Yüni

Yòb tabata amigu ku Yehova, e tabatin un famia grandi masha felis i e tabata masha riku mes. (Yòb 1:​1-5) Pero, den un solo dia el a pèrdè kasi tur kos. Pa kuminsá, el a pèrdè tur su rikesanan. (Yòb 1:​13-17) Despues, tur su yunan a muri. Imaginá bo e sla i doló ku é ku su kasá a sinti ora ku nan a pèrdè no ún, pero tur nan dies yunan. Ta di komprondé dikon Yòb a sker su paña i a tira su kurpa abou. (Yòb 1:​18-20) Pero ainda Satanas no tabata kla ku Yòb. El a dal e ku un malesa doloroso i humiante. (Yòb 2:​6-8) Yòb tabata un hende masha respetá den su komunidat. Hende tabata bin pidié konseho. (Yòb 31:18) Pero awor nan tabata kore p’e. Su rumannan, su bon amigunan i te asta su kriánan tabata trat’é manera hende straño.—Yòb 19:​13, 14, 16. w22.06 21 §5-6

Despues di boutismo, nos tur tin ku sigui e konseho ku Apòstel Pablo a duna e kristiannan na Efeso. El a animá nan pa ta “kompletamente desaroyá.” (Efe. 4:13) Ku otro palabra, nan mester a sigui krese den sentido spiritual. Ta bisto ku bo ta stima Yehova masha hopi mes. Pero, bo amor p’e por bira mas fuerte ainda. Kon? Apòstel Pablo ta menshoná un manera na Filipensenan 1:9. Pablo a pidi Yehova pa e amor di e kristiannan di Filipo “krese mas i mas.” Pues, ta posibel pa stima Yehova mas ainda. Pa logra esei nos mester di “konosementu eksakto i pleno disernimentu.” Dikon? Pasó, mas mihó nos siña konosé Yehova, mas nos lo stim’é i mas nos lo gusta su personalidat i manera di hasi kosnan. Nos lo ke hasi tur loke nos por pa hasié felis i nunka nos lo no ke hasi nada pa kibra su kurason. Ademas, nos lo ke hasi nos esfuerso pa haña sa kiko ta su boluntat i buska manera pa kumpli ku esei. w22.08 2-3 §3-4

Loke tin skirbí den e buki di Revelashon no ta pa tur hende, pero pa nos ku ta sirbi Dios. P’esei, no ta sorprendé nos ku nos ta forma parti den kumplimentu di e profesianan ku tin den e buki ei. Apòstel Huan a referí na e periodo ku e profesianan ei lo kumpli ora el a skirbi: “Bou di inspirashon, mi a haña mi den e dia di Señor.” (Rev. 1:10) Huan a skirbi e palabranan akí rònt di aña 96 D.K. E tempu ei, ainda tabata falta hopi aña pa “e dia di Señor” kuminsá. (Mat. 25:​14, 19; Luk. 19:12) Profesianan di Beibel ta mustra ku el a kuminsá na 1914 ora Hesus a bira Rei den shelu. For di e aña ei, e profesianan den e buki di Revelashon, ku tin di haber ku Dios su pueblo, a kuminsá kumpli. Pues, nos ta bibando den “e dia di Señor.”—Rev. 1:3. w22.05 2 §2-3

Miéntras ku nan tur dos tabata bibu ainda e bestia salbahe i e profeta falsu a ser tirá den e lago di kandela ku ta kima ku suafel. Pues miéntras ku e gobièrnunan akí ta gobernando ainda, nan lo ser destruí pa semper. Kiko ta e lès pa nos? Komo kristian, nos mester ta leal na Yehova i su Reino. (Huan 18:36) Nos no ta mete ni tuma parti den niun asuntu polítiko. Pero, esei por ta hopi difísil pasobra gobièrnunan ta eksigí apoyo total di nan siudadanonan, sea ku echo òf ku palabra. Esnan ku sukumbí na e preshon ei lo haña e marka di e bestia salbahe. (Rev. 13:​16, 17) I si un kristian haña e marka ei, lo e pèrdè Yehova su aprobashon i lo e no haña bida eterno. (Rev. 14:​9, 10; 20:4) Ta masha importante pa nos keda leu for di tur loke tin haber ku polítika, sin importá kuantu preshon gobièrnu pone riba nos. w22.05 10-11 §12-13

Un meta ku bo por pone ta di siña un abilidat nobo. Si nos mehorá nos abilidatnan, nos lo por hasi mas pa Yehova den kongregashon. Por ehèmpel, pensa riba e kantidat di trahadónan ku mester pa konstrukshon di Bètel, Salòn di Asamblea i Salòn di Reino. Hopi di e rumannan akí a siña e abilidatnan ei pasobra nan a traha huntu ku otro rumannan ku tabatin mas eksperensia den esei. Awe, tantu ruman hòmbernan komo ruman muhénan por siña kon pa mantené Salòn di Reino i Salòn di Asamblea. Di e manera akí i tambe na otro maneranan, Yehova Dios, “e Rei di eternidat,” i Kristu Hesus, “Rei di esnan ku ta goberná komo rei,” ta usa rumannan ku ta ábil den nan trabou pa hasi kosnan maravioso. (1 Tim. 1:17; 6:15) Nos tambe ke traha duru i usa nos abilidatnan pa glorifiká Yehova, i no nos mes.—Huan 8:54. w22.04 24 §7; 25 §11

Sálomon tabata masha riku i tabatin un bida luhoso. (1 Rei. 10:​7, 14, 15) En kambio, Hesus tabatin masha tiki kos material anto ni un kas e no tabatin. (Mat. 8:20) Pero, nan tur dos tabatin un punto di bista balansá di kosnan material pasó nan sabiduria a bini di Yehova. Sálomon a rekonosé ku plaka ta permití nos kumpra e kosnan ku nos tin mester i algun kos ku nos ta deseá. Pero, aunke Sálomon tabata masha riku, el a komprondé ku tin kosnan mas importante ku plaka. Por ehèmpel, el a skirbi: “Un bon nòmber ta mas di deseá ku gran rikesa.” (Pro. 22:1) Tambe el a mira ku masha poko biaha hende ku sèn ta kontentu ku loke nan tin. (Ekl. 5:​10, 12) Anto el a bisa ku nos no mester pensa ku plaka ta e kos di mas importante, pasó e por disparsé masha lihé.—Pro. 23:​4, 5. w22.05 21 §4-5

Ora nos para pensa riba e bendishonnan ku Yehova ta duna nos aworakí, nos amistat kuné ta bira mas fuerte. Anto ora nos meditá riba e bon kosnan ku Yehova ta primintí nos, e speransa di sirbié pa semper lo keda bibu den nos mente. Tur e kosnan ei ta yuda nos sirbi Yehova ku goso.Yehova lo lanta pa mustra nos bondat ora e trese fin na e mundu malbado akí. Komo ku e ta un Dios di hustisia, nos ta konvensí ku lo e no laga Satanas su mundu eksistí ni un dia mas ku ta nesesario. (Isa. 25:9) Huntu ku Yehova nos ta warda pa e dia di nos liberashon yega. Pero mientrastantu, nos ta sigui balorá nos privilegio di hasi orashon, studia Dios su Palabra, apliká loke nos ta siña i meditá riba nos bendishonnan. Ora nos hasi esei, Yehova lo yuda nos sigui sirbié ku goso i nunka entregá. w22.11 13 §18-19

Aunke Beibel no ta papia tokante Timoteo su boutismo, nos por imaginá kon kontentu su mama Eunise tabata riba e dia ei. (Pro. 23:25) Aunke no tabata fásil, Eunise a logra yuda Timoteo stima Yehova i su Yu Hesukristu. Timoteo su mayornan no tabatin e mesun religion. Su tata tabata griego i su mama i wela tabata hudiu. (Echo. 16:1) Probablemente ora Timoteo tabata un tiner, Eunise i Loida a bira kristian, pero su tata sí nò. Kisas Timoteo tabata basta grandi pa tuma su mes desishonnan. Kiko lo el a disidí? Ta bisto ku mamanan den kongregashon ta stima nan famia. Anto mas ku tur kos, nan ke yuda nan yunan bira amigu di Yehova. Yehova sigur ta balorá nan esfuerso. (Pro. 1:​8, 9) Danki na Yehova su konsehonan, hopi mama a logra siña nan yunan pa stima i sirbi Yehova. w22.04 16 §1-3

Pronto Yehova ta bai hinka den kurason di e gobièrnunan di mundu “pa kumpli ku Su pensamentu.” Ku ki resultado? E gobièrnunan ei, esta, e “dies rei,” lo ataká tur religion falsu i kaba ku nan. (Rev. 17:​1, 2, 12, 16) Kon nos sa ku fin di Babilonia e Grandi ta serka? Pa kontestá e pregunta ei, ta bon pa nos kòrda ku Babilonia di antigwedat tabata un stat ku entre otro tabata haña protekshon for di e awanan di Riu Eufrátes. Revelashon ta kompará e miónes di miembronan di Babilonia e Grandi ku “awanan” ku ta proteh’é. (Rev. 17:15) Pero, e ta bisa tambe ku e awanan ei lo seka. Esei ta indiká ku “Babilonia e Grandi” lo pèrdè masha hopi di su miembronan. (Rev. 16:12) Awe nos ta mira e profesia ei kumpli pasobra hopi hende ta bandoná religion falsu, i ta kuminsá buska solushon pa nan problemanan otro kaminda. w22.07 5-6 §14-15

Ora nos pordoná, nos ta mustra ku nos ta gradisidu pa Yehova su miserikòrdia. Den un parábola, Hesus a kompará Yehova ku un doño ku a kanselá un debe grandi di un esklabo ku no por a pag’é bèk. Pero, e esklabo ei sí no a mustra miserikòrdia na un esklabo ku tabata deb’é masha tiki sèn mes. (Mat. 18:​23-35) Kiko Hesus tabata ke siña nos? Si di bèrdat nos ta gradisidu pa e kantidat di biahanan ku Yehova a mustra nos miserikòrdia, esei lo motivá nos pa pordoná otronan. (Sal. 103:9) Hopi aña pasá un Toren di Vigilansia a splik’é asin’akí: “Ni maske kuantu biaha bo pordoná otro hende, nunka e kantidat ei lo yega na e kantidat di biaha ku Yehova a pordoná bo i a mustra bo miserikòrdia a base di Kristu su sakrifisio.” Si nos pordoná, Yehova lo pordoná nos. Yehova ta mustra miserikòrdia na esnan ku ta miserikòrdioso. (Mat. 5:7) Hesus a mustra esei bon kla ora el a siña su disipelnan kon pa hasi orashon.—Mat. 6:​14, 15. w22.06 10 §8-9

Ora Hesus a bini na tera komo hende, el a imitá personalidat di su Tata perfektamente. (Huan 14:9) Pues ora nos siña tokante Hesus, nos ta bin konosé i stima Yehova. Tambe Hesus su siñansanan i e manera ku e ta guia e kongregashon ta benefisiá nos. Nos ta siña biba na un manera ku Yehova ta aprobá. Pero, no ta esei so. Asta ora ku Hesus a muri, nos a benefisiá. Despues ku Hesus a ser resusitá, el a ofresé un sakrifisio perfekto, e reskate, i su sanger “ta limpia nos di tur piká.” (1 Huan 1:7) Hesus ta un Rei poderoso i inmortal. Pronto lo e plècha kabes di e kolebra. (Gén. 3:15) Bo por imaginá bo kon dushi bida lo ta ora Satanas wòrdu destruí? No falta muchu. P’esei, no entregá! Mediante e desendiente di e muhé, Yehova lo hasi hopi kos bon pa “tur e nashonnan di e tera.” w22.07 18 §13; 19 §19

Ora nos pone meta, nos mester ta fleksibel tambe. Dikon? Pasobra nos sirkunstansia por kambia. Por ehèmpel: Apòstel Pablo a yuda forma un kongregashon nobo na Tesalónika. Pero debí na oposishon, e mester a bandoná e stat. (Echo. 17:​1-5, 10) Si el a keda tòg, e por a pone bida di su rumannan na peliger. Pero, e no a laga esei strob’é di purba yuda nan. Mas bien, el a adaptá na su sirkunstansia. Mas despues, el a manda Timoteo fortalesé fe di e rumannan nobo na Tesalónika. (1 Tes. 3:​1, 2) Esta kontentu e rumannan ei tabata. Nos por siña hopi for di loke a pasa ku Pablo na Tesalónika. Kisas nos ta pone un meta pa logra un sierto privilegio, pero diripiente nos sirkunstansia ta kambia i nos no por logra e meta ei. (Ekl. 9:11) Den un kaso asina, sea dispuesto pa adaptá i pone un otro meta. w22.04 25-26 §14-15

Yehova ta konsolá nos dor di duna nos speransa pa futuro. Kon Beibel ta konsolá nos ora nos ta pasa den prueba? Yehova ta sigurá nos den Beibel ku no tin apsolutamente nada, ni sikiera prueba, ku por “separá nos for di [su] amor.” (Rom. 8:​38, 39) Ademas, e ta garantisá nos ku e ta “serka di tur esnan ku ta sklama na dje” den orashon. (Sal. 145:18) E ta bisa ku si nos konfia den dje, nos por wanta kualke prueba i sinti nos felis apesar di difikultat. (1 Kor. 10:13; Sant. 1:2) Beibel ta yuda nos kòrda tambe ku kualke prueba ku nos ta haña nos kuné ta temporal i kòrtiku si nos kompará nan ku e bida eterno ku nos tin nos dilanti. (2 Kor. 4:​16-18) Yehova ta primintí nos ku lo e destruí tur esnan ku ta kousa nos problemanan, esta, Satanas e Diabel i tur esnan ku ta imit’é. (Sal. 37:10) Abo a kuminsá siña for di kabes algun teksto ku lo yuda bo wanta e pruebanan ku lo bini den futuro? w22.08 11 §11

Bo a yega di puntra bo mes si aña aden, aña afó lo bo por biba segun Yehova su normanan hustu? Yehova a primintí ku bo hustisia por bira “manera ola di laman.” (Isa. 48:18) Imaginá ku bo ta pará na laman ta wak kon e olanan ta bin kantu un tras di otro. Akaso na e momento ei lo bo preokupá ku lo yega e dia ku e olanan lo stòp di bin kantu? Nò. Pasó, bo sa ku semper e olanan lo sigui hasi esei. Pero, kiko bo tin ku hasi pa bo hustisia ta manera ola di laman? Promé ku bo tuma un desishon, puntra bo mes: ‘Kiko Yehova ke pa mi hasi?’ Anto hasi esei! Sin importá kon difísil e desishon ei ta, bo Tata semper lo t’ei pa yuda bo sigui hasi loke ta korekto tur dia!—Isa. 40:​29-31. w22.08 30 §15-17

Na final di e 1.000 añanan, lo laga Satanas sali for di su prizòn. E ora ei, lo e purba gaña tur hende perfekto. Anto durante e tempu ei, tur hende perfekto lo tin e chèns di proba na ki banda nan ta pará relashoná ku e kuestion di Dios su nòmber i soberania. (Rev. 20:​8-10) Loke kada hende hasi lo determiná si nan nòmber lo ser skirbí pa semper den e buki di bida. Nos no sa kuantu, pero algun hende lo hasi meskos ku Adam ku Eva i rechasá Yehova su derecho di goberná. Kiko lo pasa ku nan? Revelashon 20:15 ta bisa: “Tur esnan ku nan nòmber no tabata skirbí den e buki di bida, el a benta den e lago di kandela.” Pues, tur hende rebelde lo ser destruí pa semper. Pero, mayoria hende perfekto lo pasa e prueba final. w22.09 23-24 §15-16

Algun ruman di promé siglo a insistí ku e kristiannan no-hudiu mester a ser sirkunsidá. Kisas nan tabatin e punto di bista ei pa evitá ku hende pafó di e kongregashon lo a kritiká nan. (Gal. 6:12) Apòstel Pablo no tabata niun tiki eens ku esei. Pero na lugá di insistí pa kosnan bai manera e ke, e tabata humilde i a pidi yudansa di e apòstel- i ansianonan di Herúsalèm. (Echo. 15:2) Asina ei el a yuda e rumannan mantené nan goso i e pas den e kongregashon. (Echo. 15:​30, 31) Si surgi un desakuerdo serio, nos por promové pas ora nos ta buska guia di esnan ku Yehova a asigná pa kuida e kongregashon. Ademas, mayoria di biaha nos ta haña guia basá riba Beibel den nos publikashonnan i den e instrukshonnan ku ta bini for di e organisashon. Si nos hasi esfuerso pa sigui e guia- i instrukshonnan na lugá di traha regla òf para ariba pa kosnan semper bai na nos manera, nos lo yuda promové pas den e kongregashon. w22.08 22 §8-9

Tardi òf trempan, tur hende ta sinti e nesesidat di deshogá nan mes ku un bon amigu. Tin biaha esei no ta fásil. Kisas nos no tin kustumber di konta otro hende nos sintimentunan. Si nos hasi esei anto despues haña sa ku loke nos a konta un amigu ta riba kaya, nos lo sinti nos hopi malu i kibrá. Di otro un banda, nos ta apresiá mashá si nos tin un amigu ku por tene kos konfidensial. Ansiano ku ta tene asuntunan konfidensial “ta manera un refugio kontra bientu, i un protekshon” pa nan rumannan. (Isa. 32:2) Nos sa ku nos por papia habrí ku nan sin tin miedu ku nan lo konta otro hende. Di otro banda, nos no ta preshoná nan pa konta nos kosnan konfidensial. Ademas, nos ta balorá ora kasá di un ansiano no ta purba di piska informashon konfidensial for di su esposo. Eigenlijk, ta pa su mes benefisio su esposo no ta kont’é asuntunan personal di e rumannan. w22.09 11 §10-11

Nos por tin sigur ku Yehova lo reskatá su fiel sirbidónan durante e “tribulashon grandi” ku ta djis tras di porta. (Mat. 24:21; Dan. 12:1) Lo e hasi esei ora ku Gòg di Magòg, un koalishon di nashon, lansa un atake violento rònt mundu kontra Dios su fiel sirbidónan. Asta si e koalishon ei inkluí tur e 193 miembronan di Nashonnan Uní, nan ta nada kompará ku e Ser supremo i su ehérsito selestial. Yehova a primintí: “Lo mi engrandesé mi mes, santifiká mi mes i hasi mi mes konosí den bista di hopi nashon; i nan lo sa ku ami ta SEÑOR.” (Eze. 38:​14-16, 23) E atake di Gòg lo hiba na e bataya desisivo di Armagedon, ora Yehova destruí “e reinan di henter e tera habitá.” (Rev. 16:​14, 16; 19:​19-21) Di otro banda, “ta hende hustu so lo keda biba riba tera.” Sí, ‘ta hende íntegro so lo keda riba tera.’—Pro. 2:21. w22.10 16-17 §16-17

Nos no por lesa kurason. Ta Yehova so por analisá, òf “pisa e motibunan.” (Pro. 16:2) E stima tur sorto di hende, sin importá nan background òf kultura. Anto e ta animá nos pa “habri [nos] kurason hanchu.” (2 Kor. 6:13) Pues, nos no mester husga nos rumannan mas bien stima nan. Nos no ta husga hende ku no ta forma parti di e kongregashon tampoko. Si un famia di nos no ta den e bèrdat, nos no mester husg’é bisando: “Ken! Esei? Nunka lo e bin den e bèrdat!” Esei lo ta arogante di nos parti. Te ainda Yehova ta duna “hende [na] tur kaminda” chèns pa arepentí. (Echo. 17:30) No lubidá esaki: ‘Pensa ku bo ta mas hustu ku otro hende ta un forma di inhustisia.’ Ora nos stima Yehova su normanan hustu, nos lo ta felis i lo ta un bon ehèmpel pa otronan. Esei lo pone nan stima nos mas i stima Yehova tambe mas. w22.08 31 §20-22

Nos sa ku algun hende ta kontra nos trabou di prediká. I chèns ta grandi ku, den futuro, e oposishon ei lo oumentá. (Dan. 11:44; 2 Tim. 3:12; Rev. 16:21) Pero, nos por tin sigur ku Yehova lo duna nos e yudansa ku nos tin mester. Semper el a yuda su sirbidónan kumpli ku nan asignashon, asta ora esei tabata hopi difísil. Laga nos wak ehèmpel di Profeta Ezekiel, kende a prediká na e hudiunan den eksilio na Babilonia. Ki sorto di hende Ezekiel mester a prediká na dje? Yehova a deskribí nan komo “kabesura,” “sobèrbè” i “rebelde.” El a kompará nan ku bringamosa i skòrpion pasobra nan tabata peligroso i a hasi daño. No ta pòrnada anto ku bes tras bes Yehova a bisa Ezekiel pa “no tene miedu.” (Eze. 2:​3-6) Ezekiel por a kumpli ku su trabou di prediká pasobra (1) ta Yehova a mand’é, (2) el a haña forsa di spiritu santu i (3) Dios su palabranan a fortalesé su fe. w22.11 2 §1-2

Di tur e sernan bibu ku Yehova a krea riba tera ta hende so el duna e speransa di biba pa semper. Yehova a krea nos tambe ku un deseo fuerte pa sigui biba. Na Eklesiástes 3:11 nos ta lesa ku Yehova “a pone eternidat den [hende su] kurason.” Esei ta un motibu dikon nos ta mira morto komo un enemigu. (1 Kor. 15:26) Imaginá ku bo a bira hopi malu. Lo bo djis sinta man krusá i warda morto yega? Niun ratu so! Normalmente, nos ta bai dòkter i usa remedi pa bringa e malesa. De echo, nos ta hasi tur loke rasonablemente ta den nos man pa nos no muri. Anto ora un amigu òf famia di nos muri, sea e ta yòn òf di edat, nos ta keda kibrá pa hopi tempu. (Huan 11:​32, 33) Si Yehova, kende ta stima nos, su propósito no tabata pa nos biba pa semper, lo e no a duna nos e deseo i kapasidat pa sigui biba. w22.12 3 §5; 4 §7

Den e tempunan difísil akí, hopi sirbidó di Yehova ta malu, tin miedu òf ta sinti nan nan so. Hasi tur loke bo por pa keda den kontakto ku bo rumannan. Debí na un brote di malesa, kisas nos lo tin ku tene distansia físiko asta ora nos ta huntu ku nos rumannan. Den un situashon asina bo por sinti bo meskos ku Apòstel Huan. E tabatin hopi gana di mira su amigu Gayo kara kara. (3 Huan 13, 14) Pero, Huan a komprondé ku pa un tempu e no por a hasi esei. Pues, el a hasi loke e tabata por: El a skirbi Gayo un karta. Si bo no por bishitá bo rumannan en persona, buska otro manera pa tene kontakto ku nan. Ora bo hasi esei, lo bo no sinti bo dje so ei i lo bo sinti bo mas trankil. Si bo ta sinti bo hopi anshá, yama e ansianonan i aseptá nan yudansa amoroso.—Isa. 32:​1, 2. w22.12 17-18 §6-7

Beibel ta bisa ku pa un tempu nan a bui Yosef su pianan i a mara su garganta na kadena. (Sal. 105:​17, 18) Pues, Yosef su situashon a bai di malu pa pió: di un katibu di konfiansa pa un prizonero sin balor. Bo a yega di ta den un situashon kaminda bo a hasi hopi orashon ma tòg kos a bira pió? Algu asina por pasa. Yehova no ta protehá nos di e pruebanan ku nos ta eksperensiá den e mundu akí ku ta goberná pa Satanas. (1 Huan 5:19) Pero, bo por tin sigur di esaki: Yehova sa presis den kiko bo ta pasa i ta interesá den bo. (Mat. 10:​29-31; 1 Ped. 5:​6, 7) Ademas, el a primintí: “Hamas lo mi bandoná bo, i hamas lo mi laga bo desampará.” (Heb. 13:5) Yehova por yuda bo pa no entregá asta ora parse ku bo situashon no tin salida. w23.01 16 §7-8

Beibel ta sigurá nos ku Dios no ta bira lomba pa nos ora nos kometé eror. E israelitanan a peka kontra Yehova bes tras bes. Pero asina mes, ora nan a arepentí di kurason, Dios a pordoná nan. E kristiannan di promé siglo tambe tabata sa ku Yehova ta stima nan masha hopi mes. Yehova a inspirá Apòstel Pablo pa animá e kristiannan na Korinto pa ‘pordoná i konsolá’ un hòmber ku pa un tempu a kometé piká serio pero ku a arepentí di kurason. (2 Kor. 2:​6, 7; 1 Kor. 5:​1-5) Ta bunita pa mira ku Yehova no a benta su adoradónan afó djis pasobra nan a kometé un eror. Na lugá di esei, ku amor el a yuda nan, korigí nan i invitá nan pa bira su amigu atrobe. Anto awendia e ta primintí di hasi meskos pa tur pekadó ku arepentí di kurason. (Sant. 4:​8-10) Beibel ta siña nos ku Dios ta sabí, ku e ta hustu i ku e ta stima nos. I e ta proba ku Yehova ke pa nos konos’é i bira su amigu. w23.02 7 §16-17

Nos ta interesá pa mira kon e susesonan di mundu ta kumpli ku e profesianan di Beibel. Por ehèmpel, Hesus a papia di kosnan spesífiko ku lo sosodé pa yuda nos sa ku fin di Satanas su mundu ta yegando serka. (Mat. 24:​3-14) Apòstel Pedro a animá nos pa presta atenshon na kumplimentu di profesia pa asina nos fe keda fuerte. (2 Ped. 1:​20, 21) E ke yuda nos keda balansá ora nos ta analisá profesia. El a bisa nos pa “kòrda semper riba e binida di e dia di Yehova.” (2 Ped. 3:​11-13) Pa ki propósito? No pa purba di saka ‘fó ki “dia i ora” Yehova lo trese Armagedon, sino pa usa e tempu ku a sobra pa “ta hende di kondukta santu i . . . hasi obranan ku ta demostrá deboshon na Dios.” (Mat. 24:36; Luk. 12:40) Nos ke sigui komportá nos mes na e manera korekto i hasi sigur ku tur loke nos ta hasi pa Yehova ta demostrá ku nos ta stim’é masha hopi mes. Pero si nos ke hasi esei, nos mester presta atenshon na nos mes. w23.02 16 §4, 6

Pa e “otro karné” por biba den Paradeis, nan tin ku kumpli ku sierto rekisitonan for di awor. Nos tin ku mustra kuantu nos ta stima Hesus. Nos por hasi esei na e manera ku nos ta trata su rumannan ungí. Hesus a bisa ku ta a base di esei lo e husga ken ta karné. (Mat. 25:​31-40) Nos por apoyá e rumannan ei ora nos ta partisipá den e trabou di prediká i di yuda hende bira disipel. (Mat. 28:​18-20) Nos no tin ku warda te ora nos ta den Paradeis pa bira e sorto di hende ku Yehova ke tin einan. For di awor nos por hasi esfuerso pa ta onesto den nos abla i akshon i pa hiba un bida balansá. Ademas, nos mester ta leal na Yehova, nos kasá i nos rumannan. Si awor ku nos ta den e mundu malbado akí nos ta hasi tur nos esfuerso pa obedesé Yehova, lo bira hopi mas fásil pa nos obedes’é den Paradeis. Nos mester kultivá tambe aktitut- i kualidatnan pa mustra ku nos ta preparando pa biba den Paradeis. w22.12 11-12 §14-16

Nos ta kontentu ku Hesus ta nos Rei pasó e ta e mihó Gobernante ku tin. Ta Yehova mes a train su Yu i a skoh’é pa goberná. (Isa. 50:​4, 5) Pensa tambe riba tur e amor ku Hesus a demostrá. (Huan 13:1) Komo e ta bo Rei, e meresé pa bo stim’é. El a bisa ku esnan ku di bèrdat ta stim’é i ta obedesé su mandamentunan ta su amigunan. (Huan 14:15; 15:​14, 15) Sí, lo ta un gran onor pa ta amigu di e Yu di Yehova! Bo sa ku Hesus ta humilde i ta imitá su Tata perfektamente. Ademas, bo a siña ku el a alimentá hende ku tabatin hamber, konsolá hende desanimá i asta a kura hende malu. (Mat. 14:​14-21) Tambe, bo a mira kon e ta guia e kongregashon awe. (Mat. 23:10) I bo sa ku, komo Rei di e Reino di Dios, lo e hasi kosnan maravioso pa nos den futuro. Awor, kon abo por mustra ku bo ta stima Hesus? Esei ta dor di sigui su ehèmpel. I un di e promé kosnan ku bo por hasi pa sigui su ehèmpel ta di dediká bo bida na Yehova i batisá. w23.03 4 §8, 10

Yehova a krea tantu e kosnan den shelu komo e kosnan riba tera i tambe den laman. I tur e kosnan ei ta siña nos tokante dje. (Sal. 104:​24, 25) Anto wak e manera ku Dios a traha nos. El a krea nos ku e abilidat di apresiá e bunitesa ku tin den naturalesa. Tambe el a duna nos e abilidat di mira, skucha, mishi, purba i hole. E sentidonan ei ta pone ku nos por disfrutá di e kosnan ku el a krea. Beibel ta menshoná un otro motibu importante dikon nos tin ku opservá kreashon. Kreashon ta siña nos tokante Yehova su kualidatnan. (Rom. 1:20) Por ehèmpel, wak e kosnan ku Yehova a krea i mira kon maravioso nan ta diseñá. Ora nos hasi esei, nos ta realisá kon sabí Yehova ta. Anto no lubidá e variedat di kuminda ku nos por disfrutá di dje. Esei ta proba bon kla kuantu Yehova stima nos. Ora nos mira Yehova su kualidatnan den e kosnan ku el a krea, nos ta siña konos’é mihó i nos lo ke hala mas serka di dje. w23.03 16 §4-5

Segun ku mundu ta bai di malu pa pió, nos konfiansa den Dios su Palabra lo ser poné na prueba. Hende lo purba di pone nos duda: ‘Loke Beibel ta bisa ta bèrdat? Di bèrdat Yehova a nombra e esklabo fiel i prudente pa guia su sirbidónan awe?’ Si nos ta konvensí ku Yehova su Palabra semper ta bèrdat, e atakenan ei lo no kibra nos fe. Kada un di nos lo bisa: “Mi ta determiná pa obedesé [Yehova su] normanan henter mi bida, sí, te na mi morto.” (Sal. 119:112) Nos lo “no tin bèrgwensa” pa papia ku otro hende tokante e bèrdat i pa animá nan pa apliká Beibel su konseho den nan bida. (Sal. 119:46) Ademas, nos lo por soportá e situashonnan di mas difísil, inkluso persekushon, “ku pasenshi i goso.” (Kol. 1:11; Sal. 119:​143, 157) E bèrdat ta yuda nos keda trankil i ta siña nos kon pa biba den un mundu ku ta mas konfundí i kaótiko ku nunka. Ademas, e ta duna nos un bunita speransa di un mihó futuro bou di e Reino di Dios. w23.01 7 §16-17

Riba e anochi promé ku Hesus a muri, el a tuma hopi tempu pa hasi orashon pa su disipelnan. El a pidi su Tata pa “protehá nan pa motibu di e Malbado.” (Huan 17:15) Loke Hesus a hasi ei realmente a mustra kuantu e tabata stima su disipelnan. Aunke ku e tabata sa ku un bes akí e mes lo a pasa den un prueba masha difísil, e tabata preokupá pa su disipelnan. Meskos ku Hesus, nos no ke pensa riba nos so ora nos ta hasi orashon. Mas bien, nos ke hasi orashon tur ora bai pa nos rumannan. Ora nos hasi esei, nos ta obedesé Hesus su mandamentu di stima otro i nos ta mustra Yehova kuantu nos ta stima nos rumannan. Ta bale la pena pa hasi orashon pa nos rumannan. Dikon? Pasobra Beibel ta bisa ku “súplika di un hende hustu tin hopi poder i ta masha efektivo.” (Sant. 5:16) Nos tin ku hasi orashon pa nos rumannan pasó nan ta pasa den hopi prueba. w22.07 23-24 §13-15