Mas Precioso Cu Coral

Un cantidad aumentante di bishitante a maraviyá riba exhibicionnan manera esaki den e awanan di Laman Corá.

E cantidad incontabel di piscá den un arco-iris di coló i tinta ta fasiná esnan cu ta snorkel den e awanan cla. Pero ripará cu rond dje piscánan yen di coló cu bo ta mira aki, tin un exhibicion masha atractivo di otro maraviyanan bou di awa, incluyendo coralnan di coló briyante.

E coralnan bunita ta ser hañá den hopi forma i coló. Manera bo por imaginá, asta den tempu antiguo pidanan masha precioso di coral tabatin un balor haltu. For di nan artesanonan a forma adornonan encantador, i escritornan di Bijbel a mencioná coral huntu cu oro, plata i rubí. (Proverbio 3:​14, 15; Ezekiel 27:16) Pero e escritornan ei ta yuda nos mira mas ayá cu e bunitesa i balor di coral mes.

Nan a resaltá cu algun cos ta asta mas balioso i cu nos mester atesorá nan mas altamente. Un esposa bon i capas ta un di nan, pasobra nos ta lesa: “Un esposa capas, ken por hañ’é? Su balor ta muchu mas cu di coral.” (Proverbio 31:10) Bo ta un homber casá? Wak e coralnan exkisito aki atrobe, i puntra bo mes si bo ta balorando bo casá manera e ta merecé.

Sea nos ta hende homber of muher, casá of soltero, un bistaso di coralnan espléndido mester yuda nos apreciá e balor asta mas grandi di sabiduria piadoso, dicernimentu i conocimentu. E Palabra di Dios ta bisa: “Felis ta e homber cu a haña sabiduria, i e homber cu ta haña dicernimentu, pasobra teniendo como ganashi ta mihó cu tene plata como ganashi i teniendo como producto [mihó] cu oro mes. E ta mas precioso cu coral, i tur bo otro deleitenan no por ser igualá cuné.”​—⁠Proverbio 3:​13-15; 8:⁠11.

Pues sea bo ta mira nan dor cu bo mes ta snorkel of via potret, e coralnan di Laman Corá mester transmití na nos tantu bunitesa i material pa meditacion probechoso.