Angustia den Famia—Un Siñal dje Tempo

ANGUSTIA di famía—hopi hende ta mira esei como un siñal di cu norma tradicional di matrimonio i puesto di tata i mama ta ouderwets. Otro hende ta miré como e producto di cambio político, económico, i social. Otronan ainda ta miré como un otro víctima di tecnología moderno. Realmente, problema cu famía tin cu enfrenta awe ta indica algo di un nificacion hopi mas profundo. Leza e palabra dje Bijbel den 2 Timoteo 3:1-4:

“Sabe esaki, cu den e último dianan tempo crítico duro pa trata cuné lo presenta. Pasobra hende lo ta stimador di nan mes, stimador di placa, halzá, arrogante, blas­femador, desobediente na mayornan, malagradicido, desleal, sin cariño natural, no ta dispuesto pa ningun acuerdo, calumniador, sin dominio propio, feroz, sin amor pa husticia, traidor, cabezura, hinchá cu orguyo, stimador di placer mas bien cu stimador di Dios.”

E palabra ei no ta indica e raíz mes di problema djawe? Angustia di famía djawe ta claramente un resultado directo dje situacion profetizá pe último dianan dje mundo aki. I tin evidencia convenciente di cu e tempo di angustia a cuminza na 1914.a Desde e tempo ei, e influencia dje persona spiritual sobrehumano yamá Satanás e Diabel ta specialmente fatal.—Mateo 4:8-10; 1 Juan 5:19.

Limitá desde 1914 ne becindario dje tera, Satanás “ta mashá rabiá, sabiendo cu ta kedé poco tempo so.” (Revelacion 12:7-12) Siendo cu Satanás ta enemigo hurá di Dios “na locual tur famía den cielo i riba tera ta debe nan nomber,” ta straño cu e tera a bira un lugar peligroso pa famía? (Efesio 3:15) Satanás ta keda determiná di alehá tur humanidad foi Dios. Di ki mihor manera e por logra esei sino atacá famía cu hopi problema?

Mas ta necesario cu teoría suave di supuesto experto pa proteha famía di tal atake sobrehumano. No obstante, e Bijbel ta bisa di Satanás: “Nos no ta ignorante di su mal intencion.” (2 Corintio 2:11) Nos por protehános te na un cierto grado si nos ta conoce cierto manera cu e ta usa pa ataca.

Placa i Trabao

Presion económico ta arma di mas poderoso cu Satanás ta usa den su atake. Esaki ta un “tempo crítico duro pa trata cuné,” of segun 2 Timoteo 3:1 den Testament Nobo, “tempo trabahoso.” Den país desaroyando, problema tal como desempleo, salario abao, i scarcidad di necesidad básico ta causa famía hopi sufrimento. No obstante, asta na América unda cu tin basta abundancia, presion económico ta afecta hende. Un investigacion na América a mustra cu un causa principal pa conflicto den famía ta placa. E buki na inglés Secreto di famía fuerte ta splica cu “tempo, atencion, [i] energía” dedicá pa satisface exigencia di trabao també por ta un “enemigo scondí” cu ta destrui relacion matrimonial.

Circunstancia a obligá un cantidad sin igual di hende muher pa busca empleo. Autor Vance Packard ta informa: “Actualmente, por lo menos un cuarto di mucha na América bao di tres aña di edad tin mama cu tin un sorto di trabao seglar.” Atendiendo na necesidad casi insaciable di yiu chikito i també trabao seglar por ta un esfuerzo penoso i fatigable—cu efecto negativo tanto riba mayornan como yiu. Packard a agrega cu debí na scarcidad di lugar adecuado pa cuida yiu na América, “varios miyón di mucha djawe no ta recibi bon cuido den nan niñez.”—Our Endangered Children.

Hopi bez nan lugar mes di empleo ta saboteá armonía di famía. Hopi hende ta enbolbénan den aventura romántico cu compañé di trabao. Otronan ta cai den trampa di busca en bano pa bon éxito i ta sacrifica nan bida di famía pa promocion na trabao. (Compara cu Eclesiastés 4:4.) Un tata a bira tanto ocupá cu su trabao como representante di benta cu su esposa a yama su mes un “mama soltera de facto.”

Enlace Matrimonial Debilitá

E institucion mes di matrimonio també ta bao di atake. E buki na inglés E ambiente íntimo ta bisa: “Na pasado, pareha a spera di mantene nan matrimonio amenos cu uno di nan a comete un ofensa grave contra e matrimonio, tal como adulterio, crueldad, of negligencia extremo. Awor casi tur hende ta mira e propósito di matrimonio como realizacion personal.” Sí, nan ta trata matrimonio como un curacion pa infelicidad, fastiosidad, of soledad—no como un compromiso cu un otro persona pa tur nan bida. Awor interés ta den loke bo por saca for di matrimonio, no loke bo por contribui na dje. (Haci contraste cu Echo 20:35.) Tal “cambio grandi di balornan relacioná cu matrimonio” a debilitá mashá enlace matrimonial. Ora pareha no ta alcanza nan realizacion personal, hopi bez nan ta usa divorcio como un solucion rápido.

Segun profecía bíblica, hende den e “último dianan” aki “tin un forma di debocion piadosa pero ta resulta falso na su poder.” (2 Timoteo 3:4, 5) Hopi experto ta kere cu e decadencia di religion ta hunga un papel importante saboteando matrimonio. Den su buki na inglés E caso contra divorcio, Dra. Diane Medved a skirbi: “Segun casi tur religion, Dios a bisa cu matrimonio tin cu ser permanente. Si bo no tin confianza den Dios of no ta kere den dje, anto bo ta haci loke bo kier.” Como resultado, ora un matrimonio tin problema, e pareha no ta busca un bon solucion. “Nan ta bai purá pa bandona tur e asunto.”

Hovenan Bao di Atake

Yiu ta keda tolondrá bao di presion djawe. Un cantidad escandaloso di yiu ta ser batí violentamente sea bao di abuso verbal of sexual di nan mes mayornan. Divorcio ta priva miyones mas dje influencia amoroso di nan dos mayornan, i e dolor cu e divorcio di nan mayornan ta causa en general ta sigi pe resto di nan bida.

Hovennan ta bao di atake di influencia fuerte. Ora un gewoon hoven americano ta yega 14 aña di edad, el a mira caba na television so 18.000 asesinato i otro forma incontable di violencia, relacion sexual inmoral, crueldad, i crimen. Música també ta eherce mashá influencia riba hovenan, i hopi di dje ta sumamente indecente, ta saca acto sexual na cla, i ta asta satánico den su contenido. Scol ta siña hovenan teoría tal como evolucion, locual por kibra nan fe den Dios i den e Bijbel. Presion di otro hoven ta instiga hopi di nan pa participa den relacion sexual sin casa i pa bebe alcohol of tuma droga.

E Raíz di Angustia di Famía

Ta keda bisto cu atake riba famía ta mashá amplio i por ta desastroso. Kico por yuda famía sobrebiba? John Bradshaw, consehero di famía, ta sugeri: “Regla pa papel di tata i mama no a ser modernizá seriamente den 150 aña. . . . Mi ta kere cu regla bieu no ta práctica mas.” Sin embargo, mas regla humano no ta e solucion. Jehova Dios ta Autor dje famía. E sa mihor cu tur hende ki papel importante bida di famía ta hunga den nos felicidad personal i loke ta necesario pa logra un famía feliz i fuerte. Mester ta un sorpresa pa nos sa cu su Palabra, e Bijbel, ta duna e solucion pa angustia di famía?

E buki di antigua ta splica con bida di famía a daña. E promé pareha humano, Adam i Eva, tabata poní den un hofi bonita i duná e asignacion recompensador di transforma e tera na un paradijs mundial. Dios a decreta cu Adam tabata cabez di famía. Eva tabatin cu coopera cu su hefatura como “yudante,” of “complemento” di dje. Pero, Eva a rebela contra tal decreto. El a horta e hefatura di su esposo i a desobedece e único prohibicion cu Dios a impone riba nan. Anto Adam a entrega su hefatura i a uní cuné den su rebelion.—Génesis 1:26–3:6.

Efecto perhudicial di nan dwalmento for dje camina di Dios a sali na cla un bez. Adam i Eva no tabata limpi i inocente mas, nan a reacciona cu bergüenza i a sinti culpa. Aunque Adam a usa palabra di cariño i poético pa pinta Eva na principio, awor cu tono friu el a yamé ‘e muher cu bo a dunámi.’ Tal palabra negativo tabata solamente e comienzo di infelicidad matrimonial. Esfuerzo bano di Adam pa recobra su hefatura a resulta den e ‘dominacion’ di su esposa. En buelta, Eva tabatin un “deseo fuerte” pa su casá, probablemente na moda extremo i desbalanzá.—Génesis 2:23; 3:7-16.

No ta un sorpresa cu e contencion di Adam i Eva a tene consecuencia perhudicial riba nan yiu. Caín, nan promé yiu, a bira asesino den sanger friu. (Génesis 4:8) Lamec, desendiente di Caín, a aumenta e degradacion di bida di famía door di ser e promé homber cu varios muher. (Génesis 4:19) Asina, Adam i Eva no solamente a duna un herencia di picá i morto sino també un modelo di un famía enfermo cu a mancha e raza humano semper. Den e último dianan aki, contencion di famía a alcanza un punto máximo.

Famía cu tin Éxito

Sin embargo, tur famía no ta faya bao di presion djawe. Por ehempel, un esposo ta biba cu su esposa i dos yiu muher den un pueblo na América. Aunque mayor i yiu di hopi famía den e becindario ta biba den dos mundo, no ta asina den su famía, ni nan no tin preocupacion di cu nan yiunan por experimenta cu droga of sexo. Tur dialuna anochi, ora otro hovenan ta pegá ne television, tur nan famía ta reuní rond di mesa pa un estudio bíblico. E tata a splica: “Dialuna anochi ta nos tempo special pa ser hunto i papia. Nos yiunan ta síntinan liber pa cóntanos abiertamente nan problema.”

En cambio, tin un mama soltera den e stad di New York cu també ta disfruta di un unidad excepcional di famía cu su dos yiu muher. Kico ta responsabel pa nan éxito? El a splica: “E television ta keda pagá te cu fin di siman. Diariamente nos tin consideracion di un texto bíblico. També, nos ta aparta un anochi pa un estudio bíblico di famía.”

E dos famía ta Testigo di Jehova. Nan ta sigi conseho pa famía cu ta pará skirbí den e Bijbel—i esei ta duna bon resultado. Pero, esei no ta raro. Tin cientos di miles di famía mescos cu nan cu ta obtene bon resultado aplicando regla pa bida di famía hayá den e Bijbel.b Cua regla? Con abo i bo famía por beneficiá di nan? Pa haya contesta, nos ta invitábo pa considera artículo cu ta cuminza ne sigiente bladji.

[Nota]

[Plachi na página 4]

Situacion económico deplorable ta causa hopi angustia di famía den país desaroyando

[Rekonosementu]

Foto di U.S. Navy

[Plachi na página 7]

Cu e aplicacion di principio bíblico, hopi famía ta resisti contra presion djawe