Suministra na Boso Awante, Debocion Piadoso

“Suministrá na boso fe, . . . awante, na boso awante, debocion piadoso.”—2 PEDRO 1:5, 6.

TABATA un periodo scur den historia di siglo 20. Cuminsando den añanan 30, miles di Testigo di Jehova den paisnan bou di dominio nazista a ser arestá inhustamente i tirá den campo di concentracion. Pakico? Pasobra nan a risca keda neutral i a nenga di saludá Hitler. Con nan a ser tratá? “Ningun otro grupo di prisonero . . . a ser exponé n’e sadismo dje soldadnan di SS den mesun forma cu e Studiantenan di Bijbel [Testigonan di Jehova]. E tabata un sadismo marcá pa un cadena sin fin di tortura físico i mental, di e sorto cu ningun idioma na mundu por expresá.”—Karl Wittig, un ex-oficial di gobiernu aleman.

² Con a bai cu e Testigonan? Den su buki The Nazi State and the New Religions: Five Case Studies in Non-Conformity [Estado Nazista i Religion Nobo: Cincu Estudio den Inconformidad], Dr. Christine E. King a skirbi: “Solamente contra e Testigonan [na contraste cu otro gruponan religioso] e gobiernu no tabatin éxito.” Sí, Testigonan di Jehova como grupo a mantené nan posicion, maske cu pa cientos di nan, esaki a nificá wanta te na morto.

³ Kico a haci posibel pa Testigonan di Jehova wanta tal prueba no solamente na Alemania nazista sino na tur parti dje mundu? Nan Tata celestial a yuda nan wanta debí na nan debocion piadoso. “Jehova sa con pa libra hende di debocion piadoso for di prueba,” apostel Pedro ta splica. (2 Pedro 2:9) Anteriormente den e mesun carta, Pedro a consehá e cristiannan: “Suministrá na boso fe, . . . awante, na boso awante, debocion piadoso.” (2 Pedro 1:5, 6) Pues awante ta estrechamente ligá cu debocion piadoso. Realmente, pa wanta te na fin, nos mester ‘sigui tras di debocion piadoso’ i manifest’é. (1 Timoteo 6:11) Pero kico exactamente ta debocion piadoso?

Loke Debocion Piadoso Ta

⁴ E sustantivo griego pa “debocion piadoso” (eu·seʹbei·a) por ser traducí literalmente como “duna bon reverencia.”a (2 Pedro 1:6, Kingdom Interlinear) E ta duna idea di un sintimentu caluroso di curason pa cu Dios. Di acuerdo cu W. E. Vine, e adhetivo eu·se·besʹ, cu literalmente kier men “bon-reverente,” ta nificá “e energia cua, dirigí mediante respet reverencial sagrado pa Dios, ta ser expresá den actividad deboto.”—2 Pedro 2:9, Int.

⁵ P’esei e expresion “debocion piadoso” ta referí n’e reverencia of debocion pa Jehova cu ta impulsá nos pa haci loke ta agrad’é. Nos ta haci esaki apesar di prueba difícil pasobra nos ta stima Dios di curason. E ta un pegamentu leal i personal na Jehova cu ta ser expresá den e manera cu nos ta hiba nos bida. Berdadero cristiannan ta ser instá pa haci oracion pa nan por hiba “un bida calmu i ketu cu pleno debocion piadoso.” (1 Timoteo 2:1, 2) Di acuerdo cu e lexicógrafonan J. P. Louw i E. A. Nida, “den un cantidad di idioma [eu·seʹbei·a] den 1 Tm 2.2 por ser traducí apropiadamente como ‘biba manera Dios kier pa nos biba’ of ‘biba manera Dios a bisa cu nos mester biba.’”

⁶ Nos por comprendé mihó awor e relacion entre awante i debocion piadoso. Pa motibu cu nos ta biba manera Dios kier pa nos biba—cu debocion piadoso—nos ta trece riba nos mes e odio dje mundu, cua sin excepcion ta trece cuné prueba di fe. (2 Timoteo 3:12) Pero no tin nada cu lo motivá nos pa wanta tal prueba si no ta pa nos pegamentu personal na nos Tata celestial. Ademas, Jehova ta respondé na tal debocion di curason. Djis imaginá con Jehova ta sinti’é ora e ta wak abou for di cielu i observá esnan cu, debí na nan debocion na dje, ta forsando pa agrad’é apesar di tur clase di oposicion. Nada straño cu e ta dispuesto pa “libra hende di debocion piadoso for di prueba”!

⁷ Sin embargo, nos no ta nace cu debocion piadoso, tampoco nos ta adkiri’é automáticamente for di mayornan deboto. (Génesis 8:21) Mas bien, nos mester cultiv’é. (1 Timoteo 4:7, 10) Nos mester traha pa suministrá debocion piadoso na nos awante i na nos fe. Pedro ta bisa cu esaki ta exigí “esfuerso sincero.” (2 Pedro 1:5) Con, anto, nos por adkerí debocion piadoso?

Con Nos Ta Adkerí Debocion Piadoso?

⁸ Apostel Pedro a splica e clave pa adkerí debocion piadoso. El a bisa: “Laga bondad inmerecí i pas sea aumentá na boso pa medio di un conocimentu exacto di Dios i di Jesus nos Señor, ya cu su poder divino a duna nos libremente tur e cosnan cu ta toca bida i debocion piadoso, mediante e conocimentu exacto di esun kende a yama nos mediante gloria i birtud.” (2 Pedro 1:2, 3) Pues pa suministrá debocion piadoso na nos fe i awante, nos mester crece den conocimentu exacto, esta, pleno of completo, di Jehova Dios i di Jesucristo.

⁹ Kico ta nificá tene conocimentu exacto di Dios i di Cristo? Claramente, e ta enbolbé mas cu solamente sa ken nan ta. Pa ilustrá: Talbes bo sa ta ken ta bo bisiña i kisas asta bo ta cumind’é pa nomber. Pero lo bo fi’é un suma grandi di placa? No, aménos cu bo realmente sa ki clase di persona e ta. (Compará cu Proverbio 11:15.) Di igual manera, conocé Jehova i Jesus exactamente, of plenamente, ta nificá mas cu djis kere cu nan ta existí i sa nan nomber. Pa ser dispuesto pa wanta prueba pa causa di nan te na morto, nos mester realmente conocé nan íntimamente. (Juan 17:3) Kico esaki ta enbolbé?

¹⁰ Teniendo conocimentu exacto of completo di Jehova i di Jesus ta enbolbé dos cos: (1) siña conocé nan como persona—nan cualidadnan, sintimentunan i camindanan— i (2) imitá nan ehempel. Debocion piadoso ta enbolbé un pegamentu di curason i personal na Jehova i ta ser hací bisto den e manera cu nos ta hiba nos bida. P’esei, pa adkiri’é nos mester siña conocé Jehova personalmente i conocé su boluntad i camindanan cabalmente te asina leu esaki ta humanamente posibel. Pa nos berdaderamente conocé Jehova, den kende su imágen nos a ser creá, nos mester usa tal conocimentu i forsa pa tá manera e. (Génesis 1:26-28; Colosense 3:10) I siendo cu Jesus a imitá Jehova perfectamente den loke el a bisa i haci, conociendo Jesus exactamente ta un yudansa balioso pa desaroyá debocion piadoso.—Hebreo 1:3.

¹¹ Ma con nos por gana tal conocimentu exacto di Dios i di Cristo? Dor di studia Bijbel i publicacionnan basá riba Bijbel diligentemente.b Sin embargo, si nos kier pa nos studio personal di Bijbel resultá den nos adkisicion di debocion piadoso, ta vital pa nos tuma tempu pa meditá, esta, pa reflexioná of pensa riba loke nos ta lesa. (Compará cu Hosué 1:8.) Pakico esaki ta importante? Corda cu debocion piadoso ta un sintimentu caluroso i di curason pa cu Dios. Den e Scritura, meditacion ta ser asociá bes tras bes cu e curason figurativo—e persona di paden. (Salmo 19:14; 49:3; Proverbio 15:28) Ora nos ta reflexioná apreciativamente riba loke nos ta lesa, e ta filtra yega na e persona di paden, lanta asina nos sintimentunan, toca nos emocionnan i influenciá nos pensamentu. Solamente e ora ei un studio por fortalecé nos pegamentu personal na Jehova i impulsá nos pa biba den un manera cu ta agradá Dios asta ora nos haña nos confrontá cu circunstancia di desafio of prueba difícil.

Practicando Debocion Piadoso na Cas

¹² Debocion piadoso mester ser practicá promé na cas. Apostel Pablo a bisa: “Si cualkier biuda tin yu of nieto, laga esakinan siña promé pa practicá debocion piadoso den nan mes cas i sigui paga un debido compensacion na nan mayornan i abuelonan, pasobra esaki ta aceptabel den bista di Dios.” (1 Timoteo 5:4) Percuracion pa mayornan di edad ta, manera Pablo ta skirbi, un expresion di debocion piadoso. Berdadero cristiannan ta percurá tal cuido no djis pa motibu di un sentido di deber, sino pa motibu di amor pa nan mayornan. Aunke, mas cu esei, nan ta reconocé e importancia cu Jehova ta duna na percurá pa bo famia. Nan ta bon conciente cu pa bira lomba pa nan mayornan den un tempu di necesidad lo ta ekivalente na ‘nenga e fe cristian.’—1 Timoteo 5:8.

¹³ Nos tin cu admití cu no ta semper fácil pa practicá debocion piadoso na cas. Miembronan di famia talbes ta separá dor di distancianan grandi. Yunan grandi por ta lantando nan mes famia i kisas nan ta luchando económicamente. E caracter of e grado dje cuido cu un mayor tin mester por ta un obligacion pisá rib’e salú físico, mental i emocional di esnan cu ta percurá e cuido. Tog, por tin berdadero satisfaccion den sa cu percurando pa bo mayornan no solamente ta igual cu “un debido compensacion” sino tambe ta agradá Esun “na ken tur famia den cielu i riba tera ta debe nan nomber.”—Efesio 3:14, 15.

¹⁴ Considerá un ehempel berdaderamente conmovedor. Ellis i su cincu rumannan homber i muher ta enfrentá un tarea difícil pa cuida nan tata na cas. Ellis ta splica: “Na 1986 mi tata a sufri di un atake, cu a lagu’é completamente paralisá.” Tur e seis yunan ta percurá p’e necesidadnan di nan tata, variando for di bañ’é te haci sigur cu su posicion riba cama ta ser cambiá regularmente p’e no desaroyá herida di cama. “Nos ta lesa p’e, papia cuné, toca música p’e. Nos no ta sigur si e ta conciente di loke ta pasando rond di dje, pero nos ta trat’é como si fuera e ta completamente conciente di tur cos.”

¹⁵ Pakico e yunan ta percurá pa nan tata asina? Ellis ta sigui: “Despues di morto di nos mama na 1964, Papi a lanta nos su so. N’e tempu ei nos edad a varia di 5 pa 14 aña. E tabatei e tempu ei pa nos; nos tei p’e awor.” Claramente, no ta fácil pa percurá tal cuido, i e yunan ta desanimá de bes en cuando. “Pero nos ta realisá cu e condicion di nos tata ta un problema temporal,” Ellis ta bisa. “Nos ta mira padilanti n’e tempu ora nos tata ser restorá na bon salú i nos por ta uní atrobe cu nos mama.” (Isaías 33:24; Juan 5:28, 29) Siguramente, un cuido deboto asina pa un mayor mester alegrá curason di Esun kende ta manda yunan pa onra nan mayornan!c—Efesio 6:1, 2.

Debocion Piadoso i e Ministerio

¹⁶ Ora nos ta aceptá e invitacion di Jesus pa ‘sigui’é continuamente,’ nos ta cai bou di un comision divino di predicá e bon nobo di Reino i haci disipel. (Mateo 16:24; 24:14; 28:19, 20) Claramente, teniendo un parti den e ministerio ta un obligacion cristian den e “último dianan” aki. (2 Timoteo 3:1) Sin embargo, nos motivacion pa predicá i siña mester bai mas ayá cu djis un sentido di deber of obligacion. Un amor profundo pa Jehova mester ta e motibu primario pa loke nos ta haci i cuantu nos ta haci den e ministerio. “For dje abundancia dje curason e boca ta papia,” Jesus a bisa. (Mateo 12:34) Sí, ora nos curason ta basha over cu amor pa Jehova, nos ta sinti nos impulsá pa duna testimonio tocante dje na otronan. Ora amor pa Dios ta nos motivacion, nos ministerio ta un expresion significativo di nos debocion piadoso.

¹⁷ Con nos por cultivá e motivacion corecto p’e ministerio? Reflexioná apreciativamente riba tres motibu cu Jehova a duna nos pa stim’é. (1) Nos stima Jehova debí na loke ya el a haci pa nos. E percuracion dje rescate ta su mayor demostracion di amor. (Mateo 20:28; Juan 15:13) (2) Nos stima Jehova debí na loke e ta haciendo pa nos awor. Nos tin frankesa di expresion cu Jehova, kende ta contestá nos oracionnan. (Salmo 65:2; Hebreo 4:14-16) Segun cu nos ta duna prioridad na interesnan di Reino, nos ta gosa dje necesidadnan di bida. (Mateo 6:25-33) Nos ta ricibí un suministro constante di alimento spiritual cu ta yuda nos trata cu e problemanan cu nos ta enfrentá. (Mateo 24:45) I nos tin e bendicion di ta parti di un hermandad cristian mundial cu berdaderamente ta marca nos como distinto for dje resto di mundu. (1 Pedro 2:17) (3) Tambe nos stima Jehova debí na loke lo e haci pa nos ainda. Debí na su amor, nos tin “un gara firme riba e berdadero bida”—bida eterno den futuro. (1 Timoteo 6:12, 19) Ora nos considerá e amor di Jehova na nos fabor, siguramente nos curason lo impulsá nos pa tene un participacion deboto den bisa otronan tocante dje i su propósitonan precioso! Otronan lo no tin cu bisa nos kico pa haci of cuantu pa haci den e ministerio. Nos curason lo impulsá nos pa haci loke nos por.

¹⁸ Asta ora nos ta enfrentá circunstancianan di desafio, un curason moví pa debocion piadoso lo ta forsá pa papia. (Compará cu Jeremías 20:9.) E caso di Stella, un muher cristian extremamente tímido, ta demostrá esaki. Ora el a cuminsá studia Bijbel na principio, el a pensa, ‘Nunca lo mi por bai di cas pa cas!’ E ta splica: “Semper mi tabata hopi ketu. Nunca mi por a acercá otronan pa cuminsá un combersacion.” Segun cu el a sigui studia, su amor pa Jehova a crece i el a desaroyá un deseo ardiente pa papia cu otronan tocante dje. “Mi ta corda con mi tabata bisa mi instructor di Bijbel, ‘Mi tin masha gana di papia, pero mi simplemente no por i esei realmente ta molestiá mi.’ Lo mi no lubidá nunca loke el a bisá mi: ‘Stella, sea gradicidu cu bo kier papia.’”

¹⁹ Pronto, Stella a haña su mes ta duna testimonio na su bisiña dje cas pegá cuné. Despues el a dal e paso cu p’e tabata unu monumental—el a participá den e ministerio di cas-pa-cas pa promé biaha. (Echo 20:20, 21) E ta corda: “Mi a skirbi henter mi presentacion. Pero mi tabata asina spantá cu aunke mi tabatin’e mi dilanti, mi tabata demasiado nervioso pa wak abou na mi notanan!” Awor, mas cu 35 aña despues, ainda Stella ta masha tímido di caracter. Ma e ta stima e ministerio di veld i ta sigui tene un participacion significativo den dje.

²⁰ Ni sikiera persecucion of encarcelacion por cera boca di Testigonan deboto di Jehova. Considerá e ehempel di Ernst i Hildegard Seliger di Alemania. Pa motibu di nan fe, entre nan dos nan a pasa mas cu 40 aña den campo di concentracion nazista i prison comunista. Asta den prison, nan a persistí den duna testimonio na otro prisoneronan. Hildegard ta corda: “Oficial di prison a clasificá mi como specialmente peligroso, pasobra, manera un guardia femenino a bisa, mi a papia tocante Bijbel henter dia. Pues nan a poné mi den un cel den bodega.” Despues cu nan finalmente a ricibí nan libertad, rumannan Seliger a dedicá nan tempu completo n’e ministerio cristian. Tur dos a sirbi fielmente te na nan morto, ruman Ernst na 1985 i su casá na 1992.

²¹ Dor di studia e Palabra di Dios diligentemente i tuma tempu pa meditá apreciativamente riba loke nos ta siña, nos lo crece den conocimentu exacto di Jehova Dios i Jesucristo. Esaki, en buelta, lo resultá den nos ganamentu di un midí mas pleno di e cualidad precioso ei—debocion piadoso. Sin debocion piadoso no ta posibel pa wanta e varios pruebanan cu ta bini riba nos como cristiannan. Pues laga nos sigui e conseho di apostel Pedro, esta di sigui ‘suministrá na nos fe, awante, i na nos awante, debocion piadoso.’—2 Pedro 1:5, 6.

[Footnotes]

Kico Ta Bo Contesta?

◻ Kico ta debocion piadoso?

◻ Kico ta e relacion entre awante i debocion piadoso?

◻ Kico ta e clave pa adkerí debocion piadoso?

◻ Con un cristian por practicá debocion piadoso na cas?

◻ Kico mester ta e motibu primario pa loke nos ta haci den e ministerio?

[Study Questions]

1, 2. (a) Cuminsando den añanan 30, kico a sosodé cu Testigonan di Jehova den paisnan bou di dominio nazista, i pakico? (b) Con a bai cu e pueblo di Jehova bou dje trato cruel aki?

3. Kico a haci posibel pa Testigonan di Jehova wanta prueba severo?

4, 5. Kico ta debocion piadoso?

6. Kico ta e relacion entre awante i debocion piadoso?

7. Pakico nos mester cultivá debocion piadoso?

8. Segun apostel Pedro, kico ta e clave pa adkerí debocion piadoso?

9. Con bo por ilustrá cu teniendo conocimentu exacto di Dios i di Cristo ta enbolbé mas cu solamente sa ken nan ta?

10. Teniendo conocimentu exacto di Jehova i Jesus ta enbolbé cua dos cos, i pakico?

11. (a) Con nos por gana conocimentu exacto di Dios i di Cristo? (b) Pakico ta importante pa meditá riba loke nos ta lesa?

12. (a) Segun Pablo, con un cristian por practicá debocion piadoso na cas? (b) Pakico cristiannan berdadero ta percurá pa mayornan di edad?

13. Pakico practicando debocion piadoso na cas por ta un berdadero desafio, pero ki satisfaccion ta bini como resultado di percurá pa bo mayornan?

14, 15. Relatá un ehempel di percuracion piadoso di parti di yunan pa un mayor.

16. Kico mester ta e motibu primario pa loke nos ta haci den e ministerio?

17. Con nos por cultivá e motivacion corecto p’e ministerio?

18, 19. Ki obstáculo un ruman muhé a vence afin di participá den e ministerio?

20. Ki ehempel ta mustra cu ni persecucion of encarcelacion por cera boca di Testigonan deboto di Jehova?

21. Kico nos mester haci pa suministrá debocion piadoso na nos awante?

[Picture on page 18]

E Testigonan di Jehova encarcelá den e campo di concentracion nazista na Ravensbrück a manifestá awante i debocion piadoso