Keda Leu Ora Tin Menasa di Peliger

POCO hende ta mas sensitivo pa peliger cu nabegantenan. Nan mester ta alerta pa cualkier cambio di weer, mareo di laman i con cerca nan barcu ta for di costa. Ora tantu mareo di laman como bientu ta combiná pa manda e barcu den direccion di costa, nabegantenan ta enfrentá trabou duru i peliger.

Bou dje condicionnan aki​—⁠ora e costa ta den direccion cu e bientu ta manda e barcu​—⁠un nabegante ta mantené basta distancia entre su boto i e costa, specialmente si e barcu ta nabegá cu bela so. Un manual di nabegacion ta splica cu ‘pa ser cogé den un bientu fuerte suplando den direccion di costa ta talbes e peor dificultad’ den cua un nabegante por haña su mes. E solucion recomendá? ‘Nunca permití bo boto di hañ’é den un posicion difícil asina.’ E manera sigur pa evitá di pega riba un banki di santu of costa di baranca ta pa keda leu for di peliger.

Hende cristian mester ta sensitivo pa peliger cu lo por naufragá nan fe. (1 Timoteo 1:19) Awendia, condicionnan di ningun manera ta ideal pa tene un curso stabil. Mescos cu un boto por ser halá for di su curso dor di bientu i mareo di laman, asina nos bida dedicá por perde direccion debí n’e trek constante di nos carni imperfecto i e golpinan implacabel dje spiritu dje mundu​—⁠awor casi comparabel cu intensidad di bientu fuerte.

Un Homber Cu A Biba Peligrosamente

Ki fácil ta pa risca nabegá inconcientemente den awanan spiritual peligroso!

Considerá un ehempel cu a sosodé cerca di Laman Morto, un awa rondoná pa tera. Nos ta referí n’e ehempel di Lot. Su decision pa biba den Sódoma a trece hopi problema i basta tristesa p’e. Despues di un pleitu entre nan respectivo cuidadornan di bestia, Abraham i Lot a cumbiní pa biba den áreanan diferente. Bijbel ta bisa nos cu Lot a scoge e Districto di Jordan i a arma su tent entre e stadnan dje Districto. Despues, el a dicidí na biba den Sódoma, maske e estilo di bida dje sodomitanan a afligi’é.​—⁠Génesis 13:​5-13; 2 Pedro 2:⁠8.

Pakico Lot a sigui biba den un stad conocí pa su inmoralidad, cu a ofendé Jehova profundamente i asta a causa un sclamacion público di hende cu a biba den cercania? Sódoma tabata próspero, i e esposa di Lot sin duda a disfrutá di beneficionan material di bida dje stad. (Ezekiel 16:​49, 50) Talbes asta Lot a ser atraé dor di Sódoma su economia vibrante. Sea cual sea su motibu pa biba ei, e mester a bandon’é mas pronto cu el a haci’é. Solamente riba e insistencia urgente dje angelnan di Jehova Lot su famia finalmente a bandoná e área di peliger.

E relato di Génesis ta bisa: “Ora mainta a habri, anto e angelnan a cuminsá ansha Lot, bisando: ‘Lanta riba! Tuma bo esposa i bo dos yunan muher cu ta akinan, pa temor di cu bo por ser barí den e eror dje stad!’ ” Pero asta despues di tal spiertamentu urgente, Lot “a sigui tarda.” Finalmente, e angelnan “a gara su man i e man di su esposa i e mannan di su dos yunan muher i nan a pasa na saca nan i pone nan pafó dje stad.”​—⁠Génesis 19:​15, 16.

Pafó dje stad, e angelnan a duna e famia di Lot algun instruccion final: “Hui pa bo alma! No wak bo tras i no para ketu den henter e Districto! Hui p’e region montañoso pa temor di cu bo por ser barí!” (Génesis 19:17) Asta e ora ei, Lot a roga pa permit pa bai n’e stad cercano di Zoar en bes di bandoná e region henteramente. (Génesis 19: 18-22) Claramente, Lot no tabata dispuesto pa distanciá su mes mas leu posibel for di peliger.

Riba caminda pa Zoar, e esposa di Lot a wak patras na Sódoma, aparentemente anhelando p’e cosnan cu el a laga atras. Pa motibu cu el a ignorá instruccion dje angelnan, el a perde su bida. Lot​—⁠un homber hustu​—⁠a sobrebibí e destruccion dje stad huntu cu su dos yunan muher. Pero ki un prijs el a paga pa scoge pa biba cerca di peliger!​—⁠Génesis 19: 18-26; 2 Pedro 2:⁠7.

Kedando Leu For di Peliger

Lot su experencia amargo ta mustra kico por sosodé si nos yega cerca di of tarda den un ambiente peligroso. Sabiduria lo dicta pa, mescos cu bon nabegante, nos nunca permití nos mes di haña nos den un situacion difícil asina. Cua ta algun área di peliger cu nos mester keda leu for di dje? Algun cristian a desviá dor di bira demasiado enbolbí den actividad di negoshi, dor di cultivá amistad cerá cu asociacion mundano, of dor di bira emocionalmente pegá na un persona dje sexo opuesto ora nan no ta liber pa casa.

E curso sabí, den cada caso, ta pa keda leu for di peliger. Por ehempel, nos ta alerta n’e peligernan spiritual cu un asina yamá oportunidad di oro di negoshi lo por trece? Algun ruman a hinca nan mes den empresanan comercial a costo di nan famia, nan salú i nan responsabilidadnan teocrático. Tin biaha e tentacion ta e estilo di bida mas cómodo cu placa por trece. Na otro ocasion esei ta e desafio di proba e abilidad di nan percepcion nanishi pa negoshi. Algun por razoná cu nan motibu ta pa duna empleo na otro rumannan of pa por contribuí mas generosamente na fabor dje obra mundial. Talbes nan ta kere cu ora e negoshi ta funcioná bon, nan lo tin hopi mas tempu pa dedicá na interesnan di Reino.

Cua ta algun dje trampanan? E clima económico insigur i “sosodimentu imprevisto” por sink e empresa comercial di mas mihó planeá. (Eclesiastés 9:11) Luchando cu un debe pisá por trece angustia i por desplasá asuntunan spiritual. I asta ora un negoshi ta floreciendo, probablemente lo e absorbá hopi tempu i energia mental, i lo e por rekerí bastante asociacion mundano.

Un anciano cristian na Spaña tabata den dificultad financiero serio ora un compania di seguro a haci’é un oferta atractivo. Aunke tabatin posibilidad di gana basta placa como agente di seguro independiente, finalmente el a rechasá e oferta. “No tabata un decision fácil, pero mi ta contentu cu mi a bisa no,” e ta splica. “Entre otro, no tabata den mi pa gana tantu placa​—⁠asta indirectamente​—⁠mediante mi contactonan teocrático. I aunke mi a gusta e idea di ta mi mes hefe, lo mi mester a biaha basta i pasa oranan largu na trabou. Esei lo a nificá inevitablemente neglishá mi famia i e congregacion. Riba tur cos, mi ta convencí cu si mi a aceptá e oferta ei, lo mi a perde control di mi bida.”

Ningun cristian por permití su mes di perde control di su bida. Jesus a mustra e resultadonan trágico di un curso asina dor di conta e ilustracion di un homber cu a acumulá mas i mas rikesa afin di baha cu penshon i hiba un bida fácil. Pero riba e mesun anochi cu el a dicidí cu el a acumulá suficiente placa, el a muri. “Asina ta pasa cu e hende cu ta warda tesoro pa su mes pero no ta ricu en cuanto Dios,” Jesus a spierta.​—⁠Lucas 12: 16-21; compará cu Santiago 4:​13-17.

Tambe nos mester vigilá contra asociacion extenso cu hende mundano. Talbes ta un bisiña, un amigu di scol, un colega di trabou of un relacion di negoshi. Nos por razoná, ‘E ta respetá e Testigonan, e ta hiba un bida limpi, i de bes en cuando nos ta papia en cuanto e berdad.’ Tog, e experencia di otronan ta proba cu despues di tempu nos asta por haña nos mes ta preferá tal compania mundano riba esun di un ruman homber of muher spiritual. Cua ta algun dje peligernan di un amistad asina?

Nos por cuminsá minimisá e urgencia dje tempu den cua nos ta biba of mustra un interes creciente den cosnan material en bes di cosnan spiritual. Talbes, debí na un temor di desagradá nos amigu mundano, nos asta lo deseá pa ser aceptá p’e mundu. (Compará cu 1 Pedro 4:​3-7.) E salmista David, na otro banda, a preferá di asociá cu hende cu a stima Jehova. “Lo mi declará bo nomber na mi rumannan; meimei dje congregacion lo mi alabá bo,” el a skirbi. (Salmo 22:22) Nos lo ser protegá si nos imitá e ehempel di David, buscando amistad cu por edificá nos spiritualmente.

Un otro curso riscante ta esun di bira emocionalmente enbolbí cu un persona dje sexo opuesto ora bo no ta liber pa casa. E peliger por lanta ora bo ta ser atraí na un persona cu ta atractivo, kende su combersacion ta stimulante, i kende asta tin e mesun concepto di bida i sentido di humor. Talbes bo ta disfrutá di su compania, razonando, ‘Mi sa con leu pa bai. Nos ta simplemente amigu.’ Sin embargo, unabes sintimentunan lanta, nan no ta fácil pa controlá.

Mary, un ruman muher hóben casá, a disfrutá di compania di Michael.a Michael tabata un bon ruman pero a haña ta difícil p’e haña amigu. Nan tabatin hopi cos en comun, i nan a haña cu nan por a chansa huntu. Mary a sinti’é gosá di pensa cu un ruman homber soltero kier a confia den dje. Pronto, loke a parce un amistad inocente a bira un enbolbimentu emocional profundo. Nan a pasa mas i mas tempu huntu i despues a cometé inmoralidad. “Mi mester a realisá e peliger na cuminsamentu,” Mary ta suspirá. “Unabes e amistad a florecé, el a bira manera drijfzand cu a chupa nos cada bes mas profundo.”

Nos nunca mester lubidá e spiertamentu di Bijbel: “E curason ta mas traicionero cu cualkier otro cos i ta desesperá. Ken por conoc’é?” (Jeremías 17:⁠9) Nos curason traicionero, mescos cu e mareo di laman cu ta manda e boto di bela den baranca, por hiba nos den un relacion emocional desastroso. E solucion? Si bo no ta liber pa casa, traha deliberadamente pa keda emocionalmente leu for di un persona cu bo ta haña atractivo.​—⁠Proverbio 10:⁠23.

Librando Bo Mes i Kedando Liber di Peliger

Kico si nos ya caba ta haña nos mes den peliger spiritual? Ora nabegantenan ta ser mandá den direccion di costa di baranca dor di bientu i mareo, nan ta traha desesperadamente pa bira nan boto pa laman grandi pa evitá naufragio, te ora nan alcansá awanan mas sigur. Di igual manera, nos mester lucha pa libra nos mes. Dor di presta atencion na conseho bíblico, dor di haci oracion sincero pa yudansa di Jehova, i dor di busca asistencia di rumannan cristian maduro, nos por bai bek riba un curso sigur. Nos lo ser bendicioná un bes mas cu pas di mente i di curason.​—⁠1 Tesalonicense 5:⁠17.

Sea cual sea nos circunstancianan, nos ta haci bon di keda leu for dje “cosnan cu ta pertenecé n’e mundu.” (Galatio 4:⁠3) Na contraste cu Lot, Abraham a scoge pa biba separá dje cananeonan mundano, aunke esei a nificá biba den tent pa hopi aña. Talbes el a falta algun comodidad material, pero su estilo di bida simpel a proteg’é spiritualmente. En bes di sufri un naufragio di su fe, el a bira “e tata di tur esnan cu tin fe.”​—⁠Romano 4:⁠11.

Rondoná manera nos ta pa un mundu cu ta busca satisfaccion propio, di cua su “spiritu” ta semper mas fuerte, nos mester sigui e ehempel di Abraham. (Efesio 2:⁠2) Si nos aceptá e guia di Jehova den tur asuntu, nos lo ta bendicioná dor di experenciá personalmente su proteccion amoroso. Nos lo sinti mescos cu David a sinti: “Mi alma e ta refrescá. E ta guiá mi den e pasonan di husticia pa causa di su nomber. Siguramente loke ta bon i bondad amoroso mes lo sigui mi tras tur e dianan di mi bida; i lo mi biba den e cas di Jehova te na largura di dianan.” No cabe duda, canando den “e pasonan di husticia,” en bes di desviá den rumbo dje camindanan di peliger, lo trece bendicion eterno.​—⁠Salmo 23:​3, 6.

[Footnotes]

[Caption on page 24]

Si bo no ta liber pa casa, keda emocionalmente leu for di un persona cu bo ta haña atractivo