Informe di Proclamador di Reino

Bon noticia di Oosteuropa

HOPI cos excitante ta sosode den e campo teocrático di Oosteuropa. Sobresaliente tabata e asamblea internacional den Zagreb, dia 16 te 18 di Augustus di 1991, ora 7.300 testigo a recibi sinceramente nan ruman di 15 nacion. Un total di 14.684 a asisti. Esei tabata un desplega maraviyoso di amor i unidad den un país cu inketud ta sagudi!

Testigo di Jehova den Oosteuropa ta keda ocupá bisando otro hende e bon nobo dje Reino di Jehova, cu nan sa ta e único speranza pa berdadero paz. Den algun parti ta un desafío pa nan mantene nan posicion neutral. No obstante, hopi bez hende ta scucha, i e testigonan ta informa di hopi experencia excelente.

Den un pueblo un mucha muher di 16 aña di edad a tende e bon nobo for dje único Testigo di Jehova den e pueblo. Un estudio bíblico a cuminza regularmente, i su aprecio pe berdad a aumenta. Teniendo un gran deseo pa bisa otronan dje cosnan maraviyoso cu el a siña, el a purba di papia cu compañé di scol pero a encontra oposicion i mofa. Un compañé di scol a oponele specialmente pero a keda sorprendí i impresioná cu su pacenshi, pasobra e studiante hoven di Bijbel no a rabia apesar di tanto insulto. Despues, un testimonio mas completo tabata duná ne mucha muher, i el a comprende cu su actitud tabata malu. Un estudio bíblico tabata cuminza cuné, anto e studiante bíblico original i su compañé nobo a purba di comparti nan felicidad cu otronan, apesar di oposicion di nan mayornan, nan maestro, i nan compañénan di scol.

Como resultado di nan testimonio, un otro compañé di scol a acepta e berdad. Awor tabatin tres di nan den e klas, i tur tres tabata bon ehempel di gana di yuda otronan i di mustra amor un pa otro. Anto un otro mucha muher a uni cu nan.

Awor tabatin cuater riba e banki den e curá di scol unda nan a considerá e Bijbel hunto. I pe sorpresa di hopi hende, e cantidad di nan a aumenta. Un otro mucha muher dje klas cu a keda entusiasmá tocante nan conducta excelente, a decidi di participa den e estudio bíblico. Nan cinco a sigi invita otronan, alumno i maestro, pa haci mescos. No obstante, e mucha muhernan a sigi experimenta mashá presion for di nan mayornan. E mayornan a traha duro pa forza e mucha muhernan di kita for di nan estudio bíblico, destruyendo nan literatura i maltratando nan.

Kico tabata e resultado dje testimonio cu a cuminza cu un solo persona hoven interesá? Un mucha muher a bautiza na asamblea di districto na 1990, i e otro cuater ne asamblea di circuito den primavera di 1991. Esei tabata e motibo di gran gozo! Awe, tur cinco mucha muher ta sirbi como pionero regular! Den e pueblo unda esei a sosode, tin awor 11 publicador, 8 di locual ta den e sirbishi di pionero.

Jehova Dios ta sostene i ta bendiciona su testigonan den Oosteuropa. Claramente, tin un potencial grandi pa aumento di hende di curazón onrado den e parti di mundo ei.