Pregunta Di Lector

Ora e soldánan di Saul a come carni huntu cu e sanger, pakico nan no a wordu ehecutá, siendo cu esei tabata e castigu describí den e Ley di Dios?

E hombernan aki a violá e ley di Dios en cuanto sanger, pero kisas nan a ser mustrá misericordia pasobra nan tabatin respet pa sanger, maske nan mester tabata mas diligente den mustra tal respet.

Considerá e situacion. E israelitanan bou di Rey Saul i su yu Jonatan tabata den guera cu e filisteonan. Na un dado momento punto ora “e hombernan di Israel mes tabata severamente pertá” den bataya, Saul imprudentemente a haci un huramentu cu su hombernan no mag come te ora e enemigu a ser derotá. (1 Samuel 14:24) Pronto su huramentu a crea un problema.

Su hombernan tabata ganando un bataya duru-bringá, pero e esfuerso vigoroso tabata exigiendo su prijs. Nan tabata hambrá i agotá. Kico nan a haci den e situacion extremo ei? “E pueblo a cuminsá lansa su mes golosmente rib’e botin i a tuma carné i baca i bisé i a mata nan rib’e tera, i e pueblo a entregá na come huntu cu e sanger.”​—⁠1 Samuel 14:⁠32.

Esei tabata na violacion dje ley di Dios en cuanto sanger, manera algun dje hendenan di Saul a cont’é, bisando: “Mira! E pueblo ta pecando contra Jehova dor di come huntu cu e sanger.” (1 Samuel 14:33) Sí, e Ley a bisa cu ora a mata bestia, mester a lagu’e sangra promé cu come e carni. Dios no a exigí pa tuma medidanan fanático pa laga e carni sangra. Dor di dal paso razonabel pa laga e carni sangra, su sirbidornan por a manifestá respet p’e nificacion di sanger. (Deuteronomio 12:​15, 16, 21-25) Por a usa sanger di bestia den sacrificio riba altar, pero e no tabata pa come. Violacion deliberá tabata castigabel cu morto, pasobra e pueblo di Dios a ser bisá: “Boso no mag come sanger di ningun clase di carni, pasobra e alma di tur sorto di carni ta su sanger. Cualkier un cu com’é lo ser cortá afó.”​—⁠Levítico 17:​10-14.

E soldánan di Rey Saul tabata kibrando e Ley deliberadamente? Nan tabata mustrando falta di respet absoluto p’e ley divino en cuanto sanger?​—⁠Compará cu Número 15:⁠30.

Nos no tin nodi concluí esei. E registro ta bisa cu nan tabata ‘matando e bestianan rib’e tera i comiendo huntu cu e sanger.’ Pues kisas nan tabata haciendo algun esfuerso pa drama e sanger. (Deuteronomio 15:23) Pero, den nan estado agotá i hambrá nan no a cologá e cadavernan morto i permití nan suficiente tempu p’e carni sangra normalmente. Nan a mata e carnénan i bacanan “rib’e tera,” cua lo por a tarda e sangramentu. I nan a corta carni lihé for dje cadavernan cu kisas tabata drumí den sanger. P’esei, asta si nan tabatin na mente obedencia n’e ley di Dios, nan no a actua conforme cu esei den un manera apropiado ni na un grado adecuá.

E resultado tabata cu “e pueblo a entregá na come huntu cu e sanger,” locual tabata un picá. Saul a reconocé esaki i a ordená pa lora un piedra grandi p’e. El a manda e soldánan: “Trece cerca mi, cada un di boso, su toro i, cada un, su carné, i boso tin cu mata den e lugá aki i come, i boso no mester peca contra Jehova dor di come huntu cu e sanger.” (1 Samuel 14:​33, 34) E soldánan culpabel a obedecé, i “Saul a pasa na edificá un altar na Jehova.”​—⁠1 Samuel 14:⁠35.

Matamentu di bestia rib’e piedra probablemente a soru p’e carni sangra adecuadamente. Nan lo a come e carni leu for di caminda e matamentu a tuma lugá. Kisas Saul a usa un poco dje sanger dramá rib’e altar den buscamentu dje misericordia di Dios pa cu esnan cu a peca. Jehova a extendé misericordia, aparentemente pasobra e tabata sa ki intentonan e soldánan a haci maske nan tabata masha cansá i hambrá. Tambe Dios kisas a tene cuenta cu e huramentu imprudente di Saul a perta su hombernan den tal situacion desesperá.

E relato aki ta mustra cu un situacion di emergencia no ta excuus pa falta cu ley divino. Tambe e mester yuda nos mira e necesidad pa pensamentu cuidadoso promé cu haci un huramentu, pasobra un voto imprudente por causa problema pa nos personalmente i pa otronan.​—⁠Eclesiastés 5:​4-6.