará kon bo ta bai desaroyá e ideanan di e boskeho, lo bo kosechá e benefisionan di a pensa bon riba dje di antemano. Si bo trata bo asignashonnan den e manera aki, lo bo ta hopi ménos nervioso i lo bo por presentá e informashon den un manera ku ta práktiko i ku ta yega na kurason di e rumannan den kongregashon.

Na e grado ku bo ta apresiá e don enkargá na bo pa partisipá den e programa edukativo ku Yehova ta brinda su pueblo, lo bo onra Yehova i lo bo ta un bendishon pa esnan ku ta stim’é.—Isa. 54:13; Rom. 12:6-8.