Celebracion di Cumpleaño A Laga un Rastro di Morto
E CELEBRACION di cumpleaño ta ser considerá dor di mayoria hende awe como simplemente un custumber inocente. Pero Bijbel no ta describí e tradicion aki den un manera positivo. Entre otro, e Scritura no ta duna indicacion cu ningun fiel sirbidor di Dios a celebrá cumpleaño.
E único dos cumpleañonan cu Bijbel ta mencioná tabata di gobernantenan cu tabata enemigu di Dios. Cada celebracion a incluí un ehecucion, di manera cu e huéspednan por a gosa riba e morto di un persona cu a desagradá e rey. Den e promé caso, Fárao, e rey di Egipto, a ehecutá su panadero principal. (Génesis 40:2, 3, 20, 22) E gobernante egipcio a haci esei durante e fiesta pasobra e tabata masha indigná cu su criá. Den e di dos caso, Herodes, e gobernante inmoral di Galilea, a kita cabes di Juan Bautista como un fabor na un mucha muher kende su bailamentu n’e fiesta a agrad’é. Ki esenanan repugnante!—Mateo 14:6-11.
Pero Bijbel no a enfocá riba dos cumpleaño masha excepcional? No realmente. E historiador hudiu di antiguo, Josefo, ta revelá cu e incidentenan aki no tabata único. E ta registrá otro casonan dje práctica di ehecucion riba dia di cumpleaño como entretenimentu.
Por ehempel, algun a tuma lugá despues dje destruccion di Jerusalem na aña 70 E.C., ora 1.000.000 hudiu a perecé i 97.000 a sobrebibí pa ser hibá prisonero. Riba ruta pa Roma, e general romano Tito a hiba su prisoneronan hudiu n’e haf cercano di Cesarea.
Josefo ta skirbi: “Miéntras Tito a permanecé na Cesarea, el a celebrá cumpleaño di su ruman homber Domitio cu gran splendor, ehecutando mas cu 2.500 prisonero den weganan cu bestia i candela flam. Despues di esaki el a muda pa Berytus [Beirut], un colonia romano na Fenecia, unda el a celebrá e cumpleaño di su tata matando hopi mas prisonero na exhibicionnan extenso.”—The Jewish War, VII, 37, traducí dor di Paul L. Maier den Josephus: The Essential Writings.[1]
Nada straño cu The Imperial Bible-Dictionary ta comentá: “E hendenan hebreo di mas despues a considerá e celebracion di cumpleaño como parti di adoracion di ídolo, un opinion cu lo a ser confirmá ampliamente pa loke nan a mira dje custumbernan comun asociá cu e dianan aki.”
Fiel cristiannan di promé siglo lo no tabata incliná pa participá den un custumber presentá asina desfaborablemente den Bijbel i celebrá asina horiblemente dor dje romanonan. Awe, cristiannan sincero ta realisá cu e relatonan bíblico tocante cumpleaño tabata entre e cosnan skirbí pa nan instruccion. (Romano 15:4) Nan ta evitá celebracion di cumpleaño pasobra e custumbernan ei ta duna indebido importancia n’e individuo. Mas importante, Jehova su sirbidornan sabiamente ta tuma na cuenta e presentacion desfaborabel di cumpleañonan den Bijbel.
[Caption on page 25]
Arena na Cesarea