Con Nos Por Suministra Birtud na Nos Fe?

“Suministrá na boso fe, birtud.”—2 PEDRO 1:5.

1, 2. Pakico nos mester spera p’e pueblo di Jehova haci loke ta birtuoso?

JEHOVA semper ta actua den un manera birtuoso. E ta haci loke ta hustu i bon. P’esei, apostel Pedro por a papia di Dios como esun kende a yama cristiannan ungí ‘mediante Su gloria i birtud.’ Conocimentu exacto di nan birtuoso Tata celestial a mustra nan kico tabata necesario pa sigui tras di un bida di berdadero debocion piadoso.—2 Pedro 1:2, 3.

² Apostel Pablo ta insta cristiannan pa “bira imitadornan di Dios, como yunan stimá.” (Efesio 5:1) Mescos cu nan Tata celestial, adoradornan di Jehova mester haci loke ta birtuoso den cualkier situacion. Pero kico ta birtud?

Loke Ta Birtud

3. Con “birtud” a ser definí?

³ Diccionarionan moderno ta definí “birtud” como “excelencia moral; bondad.” E ta “accion i pensamentu corecto; bondad di carácter.” Un persona birtuoso ta hustu. Birtud a ser definí tambe como “conformidad na un norma di husticia.” Naturalmente, pa cristiannan ta Dios ta determiná e “norma di husticia” i ta haci’é cla den su Palabra Sagrado, Bijbel.

4. Cristiannan mester traha duru pa desaroyá cua cualidadnan cu 2 Pedro 1:5-7 ta mencioná?

⁴ Cristiannan berdadero ta conformá cu Jehova Dios su normanan hustu i nan ta respondé na su promesanan precioso dor di ehercé fe. Tambe nan ta tuma na pechu Pedro su conseho: “Contribuyendo como contesta na tur esfuerso sincero, suministrá na boso fe, birtud, na boso birtud, conocimentu, na boso conocimentu, dominio propio, na boso dominio propio, awante, na boso awante, debocion piadoso, na boso debocion piadoso, cariño fraternal, na boso cariño fraternal, amor.” (2 Pedro 1:5-7) Un cristian mester traha duru pa desaroyá e cualidadnan aki. Bo no por haci esaki den un par di dia of aña, ma e ta exigí un bida largu di esfuerso continuo. En realidad, pa suministrá birtud na nos fe riba su mes ta un desafio caba!

5. Kico ta birtud for di un punto di bista bíblico?

⁵ E lexicógrafo, M. R. Vincent ta bisa cu e sentido clásico original dje palabra griego traducí como “birtud” ta nificá “excelencia di cualkier sorto.” Pedro a usa su forma plural ora el a bisa cu cristiannan mester declará den público e “excelencianan,” of birtudnan, di Dios. (1 Pedro 2:9) For di un punto di bista bíblico, birtud ta ser describí no como algu pasivo sino como “poder moral, energia moral, vigor of alma.” Mencionando birtud, Pedro tabatin na mente e excelencia moral yen di curashi cu ta ser sperá pa sirbidornan di Dios manifestá i mantené. Sin embargo, ya cu nos ta imperfecto, nos realmente por haci loke ta birtuoso den bista di Dios?

Imperfecto pero Birtuoso

6. Maske nos ta imperfecto, pakico tog nos por haci loke ta birtuoso den bista di Dios?

⁶ Nos a heredá imperfeccion i picá, pues talbes nos ta puntra con nos realmente por haci loke ta birtuoso den bista di Dios. (Romano 5:12) Siguramente nos mester dje yudansa di Jehova si nos kier tin un curason puru, for di cua pensamentu, palabra i accion birtuoso ta brota. (Compará cu Lucas 6:45) Despues di David su picá cu Bat-seba, e salmista repentí a roga: “Crea den mi asta un curason puru, O Dios, i pone den mi un spiritu nobo, unu constante.” (Salmo 51:10) David a ricibí Dios su pordon i e yudansa necesario pa sigui tras di un curso birtuoso. P’esei, si nos a cometé un pica serio pero cu repentimentu a aceptá e yudansa di Dios i di anciano dje congregacion, nos por bolbe bek riba un caminda birtuoso i permanecé riba dje.—Salmo 103:1-3, 10-14; Santiago 5:13-15.

7, 8. (a) Si nos kier keda birtuoso, kico ta necesario? (b)  Ki yudansa cristiannan tin pa ser birtuoso?

⁷ Pa motibu di imperfeccion heredá, nos mester hiba un bataya interno continuo pa haci loke e curso di birtud ta rekerí di nos. Si nos kier keda birtuoso, nos nunca por permití nos mes di bira esclabo di picá. En bes di esei, nos mester ta “esclabo na husticia,” semper pensando, papiando i actuando den un manera birtuoso. (Romano 6:16-23) Naturalmente, nos deseonan carnal i inclinacionnan pecaminoso ta fuerte, i nos ta confrontá cu un conflicto entre esakinan i e cosnan birtuoso cu Dios ta exigí di nos. Pues, kico pa haci?

⁸ Entre otro, nos mester sigui e guia di Jehova su spiritu santu, of forsa activo. P’esei nos mester tuma Pablo su conseho na pechu: “Sigui cana pa spiritu i boso lo no hiba a cabo ningun deseo carnal. Pasobra e carni ta contra e spiritu den su deseo, i e spiritu contra e carni; pasobra esakinan ta contrali na otro, di manera cu e mes cosnan cu boso kier haci, boso no ta haci.” (Galatio 5:16, 17) Sí, como un forsa pa husticia, nos tin e spiritu di Dios, i como un guia pa conducta corecto, nos tin su Palabra. Tambe nos tin e yudansa amoroso dje organisacion di Jehova i e conseho dje “esclabo fiel i discreto.” (Mateo 24:45-47) Pues, nos por bringa un bataya exitoso contra tendencia pecaminoso. (Romano 7:15-25) Naturalmente, si un pensamentu impuru mester bini na mente, nos mester sak’é mesora i resa p’e yudansa di Dios pa resistí cualkier tentacion di actua den cualkier manera cu ta falta birtud.—Mateo 6:13.

Birtud i Nos Pensamentunan

9. Ki clase di pensamentu un conducta birtuoso ta exigí?

⁹ Birtud ta cuminsá cu e manera cu un persona ta pensa. Pa gosa di fabor divino, nos mester pensa riba cosnan hustu, bon i birtuoso. Pablo a bisa: “Rumannan, cualkier cos cu ta berdadero, cualkier cos cu ta di consideracion serio, cualkier cos cu ta hustu, cualkier cos cu ta puru, cualkier cos cu ta amabel, cualkier cos cu tin bon reputacion, cualkier birtud cu tin i cualkier cos digno di alabansa cu tin, sigui considerá e cosnan aki.” (Filipense 4:8) Nos mester fiha nos mente riba cosnan hustu i puru, i cualkier cos cu ta falta birtud no mester atraé nos. Pablo por a bisa: “E cosnan cu boso a siña i tambe aceptá i tende i mira relacioná cu mi, practicá esakinan.” Si nos ta manera Pablo—birtuoso den pensamentu, manera di papia i accion—nos lo ta bon compañé i ehempel excelente den bida cristian i ‘e Dios di pas lo ta cu nos.’—Filipense 4:9.

10. Con e aplicacion personal di 1 Corintio 14:20 lo yuda nos permanecé birtuoso?

¹⁰ Si ta nos deseo pa permanecé birtuoso den pensamentu i asina agradá nos Tata celestial, ta necesario pa nos aplicá Pablo su conseho: “No bira mucha chikí den facultad di comprendimentu, sino baby encuanto maldad; sin embargo bira plenamente desaroyá den facultad di comprendimentu.” (1 Corintio 14:20) Esaki ta nificá cu como cristian nos no ta busca conocimentu of experencia den maldad. En bes di permití nos mente di ser corumpí den e manera aki, nos sabiamente ta scoge pa keda inexperenciá i inocente como baby den e aspecto aki. Na mésun tempu, nos ta comprendé completamente cu inmoralidad i malecho ta pecaminoso den bista di Jehova. Un deseo sincero di curason pa agrad’é dor di ser birtuoso lo beneficiá nos, pasobra lo e impulsá nos pa evitá formanan impuru di entretenimentu i otro influencianan mentalmente corupto dje mundu aki cu ta drumí den poder di Satanas.—1 Juan 5:19.

Birtud i Nos Manera di Papia

11. Ki sorto di manera di papia birtud ta exigí, i den e aspecto aki, ki ehempelnan nos tin den Jehova Dios i Jesucristo?

¹¹ Si nos pensamentunan ta birtuoso, esaki mester tin un efecto profundo riba loke nos ta bisa. Birtud ta exigí un manera di papia limpi, saludabel, verídico i edificante. (2 Corintio 6:3, 4, 7) Jehova ta “e Dios di berdad.” (Salmo 31:5) E ta fiel den tur su tratamentu, i su promesanan ta sigur pasobra e no por gaña. (Número 23:19; 1 Samuel 15:29; Tito 1:2) Jesucristo, e Yu di Dios, ta “yen di bondad inmerecí i berdad.” Miéntras cu e tabata riba tera, e semper a papia e berdad manera el a ricibi’é for di su Tata. (Juan 1:14; 8:40) Ademas, Jesus “no a cometé picá, ni engaño a ser hañá den su boca.” (1 Pedro 2:22) Si nos berdaderamente ta sirbidornan di Dios i di Cristo, nos lo papia berdad i ser recto den conducta, como si fuera “fahá cu berdad.”—Efesio 5:9; 6:14.

12. Si nos kier ta birtuoso, ki sorto di manera di papia nos mester evitá?

¹² Si nos ta birtuoso, tin algun sorto di manera di papia cu nos lo evitá. Nos lo laga e conseho di Pablo dirigí nos: “Kita tur amargura malicioso i furia i rabia i griteria i manera di papia ofensivo for di boso, huntu cu tur maldad.” “Laga fornicacion i impuresa di tur sorto of golosidad ni sikiera ser mencioná entre boso, net manera ta pas pa hende santu; tampoco conducta bergonsoso ni papiamentu di co’i bobo ni chiste obseno, cosnan cu no ta decente, sino, mas bien, duna gradicimentu.” (Efesio 4:31; 5:3, 4) Otronan lo haña ta refrescante pa ta den nos compania pasobra nos curason hustu ta impulsá nos pa evitá manera di papia no-cristian.

13. Pakico cristiannan mester controlá e lenga?

¹³ Un deseo pa agradá Dios i bisa cosnan birtuoso lo yuda nos controlá e lenga. Debí na inclinacion pecaminoso, nos tur ta trompecá den palabra tin biaha. Sin embargo, disipel Santiago ta bisa cu “si nos pone freno den boca di cabai,” nan ta bai obedientemente caminda nos dirigí nan. P’esei, nos mester traha duru pa frena e lenga i trata na us’é solamente den un manera birtuoso. Un lenga no-controlá “ta constituí un mundu di inhusticia.” (Santiago 3:1-7) Tur sorto di mal característica dje mundu malbado aki ta relacioná cu e lenga sin dominio. E ta responsabel pa cosnan dañino manera testimonio falsu, zundramentu i calumnia. (Isaías 5:20; Mateo 15:18-20) I ora un lenga ingobernabel ta haci remarke ofensivo, sarcástico of calumniador, e ta yen di venenu mortífero.—Salmo 140:3; Romano 3:13; Santiago 3:8.

14. Ki inconsistencia den manera di papia cristiannan mester evitá?

¹⁴ Manera Santiago ta indicá, lo ta inconsistente pa “bendicioná Jehova” dor di papia bon di Dios anto malusá e lenga pa “maldicioná hende” dor di plega nan. Ta ki pecaminoso pa canta alabansa na Dios na reunionnan anto sali i papia malu di compañénan creyente! Awa dushi i awa marga no por brota for dje mésun fuente. Si nos ta sirbiendo Jehova, otronan tin e derecho di spera pa nos bisa cosnan birtuoso en bes di papia palabra di mal gusto. P’esei laga nos evitá mal manera di papia i percurá pa bisa cosnan cu lo beneficiá nos compañénan i edificá nan spiritualmente.—Santiago 3:9-12.

Birtud i Nos Accionnan

15. Pakico ta asina importante pa evitá di bira mañoso?

¹⁵ Siendo cu pensamentu i manera di papia cristian mester ta birtuoso, kico di nos accionnan? Ser birtuoso den conducta ta e único manera pa haña e aprobacion di Dios. Ningun sirbidor di Jehova por bandoná birtud, bira mañoso i mentiroso i kere hustamente cu Dios lo aceptá e cosnan ei. Proverbio 3:32 ta bisa: “E persona mañoso ta un cos repugnante pa Jehova, pero Su intimidad ta cu esnan recto.” Si nos ta apreciá nos relacion cu Jehova Dios, e palabranan ei cu ta pone nos pensa mester impedí nos di planea pa causa daño of di haci cualkier cos mañoso. En realidad, entre e siete cosnan repugnante pa Jehova su alma ta “un curason cu ta fabricá proyecto perhudicial”! (Proverbio 6:16-19) P’esei laga nos evitá accionnan asina i haci loke ta birtuoso, p’e beneficio di nos próhimo i p’e gloria di nos Tata celestial.

16. Pakico cristiannan no mester ta enbolbí den ningun accion hipócrita?

¹⁶ Manifestacion di birtud ta rekerí pa nos ta onesto. (Hebreo 13:18) Un persona hipócrita, kende su accionnan no ta armonisá cu su palabranan, no ta birtuoso. E palabra griego traducí como “hipócrita” (hy·po·kri·tesʹ) ta nificá “un persona cu ta contestá” i ta nificá tambe un actor di plataforma. Siendo cu actornan griego i romano a bisti mascarada, hende a usa e palabra aki figurativamente pa un persona cu ta disimulá. E hipócritanan ta “esnan infiel.” (Compará Lucas 12:46 cu Mateo 24:50, 51.) Hipocresia (hy·poʹkri·sis) por nificá tambe maldad i astucia. (Mateo 22:18; Marco 12:15; Lucas 20:23) Ta ki tristu ora un persona cu ta confia ser engañá pa sonrisa, chiflamentu i accionnan cu ta solamente pretension! N’e otro banda ta alentador pa sa cu nos ta tratando cu cristiannan digno di confiansa. I Dios ta bendicioná nos p’e echo cu nos ta birtuoso i no hipócrita. Su aprobacion ta riba esnan cu ta manifestá “cariño fraternal sin hipocresia” i cu ta poseé “fe sin hipocresia.”—1 Pedro 1:22; 1 Timoteo 1:5.

Birtud Ta Bondad Activo

17, 18. Segun cu nos ta manifestá e fruta di spiritu di bondad, con nos lo trata cu otronan?

¹⁷ Si nos suministrá birtud na nos fe, nos lo forsa pa evitá di pensa, bisa i haci cosnan cu no ta aceptabel pa Dios. Sin embargo, manifestando birtud cristian tambe ta rekerí pa nos practicá bondad activo. En realidad, birtud a ser definí como bondad. I bondad ta un fruta di Jehova su spiritu santu, no producto di simpel esfuerso humano. (Galatio 5:22, 23) Segun cu nos ta manifestá e fruta di spiritu di bondad, nos lo ser motivá pa pensa bon di otronan i pa encomendá nan pa nan bon cualidadnan apesar di nan imperfeccion. Nan a sirbi Jehova fielmente pa añanan largu? E ora ei nos mester mustra respet na nan i papia bon di nan i nan sirbishi na Dios. Nos Tata celestial ta tuma nota dje amor cu nan ta mustra pa su nomber i nan obranan birtuoso di fe i nos tambe mester haci’é.—Nehemías 13:31b; Hebreo 6:10.

¹⁸ Birtud ta haci nos paciente, comprensivo, compasivo. Si un co-adorador di Jehova ta sufriendo di angustia of depresion, nos lo consol’é i busca moda pa dun’é algun sosten, net manera nos amoroso Tata celestial ta sostené nos. (2 Corintio 1:3, 4; 1 Tesalonicense 5:14) Nos ta simpatisá cu esnan cu ta di luto, kisas debí n’e pérdida di un ser kerí den morto. Si nos por haci cualkier cos pa aliviá nan sufrimentu, nos lo haci’é, pasobra un spiritu birtuoso ta impulsá accion amoroso i bondadoso.

19. Con otronan probablemente lo trata nos si nos ta birtuoso den pensamentu, palabra i echo?

¹⁹ Mescos cu nos ta bendicioná Jehova dor di papia bon di dje, otronan probablemente lo bendicioná nos si nos ta birtuoso den pensamentu, palabra i echo. (Salmo 145:10) Un proverbio sabí ta bisa: “Bendicion ta pa cabes di esun hustu, pero encuanto boca di esnan malbado, e ta tapa violencia.” (Proverbio 10:6) Un persona malbado i violento ta falta e birtud cu lo haci otronan tene cariño p’e. E ta cosechá loke e ta sembra, pasobra hende onestamente no por dun’é nan bendicion dor di papia bon di dje. (Galatio 6:7) Cuantu mihó ta pa esnan cu ta pensa, papia i actua cu birtud manera sirbidornan di Jehova! Nan ta gana e amor, confiansa i respet di otronan, kendenan ta ser impulsá pa bendicioná nan i papia bon di nan. Ademas, nan birtud piadoso ta resultá den e bendicion preciocísimo di Jehova.—Proverbio 10:22.

20. Pensamentu, manera di papia i accion birtuoso por tin ki efecto den un congregacion dje pueblo di Jehova?

²⁰ Pensamentu, manera di papia i accion birtuoso siguramente ta beneficiá un congregacion dje pueblo di Jehova. Ora compañé creyentenan tin pensamentu afectuoso i respetuoso pa un e otro, amor fraternal ta florecé entre nan. (Juan 13:34, 35) Un manera di papia birtuoso, incluyendo encomendacion i animacion sincero, ta fomentá un sintimentu caluroso di cooperacion i unidad. (Salmo 133:1-3) I accion caluroso di birtud ta incitá otronan pa respondé den un manera similar. Riba tur cos, e práctica di birtud cristian ta resultá den e aprobacion i bendicion di nos birtuoso Tata celestial, Jehova. P’esei, laga nos pone como meta pa respondé n’e promesanan precioso di Dios dor di ehercé fe. I di tur manera, laga nos haci esfuerso sincero pa suministrá birtud na nos fe.

Con Bo Ta Contestá?

◻ Con lo bo definí “birtud,” i pakico hende imperfecto por ta birtuoso?

◻ Birtud ta exigí ki sorto di pensamentu?

◻ Con birtud mester afectá nos manera di papia?

◻ Ki efecto birtud mester tin riba nos accionnan?

◻ Cua ta algun beneficio di ser birtuoso?

[Plachi na página 21]

Siendo cu awa dushi i awa marga no por brota for dje mésun fuente, otronan ta spera hustamente pa sirbidornan di Jehova bisa solamente cosnan birtuoso