Acto di Salbacion di Jehova Dios Awor

E BIJBEL ta bísanos lo sigiente tocante Jehova Dios: “Hende husto tin hopi calamidad, pero Jehova ta líbranan for di nan tur” i, “Jehova sa con pa libra hende di debocion piadosa for di prueba.”—Salmo 34:19; 2 Pedro 2:9.

Con Jehova Dios ta bini pa yuda su pueblo ora nan tin problema? E no ta haci milagro parando e forza di naturaleza ni no ta haci otro acto sobrenatural, manera hopi hende ta kere cu e mester haci, sino ta usa un otro forza cu e mayor parti di hende berdaderamente no ta comprende, esta, amor. Sí, Jehova Dios ta stima su pueblo, i el a cultiva den nan un amor un pa otro asina fuerte cu e por haci pa nan loke ta parce casi milagroso.—1 Juan 4:10-12, 21.

Algun hende por pleita cu den e tempo di emergencia, loke ta necesario ta cuminda, medicina, i equipo—i no amor. Naturalmente, cuminda, medicina, i equipo ta importante. Sin embargo, apóstol Pablo a razona segun lo sigiente: “Si mi tin tur fe afin di transplanta montaña, pero no tin amor, mi ta nada. I si mi ta duna tur mi pertenencia pa alimenta otro, i si mi entrega mi curpa, pa mi por gaba, pero no tin amor, esei no ta di ningun probecho pa mi.”—1 Corintio 13:2, 3.

Hopi bez nos ta leza cu material mandá pa alivio ta keda montoná riba waf i ta putrí of djaca ta comé mientras cu hende den necesidad ta muri di maleza i hamber. Of pior ainda, tal material ta cai den man di hende golós i sin escrúpulo cu ta bendé pa hopi placa. Pues, ta un cos pa material ser disponibel, pero ta completamente otro cos pa percura pa hende den afliccion beneficiá di nan. Berdadero amor i interés por haci e diferencia.

Amor den accion

Den September di 1992 horcán Iniki a dal Kauai, un isla di Hawaí cu un poblacion di 55.000. Cu bientu di 210 km pa ora i un máximo di 260 km pa ora, horcán Iniki a mata 2 hende i a heridá 98, a daña 75 porciento dje casnan, a laga 8.000 hende sin cas, i a causa un calculacion di mil miyón di dólar di destruccion. Den e pueblo cu a biba riba e isla chikito ei tabatin rond di 800 Testigo di Jehova den seis congregacion. Con a bai cu nan?

Promé cu Iniki realmente a yega, anciano di congregacion, bao di direccion dje superintendente biahero, a haci contacto caba cu tur miembro di tur congregacion pa haci sigur cu nan tabata sano i salbo, i cla pe horcán. Tal cuido amoroso tabata instrumental pa preveni daño serio of morto den e Testigonan.—Compara cu Isaías 32:1, 2.

Aunque comunicacion i transportacion tabata interrumpí seriamente, tres representante dje oficina di sucursal dje Sociedad Watch Tower Bible and Tract den Honolulu tabata entre e promé hendenan pa yega ne isla despues dje horcán, ya cu nan a recibi permiso special dje Defensa Civil pa bai cu avión na Kauai. Nan a haci contacto un bez cu e Testigonan local i, su mañán, a organiza un reunion pa planeá estrategia pa auxilio. Un comité di auxilio tabata establecí pa calcula e necesidad i pa obtene material necesario via e oficina di sucursal den Honolulu. Trahando 24 ora pa dia, nan a dirigi e trabao di hiba provision pa esnan den necesidad i pa haci limpi i drecha cas kibrá.

Testigo di otro isla a reacciona un bez ne necesidad di nan rumanan. Asina cu e aeropuerto di Kauai a habri, 70 Testigo a yega pa yuda. Provision pa duna auxilio di balor di $100.000, incluyendo Delco, stoof portátil, lanterna, i cuminda, a yega. Uno di varios Salón di Reino riba e isla tabata usá como depósito; pero algun ruman tabatin miedu di ladronicia. Anto algun truck militar a para den parkerplats dje Salón di Reino, i shofer a puntra si nan mag stacioná nan truck ei. Soldad stacioná pa proteha nan truck també a elimina e problema di hortamento di provision di auxilio.

E rumanan a hiba Delco di cas pa cas i a láganan produci corriente den cas pa dos of tres ora pa yuda friezer di hende fria. Grupo di ruman tabata mandá na varios cas pa yúdanan haci cas limpi i dréchanan. Ora nan a drecha cas di un hermana kende su esposo a oponé ferozmente den pasado, e esposo a keda asina emocioná cu tur loke e por a haci tabata di para wak i yora. Un bishitante americano cu a mira un otro grupo di Testigo traha a keda asina impresioná cu nan conducta i organizacion cu el a bini cerca nan i a púntranan kico a hácinan tanto diferente. Ora un ruman a splica cu esei tabata nan amor pa Dios i pa otro hende cristian, e homber a contestá: “Con mi por yega di conoce Dios?” (Mateo 22:37-40) Anto el a agrega: “Boso ta asina organizá cu probablemente boso lo tin un hende sperando pa mi ora mi ta bolbe pa Flórida!”

Totalmente, Testigo di Jehova a yuda haci limpi i drecha 295 cas na Kauai. Di eseinan, 207 cas tabatin mester di un poco trabao, pero 54 cas a recibi daño severo, i 19 tabata destrui totalmente. Nan trabao també a inclui bishitando tur Testigo cu nan a conoce riba e isla pa haci sigur cu cada un a recibi atencion. Ora provision tabata entregá na un hermana, un beciña budista a bisa cu e ni sikiera a recibi un copi di te for di su religion. Ora un grupo di Testigo a haci e cas di un otro señora limpi, el a bisa: “Boso tabata bishitá mi cas pa hopi tempo, i mi a pensa cu boso ta bon beciña, pero e expresion aki di amor pa beciña ta mústrami e propósito di boso organizacion. Mashá danki pa tur boso trabao duro.”

Además di atende ne necesidad material di nan rumanan cristian, esnan responsabel pe dunamento di auxilio tabata igualmente interesá den nan bienestar spiritual. Menos cu dos dia despues dje horcán, varios congregacion tabata celebrá nan reunion caba. Pronto, grupo chikito di estudio di buki tabata funciona. Diez anciano di otro isla a bini na Kauai pa yuda anciano local di manera cu nan por a haci bishita di pastoreá cerca tur Testigo riba e isla. E sigiente diadomingo, tur seis congregacion a tene nan estudio di Toren di Vigilancia, un discurso di 30 minut di un miembro dje Comité di Auxilio tocante procedimiento den dunamento di auxilio, i un discurso di conclusion di 30 minut di un miembro dje Comité di Sucursal cu a bini di Honolulu pa haci esei. Un informe di un testigo ocular ta bisa: “Tur a recibi consuelo for dje dunamento di direccion excelente i a síntinan spiritualmente cla pa ataca problema cu a keda. Tabatin mashá poco hende den e auditorio cu no a yora ora e programa a conclui, i e aplauso tabata espontáneo.”

Un hermandad mundial

Tal amor i interés ta identifica e pueblo di Jehova Dios rond di mundo. Ora cu ciclón Val a dal e isla di Samoa Pabao rond di un aña promé, el a causa basta hopi daño, pero Testigo di Jehova di otro parti di mundo a yega lihé pa yuda e rumanan ei. Despues, ora e gobierno a percura fondo pa tur religion—incluyendo Testigo di Jehova—pa drecha nan propiedad, Testigo di Jehova a manda e placa bek cu un carta bisando cu nan a drecha tur daño caba, i e gobierno por usa e placa pa drecha algun edificio dje gobierno. Un curant local a informa di accion dje Testigonan. Tumando nota di esei, un oficial di gobierno a bisa un Testigo cu el a sinti basta bergüenza di su mes religion pasobra nan a acepta e placa dje gobierno aunque tur edificio di nan cu a recibi daño tabata cubrí cu seguro.

Di igual manera, na September di 1992, ora e rio Ouvèze den zuidoost di Francia a inunda i a destrui Vaison-la-Romaine i 15 comunidad alrededor, Testigo di Jehova a reacciona lihé. Den un solo anochi e diluvio a mata 40 hende, a destrui 400 cas, a haci daño na cientos di otronan, i a laga miles di famía sin awa of corriente. Madrugá, Testigo di Jehova di congregacion local tabata e proménan pa yega pa yuda nan rumanan. Famía di Testigo di Jehova den e region a recibi amorosamente esnan sin cas. Cientos di Testigo a bini di leu i cerca pa ofrece yudanza. Un comité di auxilio tabata organizá den Orange, un stad beciña, pa coordiná esfuerzo di cuater grupo di boluntario, cu a saca lodo i a haci limpi e casnan, a laba un gran cantidad di paña yen di lodo, i a prepara i a entrega cuminda i awa pa bebe den tur e region inundá. Nan asta a haci limpi boluntariamente un scol local i varios edificio dje stad. Nan rumanan i també hende dje comunidad a aprecia nan esfuerzo incansable.

Den hopi otro lugar, Testigo di Jehova a sufri di desaster, tal como diluvio, tempestad, i temblor, mescos cu tur otro hende. Cu e comprendimento di cu esei ta consecuencia di circunstancia imprevisto of inprevenible, nan no ta culpa Dios ni ningun otro persona. (Eclesiastés 9:11) Mas bien, nan ta tene confianza di cu e amor di sacrificio propio di otro hende creyente lo sálbanan apesar di circunstancia calamitoso cu por sosodénan. Tal acto amoroso ta un resultado dje fe cu nan tin en común. Disípel Santiago a splica: “Si un ruman homber of ruman muher ta den un estado di desnudez i ta falta cuminda suficiente pe dia, i toch un cierto hende di boso ta bísanan: ‘Bai den paz, cuida bo curpa i come bon,’ pero boso no ta dúnanan cos necesario pa nan curpa, esei ta di ki probecho? Asina, també, fe, si e no tin obra ta morto den su mes.”—Santiago 2:15-17.

E fuente di berdadero proteccion

En bez di spera milagro den e forma di entremetimento divino di cualkier sorto, Testigo di Jehova sa cu proteccion ta ser hayá den nan hermandad cristian mundial. Realmente, loke nan hermandad por haci den tempo di angustia ta nada menos cu milagroso. Nan ta corda e palabra di Jesús den Mateo 17:20: “Si boso tin fe e tamaño di pepita di mosterd, boso por bisa e montaña aki, ‘Hala djaki p’ei,’ i lo e hala, i nada lo ser imposibel pa boso.” Sí, obstáculo montañoso lo desparce ora berdadero fe cristian, hunto cu amor, ta drenta den accion.

E pueblo di Jehova Dios mundialmente ta sinti e man protector di nan Dios den e tempo cambiable i peligroso aki. Nan ta síntinan mescos cu e salmista: “Den paz lo mi subi cama i també drumi, pasobra abo, sí, abo so, O Jehova, ta hacími biba den siguridad.” (Salmo 4:8) Cu confianza, nan ta enfoca nan atencion riba e trabao na man: “E bon nobo di reino lo ser predicá den tur e tera habitá como testimonio pa tur nacion; anto e fin lo yega.” (Mateo 24:14) I cu siguridad nan ta spera cumplimento dje promesa di Jehova Dios di un mundo nobo di paz i husticia, den cua nan lo no experimenta desaster mas di ningun sorto, sea natural of cu hende ta causa.—Miqueas 4:4.

[Pictures on page 12]

Testigo di Jehova a bini di leu i cerca pa yuda víctima dje diluvio