Nan buscamento pe religion berdadero

DESDE nan hubentud, algun hende a busca contesta satisfactorio pa nan pregunta tocante bida. Tal bez, ora nan tabata hoven, nan a bai misa. Pero, hopi di nan a haya cu ni e contesta duná ni e ceremonia religioso realmente a yúdanan enfrenta problema di bida.

Tal bez nan ta bisa cu nan ta sigi e religion di nan mayornan ainda, aunque nan casi nunca ta bai misa. Segun e obispo dje religion anglicano, e poco fe cu nan tin, ta tene poco efecto riba nan bida. Nan ta hala religion un banda. Otro hende, disgustá cu e hipocresía cu nan ta mira den círculo religioso, ta rechaza religion completamente. Sin embargo, nan pregunta tocante bida ta persisti.

Pakico algun hende tin duda serio

Casi tur hende sa cu hopi religion tin agencia pa yuda hende desampará, pa parti cuminda pa hende den necesidad, i pa respalda actividad cultural. Pero, casi tur dia nan també ta tende informe di noticia tocante violencia i dramamento di sanger cu raíz den religion no solamente di hende no cristian sino també di hende cu ta yama nan mes cristian. E mester sorprendénos si nan ta duda cu grupo enbolbí den tal violencia ta practica e religion berdadero?

Hopi hende cu a lanta den un religion tabata kere cu casa cuna di organizacion religioso tabata algo bon. Sin embargo, den tempo reciente nan ta keda scandalizá ora pastor den un lugar tras di otro ta keda acusá di a haci abuso sexual di muchanan bao di nan cuido. Na principio hende a kere cu un poco pastor so tabata culpable. Awor algun hende ta puntra si e religion mes tin falta fundamental.

Algun hende, tal como Eugenia, na antes tabata enbolbí profundamente den nan religion. Como un hoven den Argentina, e tabata hunto cu esnan cu a haci peregrinahe pa adora e Birgen di Itatí. El a biba pa 14 aña den un conbento como soeur. Anto el a bandoné pa bira parti di un grupo internacional religiopolítico cu a boga pa cambio radical inmediato di estructura social i económico dje arreglo social usando medio revolucionario. Como resultado di loke el a mira i a experimenta, el a perde fe i confianza den Dios. E realmente no tabata busca un religion cu e por kere. Loke el a deseá tabata un camina pa ehecuta husticia pa hende cu ta pober​—⁠sí, i amigo cu e por confia.

Otro hende ta mira loke ta pasa den religion pero ta keda leu for di misa. Un hende ateísta cu tin opinion cu tabata publicá na 1991 den e revista Sputnik a bisa francamente: “Mi no por mira ningun diferencia fundamental entre atributo di leyenda pagano i leyenda cristian.” Dunando ehempel, el a mencioná un procesion den locual pastor den mantel bordá cu oro a pasa poco poco hibando un caha di morto cu cadáver balsamá den dje door di caya di Moscú. Esei tabata cadáver di “un santo cristian dje religion católico griego” cu nan a hiba for di museo pa misa, i a haci e autor corda pastor i cadáver balsamá di Egipto di antigua. El a corda, també, cu aunque hende cu a pasa den e procesion den Moscú a kere den “e trinidad cristian,” egipcio també a adora un trinidad di dios​—⁠Osiris, Isis, i Horus.

E mesun autor a menciona e concepto cristian di amor​—⁠“Dios ta amor,” i “stima bo próhimo”​—⁠locual no tin nada igual cuné den Egipto pagano. Pero, el a bisa: “Amor fraternal no a vence mundo, ni sikiera den e parti di dje cu ta yama su mes e mundo cristian.” I el a concluí esei cu comentario tocante e mal fruta dje insistencia religioso di ser enbolbí den asunto di gobierno. Loke el a mira no a conmové pa kere cu religion di cristiandad ta ofrece loke e tabata busca.

En contraste, otro hende a haya contesta satisfactorio pero no den religion di cristiandad.

El a siña e berdad tocante hende morto

Magdalena, cu awor tin 37 aña di edad, ta biba den Bulgaria. Despues cu su suegro a muri na 1991, el a keda mashá desconsolá. Bez tras bez el a puntra su mes, ‘Unda hende morto ta bai? Unda ta mi suegro?’ El a bai misa, i a haci oracion dilanti imagen na cas, pero e no a haya contesta.

Anto un dia un beciña a yama na telefón pa invité na su cas. Un hoven cu tabata studia cu Testigo di Jehova tabata bishitá e beciña. Magdalena a scucha e hoven papia tocante e Reino di Dios i Su propósito pa haci e tera un paradijs unda hende por biba pa semper den felicidad. Riba mesa tabata e buki Bo por biba pa semper den Paradijs riba tera. Usando esei e hoven a hala su atencion ne texto bíblico di Eclesiastés 9:​5, cu ta bisa: “En cuanto hende morto, nan no ta consiente di nada mes.” E anochi ei, Magdalena a leza mas. El a siña cu hende morto no ta pasa na un otro bida den cielo of fiernu; nan no ta consiente di nada, como si fuera den un soño profundo. Cu gusto el a acepta e invitacion pa asisti na un reunion dje congregacion local di Testigo di Jehova. Despues dje reunion el a acepta un estudio regular dje Bijbel. Ya cu el a mira den e reunion e manera cu oracion tabata ofrecí na Jehova Dios, e també a cuminza pidi yudanza di Jehova Dios pe vence debilidad bieu di curazón. Ora Jehova Dios a contesta su oracion, e tabata sa cu el a haya e religion berdadero.

Nan a descubri cu bida tin nificacion

André a lanta den un famía fuertemente católico den Bélgica i a sirbi como asistente dje pastor local. Pero, durante e tempo ei, el a mira cosnan cu a destrui su respet pe iglesia. Como resultado, e tabata católico di nomber so.

Pa 15 aña el a hunga futbol profesional. Na un ocasion ora su equipo a hunga den competencia cu Italia, nan tabata invitá pa un audiencia cu e papa. No tabatin nada spiritualmente edificante tocante tal bishita, i e riqueza mundano tur rond dje papa a molestiá André. Su duda tocante e iglesia a bira mas profundo. Su mes bida privá tabata infeliz debí na dos matrimonio kibrá. E situacion di mundo a confundié. Na 1989 el a skirbi den su diario: ‘Kico ta e nificacion di tur cos stúpido cu ta sosode rond di nos?’ E no a haya ningun contesta den su religion.

Na 1990, ora André tabata traha como entrenador di futbol den Islandia, Iiris, un misionera di Testigo di Jehova, a haci contacto cuné. El a acepta literatura i a invita e misionera pa bolbe. El a bolbe cu su esposo, Kjell. Ora nan finalmente por a sinta i papia cu André, a keda claro cu e tabata profundamente interesá den comprendimento di Bijbel. Su esposa, Ásta, també tabata interesá. Durante merdia, e tabatin tres ora liber entre sesion di entrenamento, i nan a decidi di usa e tempo pa un estudio bíblico. El a bisa: “Mi ta sintími mas refrescá via estudio di Bijbel cu solamente descansando.” Gradualmente e Bijbel a contestá nan preguntanan. Poco poco nan fe den Jehova i den su Reino a aumenta. E promesa bíblico glorioso di un mundo nobo di paz, un mundo liber di “tur cos stúpido cu ta sosode rond di nos,” a bira un realidad pa nan. Awor tanto André como Ásta ta comparti nan fe recién nací cu otro hende.

Magdalena, André, i Ásta tin e confianza di cu nan finalmente a haya e religion berdadero. Eugenia també, despues di a purba di resolve problema di mundo usando medio político, eventualmente a haya den Testigo di Jehova e religion cu a parce na dje e religion berdadero. Pero, kico realmente ta determiná si un religion ta esun berdadero? Haci fabor di mira e sigiente informacion.

[Caption on page 7]

Un estudio di Bijbel regularmente cu Testigo di Jehova ta yuda mas cu cinco miyón hende den nan buscamento pa contesta satisfactorio