“El A Siña Obedensia”

1, 2. Dikon un tata amoroso ta keda kontentu di mira su yu obedes’é, i kon su sintimentunan ta reflehá e sintimentunan di Yehova?

UN TATA pará den bentana ta mira su yu hòmber chikí ta hunga bala pafó ku algun amiguitu. E bala ta sali for di kurá i bai kai riba kaya. E yu ta keda wak e bala ku gana di bai su tras. Un di su amiguitunan ta mand’é bai kue e bala, pero e yu ta sagudí kabes i bisa: “Mi no tin mag di bai riba kaya.” E tata ta para smail su so.

² Dikon e tata a keda asina kontentu? Pasobra el a siña su yu pa no sali riba kaya su so. Ora e mucha ta obedesé—sin sa ku su tata ta mir’é—e tata sa sigur ku su yu a siña obedensia i p’esei e yu lo ta mas safe. E tata ei ta sinti meskos ku nos Tata selestial, Yehova. Dios sa ku pa nos por keda fiel i na bida pa mira e maravioso futuro ku e tin prepará pa nos, nos tin ku siña konfi’é i obedes’é. (Proverbionan 3:5, 6) Pa logra esei, el a manda pa nos e mihó maestro humano den historia.

3, 4. Den ki sentido Hesus “a siña obedensia” i a “wòrdu hasí perfekto”? Ilustrá esei.

³ Beibel ta bisa algu asombroso tokante Hesus: “Ounke ku e tabata Yu, el a siña obedensia dor di e kosnan ku el a sufri. I despues di a wòrdu hasí perfekto, el a bira pa tur esnan ku ta obedes’é, e outor di salbashon eterno.” (Hebreonan 5:8, 9) E Yu aki a eksistí pa masha hopi siglo mes den shelu. El a mira Satanas i e otro angelnan rebelde desobedesé Dios, pero e Yu primogénito nunka a uni ku nan. Profesia inspirá a apliká e palabranan aki na Hesus: “Mi no tabata desobedesidu.” (Isaias 50:5) Pues anto, kon e palabranan “el a siña obedensia” por a apliká na e Yu perfektamente obedesidu aki? Kon un kriatura perfekto asina por a “wòrdu hasí perfekto”?

⁴ Pensa riba e ilustrashon aki. Un sòldá tin un spada di heru. Ounke e spada nunka a ser di tèst den bataya, e ta perfektamente formá i bunita diseñá. Sin embargo, e sòldá ta kambia e spada ei pa unu trahá di un metal mas fuerte, di stal sólido. E spada nobo aki sí nan a usa efektivamente kaba den bataya. Akaso esei no ta un kambio sabí? Asina tambe, e obedensia ku Hesus a demostrá promé ku el a bin na tera tabata sin defekto. Pero despues di su estadia aki riba tera, su obedensia a bira di kompletamente un otro kalidat. E obedensia a ser di tèst i, na moda di papia, a bira mas sólido. El a keda someté na pruebanan ku Hesus lo no por a konfrontá nunka den shelu.

5. Kiko a hasi e obedensia di Hesus asina importante, i kiko nos lo konsiderá den e kapítulo aki?

⁵ Obedensia tabata masha importante den Hesus su mishon riba tera. Komo “e último Adam,” Hesus a bin aki bou pa hasi loke nos promé mayor no a hasi, esta, keda obedesidu na Yehova Dios, asta bou di prueba. (1 Korintionan 15:45) Sin embargo, e obedensia di Hesus no tabata superfisial. Hesus a obedesé ku henter su mente, kurason i alma. Anto el a hasié ku goso. Hasimentu di e boluntat di su Tata tabata mas importante p’e ku kome! (Juan 4:34) Kiko por yuda nos imitá e obedensia di Hesus? Laga nos konsiderá promé kiko ta loke a motiv’é. Ora nos kultivá e mesun motivashon ku e tabatin, esei lo yuda nos resistí tentashon i tambe kumpli ku e boluntat di Dios. Despues nos lo repasá algun rekompensa ku nos lo haña ora nos ta desplegá obedensia manera Kristu.

Loke A Motivá Hesus pa Obedesé

6, 7. Menshoná algun kos ku a motivá Hesus pa obedesé.

⁶ E obedensia di Hesus a sali for di loke tabatin den su kurason. Manera nos a mira den Kapítulo 3, Kristu tabata humilde di kurason. Orguyo arogante ta pone ku hende no ta gusta obedesé, miéntras ku humildat ta yuda nos obedesé Yehova di buena gana. (Eksodo 5:1, 2; 1 Pedro 5:5, 6) Ademas, Hesus su obedensia a sali for di loke el a stima i loke el a odia.

⁷ Mas ku tur kos, Hesus a stima su Tata selestial, Yehova. Nos lo papia mas en detaye di e amor ei den Kapítulo 13. Ta e amor ei a pone Hesus desaroyá temor di Dios. Su amor pa Yehova tabata asina intenso, su rèspèt asina profundo, ku e tabatin temor di desagradá su Tata. Un di e motibunan pakiko Yehova a skucha su orashonnan ta pasobra Hesus tabatin temor di Dios. (Hebreonan 5:7, NW) Ademas, temor di Yehova ta un karakterístika sobresaliente di Hesus su gobernashon komo Rei Mesiániko.—Isaias 11:3.

8, 9. Manera a ser profetisá, kon Hesus a sinti tokante hustisia i maldat, i kon el a demostrá e sintimentunan ei bon kla?

⁸ Amor pa Yehova ta enserá tambe odia loke Yehova ta odia. Por ehèmpel, tuma nota di e siguiente profesia dirigí na e Rei Mesiániko: “Bo a stima hustisia i a odia maldat; p’esei Dios, bo Dios, a ungi bo ku e zeta di goso, mas ku bo kompañeronan.” (Salmo 45:7) E “kompañeronan” di Hesus tabata e otro reinan den e liña di desendensia di Rei David. Mas ku kualke un di nan, Hesus tabatin motibu pa sinti gran goso ora ku el a ser ungí. Dikon? Su rekompensa ta muchu mas grandi ku di nan, su reino ta infinitamente mas benefisioso. Hesus ta ser rekompensá pasobra su amor pa hustisia i su odio pa maldat a motiv’é pa obedesé Dios den tur kos.

⁹ Kon Hesus a demostrá bon kla kiko tabata su sintimentunan relashoná ku hustisia i maldat? Por ehèmpel, kon Hesus a reakshoná ora su siguidónan a obedesé su instrukshon den e trabou di prediká i a ser bendishoná ku bon resultado? El a bira sumamente kontentu. (Lukas 10:1, 17, 21) Anto kon Hesus a sinti ora e pueblo di Yerusalèm a demostrá bes tras bes un aktitut desobedesidu, rechasando su esfuerso amoroso pa yuda nan? E aktitut aki di e hendenan di e stat ei a pon’é yora. (Lukas 19:41, 42) Hesus tabata profundamente interesá den hende su kondukta, tantu bon komo malu.

10. Ki sintimentunan nos tin ku kultivá pa loke ta bon obra i malecho, i kiko lo yuda nos hasi esei?

¹⁰ Ora nos meditá riba e sintimentunan di Hesus, esei por yuda nos saminá nos propio motivashon pa obedesé Yehova. Pa imperfekto ku nos ta, nos por kultivá un amor di kurason pa bon obra i un odio sinsero kontra mal kondukta. Nos tin ku hasi orashon na Yehova i pidié yuda nos kultivá e mesun sintimentunan ku tantu e komo su Yu tin. (Salmo 51:10) Na mes momento, nos tin ku evitá kosnan ku por debilitá e sintimentunan ei. Ta sumamente importante pa nos skohe nos rekreo i amistatnan kuidadosamente. (Proverbionan 13:20; Filipensenan 4:8) Si nos kultivá e mesun motivashon manera di Kristu, nos obedensia lo no ta djis un formalidat. Nos lo hasi loke ta korekto pasobra nos ta stima hasi esei. Nos lo evitá malecho, no pasobra nos tin miedu di ser gará, sino pasobra nos ta odia tal kondukta.

E “No A Kometé Piká”

11, 12. (a) Kiko a pasa ku Hesus na prinsipio di su ministerio? (b) Na promé instante kon Satanas a tenta Hesus, i ki táktika mañoso el a usa?

¹¹ Relashoná ku su odio kontra piká, Hesus a ser di tèst for di trempan den su ministerio. Despues di su boutismo, el a pasa 40 dia i anochi den desierto sin kuminda. Na fin di e periodo ei Satanas a bin tent’é. Tuma nota kon mañoso Diabel tabata.—Mateo 4:1-11.

¹² Promé Satanas a bis’é: “Si bo ta e yu di Dios, ordená e piedranan aki pa nan bira pan.” (Mateo 4:3) Kiko Hesus a sinti despues di a yuna asina largu? Beibel ta bisa bon kla: “El a haña hamber.” (Mateo 4:2) Pues Satanas a probechá di e deseo natural pa kuminda, i sin duda el a warda deliberadamente te ora Hesus tabata den un kondishon físikamente débil. Tuma nota tambe di e palabranan provokativo ku Satanas a usa: “Si bo ta e yu di Dios.” Satanas tabata sa ku Hesus ta “e primogénito di henter kreashon.” (Kolosensenan 1:15) Sin embargo, Hesus no a laga Satanas provok’é pa desobedesé Dios. Hesus tabata sa ku no tabata e boluntat di Dios p’e usa su poder pa metanan egoista. P’esei el a nenga di hasi esei, mustrando ku humildemente el a dependé riba Yehova pa dun’é alimentashon i instrukshon.—Mateo 4:4.

13-15. (a) Kon Satanas a tenta Hesus pa di dos i di tres biaha, i kon Hesus a reakshoná? (b) Dikon nos sa ku Hesus nunka por a stòp di vigilá kontra Satanas?

¹³ Pa e di dos tentashon, Satanas a hiba Hesus na un lugá haltu riba e tèmpel. Trosiendo e Palabra di Dios astutamente, Satanas a tenta Hesus pa hasi un hazaña espektakular tirando su kurpa abou for di e lugá haltu ei di manera ku angel lo tabatin ku skap’é. Si e multitut na e tèmpel a mira un milager asina, ta ken lo a tribi duda despues di esei ku Hesus tabata e Mesias primintí? I si e multitut a aseptá Hesus komo e Mesias a base di tal hazaña espektakular, Hesus lo no a skapa di hopi problema i difikultat? Kisas. Pero Hesus tabata sa ku e boluntat di Yehova tabata pa e Mesias kumpli ku su trabou na un manera humilde, i no p’e influensiá hende pa kere den dje pa medio di hazañanan espektakular. (Isaias 42:1, 2) Un biaha mas, Hesus a nenga di desobedesé Yehova. Fama no tabata un tentashon p’e.

¹⁴ Pero kiko di e tentashon di poder? Den Satanas su di tres intento, el a ofresé Hesus tur e reinonan na mundu si el a hasi un solo akto di adorashon na Satanas. Akaso Hesus a pensa seriamente riba e oferta di Satanas? Hesus a kontest’é: “Bai for di akinan, Satanas!” Anto el a agregá: “Pasobra ta pará skirbí: ‘Adorá [Yehova] bo Dios, i sirbi e so.’” (Mateo 4:10) Nada hamas lo por a tenta Hesus pa adorá otro dios. Ningun oferta di poder òf influensia den e mundu aki lo por a konvens’é pa kometé kualke akto di desobedensia.

¹⁵ Esei a pone Satanas entregá? El a bai ora Hesus a orden’é pa hasi esei. Sin embargo, e Evangelio di Lukas ta deklará ku Diabel “a lag’é pa un tempu.” (Lukas 4:13) De echo, Satanas a haña otro okashonnan pa tèst i tenta Hesus, i el a hasié te na final. Beibel ta bisa nos ku Hesus a “wòrdu tentá den tur kos.” (Hebreonan 4:15) Pues Hesus nunka por a stòp di vigilá; i nos tampoko.

16. Kon Satanas ta tenta sirbidó di Dios awe, i kon nos por rechasá su esfuersonan?

¹⁶ Satanas ta sigui tenta sirbidónan di Dios awe. Lamentablemente, nos imperfekshonnan ta hasi nos hopi bes un blanko fásil. Satanas astutamente ta probechá di nos inklinashonnan egoista, di orguyo i di set pa poder. Usando e tentashon di materialismo, Satanas por asta probechá di tur e inklinashonnan aki pareu! P’esei ta masha importante pa de bes en kuando nos para ketu i analisá nos mes onestamente. Ta bon pa nos meditá riba e palabranan di 1 Juan 2:15-17. Segun ku nos ta hasi esei, nos lo por puntra nos mes si e deseonan di karni di e mundu aki, e anhelo pa kos material i e deseo pa impreshoná otro hende, no a mengua nos amor pa nos Tata selestial te na sierto grado. Nos tin ku kòrda ku e mundu aki, huntu ku su gobernante, Satanas, ta serka di pasa bai. P’esei laga nos rechasá su intentonan mañoso di tenta nos pa kai den piká! Laga e ehèmpel di nos Shon inspirá nos, pasobra e “no a kometé piká.”—1 Pedro 2:22.

“Semper Mi Ta Hasi e Kosnan Ku Ta Agrad’é”

17. Kiko Hesus a pensa di e obedensia ku e mester a rindi na su Tata, pero ki opheshon algun hende lo por bin kuné?

¹⁷ Obedensia ta enserá hopi mas ku djis keda sin peka; Kristu a kumpli aktivamente ku delaster un mandamentu di su Tata. El a deklará: “Semper mi ta hasi e kosnan ku ta agrad’é.” (Juan 8:29) E obedensia aki a duna Hesus gran goso. Naturalmente, tin hende kisas ta bin ku e opheshon ku obedensia tabata ménos kompliká pa Hesus. Podisé nan ta kere ku e tabatin ku obedesé Yehova so, kende ta perfekto, miéntras ku nos hopi bes tin ku obedesé hende imperfekto den puesto di outoridat. Pero echo ta ku Hesus tabata obedesidu na hende imperfekto den puesto di outoridat.

18. Komo hóben, kon Hesus tabata un ehèmpel di obedensia?

¹⁸ Segun ku Hesus a krese, e tabata bou di e outoridat di su mayornan humano imperfekto, Hosé ku Maria. Probablemente, mas ku mayoria mucha, lo e por a mira e imperfekshonnan di su mayornan. Akaso el a rebeldiá i bai mas ayá di e papel di yu ku Dios a dun’é, bisando nan kon nan mester a dirigí e famia? Tuma nota di loke Lukas 2:51 ta bisa di Hesus na edat di 12 aña: “El a keda sometí na nan.” Ku e obedensia aki, el a pone un ekselente ehèmpel pa hóbennan kristian ku ta hasi esfuerso pa obedesé nan mayornan i mustra nan e debido rèspèt.—Efesionan 6:1, 2.

19, 20. (a) Hesus a konfrontá ki retonan úniko relashoná ku obedensia na hende imperfekto? (b) Dikon kristiannan berdadero djawe mester ta obedesidu na e rumannan ku ta hiba delantera?

¹⁹ Pa loke ta trata obedesé hende imperfekto, Hesus a konfrontá retonan ku kristiannan berdadero djawe nunka tin ku konfrontá. Pensa riba e tempu úniko den kua el a biba. E sistema religioso hudiu, ku su tèmpel na Yerusalèm i su saserdosio, pa hopi tempu tabatin e aprobashon di Yehova. Pero awor Yehova tabata a punto di rechas’é i remplas’é ku e areglo di e kongregashon kristian. (Mateo 23:33-38) Miéntras tantu, hopi di e lidernan religioso tabata siña mentira basá riba filosofia griego. Tabatin asina tantu korupshon den e tèmpel ku Hesus a yam’é “un kueba di ladron.” (Marko 11:17) Akaso Hesus a keda leu for di e tèmpel ei i di e snoanan? Nò! Yehova ainda tabata hasi uso di e areglonan ei. Tanten ku Dios no a kai den e asuntu i hasi kambio, Hesus obedientemente a bai na e fiestanan di tèmpel i na snoa.—Lukas 4:16; Juan 5:1.

²⁰ Si Hesus tabata obedesidu bou di e sirkunstansianan ei, kuantu mas kristiannan berdadero mester keda obedesidu awe! De echo, nos ta biba den un tempu masha distinto, den e era di restorashon di adorashon puru, un era profetisá hopi tempu pasá. Dios ta sigurá nos ku hamas lo e permití Satanas korumpí su pueblo restorá. (Isaias 2:1, 2; 54:17) Ta bèrdat ku nos ta topa piká i imperfekshon den e kongregashon kristian. Pero nos mester usa e imperfekshonnan di otro hende komo un èksküs pa desobedesé Yehova, podisé keda sin asistí na reunionnan kristian òf kuminsá kritiká e ansianonan? Hamas! Mas bien, di kurason nos ta sostené esnan ku ta hiba delantera den e kongregashon. Obedientemente, nos ta asistí na e reunion- i asambleanan kristian i ta apliká e konseho bíbliko ku nos ta haña na e okashonnan ei.—Hebreonan 10:24, 25; 13:17.

21. Kon Hesus a reakshoná riba preshon di otro hende p’e desobedesé Dios, i ki ehèmpel el a pone pa nos?

²¹ Hesus nunka a laga hende, ni sikiera amigunan ku bon intenshon, stòp e di obedesé Yehova. Por ehèmpel, apòstel Pedro a purba konvensé su Shon ku e no tabatin nodi sufri i muri. Su konseho pa Hesus ta bondadoso ku su mes tabata duná ku bon intenshon. Pero Hesus a rechas’é redondamente pasobra e tabata inkorekto. (Mateo 16:21-23) Awe, siguidó di Hesus hopi biaha ta haña nan tin ku trata ku nan famianan ku tin bon intenshon pero ku ta purba konvensé nan pa stòp di obedesé e lei- i prinsipionan di Dios. Meskos ku siguidó di Hesus den promé siglo, nos ta mantené e posishon ku “nos mester obedesé Dios mas ku hende.”—Echonan 5:29.

E Rekompensanan di Ta Obedesidu Manera Kristu

22. Ki pregunta Hesus a kontestá, i kon el a hasié?

²² Ora ku Hesus a konfrontá morto, su obedensia a ser someté na e prueba di mas severo. Tabata durante e momentonan difísil ei di su bida ku “el a siña obedensia” den e pleno sentido di palabra. El a hasi e boluntat di su Tata, no di su mes. (Lukas 22:42) Na mesun tempu, el a establesé un registro perfekto di integridat. (1 Timoteo 3:16, NW) El a duna e kontesta riba e pregunta ku a eksistí pa hopi tempu: Hende perfekto por keda obedesidu na Yehova asta bou di prueba? Adam a frakasá, i Eva tambe. Anto Hesus a bin na tera, biba, muri i mustra bon kla ku sí por. E kriatura mas grandi di tur e kriaturanan di Yehova a duna e kontesta di mas impaktante. El a obedesé asta ora esei a kous’é hopi sufrimentu, inkluso su morto.

23-25. (a) Kon obedensia ta ligá ku integridat? Ilustrá esei. (b) Ki tópiko e siguiente kapítulo lo trata?

²³ Nos por ekspresá integridat, òf deboshon di henter nos kurason na Yehova, pa medio di obedensia. Komo ku Hesus a obedesé, el a mantené su integridat i a benefisiá henter humanidat. (Romanonan 5:19) Yehova a rekompensá Hesus rikamente. Si nos ta obedesé Kristu, nos Shon, Yehova lo rekompensá nos tambe. Obedesé Kristu ta hiba na “salbashon eterno”!—Hebreonan 5:9.

²⁴ Ademas, integridat ta un rekompensa riba su mes. Proverbionan 10:9 [NW] ta bisa: “Esun ku ta kana den integridat lo kana den siguridat.” Si nos kompará integridat ku un kas grandi trahá di bon blòki, kada akto di obedensia por ser kompará ku ún blòki. Un blòki so por parse insignifikante, pero kada un tin su lugá, su balor. I ora pega hopi blòki huntu, nos ta konstruí algu di un balor muchu mas grandi. Ora nos kombiná aktonan di obedensia, agregando nan un pa un, dia aden dia afó i aña den aña afó, nos ta konstruí nos bunita kas di integridat.

²⁵ Un bida di obedensia ku ta ekstendé pa un periodo largu ta laga nos kòrda riba un otro kualidat: perseveransia. E aspekto ei di e ehèmpel di Hesus ta tópiko di e siguiente kapítulo.