Ta Esaki Tabata Dios Su Propósito?

HABRI kualke korant. Wak televishon òf skucha radio. Tin tantísimo notisia tokante kriminalidat, guera i terorismo! Pensa awor riba bo propio problemanan. Podisé malesa òf morto di un ser kerí ta kousando bo hopi angustia. Kisas bo ta sinti meskos ku e bon hòmber Jòb, kende a bisa ku e tabata ‘hoga den aflikshon.’—Jòb 10:15, BPK.

Puntra bo mes:

Ta esaki tabata Dios su propósito pa mi i pa e restu di humanidat?
Unda mi por haña yudansa pa trata ku mi problemanan?
Tin speransa ku un dia nos lo mira pas riba tera?

Beibel ta kontestá e preguntanan aki na un manera ku ta laga bo keda satisfecho.

BEIBEL TA SIÑA KU DIOS LO TRESE E KAMBIONAN AKI RIBA TERA.

“E lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló.”—Revelashon 21:4

“E kohonan lo bula manera biná.”—Isaias 35:6

“Wowo di e siegunan lo mira.”—Isaias 35:5

“Tur ku ta den graf lo . . . sali.”—Juan 5:28, 29

“Ningun habitante lo no bisa: ‘Mi ta malu.’”—Isaias 33:24

“Lo tin abundansia di maishi den e tera.”—Salmo 72:16

Dios su proposito pa tera a kumpli: Hende di edat a bira yòn, hende malu i siegu a ser kurá, e mortonan a resusitá, tin kuminda na abundansia

BENEFISIÁ DI LOKE BEIBEL TA SIÑA

No kore rechasá loke tin pará skirbí riba e páginanan anterior komo puru ilushon. Dios a primintí di kumpli ku e kosnan aki, i Beibel ta splika kon lo e hasié.

Pero Beibel ta hasi mas ku esei. E ta duna bo e yabi pa bo disfrutá di un bida di berdadero satisfakshon for di awor. Pensa un ratu riba bo preokupashonnan i problemanan. Kisas ta falta di plaka, problema di famia, salú ku ta bai atras òf morto di un ser kerí. Beibel por yuda bo trata ku problemanan djawendia, i e por duna bo alivio dor di kontestá preguntanan manera lo siguiente:

Dikon nos ta sufri?
Kon nos por trata ku e preokupashonnan di bida?
Kon nos por hasi nos bida di famia mas felis?
Kiko ta pasa ku nos ora nos muri?
Nos lo bolbe mira nos defuntunan stimá un dia?
Kon nos por ta sigur ku Dios lo kumpli ku su promesanan pa futuro?

E echo ku bo ta lesando e buki aki ta mustra ku lo bo tin gana di haña sa kiko Beibel ta siña. E buki aki lo yuda bo. Tuma nota ku na pia di kada página tin pregunta ku ta korespondé ku e paragrafnan riba e página ei. Miónes di hende a gusta e método aki di pregunta i kontesta pa analisá Beibel ku Testigunan di Yehova. Nos ta spera ku abo tambe lo disfrutá di dje. Dios bendishoná bo awor ku bo ta bai tin e eksperensia emoshonante i satisfasiente di haña sa loke Beibel ta siña realmente!