Kapítulo Diestres
Un Multitut Grandi Dilanti di e Trono di Yehova
1. (a) Promé ku sirbidónan di Dios dje tempu pre-kristian òf e 144.000 risibí nan rekompensá, kiko mester pasa ku nan? (b) Kiko lo ta posibel pa “un multitut grandi” ku ta na bida awor den nos tempu?
FOR di Abel te Huan Boutista, fiel sirbidónan di Yehova a pone e boluntat di Dios na promé lugá den nan bida. No opstante, nan tur a muri i ta warda riba nan resurekshon pa bida riba tera den Dios su mundu nobo. E 144.000, ku lo goberná ku Kristu den Dios su Reino selestial, tambe tin ku muri promé ku nan por risibí nan rekompensa. Sin embargo, Revelashon 7:9 ta mustra ku den e último dianan aki lo tin “un multitut grandi” di hende di tur nashon ku lo no muri. Mas bien, nan tin e speransa di biba pa semper riba tera. Abo ta den e multitut ei?
Identidat di e Multitut Grandi
2. Kiko a yuda klarifiká ken ta e multitut grandi di Revelashon 7:9?
2 Na aña 1923, sirbidónan di Yehova a komprendé ku “e karnénan” di Hesus su komparashon na Mateo 25:31-46 i e “otro karnénan” ku el a papia di dje na Huan 10:16, ta hende ku lo tin e oportunidat di biba pa semper riba tera. Na 1931, nan a komprendé ku e personanan deskribí na Ezekiel 9:1-11 ku ta risibí un marka riba nan frenta, tambe tabata referí na hende ku tin speransa di biba riba tera. Anto na 1935, nan a haña sa ku e multitut grandi ta forma parti dje grupo ku Hesus a yama e otro karnénan. Awe, e multitut grandi bendishoná ei ta konsistí di miónes di hende.
3. Dikon e ekspreshon “pará dilanti di e trono” no ta referí na un grupo selestial?
3 No ta den shelu e multitut grandi menshoná na Revelashon 7:9 ta. Djis pasobra nan ta “pará dilanti di e trono” di Dios no ta nifiká ku nan mester ta den shelu. Nan ta simplemente dilanti e bista di Dios. (Salmo 11:4) E echo ku e multitut grandi, “ku ningun hende no por a konta,” no ta un grupo selestial ta keda komprobá dor di kompará su kantidat ku no ta ser spesifiká, ku loke tin pará skirbí na Revelashon 7:4-8 i Revelashon 14:1-4. Einan Beibel ta revelá ku e kantidat di hende tumá for di tera pa bai shelu ta 144.000.
4. (a) Kiko ta “e gran tribulashon” ku e multitut grandi ta sobrebibí? (b) Manera Revelashon 7:11 i 12 ta deklará, ken ta opservá e multitut grandi i ta adorá Dios huntu ku nan?
4 Revelashon 7:14 ta bisa dje multitut grandi: “Esakinan ta esnan ku a sali for di e gran tribulashon.” Nan ta sobrebibí e tempu di mas difísil ku hende a yega di pasa aden. (Mateo 24:21) Ora ku nan ta gradisí Dios i Kristu pa nan salbashon, tur fiel kriatura den shelu lo bisa huntu ku nan: “Amèn, bendishon i gloria i sabiduria i gradisimentu i onor i poder i fortalesa sea na nos Dios pa semper i semper. Amèn.”—Revelashon 7:11, 12.
Nan Ta Duna Prueba di Ta Digno
5. Kon nos por haña sa kiko ta ser eksigí di e multitut grandi?
5 Pa e multitut grandi skapa e gran tribulashon, nan mester kumpli ku rekisitonan ku ta na armonia ku e normanan hustu di Yehova. Beibel ta papia bon kla dje kualidatnan ku ta identifiká esnan ku lo skapa. Pues, amantenan di hustisia por aktua awor di tal manera ku nan ta duna prueba di ta digno pa sobrebibí. Kiko nan tin ku hasi?
6. Pakiko ta na su lugá pa kompará e multitut grandi ku karné?
6 Karné ta bestia mansu i sumiso. P’esei ora Hesus a bisa ku e tin otro karné ku no ta dje grupo selestial, e tabata kier men hende ku no solamente kier biba pa semper riba tera, sino ku tambe lo ta sumiso na su siñansanan. El a bisa: “Mi karnénan ta tende mi bos, i mi konosé nan, i nan ta sigui mi.” (Huan 10:16, 27) Esakinan ta hende ku realmente ta skucha Hesus i obedes’é den tur kos. Asina nan ta bira su disipel.
7. Ki otro kualidatnan e siguidónan di Hesus tin ku kultivá?
7 Ki otro kualidat kada un dje siguidónan aki di Hesus tin ku kultivá? E Palabra di Dios ta kontestá: “En kuanto boso manera di biba di ántes, boso pone un banda e hende bieu ku ta wòrdu korumpí konforme e pashonnan engañoso, i . . . boso bisti e hende nobo, ku a wòrdu kreá segun Dios den hustisia i santidat berdadero.” (Efesionan 4:22-24) Nan tin ku kultivá kualidatnan ku ta fortalesé e union di Dios su sirbidónan: “amor, goso, pas, pasenshi, kariño, bondat, fieldat, mansedumbre, dominio propio.”—Galationan 5:22, 23.
8. Kiko e multitut grandi lo konfrontá ora nan ta apoyá e restu?
8 E multitut grandi ta apoyá e kantidat chikí di esnan ku tin speransa selestial, i ku ta hiba delantera den e trabou di prediká. (Mateo 24:14; 25:40) E otro karnénan ta apoyá nan, maske e karnénan sa ku nan lo konfrontá oposishon, ya ku na prinsipio dje último dianan aki, Kristu Hesus i su angelnan a saka Satanas i su demoñonan for di shelu. Esaki a nifiká “ai di tera . . . pasobra Diabel a baha bin serka boso ku gran furia, sabiendo ku ta ked’é solamente un poko tempu mas.” (Revelashon 12:7-12) Pues, Satanas ta oumentá su oposishon kontra e sirbidónan di Dios segun ku fin dje sistema aki ta yega serka.
9. Kiko e sirbidónan di Dios a logra ku nan trabou di prediká e bon nobo, i kon bin?
9 Apesar di persekushon kruel, e trabou di prediká ta sigui bai dilanti. Na fin di Promé Guera Mundial tabatin apénas un par di mil proklamadó di Reino, awor tin miónes, pasobra Yehova a primintí: “Ningun arma ku wòrdu formá kontra bo lo no prosperá.” (Isaías 54:17) Asta un miembro dje korte supremo hudiu a rekonosé ku hende no por frustra un trabou di Dios. El a bisa e fariseonan den promé siglo relashoná ku e disipelnan: “Laga nan na pas; pasobra si e plan òf trabou aki ta di hende, e lo wòrdu destruí, ma si ta di Dios e ta, boso lo no por tumba nan; asta boso por haña boso ta bringa kontra Dios.”—Echonan 5:38, 39.
10. (a) Kiko “e marka” ku tin riba esnan dje multitut grandi ta nifiká? (b) Kon e sirbidónan di Dios awe ta obedesé “e bos for di shelu”?
10 Beibel ta presentá e hendenan dje multitut grandi komo si fuera marká pa sobrebibí. (Ezekiel 9:4-6) “E marka” ta e evidensia ku nan ta dediká na Yehova, batisá komo disipel di Hesus i ta hasiendo esfuerso pa kultivá un personalidat semehante na esun di Kristu. Nan ta obedesé e “bos for di shelu” ku ta bisa tokante Satanas su imperio mundial di religion falsu: “Sali for di dje, mi pueblo, pa bo no partisipá den su pikánan i pa bo no risibí di su plaganan.”—Revelashon 18:1-5.
11. Den ki manera importante e multitut grandi ta demostrá ku nan ta sirbidó di Yehova?
11 Tambe Hesus a bisa su siguidónan: “Na esaki tur hende lo sa ku boso ta mi disipel, si boso tin amor un pa otro.” (Huan 13:35) Na kontraste, miembronan di religionnan dje mundu aki ta mata otro den guera, hopi bes djis pasobra nan ta di otro nashonalidat! E Palabra di Dios ta deklará: “Na esaki e yunan di Dios i e yunan di Diabel ta konosí: esun ku no ta praktiká hustisia no ta di Dios, ni esun ku no ta stima su ruman. . . . Nos mester stima otro; no manera Kain, kende tabata di e malbado, i a mata su ruman.”—1 Huan 3:10-12.
12. Den e gran tribulashon, kiko Yehova lo hasi ku ‘palunan’ religioso ku ta duna mal fruta?
12 Hesus a deklará: “Tur bon palu ta duna bon fruta; ma e palu malu ta duna mal fruta. Un bon palu no por duna mal fruta, ni un palu malu no por duna bon fruta. Tur palu ku no ta duna bon fruta ta wòrdu gekap i tirá den kandela. Asina anto, na nan fruta boso lo konosé nan.” (Mateo 7:17-20) E fruta ku religionnan dje mundu aki ta produsí ta identifiká nan komo “palu” putrí ku pronto Yehova lo destruí den e gran tribulashon.—Revelashon 17:16.
13. Kon e multitut grandi ta demostrá ku unidamente nan ta “pará dilanti di e trono” di Yehova?
13 Revelashon 7:9-15 ta mustra kiko ta e faktornan ku ta kontribuí na salbashon di e multitut grandi. E teksto ta mustra ku unidamente nan ta “pará dilanti di e trono” di Yehova, apoyando su derecho di ta gobernante supremo dje universo. Nan “a laba nan pañanan i a hasi nan blanku den e sanger di e Lamchi,” demostrando asina ku nan ta rekonosé e sakrifisio di Hesus ku ta kita pika. (Huan 1:29) Nan a dediká nan mes na Dios i a simbolisá esaki pa medio di boutismo den awa. Pues nan ta gosa di un kondishon limpi dilanti Dios, representá dor di nan paña blanku, i nan ta “sirbié di dia i anochi.” Tin maneranan ku abo por pone bo bida mas na armonia ku loke ta ser deskribí aki?
Benefisionan Aktual
14. Kua ta algun benefisio úniko ku sirbidó di Yehova ta risibí for di awor?
14 Probablemente bo a opservá e benefisionan úniko ku hende ku ta sirbi Yehova ta risibí for di awor. Por ehèmpel, ora bo a siña tokante e propósitonan hustu di Yehova, bo a komprendé ku tabatin un speransa briante pa futuro. Pues awor bo tin un berdadero propósito den bo bida: sirbi e Dios berdadero ku e perspektiva gososo di bida eterno riba e tera kombertí den un paradeis. Sí, e Rei Hesukristu “lo guia [e multitut grandi] hiba na fuentenan di e awa di bida.”—Revelashon 7:17.
15. Kon Testigunan di Yehova ta benefisiá dor di tene nan mes na prinsipionan bíbliko relashoná ku asuntunan polítiko i moral?
15 Un otro benefisio maravioso ku e multitut grandi ta disfrutá di dje ta e amor, union i armonia ku tin entre sirbidónan di Yehova rònt mundu. Komo ku nos tur ta nutri nos mes ku e mesun alimento spiritual, nos tur ta obedesé e mesun lei i prinsipionan ku tin den e Palabra di Dios. Ta p’esei ni ideologianan polítiko ni nashonal no ta kousa desunion den nos. Tambe nos ta tene nos mes na e normanan moral haltu ku Dios ta eksigí di su pueblo. (1 Korintionan 6:9-11) Pues, en bes di eksperensiá e konflikto, desunion i inmoralidat ku ta reina den mundu, e pueblo di Yehova ta disfrutá di loke nos por yama un paradeis spiritual. Nota kon e ta ser deskribí na Isaías 65:13 i 14.
16. Apesar di problemanan komun di bida, ki speransa e multitut grandi tin?
16 Nò, Yehova su sirbidónan humano no ta perfekto. Nan tambe ta ser afektá dor dje problemanan komun di bida den e mundu aki. Por ehèmpel, nan ta pasa den berans òf ta bira víktima inosente den guera dje nashonnan. Tambe nan ta konfrontá malesa, sufrimentu i morto. Pero nan tin fe ku den e mundu nobo, Dios “lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló.”—Revelashon 21:4.
17. Maske kiko sosodé ku nos awor, ki futuro maravioso ta spera esnan ku ta adorá e Dios berdadero?
17 Asta si bo pèrdè bo bida awor debí na behes, malesa, un aksidente òf persekushon, Yehova lo resusitá bo pa biba den Paradeis. (Echonan 24:15) E ora ei lo bo sigui disfrutá di un bankete spiritual durante di Kristu su Reinado di Mil Aña. Bo amor pa Dios lo krese segun ku bo ta mira su propósitonan alkansá nan glorioso realisashon. I e bendishonnan físiko ku Yehova lo perkurá e tempu ei lo laga bo amor p’e krese mas ainda. (Isaías 25:6-9) Esta un futuro maravioso ta spera e pueblo di Dios!
Komo Repaso
• Beibel ta asosiá e multitut grandi ku ki suseso ekstraordinario?
• Si di bèrdat nos kier ser kontá den e multitut grandi ei ku ta disfrutá di Dios su aprobashon, kiko nos tin ku hasi awor?
• Kon importante e bendishonnan ku e multitut grandi ta disfrutá di dje awor—i ku nan lo bai disfrutá di dje despues den Dios su mundu nobo—ta pa bo?
[Plachi na página 123]
Miónes di hende dje multitut grandi unidamente ta adorá e Dios berdadero