Kapítulo Dieseis

“Keda Ferviente den Boso Amor pa Otro”

1. Kiko hopi bes ta impreshoná hende ku kuminsá asistí na e reunionnan di Testigunan di Yehova?

ORA hende kuminsá asistí na e reunionnan di Testigunan di Yehova, hopi bes nan ta keda impreshoná ku e amor demostrá einan. Nan ta mira e amor den e manera ku ta risibí nan i den e kompañerismo kariñoso. Hende ku bishitá nos kongresonan tambe ta ripará e amor aki. Un reportero a skirbi tokante nos kongreso: ‘No tin hende drogá ni burachi. Ningun bochincha ni gritamentu. Ni pushamentu ni stotmentu. Ningun hende ta zundra ni papia palabra malu. No tin chiste sushi ni papiamentu di disparate. Ningun hende ta huma. Ni hòrta. Ningun hende ta tira kùp abou. Esei sí tabata straño.’ Tur esaki ta prueba di amor, e klase di amor ku “no ta komportá su mes indesente; [ku] no ta buska su propio interes.”—1 Korintionan 13:4-8.

2. (a) Ku tempu, kiko mester ta bisto en kuanto e amor ku nos ta demostrá? (b) Imitando Kristu, ki klase di amor nos tin ku kultivá?

² Amor fraternal ta e marka ku ta distinguí kristiannan berdadero. (Huan 13:35) Segun ku nos ta krese spiritualmente, nos ta siña ekspresá amor mas plenamente. Apòstel Pablo a pidi den orashon pa e amor di kristiannan “por abundá mas i mas ainda.” (Filipensenan 1:9) Apòstel Huan a indiká ku nos amor mester ta un amor di sakrifisio propio. El a skirbi: “Na esaki nos konosé amor, ku [e Yu di Dios] a entregá su bida pa nos; i nos mester entregá nos bida pa e rumannan.” (1 Huan 3:16; Huan 15:12, 13) Di bèrdat nos lo entregá nos bida pa nos rumannan? Ounke mayoria situashon no ta eksigí esei, te na ki grado nos ta dispuesto pa hasi un esfuerso èkstra pa yuda nan awor, asta ora esei no ta kumbiní nos?

3. (a) Den ki manera nos lo por ekspresá nos amor mas plenamente? (b) Pakiko ta vital pa nos keda ferviente den nos amor pa otro awor?

³ Huntu ku nos obranan ku ta reflehá un aktitut di sakrifisio propio, nos mester tin un kariño sinsero pa nos rumannan. E Palabra di Dios ta urgi nos: “Stima otro ku amor fraternal.” (Romanonan 12:10) Nos tur tin e amor ei pa algun hende. Pero nos lo por siña stima mas hende ku e kariño ei? Segun ku fin dje sistema bieu aki ta aserká, ta vital pa nos hala mas serka di nos kompañeronan kristian. Beibel ta bisa: “Fin di tur kos ta serka; . . . Riba tur kos, keda ferviente den boso amor pa otro, pasobra amor ta kubri un multitut di piká.”—1 Pedro 4:7, 8.

Ora Surgi Problema

4. (a) Dikon por surgi problema entre miembronan di un kongregashon? (b) Ounke no ta semper nos ta inkliná na apliká e konseho di Beibel, ki bon resultado nos por tin si nos hasié tòg?

⁴ Pero tanten ku nos ta imperfekto, lo tin biaha ku nos ta hasi kosnan ku ta ofendé otro hende. Nos rumannan tambe por peka kontra nos den vários manera. (1 Huan 1:8) Si bo haña bo den un situashon asina, kiko bo mester hasi? E Skritura ta duna e guia nesesario. Pero loke e ta bisa podisé no ta kuadra ku loke nos komo hende imperfekto ta inkliná na hasi. (Romanonan 7:21-23) No opstante, si nos ta apliká ku empeño e konseho ku Beibel ta kontené, esei lo duna evidensia di nos deseo sinsero di agradá Yehova. Tambe esei lo mehorá e kalidat di nos amor pa otro hende.

5. Dikon nos no mester tuma vengansa si un hende ofendé nos?

⁵ Tin biaha ora hende ta sinti nan ofendí, nan ta buska manera pa tuma vengansa kontra esun ku a ofendé nan. Pero ta pió so esei ta hasi e situashon. Si mester paga e hende bèk, nos mester laga esei den man di Dios. (Proverbionan 24:29; Romanonan 12:17-21) Tin hende ta purba evitá kontakto ku esun ku a ofendé nan. Pero nos no mester hasi asina ku nos kompañeronan di adorashon, pasobra amor pa nos rumannan ta un di e rekisitonan pa Dios aseptá nos adorashon. (1 Huan 4:20) P’esei Pablo a skirbi: “Boso soportá otro i pordoná otro, si un di boso tin un keho kontra un otro; meskos ku Señor a pordoná boso, asina boso tambe mester hasi.” (Kolosensenan 3:13) Abo por hasi esei?

6. (a) Kuantu bes nos tin ku pordoná nos ruman? (b) Kiko nos tin ku rekonosé tokante nos mes pa por trata ku un piká kometé kontra nos?

⁶ Kiko si un persona ta peka kada bes kontra nos, pero e no ta kometé pikánan serio pa kua nan por sak’é for dje kongregashon? Pa pikánan menor asina, apòstel Pedro a sugerí pa pordoná “te shete bes.” Pero Hesus a bisa: “No te shete bes, sino te setenta bes shete.” Ku un ilustrashon el a enfatisá kon grandi nos debe serka Dios ta na komparashon ku loke kualkier hende por debe nos. (Mateo 18:21-35) Den hopi manera nos ta peka kontra Dios tur dia, sin realisá mes ku nos ta pekando—tin biaha dor di hasi algu egoista, dor di loke nos ta bisa òf pensa, òf dor di loke nos ta keda sin hasi. (Romanonan 3:23) Sin embargo, Dios ta sigui mustra miserikòrdia na nos. (Salmo 103:10-14; 130:3, 4) E ta eksigí pa nos ta mesun miserikòrdioso ku otro hende. (Mateo 6:14, 15; Efesionan 4:1-3) E ora ei nos ta praktiká e klase di amor ku “no ta warda renkor.”—1 Korintionan 13:4, 5; 1 Pedro 3:8, 9.

7. Kiko nos mester hasi si un ruman tin algu kontra nos?

⁷ Tin biaha nos ta realisá ku maske nos no tin renkor kontra nos ruman, e sí tin algu kontra nos. Nos por skohe pa ‘kubri e piká ku amor,’ manera 1 Pedro 4:8 ta sugerí. Òf nos por tuma e inisiativa pa papia kuné i purba trese pas bèk den e relashon.—Mateo 5:23, 24.

8. Si un kompañero di kreensia ta hasi algu ku ta iritá nos, kiko nos por hasi al respekto?

⁸ Podisé un kompañero di kreensia tin algu ta hasi ku ta iritá bo i tambe otro hende. Lo no ta bon pa papia kuné? Kisas. Si abo personalmente splik’é e problema na un manera bondadoso, esaki por duna bon resultado. Pero promé bo tin ku puntra bo mes: ‘Di bèrdat e ta hasiendo algu ku ta kontra di loke Beibel ta bisa? Òf e problema ta sinta prinsipalmente den e echo ku mi kustumbernan i kriansa ta diferente for di esnan di dje?’ Tene kuidou pa bo no fiha bo propio normanan anto husga hende segun esakinan. (Santiago 4:11, 12) Yehova ta aseptá hende di tur sorto di antesedente sin hasi distinshon di persona, i e ta tene pasenshi ku nan segun ku nan ta krese spiritualmente.

9. (a) Ken ta duna atenshon na kasonan di malecho serio den e kongregashon? (b) Ki ora ta e responsabilidat di e persona ku nan a peka kontra dje pa é dal e promé paso, i ku ki meta?

⁹ Si un hende den kongregashon ta enbolbí den malecho serio, manera por ehèmpel inmoralidat, mester duna atenshon mesora na esei. Ken mester duna e atenshon ei? E ansianonan. (Santiago 5:14, 15) Sin embargo, si a kometé un piká kontra un persona, podisé den un asuntu di negoshi òf un hende a papia algu perhudisial ku a ofendé e persona aki, e persona ku nan a peka kontra dje mester kuminsá na purba aserká den privá esun ku a ofend’é. (Mateo 18:15) Si esei no solushoná e asuntu, mester dal mas paso, manera Mateo 18:16 i 17 ta deskribí. Amor pa nos ruman ku a faya i un deseo pa “gana” nos ruman, lo yuda nos hasi esaki di un manera ku ta alkansá su kurason.—Proverbionan 16:23.

10. Ora surgi un problema, kiko lo yuda nos mira e asuntu korektamente?

¹⁰ Ora surgi un problema, sea ku e ta grandi òf chikí, nos lo benefisiá si nos purba komprendé kon Yehova ta mir’é. E no ta aprobá di ningun klase di piká, i na su debido tempu, e ta saka for di su organisashon tur hende ku ta praktiká piká sin repentí. Sin embargo, laga nos no lubidá ku nos tur ta peka den maneranan ménos serio i ku nos tin mester di Yehova su pasenshi i miserikòrdia. Pues nos tin Yehova su ehèmpel pa imitá ora nos ta konfrontá e pikánan di otro hende. Ora nos mustra miserikòrdia, nos ta reflehá su amor.—Efesionan 5:1, 2.

Buska Maneranan pa ‘Hancha Nos Kurason’

11. Dikon Pablo a animá e korintionan pa ‘hancha nan kurason’?

¹¹ Pablo a pasa hopi luna fortalesiendo e kongregashon na Korinto, Gresia. El a traha duru pa yuda e rumannan einan, i e tabata stima nan. Pero algun di nan no tabatin kariño p’e. Nan tabata masha krítiko. El a urgi nan pa ‘hancha nan kurason’ pa ekspresá kariño. (2 Korintionan 6:11-13; 12:15) Ta bon pa nos kada un wak te na ki grado nos ta ekspresá amor na otro hende i buska maneranan pa hancha nos kurason.—1 Huan 3:14.

12. Kon nos amor pa tur hende den kongregashon por krese?

¹² Tin hende den kongregashon ku nos ta haña ta difísil pa sera ku nan? Si nos hasi èkstra esfuerso pa pasa por haltu di kualkier diferensia di personalidat ku tin—manera nos lo kier pa nan hasi ku nos—esaki por drecha nos relashon ku nan. Nos sintimentunan pa nan por drecha tambe si nos buska nan bon kualidatnan i konsentrá riba esakinan. Esaki sigur lo pone nos amor pa nan krese.—Lukas 6:32, 33, 36.

13. Kon nos por hancha nos kurason mas tantu pa mustra amor na esnan den nos kongregashon?

¹³ Ta sierto ku tin límite na loke nos por hasi pa otro hende. Kisas nos no por kumindá tur hende na tur reunion. Kisas no ta posibel pa nos inkluí tur hende ora nos ta invitá amigunan pa un komementu. Pero nos lo por hancha nos kurason mas tantu dor di tuma djis un par di minüt pa siña konosé un hende den nos kongregashon mas mihó? Nos lo por invitá de bes en kuando un hende ku nos no konosé dje bon ei pa nos traha kuné den sirbishi di fèlt?

14. Ora nos ta entre kristiannan ku nunka nos no a topa, kon nos por demostrá amor ferviente pa otro?

¹⁴ Kongresonan kristian ta un bon oportunidat pa nos hancha nos kurason pa demostrá amor. Podisé tin míles di hende presente. Nos no por sera konosí ku nan tur, pero nos por komportá nos mes di tal manera ku ta mustra ku nos ta pone nan bienestar promé ku nos kumbinensia. Entre e seshonnan, nos por demostrá interes personal dor di tuma inisiativa pa sera konosí ku algun hende rònt di nos. Un dia, tur hende ku ta biba riba tera lo ta nos ruman, uní den adorashon dje Dios berdadero i Tata di nos tur. Ki un goso lo ta e ora ei pa siña konosé otro! Amor ferviente lo impulsá nos di kier hasi esei. Dikon no kuminsá for di awor?

Komo Repaso

• Ora surgi problema entre kristiannan, kon mester solushoná nan, i dikon?

• Den ki maneranan nos amor tambe mester krese samsam ku nos spiritualidat?

• Kon ta posibel pa demostrá amor ferviente na mas ku solamente un grupo íntimo di amigu?

[Plachi na página 148]

Nos por demostrá amor kristian den hopi manera, por ehèmpel na reunionnan di kongregashon