Nan A Pone Ehempel Pa Nos

SEGUN CU CRAIG ZANKER A CONTÉ

Pa ocho aña mi esposa, Gayle, i mi ta pionero, evangelizador di tempo completo di Testigo di Jehova. Pe último seis aña, nos ta sirbi den e poblacion aboriginal dje interior di Australia. Nos simplemente ta sigi ehempel excelente cu mi mayornan i abuelonan a pone pa nos.

LAGÁMI conta boso specialmente tocante mi abuelonan. Nos semper a yámanan pe nomber di cariño Opa i Oma, locual na holandés ta igual cu padushi i madushi. Mi padushi, Charles Harris, ta sirbi celosamente ainda den Melbourne, unda el a biba pa casi 50 aña.

Siñando e berdad bíblico

Opa a nace den un pueblecito den Tasmania, un isla cu ta un estado di Australia. Na 1924, ora el a haci 14 aña di edad, su tata a cumpra un baúl marinero na findishi. El a resulta di ser un berdadero baúl yen di tesoro, den un sentido spiritual, pasobra el a contene cantidad di buki cu Charles Taze Russell, e promé presidente dje Sociedad Watch Tower Bible and Tract, a skirbi.

Aparentemente, e tata di Opa no tabata specialmente interesá den tal buki, pero Opa a cuminza lézanan i a reconoce un bez cu nan a contene berdad bíblico vital. P’sei el a cuminza busca Studiante Internacional di Bijbel, representante di publicador dje bukinan cu awor ta yamá Testigo di Jehova. E kier a papia cu nan pe por haya mas splicacion dje berdad bíblico cu e tabata siña.

Despues di hopi investigacion el a contra cu tres señora di edad cu tabata activo den e siñamento di otro hende. Nan a haci un impacto tremendo riba e hoven Charles. Despues, na 1930, el a haci un dedicacion na Jehova Dios i a bautiza bao di awa. El a retira for di su trabao como carnicero i a bai nort na Sydney, unda el a recibi un asignacion como un evangelizador di tempo completo.

Trahando como pionero den Australia

Durante e sigiente añanan, e territorio unda cu Charles a predica a inclui Bondi, na oriya di Sydney cant’i lamá i també den campo dje estado di New South Wales. Anto e tabata asigná na Perth, Western Australia, miles di miya distancia na otro banda dje continente. Pa seis luna el a duna testimonio den e territorio dje centro comercial di Perth, anto, hunto cu dos otro pionero, e tabata asigná na territorio grandi di poco poblacion den nortwest di Australia.

E territorio unda nan tres tabata asigná​—⁠Arthur Willis, George Rollsten, i Charles​—⁠tabata un territorio cuater bez mas grandi cu Italia! Tabatin poco poblacion, e campo tabata desierto, i e calor tabata intenso. Tabatin bez cu tabata necesario pa biahá mas cu 500 km di un rancho pa otro, yamá stacion di bestia. Auto cu nan a usa tabata bieu i gastá, asta pe tempo dje depresion económico di 1930, pero nan tabatin un fe fuerte i hopi determinacion.

Camina smal di santo yen di burracu tabatin laster di camel, i de bez en cuando stof fini (yamá bulldust) a tapa troncón peligroso di palu. No ta straño cu veer di auto a kibra hopi bez. As patrás a kibra na dos ocasion, i hopi bez tire a wordu cortá. Hopi bez e pioneronan a usa tire bieu como furamento, usando bout pa ténenan den tire riba e auto pa nan sigi nan camina.

Ora mi tabata mucha, mi a puntra Opa kico a animánan pa nan perseverá den situacion dificultoso asina. El a splica cu den desierto leu for di hende tabatin un intimidad cu Jehova. El a bisa cu tabatin tempo cu loke tabata un dificultad física, a bira un bendicion spiritual.

Sin ningun indicacion di superioridad of orguyo, Opa a expresa asombro riba tanto hende cu ta parce demasiado preocupá cu acumulacion di cosnan material. El a dunámi e recordatorio, “Ta hopi mas mihor pa pasa bo bida cu asina poco posesion posibel. Si Jesús a keda dispuesto pa drumi den aire liber ora tabata necesario, anto nos mester keda contentu pa haci mescos si nos asignacion ta exigi esei.” (Mateo 8:​19, 20) I, realmente, e i su compañénan a haci esei.

Invita na territorio den stranhería

Na 1935, Opa a recibi un asignacion nobo pa predica den dje​—⁠pa duna testimonio na hende di isla di Surpacífico. Cu un tripulacion di seis otronan, el a nabega riba Lightbearer, e barcu di bela dje Sociedad Watch Tower di 16 meter largu.

Un biaha, riba Lamá Coral panort di Australia, e motor auxiliar di Lightbearer a daña. No tabatin ningun bientu mes, p’sei nan a keda pará hopi kilometer for di tera. Aunque tabatin peliger di naufraga riba e rif Great Barrier Reef, Opa a keda impresioná cu e trankilidad exquisito. “Lamá tabata manera tanki,” el a skirbi den su diario. “Nunca mi por lubida drentamento di solo tur atardi riba lamá calmo. E bista tabata asina bonita cu e ta keda semper grabá den mi memoria.”

Felizmente, promé cu e corriente a híbanan riba rif, e bientu a lanta, i nan a nabega cu bela pa Porto Moresby, Papua Nueva Guinea, unda nan a drecha e motor. For di Porto Moresby nan a nabega pa Thursday Island anto a sigi te na Java, un isla grandi di Indonesia. Opa a desaroya un amor profundo pa Indonesia cu el a yama un “collar di perla dornando e ecuador.” Ne tempo ei, Indonesia tabata un colonia holandés, pues padushi a siña holandés i també indonés. Pero, e literatura cu el a ofrece den su evangelizacion tabata na cinco idioma: holandés, indonés, chinés, inglés, i arabir.

Opa a goza bon éxito den partimento di literatura bíblica. Un biaha Clem Deschamp, cu tabata responsabel pe depósito di Watch Tower den Batavia (yamá awor Djakarta), tabata yamá dilanti dje oficial holandés cu tabata vigila cuidadosamente nos trabao di predica. E oficial a puntré, “Cuanto hende bo tin trahando ei den Oost Java?”

Ruman Deschamp a contestá, “Un so.”

E oficial a grita, “Bo ta spera pa mi kere esei? Mester tin un ehército di trahador ei, segun e cantidad di boso literatura cu ta ser plamá na tur parti!”

Opa ta kere cu esei tabata un encomendacion di mas satisfactorio di su bida. Pero, siguramente el a merece esei, siendo cu no tabata extraordinario pe laga entre 1.500 i 3.000 buki tur luna.

Casamento, prohibicion, i gera

Na December di 1938, Opa a casa cu un bruid hoven indonés yamá Wilhelmina, cu a bira mi abuela. Oma, of madushi, tabata bondadoso, manso, balente, i cu boz suave. Mi sa, pasobra durante mi hubentud e tabata mi amiga di mas íntimo.

Despues di nan casamento Opa i Oma a sigi traha como pionero hunto. Ne tempo ei otro miembro dje tripulacion di Lightbearer a plama na otro parti di mundo of a bai cas. Pero Opa a haci Indonesia su cas, i el a keda determiná di permanece.

Mientras cu Gera Mundial II a yega cerca, e gobierno holandés gobernando Indonesia, a entrega na presion dje clero, a cuminza pone restriccion riba e actividad di Testigo di Jehova, i despues a prohibi nos trabao. Pues, e predicacion tabata hací cu dificultad, usando e Bijbel so. Den casi tur pueblo cu Opa i Oma a bishita, nan tabata hibá dilanti oficial i interrogá. Nan tabata tratá manera criminal. No mucho tempo despues cu e prohibicion a yega, e suá di Oma tabata encarcelá pa su posicion di neutralidad cristian. El a muri den prisón holandés.

Opa i Oma a biba den un truck cu eskeleto di caravana trahá riba dje. Usando tal cas riba wiel, nan a predica den tur parti di Java. Na 1940, ora tabatin e peliger di invasion haponés militar, nan tabata bendicioná cu un yiu muher, cu a bira mi mama. Nan a yama e yiu Victoria, e título di un discurso cu J. F. Rutherford cu tabata presidente dje Sociedad Watch Tower Bible and Tract ne tempo ei, a duna dos aña promé. Nan a sigi como pionero continuamente durante e tempo di nacimento dje yiu.

Na principio di 1942, Opa, Oma, i Victoria tabata na bordo di un bapor di carga holandés bolbiendo for di Borneo ora nan a tende un tiro duro di scopet di barcu di gera haponés. Tur luz a paga, i hende a grita. Asina e gera a drenta den e bida di mi famía. Aunque nan a yega sano i salbo ne haf, haponés a invadi Java solamente un poco dia despues, i un oficial holandés a informa soldad haponés dje sitio di Opa i Oma.

Ora e hapones a háyanan, nan a kita tur posesion cu nan tabatin, asta incluyendo huguete di Victoriacita, i a híbanan na dos diferente concentrasicamp. Nan a permiti Victoria keda cu Oma, i Opa no a míranan pa tres aña i mei.

Bida den concentrasicamp

Durante su encarcelacion, nan a hiba Opa di stad pa stad​—⁠di Surabaja pa Ngawi, pa Bandung, i finalmente pa Tjimahi. Tal cambio constantemente tabata pa stroba cualkier esfuerzo di plan organizá pa scapamento. Prisionero tabata principalmente holandés, cu algun inglés i australiano. Den e campamento, Opa a siña e ofishi di barbero, un ofishi cu e ta practica de bez en cuando ainda. E único buki religioso cu nan a permiti den su poder tabata e Bijbel​—⁠su King James Version.

Mientras tanto, Oma i Victoria també tabata hibá di campamento pa campamento. Den campamento asina e comandante dje campamento a exigi pa hende muher sirbi pafó den “sirbishi social.” Pero, pa un motibo nan nunca a scoge Oma. Despues Oma a haya sa cu tal muher tabata hibá pa sirbi como prostituta pa soldad haponés.

Siendo cu soldad haponés no a gusta yiu muher, Oma semper a tene Victoria bistí como yiu homber i a corta su cabei cortico. E nomber Victoria a causa dificultad grandi ora e comandante dje campamento a puntra tocante e nificacion dje nomber​—⁠Victoria pe ehército imperial di Hapón of Victoria pa americano?

Mi abuela a contestá cu orguyo, “Victoria pe Reino di Dios riba tur gobierno di mundo!”

Como castigo pasobra el a nenga di bisa, “Victoria pe ehército imperial di Hapón,” Oma i su yiu muher di cinco aña di edad a keda obligá di para stret i stijf pa ocho ora kimando den e solo tropical cayente, sin sombra, sin awa, sin sinta, sin sag padilanti. Pero, cu e yudanza di Jehova Dios nan a sobrebiba e experencia terribel.

Un aña so despues dje encarcelacion di Oma, e comandante dje campamento a bisé cu su casá a muri! Cu tristeza el a pone e portret di Opa na bom di su valís gastá i a sigi cu su bida, apesar di su desconsuelo.

Bida den e concentrasicamp tabata duro. Cuminda diario pa cada persona a consisti di un copi di tapioca pa desayuno, 190 gram di pan trahá di sago merdia, i atardi un copi di arroz herbí den sopi di berdura casi awa so. Pa motibo di asina poco cuminda, malnutricion tabata común, i víctima di diarea a muri tur dia.

Durante e encarcelacion di Opa, el a sufri di pelagra i edema nutricional (murimento di hamber). Oma també casi a muri, siendo cu hopi bez el a duna su cuminda na Victoria pe mucha no muri di hamber. Semper tabatin crueldad i hamber. Nan por a sobrebiba solamente door di keda pegá cu nan Dios, Jehova.

Mi ta corda bon un palabra favorito di Opa: “Libertad ta resulta di armonía cu e Divino, Jehova.” Pues, Opa a considera su mes liber den un sentido berdadero asta durante cu el a wanta encarcelacion severo. E amor cu e i Oma tabatin pa Jehova Dios siguramente a yúdanan ‘wanta tur cos.’ (1 Corintio 13:⁠7) Tal relacion íntimo cu Dios ta loke Gayle cu mi ta purba di mantene.

Libertad i un reunimento notable

Finalmente, Gera Mundial II a termina na 1945. Un poco despues dje entréga di Hapón, nan tabata hiba Opa den un trein. Riba camina di Djakarta pa Bandung, soldad indonés a para e trein. Aunque e gera cu Hapón a termina, indonés tabata bringa pa haya independencia for di Holanda. Opa a haya asina un sorpresa ora di ripiente nan a kité for dje trein cu el a lubida di papia inglés i en bez di inglés a papia holandés. Pa indonés, holandés tabata idioma dje enemigo, i enemigo tabatin cu ser matá.

Afortunadamente, ora soldad tabata rista Opa, nan a haya su rijbewijs di Australia, locual el a lubida totalmente. Felizmente, indonés no tabata den gera cu Australia. Te ne dia djawe, Opa ta considera e hayamento di su rijbewijs cu a duna prueba cu e tabata ciudadano di Australia como scapamento divino, pasobra ne mesun stacion di trein solamente un poco tempo despues, e mesun soldadnan a mata 12 holandés cu tabata pasando riba trein.

Un poco despues dje incidente, Oma i Victoria tabata spera transportacion for di region destruí pa gera. Mientras cu nan tabata sinta cant’i camina, un procesion sin fin di truck hibando soldad i hende civil a pasa. Di ripiente, pa ningun motibo conocí, e procesion a para. Pa casualidad Oma a tira un bista den e parti patrás habrí dje truck mas cerca, i ei, pa su sorpresa, a sinta un homber flaquísimo cu el a reconoce mesora. Esei tabata su casá! Palabra no por splica e emocion di nan reunimento.

Den Australia di nobo

Ora padushi a bolbe cu su famía na Australia na 1946, despues di a biba den Indonesia pa 11 aña, bida pa nan no tabata fácil. Nan a bolbe como refugiado di gera​—⁠bashí, sufriendo di hamber, i bao di sospecho di hopi hende local. Oma i Victoria tabatin cu sufri di prehuicio racial contra imigrante di Asia. Opa tabatin cu traha duro pa oranan largu pa zorg pa su famía i percura cas pa nan. Apesar di tal dificultad, nan a perseverá i a sobrebiba cu nan spiritualidad fuerte.

Awor, mas cu 48 aña despues, Opa ta biba den Melbourne, unda e ta participa den e ministerio di cas pa cas ainda. El a mira Victoria i su yiunan acepta e berdad, dedica nan bida na Jehova, i cada un, den nan turno, drenta den e sirbishi di tempo completo como pionero.

Desmond Zanker, cu a bira mi tata, i Victoria tabata bautizá un poco despues di 1950, i Desmond a bira miembro dje famía di Betel di Australia na 1958. Despues cu el a casa cu Victoria, cu tabata sirbi como un pionero special, nan a traha como pionero pa un tempo, anto tabata invitá pa bira superintendente biahero. Anto mi a nace, i nan tabatin cu bandona e superintendencia biahero pa criámi. Pero, despues di 27 aña, papa ta pionero ainda.

Na principio di 1990, Oma a muri trankilamente na cas, den e mesun cas unda el a cria mi mama. Ami també tabata criá den e mesun cas den Melbourne, i també mi ruman homber i muher menor. Tabata un berdadero bendicion pa nos famía biba hunto den e mesun cas. Tabatin bez cu e tabata pretá, pero mi no ta corda cu esei nunca a preocupános. Asta durante e promé cuater aña di nos bida matrimonial, mi esposa, Gayle, por a bira miembro di nos famía també i a gusté. Ora finalmente nos a bai na nos asignacion nobo, mi a yora. Mi a recibi tanto apoyo i amor den e cas ei.

Sin embargo, awor Gayle cu mi tin motibo abundante pa ser gozoso, pasobra nos por haci loke mi mayornan i nan mayornan a haci promé cu nan. Ora nos a bandona nos famía, nos a haya consuelo den nos motibo pe hacimento di esei, locual ta e hacimento dje boluntad di Jehova Dios den e sirbishi di tempo completo. Nos ta haci hopi esfuerzo pa sigi ehempel excelente di nos famía fiel, cu també a haya consuelo similar ora nan tabata traha den asignacion dificultoso, den pobreza extremo, i asta ora nan tabata prisionero pa hopi aña den concentrasicamp haponés.​—⁠2 Corintio 1:​3, 4.

Opa semper a haya consuelo den e palabra inspirá di rey David dirigí na Jehova Dios: “Bo bondad amoroso ta mihor cu bida.” (Salmo 63:⁠3) Semper tabata e deseo intenso di padushi pa disfruta di tal bondad amoroso pa eternidad. E deseo di henter su famía ta di participa den esei cuné.

[Caption on page 21]

Oma i Opa Harris

[Caption on page 23]

Craig Zanker (patrás) cu su esposa, mayornan, i rumanan menor