Desèmber

Un di e aspektonan mas bunita di Hesus su personalidat ta su abilidat di komprondé e difikultatnan ku nos, komo hende imperfekto, ta enfrentá. Ora Hesus tabata riba tera, e tabata “alegrá ku esnan ku ta alegrá” i “yora ku esnan ku ta yora.” (Rom. 12:15) Por ehèmpel, ora su 70 disipelnan a bini bèk tur kontentu despues ku nan tabatin éksito den sirbishi, Hesus a “yena ku goso.” (Luk. 10:17-21) Di otro banda, ora Hesus a mira kon tristu Lázaro su famia tabata ora ku Lázaro a muri, Hesus “a suspirá profundamente i a keda masha konmoví.” (Huan 11:33) Aunke Hesus tabata perfekto, el a mustra miserikòrdia i kompashon na hende imperfekto. Kiko a yud’é hasi esei? E motibu di mas importante tabata su amor pa hende. Su “delisia tabata den e yunan di hende.” (Pro. 8:31) Pues, amor a motivá Hesus pa buska pa haña sa kon hende ta pensa. Apòstel Huan a bisa: “E mes tabata sa kiko ta biba den kurason di hende.”—Huan 2:25. w19.03 20 §1-2

Satanas a kita tur loke Yòb tabatin for di dje, mata su sirbidónan i daña su reputashon. El a ataká Yòb su famia i a mata su dies yunan stimá. Despues, el a ataká Yòb su salú. El a laga Yòb su kurpa saka blufein ku ta hasi masha doló, for di su plant’i pia te na su korona di kabes. Yòb su kasá tabatin asina tantu angustia i tristesa, ku el a bisa Yòb pa entregá, maldishoná Dios i muri. Yòb mes tabatin gana di muri, pero tòg el a mantené su integridat. P’esei, Satanas a purba di atak’é di un otro manera. El a usa tres amigu di Yòb. E hòmbernan ei a keda vários dia serka Yòb pero nan no a dun’é niun konsuelo. Al kontrario, nan a skual e i kritik’é sin miserikòrdia. Nan a pretendé ku ta Dios a kousa su sufrimentu i ku Dios no tabatin kunes si e mantené su integridat òf nò. Nan a asta insinuá ku Yòb tabata un hòmber malbado i ku e tabata meresé e kosnan horibel ku tabata pasa kuné!—Yòb 1:13-22; 2:7-11; 15:4, 5; 22:3-6; 25:4-6. w19.02 4 §7-8

No ta tur tipo di miedu ta malu. Por ehèmpel, nos mester tin miedu di desagradá Yehova. Si Adam ku Eva tabatin e tipo di miedu ei, nan lo no a rebeldiá kontra Yehova. Ora nan a rebeldiá, nan wowo a habri den e sentido ku nan a realisá ku nan a bira pekadó i ku nan lo a pasa piká i morto pa nan yunan. Komo ku nan por a mira, òf komprondé, e kondishon ku nan tabata aden, nan a haña bèrgwensa di e echo ku nan tabata sunú i a tapa nan kurpa. (Gén. 3:7, 21) E echo ku nos tin miedu di desagradá Yehova ta bon. Pero, no ta tur tipo di miedu ta bon. Por ehèmpel, nos no mester tin demasiado miedu di muri. Dikon nò? Pasobra Yehova a hasi posibel pa nos haña bida eterno. Si nos peka, Yehova lo pordoná nos eror, basta nos arepentí di kurason. Lo e pordoná nos a base di nos fe den e sakrifisio di reskate di su Yu. Un di e maneranan mas importante pa demostrá nos fe ta di dediká nos bida na Dios i batisá.—1 Ped. 3:21. w19.03 5-6 §12-13

E israelitanan tabatin hopi motibu pa mustra apresio. Yehova a manda dies plaga riba Egipto pa libra nan for di sklabitut. Despues, Yehova a destruí henter e ehérsito di Egipto den Laman Kòrá pa salba nan. E israelitanan tabata asina gradisidu ku nan a alabá Yehova ku un kantika di viktoria. Pero, akaso nan a keda gradisidu? Nò, asina ku e israelitanan a haña nan ku difikultat atrobe, nan a lubidá tur e bon ku Yehova a hasi pa nan. Nan no a mustra apresio. (Sal. 106:7) Beibel ta bisa ku “henter e kongregashon di e yunan di Israel tabata murmurá den desierto kontra Moises i Aron.” Pero en realidat, nan tabata murmurá kontra Yehova. (Éks. 16:2, 8) E israelitanan tabata malagradesí. Esei a desapuntá Yehova asina tantu ku el a bisa ku henter e generashon ei di israelita lo muri den desierto, ku eksepshon di Hosue i Kalèb.—Num. 14:22-24. w19.02 17 §12-13

Hesus no a hala atenshon na su mes organisando un selebrashon elaborá i kompliká pa rekordá su morto. En bes di esei, el a bisa su disipelnan pa rekordá su morto un bes pa aña mediante un sena simpel. (Huan 13:15; 1 Kor. 11:23-25) Asina el a mustra bon kla ku e no ta un persona halsá. Ki kontentu nos ta ku un kualidat sobresaliente di nos Rei selestial ta humildat. (Flp. 2:5-8) Un manera ku nos por imitá Hesus su humildat ta di pone interes di otro hende promé ku esun di nos mes. (Flp. 2:3, 4) Pensa atrobe riba Hesus su último anochi riba tera. Aunke Hesus tabata sa ku pronto lo e tabatin ku sufri un morto doloroso, el a preokupá mas pa e doló ku su fiel apòstelnan lo a sinti despues di su morto. Pues, el a pasa su último anochi ta instruí, animá i konsolá nan. (Huan 14:25-31) Hesus tabata mas preokupá pa e bienestar di otro hende ku di su mes. Esta un bunita ehèmpel di humildat e ta pa nos! w19.01 21 §5-6

Bo ta sinti bo kurason bati te den bo garganta ora bo pensa di hisa man pa duna un komentario? Si esei ta e kaso, bo no ta bo so. E bèrdat ta ku mayoria di nos ta haña un tiki miedu ora di duna komentario. En realidat, e tipo di miedu ei por ta algu bon. E ta indiká ku bo ta un persona humilde i ku bo ta mira otro hende superior na bo. Yehova ta stima humildat. (Sal. 138:6; Flp. 2:3) Pero, Yehova ke pa bo alab’é i tambe animá bo rumannan na reunion. (1 Tes. 5:11) Yehova ta stima bo i lo e duna bo e kurashi ku bo tin mester. Laga nos konsiderá algun rekordatorio ku nos ta haña den Beibel. Beibel ta bisa ku nos tur ta faya ora di papia. (Sant. 3:2) Yehova no ta ferwagt pa nos ta perfekto i nos rumannan tampoko no ta ferwagt esei. (Sal. 103:12-14) Nan ta nos famia spiritual i nan stima nos. (Mar. 10:29, 30; Huan 13:35) Nan ta komprondé ku no ta semper nos komentario ta sali manera nos ke. w19.01 8 §3; 10-11 §10-11

Esei no ta fásil den e mundu djawe. Pero e no ta imposibel tampoko. Yehova ke pa bo tin un bida berdaderamente felis i eksitoso. Ku yudansa di Dios bo por tin un bida felis i eksitoso, no solamente den bo hubentut, sino durante henter bo bida. Pa yuda nos komprondé esaki mihó, laga nos wak kiko a yuda e israelitanan konkistá e Tera Primintí. Ora e israelitanan tabata serka di yega e Tera Primintí, Dios no a bisa nan pa nan bira mihó sòldá ni pa nan train pa guera. (Deu. 28:1, 2) Mas bien, el a bisa nan ku nan tabatin ku obedesé su mandamentunan i konfia den dje. (Hos. 1:7-9) For di punto di bista humano, e konseho ei no a zona niun tiki lógiko! Pero esei tabata e mihó konseho, pasobra Yehova a duna nan ún viktoria tras di otro riba e kananeonan. (Hos. 24:11-13) Sí, obedensia na Dios ta rekerí fe. I si nos tin e klase di fe ei, semper lo bai nos bon. Esei tabata asina den pasado i ta asina awe tambe. w18.12 25 §3-4

Kisas un ahuste den komprondementu di un teksto bíbliko a pone ku algun ruman a trompeká. I tin ruman ku kisas a sigui siñansa di apóstata òf di hende ku ta oponé e bèrdat. Komo resultado, algun di nan intenshonalmente a “alehá” for di Yehova i e kongregashon. (Heb. 3:12-14) Lo tabata muchu mas mihó si nan a imitá apòstel Pedro i pone nan fe i konfiansa den Hesus! Algun hende no a ripará mes ku pokopoko nan tabata drif bai for di e bèrdat. Nos por kompará un persona ku gradualmente ta bai for di e bèrdat ku un boto ku pokopoko ta drif bai for di kantu. Beibel ta spièrta nos “pa nunka nos no drif bai.” (Heb. 2:1) Generalmente, un persona no ta alehá su mes for di e bèrdat intenshonalmente. E problema ta ku pokopoko e ta laga su amistat ku Yehova bai atras te ku e ta pèrdè e amistat akí kompletamente. w18.11 9 §5-6

Bo ta deseá di risibí mas entrenamentu di manera ku bo por sirbi Yehova mas plenamente? Si esei ta e kaso, kisas lo bo por apliká pa e Skol pa Predikadó di Reino. E skol akí ta entrená rumannan madurá ku ya kaba ta den e trabou di tempu kompleto pa asina nan por amplia nan sirbishi na Yehova. Rumannan ku apliká pa e skol akí mester ta dispuesto pa aseptá kualke asignashon ora nan gradua. Abo ta dispuesto pa probechá di e oportunidat akí pa hasi mas pa Yehova? (1 Kor. 9:23) Komo pueblo di Yehova, nos ta deseá di ta hendenan generoso, bondadoso, amabel i amoroso. Tur dia nos tin bienestar di otro hende na pechu. Ora nos hasi esei, nos lo tin goso, pas i felisidat. (Gal. 5:22, 23) Sea kual sea bo sirkunstansianan den bida, lo bo ta felis si bo imitá Yehova su personalidat generoso i sigui kolaborá i traha kuné komo su kompañero di trabou presioso.—Pro. 3:9, 10. w18.08 27 §16-18

Kisas algun hende ta puntra: ‘Tin un base bíbliko ku ta permití un kristian divorsiá i bolbe kasa?’ Wèl, laga nos wak kiko Hesus a bisa: “Ken ku divorsiá di su esposa i kasa ku un otro muhé ta kometé adulterio kontra su esposa, i si un muhé, despues ku e divorsiá di su esposo, kasa ku un otro hòmber, e muhé ta kometé adulterio.” (Mar. 10:11, 12; Luk. 16:18) Pues, ta bisto ku Hesus a onra matrimonio i e tabata ke pa otro hende tambe hasi meskos. Si un persona divorsiá di su kasá inosente i kasa atrobe, e persona ei ta kometé adulterio. Dikon? Pasobra den bista di Dios, ainda nan dos ta “ún karni.” Nan matrimonio no a terminá djis pasobra nan a divorsiá. Es mas, Hesus a bisa ku ora un hòmber divorsiá su esposa inosente, esei lo pone e esposa den peliger di kometé adulterio. Kon asina? Den tempu di Hesus, un esposa divorsiá por a sinti ku e mester a kasa atrobe pa e por haña sosten finansiero. Pero, si e esposa a hasi esaki, lo el a kometé adulterio. w18.12 11 §8-9

Ora Habakuk a papia ku Yehova, el a haña pas mental. Esei a yud’é sigui warda ku konfiansa riba Yehova. Esaki no tabata un desishon emoshonal, pasobra mas despues el a bolbe bisa ku e lo “spera ketu asina pa e dianan di angustia.” (Hab. 3:16) Kiko nos por siña for di e desishon ku Habakuk a tuma? Di promé, sin importá ki prueba nos pasa aden, nunka nos no mester stòp di hasi orashon na Yehova. Di dos, nos mester skucha loke Yehova ta bisa nos mediante su Palabra i su organisashon. Di tres, nos mester warda ku pasenshi riba Yehova i konfia ku lo e aliviá nos sufrimentu na su debido tempu. Ademas, meskos ku Habakuk, nos tambe por tin pas mental si nos hasi orashon di kurason na Yehova, skuch’é i warda riba dje ku pasenshi. Si nos hasi e kosnan akí, nos lo por sigui perseverá. Ademas, nos speransa lo duna nos mas pasenshi i, esei na su turno, lo yuda nos ta felis apesar di e problemanan ku nos enfrentá. Sí, speransa lo yuda nos konfia ku nos Tata selestial lo tuma akshon.—Rom. 12:12. w18.11 15-16 §11-12

Kiko ta Dios su punto di bista di un persona ku ta trompeká un otro hende, esta, pone un otro hende peka òf stòp di sirbi Yehova? Hesus a bisa: “Ken ku pone un di e chikitunan akí ku ta kere den mi trompeká, lo tabata mihó p’e si nan a kologá un piedra di mulina na su garganta i bent’é den laman.” (Mar. 9:42) E palabranan ei ta mustra kon serio e asuntu akí ta pa Hesus! Ademas, komo ku Hesus ta imitá su Tata perfektamente, nos por tin sigur ku Yehova tambe ta sinti meskos ora un persona no tin kunes si loke e ta hasi ta pone un di Hesus su siguidónan trompeká. (Huan 14:9) Kiko di nos? Nos tin e punto di bista di Yehova i Hesus? Kiko nos echonan ta mustra? Tuma por ehèmpel nos bistimentu i kuido di nos aparensia. Imaginá bo ku tin sierto stail ku nos ta gusta masha hopi mes pero ku kisas ta pone algun ruman sinti nan inkómodo òf asta ta pone nan pensa riba kos inmoral. Kiko nos lo hasi? Nos ta dispuesto pa pone nos preferensianan personal un banda i mustra amor pa nos rumannan? w18.11 25 §9-10

Dikon ta importante pa kada un di nos mantené nos integridat? Pasobra Satanas a akusá Yehova i tambe kada un di nos. E angel rebelde ei a purba daña Yehova su reputashon. El a insinuá ku Dios ta un mal Gobernante i tambe ku e ta egoista i desonesto. Lamentablemente, Adam ku Eva a djòin Satanas i a rebeldiá kontra Yehova. (Gén. 3:1-6) Miéntras ku nan tabata biba den Eden, nan tabatin masha hopi oportunidat pa hasi nan amor pa Yehova mas fuerte. Pero, ora Satanas a rebeldiá, e amor ku Adam ku Eva tabatin na e momento ei no tabata kompleto ni sin defekto. Mas despues, den tempu di Yòb, un otro kuestion a presentá: Tin hende ku lo keda leal na Yehova Dios pasobra nan stim’é? Ku otro palabra, hende ta kapas di mustra integridat? (Yòb 1:8-11) Yòb tabata imperfekto i a kometé eror, meskos ku nos. Sinembargo, Yehova tabata stima Yòb pa su integridat. w19.02 3-4 §6-7

Hesus a duna un ilustrashon di un komersiante ku tabata biaha en buska di pèrla di bon kalidat. E pèrla ku e komersiante a haña tabata asina balioso ku “mesora el a bende tur loke e tabatin i kumpr’é.” (Mat. 13:45, 46) E bèrdat ku nos a haña, esta, e bèrdat tokante e Reino di Dios i tur e otro bèrdatnan ku nos a siña di Beibel, ta asina balioso ku mesora nos a hasi e sakrifisionan nesesario pa por optené nan. Tanten ku nos ta mira e balor di e bèrdat, nunka nos lo “no bend’é.” (Pro. 23:23) Lamentablemente, algun sirbidó di Yehova a stòp di balorá e bèrdat i a asta bend’é. Nunka nos lo no ke hasi esei! Pa demostrá ku realmente nos ta balorá e bèrdat i ku nunka nos lo no bend’é, nos mester hasi kaso di Beibel su konseho pa “sigui kana den e bèrdat.” (3 Huan 2-4) Sigui kana den e bèrdat ke men biba e bèrdat, esta, duna e bèrdat prioridat den nos bida i biba di akuerdo kuné. w18.11 9 §3

E israelitanan a haña òrdu pa no ataká Yériko. Nan mester a marcha un biaha pa dia rònt di e stat durante seis dia, i shete biaha riba e di shete dia. Podisé algun sòldá a pensa: ‘Ta pèrdèmentu di tempu i energia!’ Pero Israel su Lider Yehova, tabata sa eksaktamente kiko e tabata hasi. E strategia akí no solamente a fortalesé fe di e israelitanan pero tambe a spar nan di bringa kontra e sòldánan di Yériko. (Hos. 6:2-5) Kiko nos por siña for di e relato akí? Tin biaha nos no ta komprond’é kompletamente dikon e organisashon ta introdusí sierto kambio. Por ehèmpel, kisas na prinsipio nos a kuestioná e uso di aparatonan elektróniko pa estudio personal, sirbishi di vèlt i reunion. Pero probablemente awor nos ta mira e benefisionan di usa nan ora ta posibel. P’esei, asta ora ku na promé instante nos tin duda, nos mester sigui e instrukshonnan di e organisashon di Dios. Ora nos mira e bon resultado di e kambionan, nos fe ta bira mas fuerte i nos ta bira mas uní ku nos rumannan. w18.10 23 §8-9

E hudiunan, meskos ku e disipelnan di Hesus, a ferwagt ku e Mesías lo a solushoná nan problemanan. Probablemente, ta p’esei e pueblo di Galilea tabata ke p’e bira nan rei. Nan lo a pensa ku Hesus lo tabata un bon lider: e tabata un ekselente oradó; e por a kura hende malu i e por a asta perkurá kuminda pa hende ku hamber. Despues ku Hesus a alimentá mas o ménos 5.000 hòmber, e pueblo a keda asombrá. Pero “komo ku Hesus tabata sa ku nan tabata serka di bin gar’é pa hasié rei, el a kita for di einan i bolbe bai su so den seru.” (Huan 6:10-15) E siguiente dia, e entusiasmo di e hendenan a baha un poko. E ora ei, Hesus a splika e multitut ku el a bini pa siña hende tokante e Reino di Dios i no pa perkurá pa nan nesesidatnan material. El a bisa e multitut: “No traha pa kuminda ku ta daña, ma pa kuminda ku ta dura i ku ta hiba na bida eterno.”—Huan 6:25-27. w18.06 4 §4-5

Hesus a komprondé e sintimentunan di esnan ku tabata desanimá manera un “richi gekrak” òf un “mecha ku ta sende flou,” i p’esei el a trata nan ku konsiderashon, bondat i pasenshi. (Mar. 10:14) Ta klaru ku nos no por komprondé òf siña hende manera Hesus a hasi! Pero nos por i mester tene konsiderashon ku e hendenan den nos teritorio. Esaki ta enserá kon nos ta papia ku nan, ki ora i kon largu. Miónes di hende awe ta “soyá i deskuidá” pa motibu di komersiantenan korupto i kruel, lidernan polítiko i religioso di e mundu akí. (Mat. 9:36) Komo resultado, hopi di nan no ta konfia niun hende i no tin speransa. P’esei mes e palabranan ku nos ta skohe i nos tono di bos mester demostrá ku nos ta hende bondadoso i ku nos ta interesá den otro! Sí, hopi hende ke skucha nos mensahe no solamente pa motibu di nos konosementu di Beibel sino tambe pa motibu ku nos ta mustra berdadero interes den nan i ta respetá nan. w18.09 31-32 §13-14

Kon nos ta demostrá ku nos ta konsiente ku nos tin e nesesidat di konosé Dios i sigui su guia? Esei ta ora nos ta studia Beibel, obedesé Dios i pone nos sirbishi na dje na promé lugá den nos bida. Si nos hasi e kosnan ei, nos lo ta mas felis i nos fe ku e promesanan di Dios lo kumpli ta bira mas fuerte. (Tito 2:13) Un amistat será i fuerte ku Yehova ta nesesario pa nos por haña felisidat duradero. Apòstel Pablo a skirbi: “Semper alegrá den Señor [Yehova]. Mi ta bolbe bisa: Alegrá!” (Flp. 4:4) Pa nos por tin e amistat balioso ei, nos mester tin sabiduria di Dios. (Pro. 3:13, 18) Awor bon, pa nos logra felisidat duradero, ta masha importante pa nos no lesa Beibel so, sino tambe sigui pone na práktika loke nos ta siña. Hesus a enfatisá e importansia di esaki ora el a bisa: “Ya ku boso sa e kosnan akí, boso lo ta felis si boso hasi nan.” (Huan 13:17; Sant. 1:25) Esei ta e klave pa satisfasé bo nesesidat spiritual i logra felisidat duradero. w18.09 18 §4-6

Epafras tabata konosé e rumannan bon, i e tabata masha interesá den nan bienestar. I aunke e tabatin su mes problemanan—e tabata “kompañero di prizòn” di Pablo—tòg e no a sera wowo pa e nesesidat spiritual di otro hende. (Flm. 23) Al kontrario, el a hasi algu pa yuda nan i asina el a demostrá su amor i interes. E orashonnan ku nos ta hasi pa nos rumannan tin un efekto poderoso, foral ora nos ta menshoná e rumannan pa nòmber. (2 Kor. 1:11; Sant. 5:16) Pensa riba e rumannan ku bo por inkluí den bo orashon. Pensa riba algun nòmber spesífiko. Meskos ku Epafras, hopi ruman ta hasi orashon pa otro rumannan di nan kongregashon òf pa famianan ku ta enfrentá situashonnan difísil. Kisas nan tin ku tuma desishonnan importante òf tin tentashon ku nan mester resistí. Ademas, ta bon pa nos kòrda riba e rumannan ku a pèrdè ser kerí den morto, esnan ku resientemente a sobrebibí desaster natural i guera i esnan ku ta sufri e konsekuensianan di krísis ekonómiko. Ta bisto ku masha hopi ruman tin mester di nos orashonnan. w18.09 5-6 §12-13

Pablo no tabata referí na solamente dunamentu di kos material, sino tambe na dunamentu di animashon, guia i yudansa na hende den nesesidat. (Echo. 20:31-35) I Pablo a siña nos ku palabra i ku echo ku ta importante pa nos ta generoso ku nos tempu, nos energia, nos atenshon i nos amor. Investigadónan ku ta studia komportashon humano tambe a deskubrí ku dunamentu ta hasi hende felis. Segun un artíkulo, hende ta bisa ku nan ta sinti nan hopi mas felis despues ku nan hasi un bon obra pa otro hende. Segun investigadónan, ora nos yuda nos próhimo, nos ta sinti ku nos bida tin mas nifikashon i propósito pasobra esei ta satisfasé un nesesidat humano básiko. P’esei, ekspertonan hopi biaha ta rekomendá hende pa hasi trabou boluntario pa nan por ta mas salú i felis. Esei no ta un sorpresa pa nos, ya ku nos amoroso Kreador, Yehova, semper a bisa den su Palabra ku dunamentu ta hasi nos felis.—2 Tim. 3:16, 17. w18.08 22 §17-18

E profesia di Isaías tokante nos Señor Hesukristu ta animá nos i ta duna nos speransa. El a bisa ku Hesus “lo no husga segun loke su wowo ta mira, ni hasi desishon segun loke su orea ta tende; ma ku hustisia e lo husga e pobernan.” (Isa. 11:3, 4) Dikon e palabranan ei ta un animashon pa nos? Pasobra nos ta biba den un mundu yen di prehuisio, kaminda hende ta husga otro a base di loke nan ta mira. Nos tur ta anhelá pa Hesus bin husga nos, e Hues perfekto ku nunka lo husga nos segun aparensia! Tur dia nos ta husga òf forma opinion tokante otro hende. Pero komo hende imperfekto, nos no por husga perfektamente manera Hesus. Por lo general, nos ta ser influensiá pa loke nos ta mira. Sinembargo, ora Hesus tabata riba tera el a duna nos e mandato pa no husga “segun aparensia, ma husga na un manera hustu.” Ta bisto ku Hesus ke pa nos sigui su ehèmpel i no husga hende segun aparensia. w18.08 8 §1-2

Ta bèrdat ku nos no ta skucha Yehova su stèm for di shelu. Pero, el a duna nos instrukshon mediante su Palabra skirbí, Beibel. Ademas, Yehova su spiritu santu ta motivá “e mayordomo fiel” pa sigui duna Su sirbidónan kuminda spiritual den forma imprimí, elektróniko, di oudio i di vidio. (Luk. 12:42) Esta un abundansia di kuminda spiritual! Siguramente Yehova su palabranan den Beibel ta duna nos konfiansa ku Yehova tin tur kos bou di kontrol i ku lo e eliminá kualke daño ku Satanas i e mundu akí a kousa. Ademas, laga nos ta determiná pa skucha Yehova su stèm. Si nos hasi esei, nos lo perseverá sin importá e problemanan ku nos ta enfrentá awor i esnan ku nos lo enfrentá den futuro. Beibel ta bisa: “Boso tin mester di perseveransia, ya asina despues ku boso a hasi e boluntat di Dios, boso por risibí kumplimentu di e promesa.”—Heb. 10:36. w19.03 13 §17-18

Moises tabata lider di e pueblo di Israel pa hopi tempu, p’esei Hosue kisas lo a puntra su mes si e pueblo lo a aseptá é komo nan lider. (Deu. 34:8, 10-12) Un buki di referensia bíbliko ta bisa di Hosue 1:1 i  2: “Tantu den pasado komo den tempu moderno, e kambio di lider ta un di e momentonan di mas difísil i peligroso pa un pais.” Hosue tabatin bon motibu pa ta preokupá. Ma el a konfia den Yehova i denter di un par di dia, el a sigui e instrukshon ku el a haña. (Hos. 1:9-11) I el a hasi bon di konfia den Yehova. Manera Beibel ta mustra, Yehova a manda un angel pa guia Hosue i e israelitanan. Muy probablemente, e angel ei tabata “e Palabra,” Dios su Yu primogénito. (Éks. 23:20-23; Huan 1:1) Ku yudansa di Yehova, e pueblo di Israel no tabatin problema pa adaptá na e guia di nan lider nobo, Hosue. w18.10 22-23 §1-4

Yehova konosé tur hende ku ta sirbié di buena gana, i e ta skirbi nan nòmber den su “buki di memoria.” Pero tin sierto rekisito ku nos tin ku kumpli kuné pa Yehova skirbi nos nòmber den su “buki di memoria.” Malakías a bisa spesífikamente ku nos tin ku ‘teme Yehova i onra su nòmber [òf, “meditá riba su nòmber,” NW].’ Si nos ta adorá kualke otro kos òf persona ku no ta Yehova, lo e kita nos nòmber for di e buki di bida. (Éks. 32:33; Sal. 69:28) Pues, nos dedikashon na Yehova ta enserá mas ku djis primintié di hasi su boluntat i despues batisá. E kosnan ei nos ta hasi un biaha so, i djis despues nan ta bira kos di pasado. Pero nos ta pone nos mes na Yehova su banda i ta su sirbidó ora ku tur dia nos ta demostrá ku echo ku nos ta obedes’é, tantu awor komo den futuro, pa restu di nos bida.—1 Ped. 4:1, 2. w18.07 23-24 §7-9

Esaki no ta sosodé di su mes; nos tin ku “hasi esfuerso” kontinuo. Sí, pa alkansá madures, nos tin ku sigui oumentá nos konosementu i komprondementu di Beibel. P’esei, bes tras bes nos ta ser animá pa lesa Beibel tur dia. (Sal. 1:1-3) Esei ta bo meta? Ora bo ta lesa Beibel tur dia, lo bo komprondé e leinan i prinsipionan di Yehova mihó. E lei di mas importante pa kristiannan ta e lei di amor. Hesus a bisa su disipelnan: “Na esaki tur hende lo sa ku boso ta mi disipelnan, esta, si boso ta stima otro.” (Huan 13:35) Santiago, Hesus su ruman hòmber parti di mama, a yama amor “e lei noble.” (Sant. 2:8) Pablo a bisa: “Amor ta kumplimentu di lei.” (Rom. 13:10) E echo ku Beibel ta pone énfasis riba amor no ta straño, pasobra “Dios ta amor.”—1 Huan 4:8. w18.06 19 §14-15

Aunke e israelitanan a provoká Yehova, ta Moises tabata esun ku a rebeldiá, òf a bira amargá. Su falta di dominio propio a pone ku el a papia sin pensa riba e konsekuensianan. Moises a laga e komportashon di otro hende strob’é di fiha su bista riba Yehova. Na e promé okashon, Moises a trata e asuntu korektamente. (Éks. 7:6) Sinembargo, ta posibel ku despues di a trata ku e israelitanan rebelde pa dékadanan, el a bira kansá i frustrá. Kisas Moises tabata pensa solamente riba su mes sintimentunan en bes di pensa kon e por a glorifiká Yehova? Si un profeta fiel manera Moises por ser distraí i trompeká, meskos por pasa ku nos tambe. Meskos ku Moises, nos ta a punto di drenta un tera simbóliko, e mundu nobo ku Yehova a primintí nos. (2 Ped. 3:13) Niun di nos lo no ke pèrdè e privilegio spesial ei. Sinembargo, pa nos por logra nos meta, nos mester fiha nos bista riba Yehova i semper hasi esfuerso pa hasi su boluntat.—1 Huan 2:17. w18.07 15 §14-16

Satanas no por fòrsa nos hasi nada kontra nos boluntat. (Sant. 1:14) Hopi hende ta hasi boluntat di Satanas sin ku nan sa. Pero ora un hende haña e bèrdat, e mester skohe na ken su banda e ke ta. (Echo. 3:17; 17:30) Si nos ta determiná pa hasi Dios su boluntat, Satanas no por pone nos kibra nos lealtat na Dios. (Yòb 2:3; 27:5) Tin mas kos ku Satanas i su demoñonan no por hasi. Por ehèmpel, niun kaminda Beibel no ta bisa ku nan por lesa nos mente òf kurason. Ta Yehova i Hesus so tin e kapasidat ei. (1 Sam. 16:7; Mar. 2:8) Si nos ta hasi tur nos esfuerso pa nos echonan i nos palabranan ta na armonia ku Dios su boluntat, nos por tin sigur ku Yehova lo no permití Diabel hasi nos daño permanente. (Sal. 34:7) Pues, ta importante pa nos konosé nos enemigu. Pero nos no mester tin demasiado miedu di dje. Aunke nos ta imperfekto, nos por vense Satanas ku yudansa di Yehova. Si nos oponé Satanas, lo e hui for di nos.—Sant. 4:7; 1 Ped. 5:9. w18.05 26 §15-17

Imaginá ku bo a plania pa asistí na un evento importante na un stat ku ta keda leu. Pa bo yega einan, bo mester kore oranan largu den bùs. Na e parada di bùs tin hopi bùs. Bo mester subi e bùs ku ta hiba bo na bo destinashon. Pues, ta bisto ku lo bo no subi un bùs ku lo hiba bo otro kaminda. Awe, hóbennan ta enfrentá un situashon similar: nan tin un biahe largu nan dilanti, no den bùs, sino riba e kaminda di bida. Tin biaha, boso por sinti boso konfundí debí na e oportunidatnan ku tin boso dilanti i e desishonnan ku boso mester tuma. Hóben, abo lo hasi esfuerso pa agradá Yehova na promé lugá? Esei ta nifiká sigui su konsehonan den tur bo desishonnan, manera por ehèmpel, ora di tuma desishon tokante enseñansa, trabou, kasamentu i hañamentu di yu. E ta enserá tambe ku nan mester hasi esfuerso pa alkansá metanan spiritual. Hóbennan ku semper ta hasi esfuerso pa agradá Yehova na promé lugá por tin sigur ku Yehova lo bendishoná nan i duna nan éksito den bida. w18.04 25 §1-3

Yefta a kumpli ku su promesa i a manda su yu muhé bírgen Silo pa sirbi na e tabernakel pa restu di su bida. (Hues. 11:30-35) Ta bèrdat ku e desishon akí tabata difísil pa Yefta. Pero lo e tabata mas difísil ainda pa su yu muhé, kende boluntariamente a kumpli ku su tata su desishon. (Hues. 11:36, 37) El a renunsiá su derecho di kasa, haña yu i di preservá nòmber i herensia di su famia. Pues, si tabatin un hende ku tabatin mester di konsuelo i animashon, tabata e mucha muhé akí. Beibel ta bisa: “A bira un kustumber na Israel, ku tur aña e yu muhénan di Israel tabata bai pa rekordá yu muhé di Yefta e galaadita pa kuater dia.” (Hues. 11:39, 40) Nos rumannan soltero ku ta usa nan solteria pa dediká mas tempu na “e kosnan di Señor” tambe meresé nos elogio i nos animashon.—1 Kor. 7:32-35. w18.04 17 §10-11

Un gran kantidat di angel a djòin Satanas den su rebelion. Promé ku e Diluvio, Satanas a logra pone algun di e angelnan ei kai den tentashon pa nan tene relashon seksual ku hende muhé. Beibel ta deskribí na un manera simbóliko loke Satanas a hasi, bisando ku e dragon a lastra un terser parti di e streanan di shelu huntu kuné. (Gén. 6:1-4; Rev. 12:3, 4) Ora e angelnan ei a bandoná e famia selestial, nan a rechasá Yehova i a skohe pa Satanas dirigí nan. Pero nan no ta djis un grupo di demoño desorganisá. Satanas a lanta su propio reino, imitando asina e Reino di Dios. Satanas a hasi su mes rei, a organisá e demoñonan, a duna nan outoridat i a hasi nan gobernante di mundu. (Efe. 6:12) Satanas ta usa su organisashon invisibel pa dirigí tur gobièrnu humano. w18.05 23 §5-6

Un tata ku ta stima su yunan ta korigí nan. Di mes manera, Yehova ta stima nos i p’esei tin biaha e ta korigí nos. David a balorá e korekshon ku e tabata haña di Dios. El a meditá riba e pensamentunan di Dios, i a permití e pensamentunan ei kambi’é i hasié un mihó persona. Si bo hasi meskos ku David, bo amor pa Dios i bo deseo pa obedes’é tambe lo krese. Ademas, lo bo bira un kristian spiritualmente maduro. Un ruman muhé ku yama Christin a bisa: “Ora mi ta buska informashon adishonal i meditá riba loke mi ta lesa, mi ta sinti ku Yehova a skirbi e kosnan ei nèt pa mi!” Si bo ta un persona spiritual, Yehova lo duna bo e konosementu i komprondementu ku bo tin mester pa mira futuro meskos ku e ta mir’é. Dikon? Pasobra Yehova ke pa bo sa kiko ta importante den bida, pa bo tuma bon desishon i pa bo enfrentá futuro sin miedu!—Isa. 26:3. w18.12 26 §9-10