Desèmber

Tin situashon ku nos mester frena nos lenga, sino e por kousa hopi daño. Por ehèmpel, imaginá ku bo konosé un publikadó ku ta biba den un pais unda nos obra ta prohibí. Lo ta bon pa puntr’é detaye tokante nos aktividatnan einan? Sin duda, bo tin bon motivashon. Nos ta stima nos rumannan i ta interesá pa sa kon ta bai ku nan. Ademas, nos ke ta spesífiko ora nos ta hasi orashon pa nan. Pero, esei ta un di e situashonnan ku nos tin ku frena nos lenga. Si nos preshoná un ruman pa divulgá informashon konfidensial, nos ta demostrá falta di amor. Nos ta demostrá falta di amor tambe na e rumannan ku ta biba den e pais ei, ya ku e informashon ku e ruman divulgá por pone nan na peliger. Sigur, niun di nos lo no ke pone ku e situashon lo bira mas difísil pa nos rumannan ku ta biba den pais unda nos obra ta prohibí. Na e mesun momento, si nos ta sirbi den un pais asina, nos lo no divulgá informashon tokante kon nos ta prediká i ta hasi otro aktividat. w20.03 21 §11-12

Dios nunka tabata ke pa hende muri. El a krea Adam ku Eva pa biba pa semper. Pero, nan mester a obedesé Yehova. El a duna nan un simpel mandamentu: “Di e palu di konosementu di bon i malu lo bo no kome, pasobra e dia ku bo kome di dje, lo bo muri sigur.” (Gén. 2:16, 17) Ta aki Satanas a subi esenario. El a usa un kolebra pa bisa Eva e palabranan di e teksto djawe. Lamentablemente, Eva a kere e mentira ei i a kome e fruta. Despues, su kasá tambe a hasi meskos. (Gén. 3:6) Asina ei, piká i morto a drenta mundu. (Rom. 5:12) Manera Yehova a bisa asina a sosodé; Adam ku Eva a muri. Pero Satanas no a stòp di gaña tokante morto. Ku tempu, el a kuminsá plama otro mentira. Un di nan ta ku ora hende muri, un parti di dje ta sigui biba, kisas komo spiritu. Tin diferente variashon di e mentira ei, i te awe tin hopi hende ta kere nan.—1 Tim. 4:1. w19.04 14-15 §3-4

Mucha no tin e kapasidat ainda pa analisá situashon, tuma desishon òf rekonosé i evitá peliger. Pues, ta hopi fásil pa hende usa astusia pa gaña i abusá seksualmente di un mucha. Nan ta gaña e mucha diferente kos: ku ta su falta ku e abusu a tuma lugá, ku e no mester bisa niun hende di e abusu, ku niun hende lo no bai ker’é òf yud’é si e bisa algu òf ku akto seksual ta e manera ku adulto i mucha ta mustra ku nan stima otro. Lo tuma e víktima hopi aña pa komprondé ku tur loke ku e hende a bis’é tabata mentira. Un mucha asina ta krese ku e pensamentu ku e ta sushi, ku e no ta sirbi pa nada i ku e no meresé amor ni konsuelo. Pues, no ta nada straño ku abusu seksual ta kousa daño pa hopi aña. Nos ta biba den e último dianan, un tempu ku hopi hende ta “sin kariño” i ku “hende malbado . . . lo bai di malu pa pió.”—2 Tim. 3:1-5, 13. w19.05 15 §7-8

Kon Hesus a siña hende? Na promé lugá, mediante su palabranan. Su palabranan tabata poderoso pasobra nan a siña hende e bèrdat tokante Dios i tokante e berdadero propósito di bida. Ademas, nan a siña hende ku Dios su Reino ta e úniko solushon pa humanidat su sufrimentu. (Luk. 24:19) Hesus a siña hende tambe mediante su ehèmpel. Su manera di biba a mustra su siguidónan kon nan mester biba. (Huan 13:15) Na ki momento Hesus a siña hende? Durante su sirbishi riba tera. (Mat. 4:23) Ademas, el a siña su siguidónan djis despues ku el a resusitá. Por ehèmpel, el a aparesé na un grupo di disipel—kisas mas ku 500 di nan—i a duna nan e mandamentu pa ‘hasi hende su disipel.’ (Mat. 28:19, 20; 1 Kor. 15:6) Komo kabes di e kongregashon, Hesus a sigui duna su disipelnan instrukshon despues ku el a bolbe bèk na shelu. Por ehèmpel, rònt di aña 96 di nos era, Kristu a instruí Apòstel Huan pa duna e kristiannan ungí animashon i konseho.—Kol. 1:18; Rev. 1:1. w19.05 3 §4-5

Awendia, hende mester traha duru pa gana nan pan di kada dia. Hopi di nos rumannan ta traha henter dia pa perkurá pa e nesesidatnan di nan famia. Algun tin ku biaha oranan largu tur dia pa bai trabou i pa bini kas bèk. Ademas, hopi tin ku hasi trabou pisá. Na final di dia e rumannan ei ta morto kansá! Pues, ta di komprondé ku e último kos ku nan tin gana di hasi ta studia. Pero, echo ta ku nos mester traha tempu pa studia—ègt studia—Beibel i nos publikashonnan. Esei ta masha importante si nos ke tin un bon amistat ku Yehova i ke biba pa semper. (1 Tim. 4:15) Tin ruman ta lanta mainta trempan pa studia i meditá ora kas ta ketu i nan mente ta mas relahá. Otronan ta preferá di hasi esei na final di dia, ora ta mas trankil. w19.05 26 §1-2

E kambionan ei no ta tuma lugá di un dia pa otro ni outomátikamente. Kisas nos tin ku sigui “hasi tur [nos] esfuerso” pa vários aña. (2 Ped. 1:5) Nos mester hasi tur nos esfuerso pa kambia loke realmente nos ta di paden. E promé kos importante ku nos tin ku hasi ta resa. Nos tin ku pidi meskos ku e salmista a pidi: “Krea den mi un kurason limpi, o Dios, i renobá un spiritu rekto den mi.” (Sal. 51:10) Nos tin ku rekonosé ku nos mester kambia nos aktitut mental dominante i pidi Yehova yuda nos. E di dos kos importante ku nos tin ku hasi ta meditá. Segun ku nos ta lesa e Palabra di Dios tur dia, nos mester traha tempu pa meditá, esta, pa pensa profundamente riba e kosnan ku nos mester kambia. (Sal. 119:59; Heb. 4:12; Sant. 1:25) Ademas, nos tin ku identifiká e pensamentunan influensiá pa filosofia humano. Nos mester rekonosé onestamente kiko ta nos debilidatnan i lucha duru kontra nan. w19.06 8 §1; 10 §10; 12 §11-12

Ora di tuma desishon, bo mester pone un ora pa kumpli ku bo desishon i pega na dje. Evitá di warda e momento perfekto pa kumpli kuné; e momento ei lo no yega nunka. (Ekl. 11:4) Tene kuidou pa bo no laga kos di ménos importansia kita e tempu i energia ku bo mester pa kos mas importante. (Flp. 1:10) Si ta posibel, hasi sierto tarea na un ora ku bo tin ménos interupshon. Bisa otro hende ku durante e ora ei bo mester konsentrá. Si ta nesesario, paga bo telefòn i wak bo e-mail òf medio sosial mas despues. E resultado di bo desishon ta manera destinashon di un biahe. Si realmente bo ke yega bo destinashon, bo mester sigui bo biahe asta si e kaminda ta será i bo mester ahustá bo ruta. Di mes manera, si nos enfoká riba e resultadonan di nos desishonnan, nos lo no entregá fásilmente ora nos mester ahustá nos desishonnan òf ora nos haña nos ku opstákulo.—Gal. 6:9. w19.11 30 §17-18

Riba kiko bo desishon pa batisá mester ta basá? Debí na bo estudio di Beibel, bo a siña masha hopi kos tokante Yehova—su personalidat i su manera di hasi kos. Tur loke bo a siña ei a konmové bo kurason i a pone ku bo a stim’é mashá. P’esei, bo desishon pa batisá mester ta basá prinsipalmente riba bo amor pa Yehova. Bo desishon pa batisá tambe ta basá riba e bèrdatnan bíbliko ku bo a aseptá. Pensa riba loke Hesus a bisa ora el a duna e mandamentu di hasi hende disipel. (Mat. 28:19, 20) El a splika ku un hende ku batisá mester hasi esei “den nòmber di e Tata i di e Yu i di spiritu santu.” Esei ke men kere di henter bo kurason loke Beibel ta bisa tokante Yehova, tokante su Yu, Hesus, i tokante spiritu santu. E bèrdatnan ei tin hopi poder i por yega te den fondo di bo kurason. w20.03 9 §8-9

Yehova no a manda angel pa djis spièrta Lòt, sino pa yud’é skapa e destrukshon di Sódoma tambe. (Gén. 19:12-14, 17) Di mes manera, nos por hasi meskos si nos mira un di nos rumannan ta hasi algu ku lo hink’é den problema. Asta si e tarda pa apliká e konsehonan bíbliko ku a dun’é, nos mester tene pasenshi. Meskos ku e dos angelnan. En bes di legumai e ruman i alehá for di dje, dun’é yudansa práktiko. (1 Huan 3:18) Kisas nos lo tin ku gar’é na su man, na moda di papia, i yud’é apliká e bon konseho ku el a haña. Yehova por a keda enfoká riba Lòt su imperfekshonnan. En bes di esei, el a inspirá Apòstel Pedro pa skirbi ku Lòt tabata un hòmber hustu.(Sal. 130:3) I nos por imitá su ehèmpel. Kon? Si nos enfoká riba e bon kualidatnan ku nos rumannan tin, e ora ei nos por tene mas pasenshi ku nan. I nan, na nan turno, lo tin mas gana di aseptá nos yudansa. w19.06 21 §6-7

Si gobièrnu di bo pais prohibí nos obra, kisas lo bo puntra bo mes si bo tin ku muda pa un otro pais kaminda bo por sirbi Yehova libremente. Esei ta un desishon personal; niun hende no por tum’é pa bo. Lo ta bon pa studia loke e kristiannan di promé siglo a hasi ora nan a haña nan ku persekushon. E disipelnan na Herúsalèm a hui bai Hudea i Samaria i asta te Fenisia, Chipre i Antiokia. (Mat. 10:23; Echo. 8:1; 11:19) Pero, despues ku un otro ola di persekushon a lanta kontra e kristiannan di promé siglo, Pablo a disidí di keda na e statnan kaminda hende tabata oponé e trabou di prediká asta si esei tabata peligroso p’e. (Echo. 14:19-23) Kiko nos ta siña di e relatonan ei? Kada kabes di famia mester tuma su mes desishon. Pero, promé ku e tuma desishon, e mester hasi orashon. E mester tuma tempu pa pensa riba e sirkunstansianan di su famia i tambe e bon i mal efekto ku e mudansa lo por tin riba nan. Nos no tin ku husga otro ruman pa e desishon ku nan tuma. w19.07 10 §8-9

Hesus a bisa nos pa “bai, i hasi hende di tur nashon [su] disipel.” (Mat. 28:19) Aparte di siña un studiante kiko Hesus a manda su disipelnan hasi, nos tin ku siñ’é tambe kon pa apliká e mandamentunan ei den su bida. Ku pasenshi nos tin ku yud’é segun ku e ta purba di apliká prinsipio di Beibel. Algun studiante por hasi kambio den djis algun luna, pero tin studiante por tuma mas tempu. E eksperensia di un misionero na Perú ta yuda nos komprondé dikon ta bon pa nos tin pasenshi. El a konta: “Mi a kaba di studia e di dos buki ku un studiante ku yama Raúl. Pero ainda e tabatin difikultat pa apliká loke el a siña for di Beibel. E tabatin problema den su matrimonio, tabata papia palabra malu i su yunan no tabata respet’é. Komo ku e tabata bini reunion regularmente, mi a sigui bishit’é pa yuda e i su famia. Mas ku tres aña despues ku mi a top’é, el a kualifiká pa batisá.” w19.07 15 §3; 19 §15-17

Kòrda den ki situashon Pablo tabata ora el a skirbi e kristiannan na Filipo un karta. E tabata bou di aresto den su kas na Roma, pues e no por a sali bai prediká. Pero, el a keda okupá predikando na esnan ku a bin bishit’é i skirbiendo karta na e kongregashonnan leu. Pablo tabata sa ku, meskos ku Kristu, e mester a hasi esfuerso henter su bida. P’esei, el a kompará bida kristian ku un kareda. (1 Kor. 9:24-27) Den un kareda, e koredó ta keda enfoká riba e liña final i no ta laga nada kita su atenshon. Por ehèmpel, e por kore den un kaya ku tin diferente pakus i negoshi òf vários otro kos ku por kita su atenshon. Awor, bo ta kere ku lo e para wak showcase? Nò. Ta klaru ku lo e no hasi esei si e ke gana! Meskos ta konta pa e kareda pa bida; nos tin ku evitá tur tipo di kos ku por kita nos atenshon. Si nos keda enfoká riba nos meta i hasi esfuerso vigoroso meskos ku Pablo, nos lo gana e premio! w19.08 3 §4; 4 §7

Ora nos kuminsá biba di akuerdo ku e normanan di Dios, kisas no ta fásil pa nos famia kustumbrá na nos kreensianan i moda di biba nobo. Mayoria di biaha, e promé kos ku nan ta ripará ta ku nos no ta selebrá fiesta religioso ku nan mas ni tampoko ta mete den polítika. Na kuminsamentu, algun di nan por asta rabia ku nos. (Mat. 10:35, 36) Pero, nos no mester pensa ku nunka nan lo kambia. Si nos stòp di purba di yuda nan komprondé nos kreensianan, ta manera nos a husga nan i a disidí ku nan no meresé bida eterno. Pero, Yehova a duna e tarea di husga na Hesus, no na nos. (Huan 5:22) Si nos tene pasenshi, ku tempu nos famia por ta dispuesto pa skucha e mensahe. Nos mester ta firme pero nos mester usa takto, asta bou di prueba. Kisas por tuma tempu promé ku nos famia komprondé kompletamente dikon pa nos ta importante pa sirbi Yehova. w19.08 17 §10, 13; 18 §14

Despues di a pasa den un prueba, hopi di nos a yega di pensa ku nos no por a enfrentá esei riba nos mes forsa. Kisas nos a pensa esei despues di reflekshoná riba kon nos a logra haña e forsa pa trata ku un malesa grave òf morto di un ser kerí. Nos a realisá ku nos por a sigui perseverá dia tras dia solamente debí ku e spiritu santu di Yehova a duna nos “e poder ku ta surpasá esun di hende.” (2 Kor. 4:7-9) Nos mester di yudansa di spiritu santu tambe pa resistí influensia di e mundu malbado. (1 Huan 5:19) Ademas, nos mester lucha kontra e “forsanan spiritual di maldat.” (Efe. 6:12) Un manera ku Yehova su spiritu santu ta yuda nos ta di duna nos poder, òf forsa, pa kumpli ku nos responsabilidatnan, apesar di prueba. Apòstel Pablo tabata sa ku e por a sigui sirbi Yehova apesar di su pruebanan danki na “e poder di Kristu.”—2 Kor. 12:9. w19.11 8 §1-3

Beibel ta e úniko buki ku ta splika ku eksaktitut loke Hesus a hasi pa bo. Siña stima Hesus. Si bo ta stim’é, lo bo stima Yehova mas. Dikon? Pasobra Hesus ta reflehá e kualidatnan di su Tata perfektamente. P’esei, mas bo siña tokante Hesus, mas mihó lo bo komprondé Yehova i stim’é. Pensa riba e kompashon ku Hesus a demostrá hende despresiá pa otro hende, por ehèmpel, e pobernan, e enfermonan i e débilnan. Pensa tambe riba e bon konsehonan ku e ta duna bo i kon bo bida ta mehorá ora bo ta obedesé nan. (Mat. 5:1-11; 7:24-27) Bo amor pa Hesus siguramente lo bira mas fuerte ora bo meditá riba e sakrifisio ku el a hasi pa nos por haña pordon di nos pikánan. (Mat. 20:28) Ora bo komprondé ku e tabata dispuesto pa muri pa bo, lo bo sinti bo konmoví pa arepentí i pidi Yehova pordoná bo. (Echo. 3:19, 20; 1 Huan 1:9) Anto, mas bo ta stima Hesus i Yehova, mas lo bo ke ta rònt di hende ku ta stima nan meskos ku bo. w20.03 5-6 ¶10-12

Un ruman hòmber kisas por kuminsá pensa ku e ta esun mas kualifiká pa un sierto asignashon. Òf un ruman muhé por pensa: ‘Mi kasá por kumpli ku e asignashon ei mihó ku ruman tal i tal!’ Pero, si nos ta realmente humilde, nos lo no tin un aktitut orguyoso asina. Nos por siña hopi for di e ehèmpel di Moises. Sin duda, el a apresiá su asignashon komo lider di e nashon di Israel. Pero despues, Yehova a permití otro hende pa traha huntu ku Moises. Kon Moises a reakshoná? E no a bira yalurs. (Num. 11:24-29) E tabata humilde i a permití otro hende yud’é ku e trabou di husga e pueblo. (Éks. 18:13-24) Moises no a pone su privilegionan riba e bienestar di e pueblo. E tabata sa ku si tin mas hende ta yud’é husga e israelitanan, esei lo a nifiká ku e nashon lo a haña mihó servisio. Esta un bon ehèmpel pa nos! Nos no mester lubidá ku, si nos ke ta útil pa Yehova, nos humildat mester ta mas importante ku nos kapasidat i abilidat. w19.09 5-6 §13-14

Nos no sa ki motibu e nashonnan lo duna pa hustifiká nan atake riba religion falsu. Kisas nan lo bisa ku religion ta un opstákulo pa pas i ku konstantemente nan ta mete den polítika. Òf, kisas nan lo bisa ku e religionnan ei a akumulá demasiado rikesa i propiedat. (Rev. 18:3, 7) Ora e nashonnan ataká religion falsu, probablemente nan lo no destruí tur miembro di e religionnan ei. Mas bien, ta parse ku e nashonnan lo kaba ku e organisashonnan religioso. Unabes e organisashonnan ei no t’ei mas, nan eks-miembronan lo realisá ku nan lidernan religioso a engañá nan. Konsekuentemente, e eks-miembronan ei probablemente lo bisa ku nunka nan no tabata pertenesé na e religionnan ei. E destrukshon di religion falsu lo no dura largu. (Rev. 18:10, 21) Yehova a primintí ku lo e “hasi e dianan [di e tribulashon] kòrtiku” di manera ku “esnan ku el a skohe” i e religion berdadero lo sobrebibí.—Mar. 13:19, 20. w19.10 15 §4-5

Mamanan, kisas boso mayornan tabata rabia masha lihé i tabata grita nan yunan. Kisas bo a krese ta pensa ku ta asina ta kria yu. Pero, despues di siña kon Yehova ke pa un mama trata su yu, kisas ainda ta difísil pa keda kalmu i tene pasenshi ku bo yunan, foral si bo ta kansá i nan no ke tende. (Efe. 4:31) Na e momentonan ei, mas ku nunka bo mester pidi Yehova yuda bo. (Sal. 37:5) Un otro difikultat ku algun mama ta haña nan kuné ta di demostrá nan yunan kuantu nan ta stima nan. Kisas nan a lanta den un famia ku nan mayornan no a demostrá nan amor. Si esei tabata bo kaso, bo no mester hasi e mesun eror ku bo mayornan a hasi. Si bo someté bo mes na Yehova, lo bo siña kon pa demostrá bo yunan kuantu bo stima nan. Kisas ta difísil pa bo kambia. Pero, bo por kambia, i lo e ta bon pa tantu bo mes komo bo famia. w19.09 18-19 §19-20

Un hende ku ta adorá Yehova i ku na mes momento ta gasta hopi tempu i energia purbando di bira riku, den un sentido, ta purbando di sirbi dos doño. Pues, lo e no ta adorando Yehova so. E kristiannan den e kongregashon di Laodisea tabata broma: “Mi ta riku, mi a akumulá rikesa i mi no tin mester di nada nada.” Pero, den bista di Yehova i Hesus, nan tabata “infelis, den kondishon deplorabel, pober, siegu i sunú.” Hesus a konsehá nan, no pasobra nan tabata riku, sino pasobra nan a stima plaka. E amor ei tabata daña nan amistat ku Yehova. (Rev. 3:14-17) Awor, kiko nos mester hasi si nos a ripará ku nos a kuminsá stima plaka? Nos mester korigí nos pensamentu mesora. (1 Tim. 6:7, 8) Si nos no hasi esei, nos kurason lo bira dividí i Yehova lo no aseptá nos adorashon. Yehova ta “un Dios yalurs,” esta, e ke pa nos adorá e so.—Deu. 4:24. w19.10 27 §5-6

E palabra griego tradusí komo “guia” literalmente ta nifiká “hiba.” Lukas, eskritor di e buki di Echonan, a usa un forma paresido di e mesun palabra griego pa deskribí un barku ku bientu ta “hiba.” (Echo. 27:15) Segun un eksperto di Beibel, ora Apòstel Pedro a skirbi ku spiritu santu a “guia” e eskritornan di Beibel, el a usa un ekspreshon ku lo a pone hende pensa riba nabegashon. De echo, Pedro tabata bisando ku meskos ku bientu ta hiba un barku na su destinashon, asina tambe spiritu santu ta guia profeta i eskritor di Beibel pa hasi nan trabou. E mesun eksperto a bisa: “E profetanan a hisa nan bela, na moda di papia.” Yehova a hasi su parti dunando nan “e bientu,” esta, spiritu santu. I e eskritornan di Beibel a hasi nan parti siguiendo guia di e spiritu ei. I awe, meskos ku bientu ta hiba un barku riba un laman brutu na un haf safe, asina tambe spiritu santu ta yuda nos enfrentá prueba di bida pa nos yega den e mundu nobo ku Dios a primintí. w19.11 9 §7-9

Tin biaha, problema por desanimá nos. Pero, loke nos no mester hasi ta di pensa konstantemente riba nan pasobra esei por pone ku nos ta lubidá e maravioso speransa ku Yehova a duna nos. (Rev. 21:3, 4) Desanimashon por kaba ku tur nos energia i pone nos entregá. Laga nos wak kiko un ruman muhé na Merka a hasi pa tene su fe den bon kondishon miéntras e ta kuida su kasá ku ta masha malu. El a skirbi: “Tin biaha, e situashon ta duna nos hopi strès i ta desanimá nos, pero nos tin speransa. Mi ta masha gradisidu pa tur loke Yehova a duna nos pa fortalesé nos fe i lanta nos ánimo. Di bèrdat nos tin mester di e konseho i animashon ei. Esei ta yuda nos sigui padilanti i perseverá.” E palabranan di e ruman muhé ei ta mustra ku ta posibel pa vense desanimashon! Kon? Mira bo pruebanan komo un oportunidat pa bo demostrá ku bo ta leal na Yehova i pa bo oponé Satanas. Rekonosé ku Yehova por duna bo e konsuelo ku bo mester. I balorá e kuminda spiritual ku e ta proveé. w19.11 16 §9-10

Spesialmente ansiano mester apliká e prinsipio akí. Un ansiano sa ku e no mester divulgá informashon konfidensial di otro ruman. Si e hasi esei, e por pèrdè konfiansa di e rumannan i daña su reputashon. Ruman ku tin responsabilidat den kongregashon no por “tin dos lenga.” (1 Tim. 3:8) Ke men, nan no mester ta desonesto ni gusta hasi redu. Si un ansiano ta stima su kasá, lo e no bis’é informashon ku e no mester sa. Kasá di un ansiano por yud’é mantené un bon reputashon. Kon? Ora e no ta preshoná su esposo pa papia tokante asuntu konfidensial. Asina ei, no solamente e ta apoyá su esposo pero ta demostrá rèspèt na e rumannan ku a konfia su esposo. Anto mas importante ainda, e ta hasi Yehova kontentu pasobra el a kontribuí na pas i union di e kongregashon.—Rom. 14:19. w20.03 22 §13-14

Na 1512 promé ku Kristu, ora a lanta e tabernakel na pia di Seru Sinaí, Moises a dirigí un seremonia pa nombra Aron i su yunan komo saserdote. (Éks. 40:17; Lev. 9:1-5) Kon Yehova a mustra ku e saserdosio nobo tabatin su aprobashon? Segun ku Aron i Moises tabata bendishoná e pueblo, Yehova a manda kandela pa kima sobrá di e sakrifisio riba altar kompletamente. (Lev. 9:23, 24) Esei lo mester tabata un esena espektakular. Kiko e kandela ku a bini for di shelu a indiká? Esei a indiká ku Yehova a apoyá e saserdosio di Aron kompletamente. Ora e israelitanan a mira bon kla ku e saserdotenan tabatin e apoyo di Yehova, esei sin duda a duna nan tur motibu pa apoyá e saserdosio ei kompletamente. Dikon esei ta importante pa nos? Pasobra e saserdosio na Israel tabata sombra di un saserdosio muchu mas mihó i importante—e 144.000 personanan ku lo sirbi huntu ku Kristu den shelu. (Heb. 4:14; 8:3-5; 10:1) Sin duda, Yehova ta guia i bendishoná su organisashon awe generosamente. w19.11 23 §13; 24 §14, 16

Ora Pablo tabata na Korinto, el a keda serka Akila ku Priskila i “komo ku nan tabatin e mesun fishi di traha tènt, el a . . . traha huntu ku nan.” E echo ku Pablo a traha “di dia i anochi” no ke men ku el a traha nònstòp. Por ehèmpel, riba sabat el a prediká na e hudiunan, kendenan tampoko no a traha e dia ei. (Echo. 13:14-16, 42-44; 16:13; 18:1-4) Aunke Pablo mester a traha, el a hasi sigur di partisipá regularmente “den e trabou santu di deklará e bon notisia di Dios.” (Rom. 15:16; 2 Kor. 11:23) El a animá otro hende pa hasi meskos. El a yama Akila ku Priskila su “kompañeronan di trabou den Kristu Hesus.” (Rom. 12:11; 16:3) Pablo a konsehá e korintionan pa nan tin “hopi di hasi den e trabou di Señor.” (1 Kor. 15:58; 2 Kor. 9:8) Yehova a asta inspirá apòstel Pablo pa skirbi: “Si un hende no ke traha, no lag’é kome tampoko.”—2 Tes. 3:10. w19.12 5 §12-13

Yehova a krea e promé pareha ku e deseo di haña yu. Ken mester disidí si un pareha kasá mester haña yu? I ken mester disidí na ki momento nan tin ku haña yu? Den algun kultura, hende ta ferwagt pa pareha resien kasá kuminsá haña yu mesora. Famia di e pareha i otro hende por purba di preshoná nan pa sigui e kustumber ei. Jethro, un ruman na Asia, a bisa: “Den kongregashon, algun ruman ku tin yu ta preshoná pareha ku no tin yu.” Jeffrey, un otro ruman na Asia, a komentá: “Tin ruman ta bisa e parehanan ku no tin yu ku nan lo no tin niun hende pa kuida nan ora nan bira bieu.” Sinembargo, kada pareha mester disidí pa nan mes si nan ke yu òf nò. Ta nan desishon; ta nan responsabilidat. (Gal. 6:5) Klaru ku amigu i famia ke pa un pareha resien kasá ta felis. Pero, tur hende tin ku kòrda ku ta e pareha ta disidí si nan ke yu òf nò.—1 Tes. 4:11. w19.12 22 §1-3

Bo ta haña ku ta difísil pa mira Yehova komo bo Tata? Kisas algun hende ta pensa ku nan ta insignifikante na komparashon ku Yehova. Nan ta duda ku e Todopoderoso ta interesá den kada un di nan. Pero, nos Tata ku ta stima nos no ke pa nos pensa asina. El a duna nos bida i ke pa nos busk’é i hañ’é. Despues ku apòstel Pablo a splika esei na Aténas, el a bisa ku Yehova “no ta masha leu for di kada un di nos.” (Echo. 17:24-29) Dios ke pa kada un di nos papia kuné ku e mesun naturalidat ku un yu ta papia ku su tata ku ta stim’é. Kisas tin un otro motibu dikon algun hende ta haña ku ta difísil pa mira Yehova komo nan Tata. Kiko esei ta? Nan mes tata a demostrá nan tiki òf niun amor i kariño. Un ruman muhé a bisa: “Mi tata tabata papia malu ku mi. Ora mi a kuminsá studia Beibel, tabata difísil pa mi sinti mi serka un Tata den shelu.” E sintimentunan ei ta zona konosí? Si esei ta e kaso, sea sigur ku bo tambe por bin mira Yehova komo e mihó Tata ku por tin. w20.02 3 §4-5

Kisas bo ta haña ku bo ta hasi masha tiki pa Yehova awor ku bo a bira un persona di edat. Pero Hesus a siña nos ku, pa Yehova, tur loke nos ta hasi den su sirbishi ta balioso p’e. (Sal. 92:12-15; Luk. 21:2-4) Pues, enfoká riba loke bo por hasi. Por ehèmpel, bo por papia ku otro hende tokante Yehova, hasi orashon pa bo rumannan i animá nan pa keda fiel. Yehova ta mira bo komo su kompañero di trabou, no debí na loke bo por logra, sino pasobra di buena gana bo ta obedes’é. (1 Kor. 3:5-9) Esta bon ta pa adorá Yehova, un Dios ku ta konsiderá kada un di su sirbidónan balioso! Yehova a krea nos pa hasi su boluntat, i ta adorashon berdadero ta duna nos bida sentido. (Rev. 4:11) Aunke mundu ta mira nos komo inútil, Yehova no tin bèrgwensa di nos. (Heb. 11:16, 38) No ta importá ku nos tin ku trata ku malesa, difikultat finansiero òf edat avansá, nos por tin sigur ku nada no por separá nos for di e amor ku nos Tata den shelu tin pa nos.—Rom. 8:38, 39. w20.01 18 §16; 19 §18-19

Nos por lucha kontra envidia si nos ta humilde i ta keda kontentu ku loke nos tin. Si nos kurason ta yen di e bon kualidatnan ei, envidia no tin lugá pa krese. Humildat ta yuda nos pa no pensa demasiado di nos mes. Un hende humilde no ta sinti ku e meresé mihó trato ku tur otro hende. (Gal. 6:3, 4) Un hende ku ta kontentu ku loke e tin no ta kompará su mes ku otro hende. (1 Tim. 6:7, 8) Ora un hende ku tin e dos kualidatnan ei mira un otro hende haña algu bon, e ta keda kontentu p’e. nos evitá envidia i sea humilde i keda kontentu ku loke nos tin, nos mester di yudansa di Dios su spiritu santu. (Gal. 5:16; Flp. 2:3, 4) Yehova su spiritu santu ta yuda nos saminá nos mente i motivashonnan. Ku yudansa di Dios, nos por remplasá pensamentu i sintimentu negativo pa esnan positivo.—Sal. 26:2. w20.02 15 §8-9

Dedikashon ta un voto ku Yehova ta ferwagt ku lo bo kumpli kuné. P’esei, keda serka di bo kongregashon. Bo rumannan di kongregashon ta bo famia spiritual. Si bo asistí regularmente na reunion, lo bo fortalesé bo amistat ku nan. Lesa e Palabra di Dios tur dia. (Sal. 1:1, 2) Tuma algun minüt pa meditá riba loke bo a lesa. Asina ei, e palabranan lo yega na bo kurason. “Hasi orashon kontinuamente.” (Mat. 26:41) Bo orashonnan sinsero lo hala bo mas serka di Yehova. Anto, “sigui buska . . . promé e Reino.” (Mat. 6:33) Kon? Esei ta ora bo hasi e trabou di prediká un di bo prioridatnan den bida. Si bo ta prediká regularmente, bo fe lo keda fuerte. Kualke prueba ku bo haña bo kuné den e mundu bieu akí ta “leve i pa un tempu kòrtiku.” (2 Kor. 4:17) En kambio, bo dedikashon i boutismo lo habri porta pa un bida mas felis awor i pa e berdadero bida den futuro. E sakrifisionan ta bale la pena!—1 Tim. 6:19. w20.03 13 §19-21

Si bo studiante no ta progresá, lo bo tin ku puntra bo mes si bo mester para e estudio. Puntra bo mes: ‘Mi studiante ta hasi progreso rasonabel segun su situashon?’ ‘El a kuminsá “kumpli ku,” òf apliká, loke e ta siñando?’ (Mat. 28:20) Ta tristu pa bisa ku algun studiante ta manera e israelitanan den tempu di Ezekiel. Tuma nota kiko Yehova a bisa Ezekiel tokante nan: “Mira, pa nan bo ta manera un kantika sensual, kantá dor di un hende ku tin bunita bos i ku sa di toka instrumènt bon; pasobra nan ta tende bo palabranan, ma no ta pone nan na práktika.” (Eze. 33:32) Kisas no ta fásil pa bisa un hende ku bo ta para e estudio. Pero, “no a sobra muchu tempu mas.” P’esei, na lugá di pèrdè tempu ku studiante ku no ta progresá, lo ta mihó pa nos buska hende ku ta demostrá di ta “dispuesto pa aseptá e bèrdat ku ta hiba na bida eterno.”—Echo. 13:48. w20.01 6 §17; 7 §20

Generalmente, religion no ta siña hende e bèrdat di Beibel ku hende obediente na Dios lo biba pa semper riba tera. (2 Kor. 4:3, 4) Mayoria di religion di kristiandat ta bisa ku tur bon hende ta bai shelu ora nan muri. Pero, Studiantenan di Beibel ku for di 1879 tabata publiká e revista ku awe yama E Toren di Vigilansia tabatin un punto di bista diferente. Nan a komprondé ku Dios lo transformá e tera den un paradeis i ku miónes di hende obediente na dje lo biba aki riba tera—no den shelu. Pero, a tuma tempu pa nan haña sa ken e hendenan ei lo tabata. Ta klaru ku Studiantenan di Beibel tambe a komprondé ku, di akuerdo ku Beibel, algun hende lo “a ser kumprá for di tera” pa reina ku Hesus den shelu. (Rev. 14:3) E grupo ei lo a konsistí di 144.000 kristian zeloso i dediká ku a sirbi Dios fielmente tempu nan tabata riba tera. w19.09 27 §4-5