SEKSHON 8
Ora Algu Tristu Sosodé
‘E sufrimentu ku nos ta pasa den e bida akí ta pasahero, pero e ta trese komo resultado un gloria sin límite i duradero.’—2 Korintionan 4:17, BPK
Apesar ku bo ta traha duru pa bo por tin un matrimonio i famia felis, kos imprevisto por sosodé i kita boso goso. (Eklesiástes 9:11, NW) Ora nos haña nos ku difikultat, Dios ta kla pa yuda nos. Si abo i bo famia sigui e siguiente konsehonan di Beibel, boso lo por soportá asta e situashonnan di mas difísil.
1 DEPENDÉ RIBA YEHOVA
LOKE BEIBEL TA BISA: “Tira tur boso inkietut riba dje, pasobra e ta interesá den boso.” (1 Pedro 5:7) Semper keda kòrda ku no ta Dios ta pone boso na prueba. (Santiago 1:13) Hala serka dje, pasobra lo e yuda boso di e mihó manera posibel. (Isaías 41:10) “Drama boso kurason su dilanti.”—Salmo 62:8.
Boso por haña konsuelo tambe si boso ta lesa y studia Beibel tur dia. Sí, boso lo eksperensiá kon Yehova ta “konsolá nos den tur nos tribulashonnan.” (2 Korintionan 1:3, 4; Romanonan 15:4) Ademas, el a primintí ku lo e duna boso “e pas di Dios ku ta surpasá tur komprondementu.”—Filipensenan 4:6, 7, 13.
LOKE BO POR HASI:
Pidi Yehova yuda bo pa bo keda trankil i no pèrdè kabes
Analisá e opshonnan ku boso tin anto disidí kua di nan ta kumbiní boso mas
2 KUIDA BO MES I BO FAMIA
LOKE BEIBEL TA BISA: “Kurason di e hende prudente ta atkerí konosementu, i orea di e hende sabí ta buska konosementu.” (Proverbionan 18:15) Purba di haña tur informashon ku por yuda boso trata ku e situashon. Saka afó kiko ta nesesidat di kada miembro di famia. Papia ku nan i skucha nan.—Proverbionan 20:5.
Kiko si un ser kerí di bo muri? No tene miedu di ekspresá bo emoshonnan. Kòrda ku asta Hesus a yega di yora. (Huan 11:35; Eklesiástes 3:4) Sufisiente soño i sosiegu tambe ta importante. (Eklesiástes 4:6) Esei lo hasi un situashon teribel mas fásil pa trata kuné.
LOKE BO POR HASI:
Krea e kustumber di komuniká regularmente ku bo famia. Asina, ora un problema presentá, nan lo sinti nan kómodo pa papia ku bo
Papia ku hende ku a yega di pasa den situashon similar
3 BUSKA E YUDANSA KU BO TIN MESTER
LOKE BEIBEL TA BISA: ‘Un berdadero kompañero ta stima na tur tempu i ta un ruman ku a nase pa ora tin angustia.’ (Proverbionan 17:17, NW) Sin duda, bo amigunan ke yuda, pero kisas nan no sa kiko pa hasi. Laga nan sa kiko bo tin mester. (Proverbionan 12:25) Buska tambe yudansa spiritual serka hende ku ta komprondé Beibel. E konsehonan for di Beibel ku nan por duna bo lo yuda bo.—Santiago 5:14.
Si bo tin kontakto regularmente ku hende ku tin berdadero fe den Dios i ku ta konfia den su promesanan, lo bo haña e yudansa ku bo tin mester. Anto si bo yuda otro hende ku tin mester di ánimo, bo mes lo haña konsuelo. Papia ku nan tokante bo fe den Yehova i den su promesanan. Usa bo tempu pa yuda hende den nesesidat i no isolá bo mes for di hende ku ta stima bo i ku ke bo bon.—Proverbionan 18:1; 1 Korintionan 15:58.
LOKE BO POR HASI:
Papia ku un bon amigu i lag’é yuda bo
Sea spesífiko i onesto tokante bo nesesidatnan