Òktober

Nos kantamentu i komentarionan bon prepará ta hasi nos reunionnan dushi pa asistí na nan. Pero pa algun ruman, kantamentu i dunamentu di komentario no ta algu fásil. Wèl, si esei ta bo kaso, wak kiko algun ruman a hasi pa vense e miedu ei. Relashoná ku kantamentu, algun a mira ku kanta di kurason a yuda nan. E motibu di mas importante pa kanta na nos reunionnan ta pa alabá Yehova. Ora di prepará pa reunion, no bula e kantikanan. Purba di wak kon e kantika ta mara ku loke lo bai trata na reunion. Ademas, konsentrá mas riba e letranan i ménos riba bo kantamentu. Pa algun ruman duna komentario no ta nada fásil. Kiko por yuda? Purba duna komentario regularmente. Kòrda ku no ta malu pa bo komentario ta dirèkt i kòrtiku pasobra ta e tipo di komentarionan ei e ruman ku ta dirigí ke. Yehova ta kontentu ora nos hasi nos esfuerso pa alab’é na reunion. w22.04 7-8 §12-15

E palabra “ayudante,” ta referí na un persona ku ta sali na kareda pa yuda un hende ku ta grita pa yudansa. Imaginá bo kon Yehova ta sali na kareda pa yuda un hende ku ta den angustia. E deskripshon ei ta mustra ku Yehova ke ta nos Ayudante i tin masha gana di esei. Ku Yehova na nos lado, nos por wanta prueba ku goso. Kon Yehova ta yuda nos? Pa kontestá esei, laga nos ban den e buki di Isaías. Dikon Isaías? Wèl, hopi di e profesianan ku Yehova a laga Isaías skirbi ta konta pa nos tambe. Ademas, hopi biaha Isaías a usa palabranan fásil pa deskribí Yehova. Por ehèmpel, na kapítulo 30 el usa bunita ilustrashonnan pa deskribí kon Yehova ta yuda su pueblo. El bisa ku Yehova ta (1) skucha nos orashonnan ku atenshon i ta kontestá nan, (2) guia nos i (3) bendishoná nos aworakí i den futuro. w22.11 8 §2-3

Hesus a bisa e kristiannan na Smirna i Filadelfia ku nan no mester tin miedu di persekushon pasobra Yehova lo rekompensá nan fieldat. (Rev. 3:10) Nos lo haña nos ku persekushon, p’esei nos mester ta prepará pa perseverá. (Mat. 24:​9, 13; 2 Kor. 12:10) E buki di Revelashon ta bisa nos bon kla ku Dios su sirbidónan lo haña nan ku persekushon durante “e dia di Señor,” esta, nos tempu. (Rev. 1:10) Kapítulo 12 ta splika ku tabatin guera den shelu nèt despues ku Hesus a bira Rei di Dios su Reino. Miguel, un nòmber ku ta referí na Hesukristu, ku su angelnan a bringa kontra Satanas i e demoñonan. (Rev. 12:​7, 8) E enemigunan di Dios a pèrdè i a ser bentá abou den serkania di tera. Komo resultado, nan ta kousa sufrimentu pa tur hende aki riba tera.—Rev. 12:​9, 12. w22.05 5 §12-13

Yehova su desishonnan semper ta hustu. E ta un Dios kompletamente imparsial. Ora Yehova pordoná, nunka lo e laga un hende su aparensia, situashon ekonómiko, posishon sosial ni don influensi’É. (1 Sám. 16:7; Sant. 2:​1-4) Niun hende no por kumpra Yehova ni fòrs’é hasi algu. Su desishonnan no ta basá riba emoshon. (Éks. 34:7) Sin duda, Yehova ta e mihó Hues pasobra e sa tur kos tokante nos i nos situashon. (Deu. 32:4) E eskritornan di Skritura Hebreo tabata sa ku Yehova su pordon ta inkomparabel. Tin biaha nan tabata usa un palabra hebreo ku segun un referensia “ta ser usá solamente pa deskribí e pordon ku Dios ta duna un pekadó. Nunka ta usa e palabra ei pa referí na e pordon ku un hende ta duna un otro, kual ta hopi limitá kompará ku e pordon di Dios.” Ta Yehova so tin outoridat pa kompletamente pordoná un pekadó ku a arepentí. w22.06 4 §10-11

Si bo ta lanta bo yu bo so òf bo kasá no ta den e bèrdat, sea sigur ku bo ehèmpel di fieldat ta fortalesé i animá esnan rònt di bo. Kiko si ta parse ku apesar di tur bo esfuersonan, bo yu no ke sirbi Yehova? Kòrda ku no ta djawe pa mañan un yu ta ser entrená. Ora bo planta un simia, bo no sa sigur sigur si e mata ku sali lo pari fruta òf nò. Aunke no ta dependé di bo si e mata ta bai pari fruta, tòg bo ta sigui dun’é awa pa e tin mihó chèns pa krese. (Mar. 4:​26-29) Di mes manera, komo mama, tin biaha bo ta puntra bo mes si tur e esfuersonan ku bo ta hasi lo yuda bo yu stima Yehova. Ta bèrdat ku bo no por disidí pa bo yunan. Pero, si bo sigui hasi tur loke bo por pa train nan, nan lo tin e mihó chèns pa bira amigu di Yehova. w22.04 19-20 §16-17

Miéntras Sálomon tabata sirbi Yehova fielmente, e tabatin un punto di bista balansá di su mes. Ora e tabata yòn i relativamente nobo komo rei, el a rekonosé ku e no tabatin eksperensia i a pidi Yehova Dios gui’é. (1 Rei. 3:​7-9) Sálomon tabata konsiente tambe di e peliger di bira un hende orguyoso. Ta tristu pa bisa ku Sálomon mes no a sigui e konseho ei. Pasobra un par di aña despues, el a bira orguyoso i no a hasi kaso di Yehova su instrukshonnan. Por ehèmpel, un di e leinan a bisa ku un rei hebreo “no mester a tuma hopi esposa pa su mes, pa su kurason no desviá.” (Deu. 17:17) Sálomon no a hasi kaso di e lei ei i tabatin 700 esposa i 300 konkubina. (1 Rei. 11:​1-3) Kisas Sálomon a pensa: “Mi sa ki mi ta hasi.” Ku tempu el a sufri konsekuensia di su desobedensia na Yehova.—1 Rei. 11:​9-13. w22.05 23 §12

Tur hende na mundu tin un desishon importante di tuma: Apoyá Yehova Dios komo e Gobernante legítimo di universo òf skohe na banda di Satanas e Diabel, kende ta Dios su enemigu kruel. Aki no tin kuenta di keda neutral. Loke nan disidí lo determiná si nan lo biba pa semper òf nò. (Mat. 25:​31-33, 46) Durante “e tribulashon grandi,” tur hende lo haña un marka, sea pa sobrebibí òf pa ser destruí. (Rev. 7:14; 14:​9-11; Eze. 9:​4, 6) Si bo a skohe pa Yehova su gobernashon, b’a skohe bon. Sigur bo ke yuda otro hende tuma e mesun bon desishon. E buki di Revelashon por yuda bo den esei. Revelashon ta mustra nos kiko lo pasa ku esnan ku skohe pa banda di Satanas. Pero, e ta mustra nos tambe e bendishonnan ku ta spera esnan ku fielmente ta keda na banda di Yehova. Ta masha importante pa nos ta na altura di e echonan ei, pasó esei lo yuda nos ta mas determiná pa sigui sirbi Yehova. Ademas, nos por usa loke nos a siña pa yuda otro hende tuma e desishon korekto i pa no hala atras. w22.05 15 §1-2

Nos mester skucha Yehova, no nos enemigunan. Yòb a skucha bon ora Yehova a papia kuné. Yehova a rasoná kuné i den un sentido el a bis’é: ‘Mi sa delaster un kos ku bo a pasa aden. Bo no ta kere ku mi por yuda bo?’ Den Yòb su kontesta nos por a sinti su humildat i ku e tabata masha gradisidu pa e echo ku Yehova tabata bon kuné. El a bisa Yehova: “Ta tende mi a tende di bo, ma awor mi wowo ta mira bo.” (Yòb 42:5) Ora Yòb a bisa e palabranan ei, probablemente e tabata sintá meimei di shinishi ku su kurpa tur na herida habrí. Apesar ku e tabata den e situashon ei, Yehova a lag’é sa ku E tabata stim’é i a sigurá Yòb ku e tabatin Su aprobashon. (Yòb 42:​7, 8) Awe tambe hende por insultá nos i menospresiá nos. Nan por purba di daña nos reputashon òf reputashon di e organisashon. E relato di Yòb ta siña nos ku Yehova tin konfiansa ku nos lo keda leal na dje asta ora nos haña nos den prueba. w22.06 24 §15-16

Den shelu lo tin gritu di alegria ora Babilonia e Grandi ser destruí. Pero, un otro suseso lo pone ku lo tin mas alegria ainda. (Rev. 19:​1-3) Kua suseso esei ta? E “kasamentu di e Lamchi,” e suseso mas emoshonante den e buki di Revelashon. Aunke ku tur e 144.000 lo ta den shelu nèt promé ku Armagedon kuminsá, no ta na e momento ei e kasamentu lo tuma lugá. (Rev. 21:​1, 2) Lo e tuma lugá despues di Armagedon, ora ku tur Dios su enemigunan a ser destruí. (Sal. 45:​3, 4, 13-17) Kiko lo pasa na e kasamentu di e Lamchi? Kasamentu ta uni un hòmber i un muhé. Di mes manera, e kasamentu di e Lamchi, den un sentido, lo uni e Rei, Hesukristu, ku su “brùit,” e 144.000. Kuminsando ku e suseso importante ei, e 144.000 huntu ku Hesus lo kuminsá goberná tera pa 1.000 aña.—Rev. 20:6. w22.05 17 §11-13

Hesus a bisa ku durante e tempu di fin, lo e nombra un “esklabo fiel i prudente” pa perkurá kuminda spiritual. (Mat. 24:45) I esei ta e kaso tambe. Hesus a usa un grupo chikitu di kristian ungí pa perkurá “kuminda na e debido tempu” pa Dios su pueblo i hende interesá. E rumannan akí sa ku nan no tin outoridat pa manda riba fe di Hesus su siguidónan. (2 Kor. 1:24) Mas bien, nan ta rekonosé ku Hesukristu ta e “lider i komandante” di su siguidónan. (Isa. 55:4) Desde 1919, e esklabo fiel a prepará diferente buki ku a yuda hende interesá siña e bèrdatnan di Beibel. Na 1921 nan a saka, na ingles, e buki E Arpa di Dios ku a yuda hende interesá siña e bèrdatnan básiko di Beibel. Ku tempu, nan a saka mas publikashon. Kua buki a yuda bo siña konosé i stima Yehova? w22.07 10 §9-10

No tin niun persona mas generoso ku Yehova. Semper e ta duna bo muchu mas ku loke abo por dun’é. (Mar. 10:​29, 30) E tipo di bida ku e ta bai duna bo lo ta muchu mas mihó ku loke bo por imaginá. I bo por disfrutá di e bida ei asta for di awor. Ora bo batisá, den un sentido bo ta kuminsá un bida nobo. Bo tabata sa ku bo por sigui sirbi bo Tata, kende ta stima bo, pa semper? Bo tabata sa ku e amor ku tin entre abo i bo Tata por sigui krese? Bo tabata sa ku bo por biba tanten ku e ta biba, esta, pa eternidat? Sí, tur eseinan ta posibel! Ora nos tuma e pasonan pa dediká nos bida na Yehova i batisá, nos tin e bunita privilegio di duna nos Tata algu presioso. Kòrda, tur kos bon i kada momento felis den bida a bini di Yehova. Pero kiko abo por hasi pa Yehova? Ki regalo bo por duna e Doño di shelu i tera? Wèl, loke nos por hasi ta di skohe boluntariamente pa sirbié di henter nos kurason. (Yòb 1:8; 41:11; Pro. 27:11) No tin un mihó manera pa usa bo bida! w23.03 6 §16-17

Ora bo ta hóben, e deseo pa hasi sèks por ta hopi fuerte. I tin biaha bo por haña bo ku hopi preshon pa kometé inmoralidat seksual. Anto ta nèt esei ta loke Satanas ke pa bo hasi. Kiko por yuda bo pa no kai den e trampa ei? (1 Tes. 4:​3, 4) Bisa Yehova loke bo ta sinti, habri bo kurason i bis’é tur kos. Pidié duna bo forsa. (Mat. 6:13) Kòrda ku e ke yuda bo. Lo e no rabia ku bo ni husga bo. (Sal. 103:​13, 14) No purba di resolvé bo problemanan riba bo mes. Kòmbersá ku bo mayornan i konta nan kiko bo ta pasando aden. Ta bèrdat ku no ta fásil pa bo papia ku nan tokante algu asina personal, pero ta importante pa bo hasi esei. Ora bo lesa Beibel i tuma tempu pa komprondé bon loke bo a kaba di lesa, lo bo mira ku ta hopi mas fásil pa bo tuma desishonnan ku ta agradá Yehova. Lo bo ripará ku bo no mester di regla pa delaster un kos pasobra lo bo komprondé Yehova su manera di pensa. w22.08 5 §10-12

Ta normal ku un kabes di famia kristian ta tuma su responsabilidat di perkurá pa su famia na serio. Si bo ta un kabes di famia, kisas bo ta preokupá pensando ku lo bo no por pone pan riba mesa òf ku lo bo no por paga hür òf hipotek. Anto kisas bo ta pensa: ‘Si mi pèrdè mi trabou, unda mi ta bai haña un otro?’ Òf bo ta pensa ku bo no por biba ku ménos sèn. Debí na e miedunan ei, Satanas a logra stroba hopi hende di sirbi Yehova. Satanas ke pa nos kere ku Yehova no ta preokupá su kabes ku nos i ku lo e no yuda nos perkurá pa nos famia. I si nos kere algu asina, nos lo hasi loke sea ta nesesario pa keda ku nos trabou, asta si esei ke men hasi algu ku Yehova no gusta. w22.06 15 §5-6

Nos sa ku Yehova ta un Dios “yen di kompashon i grasia, kende no ta rabia lihé i kende ta abundá den miserikòrdia i bèrdat.” (Éks. 34:6) Ademas, e stima hustisia. (Isa. 61:8) Ta duel e mashá di mira nos sufri, i e ta anhelá e momento ku e por kaba ku tur sufrimentu. (Yer. 29:11) Nos ta anhelá pa e hasi esei! Pa e motibunan ei, nos stima Yehova asina tantu. Un otro motibu pakiko nos ta stima e bèrdat ta pasobra e ta mehorá nos bida. Por ehèmpel, e bèrdat ta duna nos speransa pa futuro. Meskos ku un anker ta tene un boto firme na su lugá ora tin mal tempu, asina tambe e speransa ku nos ta haña den Beibel ta yuda nos keda firme i kalmu ora nos haña nos ku difikultat. Den e teksto di awe apòstel Pablo tabata papia di e speransa di bai shelu ku e kristiannan ungí tin. Pero, loke el a bisa ta konta tambe pa e kristiannan ku tin speransa di biba pa semper aki riba tera. (Huan 3:16) Sin duda, e speransa di biba pa semper a duna nos bida propósito. w22.08 14-15 §3-5

Amor ta e base di konfiansa. Loke nos ta lesa na 1 Korintionan kapítulo 13 tokante amor por yuda nos konfia nos rumannan òf yuda nos konfia nan atrobe. (1 Kor. 13:​4-8) Por ehèmpel, versíkulo 4 ta bisa ku “amor tin pasenshi i ta bondadoso.” Yehova tin pasenshi ku nos asta ora nos peka kontra dje. Pues anto, nos tambe mester tin pasenshi ku nos rumannan ora nan bisa òf hasi algu ku ta duel nos òf ku ta traha riba nos nèrvio. Versíkulo 5 ta bisa ku “[amor] no ta rabia lihé. E no ta keda kòrda e malu ku hende a hasié.” Ku otro palabra, nos lo no ke traha un lista mental di tur e kosnan ku un ruman a hasi nos. I Eklesiástes 7:9 ta bisa pa “no sea lihé . . . pa rabia.” Purba di mira bo rumannan manera Yehova ta mira nan. E stima nan i no ta keda kòrda nan pikánan. Pues, nos tampoko lo no ke hasi esei. (Sal. 130:3) Na lugá di keda mustra dede riba nan fayonan, hasi esfuerso pa wak nan bon kualidatnan.—Mat. 7:​1-5. w22.09 3-4 §6-7

E buki di Daniel ta revelá den ki órden algun evento emoshonante lo sosodé durante e tempu di fin. Por ehèmpel, Daniel 12:1 ta bisa ku Miguel, kende ta Hesukristu, “lo lanta” pa “protehá e yu hòmbernan di [e] pueblo” di Dios. Parti di e profesia ei a kuminsá kumpli na 1914 ora ku Hesus a bira Rei di e Reino di Dios. Pero, Daniel a bisa tambe ku Hesus “lo lanta” durante “un tempu di angustia manera nunka tabatin for di tempu ku tabata eksistí un nashon te na e tempu ei.” E “tempu di angustia” ei ta e “tribulashon grandi” menshoná na Mateo 24:21. Hesus lo lanta, òf defendé Dios su pueblo, na fin di e tempu di angustia ei, esta, na Armagedon. E buki di Revelashon ta referí na e hendenan ei komo un multitut grandi ku lo “sobrebibí e tribulashon grandi.”—Rev. 7:​9, 14. w22.09 21 §4-5

Yehova por kita òf veeg nòmber ku tin skirbí den e buki di bida, ta komo si fuera el a skirbi nan ku pòtlot. (Rev. 3:5) P’esei, nos mester hasi esfuerso pa nos nòmber keda den dje te na momento ku, na moda di papia, Yehova skirbié pa semper ku pèn. Un grupo ku su nòmber ta skirbí den e buki di bida ta esnan skohí pa goberná ku Hesus den shelu. Apòstel Pablo a bisa su “kompañeronan di trabou” na Filipo ku nòmber di esnan ungí, kende a ser invitá pa goberná ku Hesus, ta den e buki. (Flp. 4:3) Pero, pa nan nòmber por keda den e buki ei, nan mester keda fiel. Ora kada un di nan risibí e seyo final, su nòmber lo ser skirbí permanentemente den e buki akí. Esaki por sosodé sea promé ku e muri òf promé ku tribulashon grandi kuminsá.—Rev. 7:3. w22.09 14 §3; 15 §5-6

Imaginá ku un konosí di bo kushiná un di bo platonan faborito. Pero, debí ku bo tin purá òf bo tin muchu kos na bo kabes, bo ta manda e kuminda abou sin disfrutá di kada hap. Ora bo tayó bira bashí, bo ta realisá ku bo a kome muchu lihé i bo ta sinti duele ku bo no a tuma tempu pa saboriá e plato. Wèl, meskos por pasa ora bo lesa Beibel. Tin biaha bo por lesa Beibel asina lihé ku bo no ta disfrutá òf saboriá di su mensahe. P’esei, tuma tempu pa disfrutá di bo lesamentu di Beibel: visualisá e esena, imaginá kon kada stèm ta zona i pensa riba loke bo ta lesa. Si bo hasi tur esei, lo bo ta mas felis. Hesus a duna “e esklabo fiel i prudente” e responsabilidat di perkurá kuminda spiritual pa nos na e debido tempu, i nos ta bon alimentá. (Mat. 24:45) Beibel ta e ingrediente prinsipal di tur loke e esklabo fiel ta prepará.—1 Tes. 2:13. w22.10 7-8 §6-8

Beibel a atvertí ku den e último dianan lo tin masha hopi hasidó di bofon. (2 Ped. 3:​3, 4) Nan ta bai tras di “nan mes deseonan pekaminoso.” (Hudas 7, 17, 18) Nos no ke ta manera hende ku ta gusta hasi chèrchi. Kon nos por evitá esei? Un manera ta dor di no anda ku hende ku ta gusta kritiká. (Sal. 1:1) Esei ta enserá ku nos lo no skucha ni lesa nada ku ta bini di apóstatanan. Si nos no tene kuidou, masha fásil nos por kuminsá piki pieu i duda den Yehova i e instrukshon ku nos ta haña di su organisashon. P’esei, nos mester puntra nos mes: ‘Semper mi tin algu di bisa tokante instrukshon òf splikashon nobo ku nos haña? Mi tin tendensia di kritiká e rumannan ku ta dirigí?’ Yehova lo keda hopi kontentu ora ku nos stòp di hasi e kosnan ei mesora.—Pro. 3:​34, 35. w22.10 20 §9-10

Dios su spiritu santu a duna Ezekiel forsa pa prediká na e hendenan “kabesura i sobèrbè” den su teritorio. Yehova a bis’é: “Mi a hasi bo kara mes duru ku nan kara, i bo frenta mes duru ku nan frenta. Manera djamanta, mas duru ku piedra, mi a hasi bo frenta. No tene miedu di nan, ni desmayá den nan presensia.” (Eze. 3:​8, 9) Ta manera Yehova a bis’é: ‘No laga nan terkedat desanimá bo. Lo mi hasi bo fuerte.’ Despues di esei, den un vishon Dios su spiritu santu a hisa Ezekiel i hib’é kaminda e mester a prediká. Ezekiel a bisa: “E man di SEÑOR tabata fuerte riba mi.” A tum’é un siman p’e mes komprondé bon kiko ta e mensahe ku e mester a prediká. (Eze. 3:​14, 15) Djei Yehova a mand’é na un sabana, i ei “e spiritu a drenta” den dje. (Eze. 3:​23, 24) Awor Ezekiel tabata kla pa kuminsá ku su trabou di prediká. w22.11 4-5 §8-9

Profeta Habakuk a hañ’é ta wanta hopi difikultat. Ta parse ku dado momento, el a kere ku Yehova no tabata stim’é. P’esei, el a bisa Yehova tur loke e tabatin den su kurason. Yehova a kontestá e orashon di su sirbidó fiel. (Hab. 2:​2, 3) Ora Habakuk a meditá riba e manera ku Yehova a salba su pueblo den pasado, el a haña su goso bèk. El a bira konvensí ku Yehova tabata stim’é i ku lo e yud’é wanta kualke prueba. (Hab. 3:​17-19) Kiko ta e lès? Ora bo ta pasa den difikultat, hasi orashon na Yehova i kont’é presis kon bo ta sinti bo. Pidié yuda bo. Bo por konfia ku lo e duna bo e forsa ku bo tin mester pa wanta e difikultatnan. I ora bo mira kon e ta yuda bo, bo fe den dje lo bira asta mas fuerte. Si bo sigui ku bo aktividatnan spiritual, lo bo no permití difikultat ni duda separá bo for di Yehova.—1 Tim. 6:​6-8. w22.11 15 §6-7

Hesus i e dos kriminalnan banda di dje tabata sufri segun ku pokopoko nan bida tabata kaba. (Luk. 23:​32, 33) Tur e dos kriminalnan tabata insultá Hesus. (Mat. 27:44; Mar. 15:32) Pero, un di nan su aktitut pa ku Hesus a kambia. El a bisa: “Hesus, kòrda riba mi ora bo drenta bo Reino.” Anto Hesus a respond’é ku e palabranan di e teksto djawe. (Luk. 23:​39-42) Loke Hesus a bisa e kriminal mester pone nos pensa riba kon bida lo ta den Paradeis. I algu ku lo yuda nos hasi esei ta di kòrda e periodo di pas ku tabatin durante e reinado di Rei Sálomon. Beibel ta bisa ku Hesus ta mas ku Sálomon. Pues, nos por tin sigur ku Hesus huntu ku e 144.000 lo hasi e tera akí un paradeis mashá bunita. (Mat. 12:42) Ta klaru ku e “otro karné” mester siña loke nan tin ku hasi pa por biba den Paradeis pa semper.—Huan 10:16. w22.12 8 §1; 9 §4

Isaías ta sigurá nos ku Yehova ta skucha nos ku atenshon i ta kontestá nos orashon mesora. Isaías a agregá: “Lo e kontestá bo asina ku e tende bo gritu.” E echo ku nos sa ku nos Tata tin masha gana di yuda esnan ku tin mester di yudansa, ta yuda nos wanta prueba ku goso. Yehova tin atenshon pa orashon di kada un di nos. Kon nos por sa esei? Den e promé 18 versíkulonan, Yehova ta papia ku su pueblo komo grupo, p’esei el usa e pronòmber “boso.” Pero na versíkulo 19 el usa “bo,” ku su sirbidónan individualmente. Isaías a skirbi: “Lo bo no yora mas”; “lo e ta miserikòrdioso ku bo” i “lo e kontestá bo.” Komo Yehova ta un Tata ku ta stima su yunan, e ta tene kuenta ku nos individualmente, i e mes ta atendé ku nos orashonnan.—Sal. 116:1; Isa. 57:15. w22.11 9 §5-6

Ora nos ta prediká i siña hende e bèrdat apesar di oposishon, esei lo hasi nos felis i nos lo tin pas. Den promé siglo, ora ku e outoridatnan hudiu a bisa e apòstelnan pa stòp di prediká, e hòmbernan fiel ei a skohe pa obedesé Dios. Nan a sigui prediká i esei a hasi nan felis. (Echo. 5:​27-29, 41, 42) Klaru ku ora nos obra ta restringí, nos mester ta kouteloso ora nos ta prediká. Pero si nos hasi nos bèst, nos lo tin pas pasobra nos ta agradá Yehova i ta kompartí un mensahe ku por salba bida di hende. Sea sigur ku ni maske kon difísil e situashon ku nos ta pasando aden ta, nos por sinti pas. Na e momentonan ei, nos tin ku kòrda ku e úniko pas ku por yuda nos ta esun ku solamente Yehova por duna nos. P’esei, dependé riba Yehova den kaso di un brote di malesa, kalamidat òf persekushon. Hasi bo esfuerso pa sigui tur guia ku ta bini di Yehova su organisashon. Keda pensa riba e bunita speransa ku ta warda bo den futuro. Segun ku bo ta hasi tur e kosnan ei, ‘e Dios di pas lo ta ku bo.’—Flp. 4:9. w22.12 21 §17-18

Esei ta rekerí hopi esfuerso. No ta di un dia pa otro nos ta kita rabia, amargura i furia for di nos karakter. (Efe. 4:​31, 32) Dikon ta difísil pa lucha kontra mal karakterístika òf tendensia? Pasó algun di nan ta fuertemente ankrá den nos. Por ehèmpel, Beibel ta bisa ku algun hende tin tendensia di rabia lihé. (Pro. 29:22) Pa nos ranka e mal tendensianan ei, nos tin ku hasi esfuerso kontinuo, asta despues ku nos batisá. (Rom. 7:​21-23) Papia ku Yehova tokante e kosnan ku bo ke kambia di bo karakter i konfia ku lo e tende bo i yuda bo. (1 Huan 5:​14, 15) Ta bèrdat ku Yehova lo no kita nan di un forma milagroso, pero lo e duna bo e forsa pa dominá nan. (1 Ped. 5:10) Di bo parti, aktua di akuerdo ku bo orashon i evitá di hasi kualke kos ku por pone tendensia di bo personalidat bieu bini bèk. Anto no keda pensa riba deseonan robes.—Flp. 4:8; Kol. 3:2. w23.01 10 §7, 9-10

Un manera ku nos ta demostrá nos amor ta di hasi esfuerso pa prediká ku smak. Nos ta papia ku tur hende sin importá nan rasa, di kua famia nan a bini, kuantu plaka nan tin òf kua skol nan a bai. Di e manera ei nos ta kooperá ku Yehova, kende ke “pa tur sorto di hende ser salbá i yega na un konosementu eksakto di e bèrdat.” (1 Tim. 2:4) Nos ta demostrá nos amor pa Dios i Kristu ora nos ta stima nos rumannan. Ora nan ta pasando den prueba, nos ta buska nan drechi i ta yuda nan. Ora nan pèrdè un ser kerí, nos ta konsolá nan. Ora nan ta malu, nos ta bishitá nan i ora nan ta desanimá, nos ta hasi nos bèst pa duna nan animashon. (2 Kor. 1:​3-7; 1 Tes. 5:​11, 14) Nos ta keda hasi orashon pa nan pasobra nos sa ku “súplika di un hende hustu tin hopi poder.”—Sant. 5:16. w23.01 28-29 §7-8

Meskos ku un hende ku ta den konstrukshon ku tempu ta haña mas eksperensia, asina tambe nos por mehorá e manera ku nos ta animá nos rumannan. Por ehèmpel, nos ta yuda nos rumannan haña forsa pa perseverá ora nos konta nan eksperensia di otro ruman ku a pasa den situashon similar. (Heb. 11:​32-35; 12:1) Nos ta promové pas ora nos ta papia bon di otro ruman, ora nos ta evitá di bisa òf hasi kos ku por kita e pas di e kongregashon i ora nos ta resolvé kualke desakuerdo ku surgi. (Efe. 4:3) Ademas, nos ta animá nos rumannan ora nos ta papia ku nan tokante e bèrdatnan di Beibel, duna nan yudansa práktiko i yuda esnan ku a fria òf a bira suak den sentido spiritual. Nos por sinti meskos ora nos ta hasi esfuerso pa yuda fortalesé fe di nos rumannan. Edifisionan ku ta ser konstruí ku tempu ta bai atras. Pero, ora nos ta hasi esfuerso pa animá nos rumannan, e resultado di nos trabou sí lo dura pa semper. w22.08 22 §6; 25 §17-18

Hesus a bisa ku nos mester tin disernimentu òf perspikasia pa nos komprondé Beibel. (Mat. 24:15) Pero kiko esei ta? Disernimentu ta e kapasidat di mira kon un idea ta konektá ku un otro i e diferensia ku tin entre nan. Pero tambe pa mira loke no ta asina bisto. Ademas, manera Hesus a bisa, disernimentu lo yuda nos mira ku sierto suseso ta kumpli ku profesia di Beibel. Nos mester tin disernimentu pa nos saka lo máksimo for di nos lesamentu di Beibel. Yehova ta duna su sirbidónan disernimentu. P’esei nos mester pidié yuda nos kultiv’é. Pero, nos tin ku hasi mas ku djis hasi orashon so. Nos tin ku analisá loke nos ta lesa i djei wak kon e ta konektá ku loke ya nos sa. Purba diserní importansia di un relato den Beibel i mira kon nos por aplik’é den nos bida. (Heb. 5:14) Ora nos lesa Beibel ku disernimentu, nos lo komprondé e tekstonan kada biaha mas mihó. w23.02 10 §7-8

Imaginá ku un amigu a regalá bo un pintura masha bieu pero hopi balioso. Aunke ku el a kuminsá pèrdè koló i e tin mancha i sker, esei no ta kita ku e ta un obra di arte ku ta bal miónes di dòler. No ta asina ku lo bo apresiá i protehá e pintura ei? Asina tambe, Yehova a regalá nos algu masha balioso, nos bida. De echo, Yehova a mustra kon balioso nos bida ta ora el a duna nos su Yu komo un reskate. (Huan 3:16) Yehova ta e Fuente di bida. (Sal. 36:9) Ta esei Apòstel Pablo a referí na dje ora el a bisa: “Pa medio di dje nos tin bida i ta move i ta eksistí.” (Echo. 17:​25, 28) P’esei, nos por bisa ku bida ta un regalo di Dios. Yehova stima nos i ta duna nos tur loke nos mester pa keda na bida. (Echo. 14:​15-17) Pero, Yehova no ta hasi milager pa tene nos na bida. Mas bien, e ta ferwagt pa nos hasi nos bèst pa kuida nos mes físikamente i spiritualmente.—2 Kor. 7:1. w23.02 20 §1-2

Esta gradisidu nos ta na Yehova ku el a regalá nos Beibel! Den dje, Yehova ta duna nos konseho ku ta yuda nos dil ku problemanan di tur dia. Tambe e ta duna nos un bunita speransa pa futuro. Mas importante ainda, mediante Beibel Yehova ta revelá su personalidat. Segun ku nos ta pensa riba su bunita kualidatnan, nos ta stim’é mas i nos ta haña mas gana di bira su amigu. (Sal. 25:14) Semper Yehova tabata ke pa hende konos’é. Den pasado el a usa soño, vishon i asta angel pa duna mas informashon tokante su mes. (Num. 12:6; Echo. 10:​3, 4) Nos lo no por a analisá e soño-, vishon- ni mensahenan ei si nan no a ser skirbí. Ta p’esei Yehova a laga algun hende skirbi tur loke ku e tabata ke pa nos sa “den un buki.” Komo ku “e Dios berdadero semper ta aktua na un manera perfekto,” nos tin sigur ku e método ku el a usa pa komuniká ku nos ta ekselente i lo yuda nos.—Sal. 18:30. w23.02 2 §1-2

Pone meta ku ta bale la pena. Skohe meta ku lo yuda bo fortalesé bo fe i yuda bo bira un kristian madurá. (Efe. 3:16) Por ehèmpel, kisas bo por mehorá bo estudio personal i lesamentu di Beibel. (Sal. 1:​2, 3) Òf por ta bo por hasi mas orashon i laga bo orashon ta di kurason. Òf kisas bo mester sigui wak bon ki entretenimentu bo ta skohe i kon bo ta usa bo tempu. (Efe. 5:​15, 16) Pa bo krese den sentido spiritual ta importante tambe pa bo yuda otro hende. Por ehèmpel, bo por pone meta pa yuda e rumannan di edat òf esnan ku ta malu den bo kongregashon ku nan kompra òf ku nan tablet i telefòn. Bo ta mustra ku bo ta stima hende tambe ora bo ta prediká. (Mat. 9:​36, 37) P’esei, si bo por, purba di pone meta pa traha pionero regular, traha na Bètel òf riba proyekto di konstrukshon. w22.08 6 §16-17