Testigonan di Jehova Rond Mundu​—BAHAMAS

E REPUBLICA di Bahámas​—⁠un archipiélago di 3.000 isla i islita​—⁠ta extendé manera un coyar di coral riba 900 kilometer di laman blou-berde entre Flórida i Cuba. Entre su 267.000 habitantenan tin un creciente coro di proclamadornan di Reino. Nan cantica di alabansa ta poné bo corda Isaías 42:​10-12: “Canta na Jehova un cantica nobo, su alabansa for di extremo dje tera, boso cu ta bahando na laman i na loke ta yen’é, islanan i boso cu ta habitá nan. . . . For di top dje cerunan laga hende sclama duru. Laga nan atribuí gloria na Jehova, i den e islanan laga nan anunciá asta su alabansa.”

Desafio di un Fe Nobo

Na juli di 1992, un pionero regular (un predicador di Reino di tempu completo) a laga e buki di studio di Bijbel Bo por biba pa semper den Paradijs riba tera cu un conocí di negoshi. Despues cu e homber a lesa e buki, el a bisa su mes, ‘E religion aki ta algu cu mi mester investigá.’ Rib’e siguiente dos djadumingunan, el a asistí na reunion di dos diferente Salon di Reino di Testigonan di Jehova. Despues, un studio di Bijbel a ser cuminsá cuné. Sin embargo, solamente seis siman despues cu el a cuminsá su lesnan di Bijbel, a lanta un desafio cu lo a pone su fe nobo na prueba​—⁠celebracion di cumpliaña.

E famia dje comerciante tabata masha enbolbí den celebracionnan asina, pero su amor p’e Palabra di Dios a incit’é pa sigui cu su lesnan di Bijbel. Segun cu su conocimentu di berdad bíblico a aumentá, asina a sosodé tambe cu su comprendimentu di celebracionnan di cumpliaña i fiestanan mundano i Jehova su punto di bista di nan.

Ora e esposa dje homber aki a organisá un reunion social pa Dia di Tata, cortesmente el a nenga di asistí. Pero e esposa a sinti cu e homber no tabata stim’é mas i cu e tabata poniendo su religion promé cuné i e famia. E esposo a splica bondadosamente cu aplicando loke e tabata siñando for di Bijbel a yuda transform’é den un mihó esposo i tata. Cu tempu, e esposa a cuminsá apreciá su amor pa berdad bíblico i a bai di acuerdo pa studia Bijbel. Awor e esposo ta conducí un studio di Bijbel cu su famia. I ki un goso e tabatin n’e Congreso di Districto “Siñansa Divino” aña pasá! Su esposa i yu muhé tabata presente i a mir’é bautisá.

Imigrantenan Ta Tende e Cantica Nobo

Miles di imigrante haitiano ta mesclando den e sociedad di Bahámas. Nan tambe mester tende e cantica nobo di berdad di Reino. E Testigonan cu ta biba na Bahámas ta gradicidu cu dos pareha haitiano-mericano a bini. E individuonan aki a yuda fortalecé e gruponan haitiano recien formá rib’e islanan di Gran Bahama i Abaco.

Como mas yudansa p’e haitianonan interesá den e mensahe di Reino, e promé congreso di districto na patuá cu a yega di ser tené na Bahámas a tuma lugá for di 31 di juli pa 1 di augustus, 1993. E asistencia a alcansá 214, i tres persona recientemente dedicá a ser bautisá. Hopi haitiano cu a siña e berdad na Bahámas a bolbe despues na nan pais natal of a bai establecé nan mes otro caminda pa agregá nan bos na esnan dje Testigonan local den canta alabansa na Jehova.

[Kuadro na página 8]

DETAYENAN PROFIL DJE PAIS

Aña di Sirbishi di 1993a

MAXIMO CANTIDAD DI PUBLICADOR: 1.294

PROMEDIO: 1 Testigo pa 197

ASISTENCIA NA MEMORIAL: 3.794

PROMEDIO DI PUBLICADOR PIONERO: 186

PROMEDIO DI STUDIO DI BIJBEL: 1.715

CANTIDAD BAUTISA: 79

CANTIDAD DI CONGREGACION: 22

OFICINA DI SUCURSAL: NASSAU

[Nota]

[Caption on page 9]

E promé Salon di Reino, cu e oficina di sucursal i cas di misionero

[Caption on page 9]

E Testigonan celosamente ta declará e bon nobo

[Caption on page 9]

Milton G. Henschel i Nathan H. Knorr cu misioneronan den Nassau rond di 45 aña pasá

[Caption on page 9]

E oficina di sucursal nobo, dedicá dia 8 di februari, 1992