Yudando Nos Famia Di Creyentenan Na Bosnia

TESTIGONAN DI JEHOVA no ta tuma parti den conflictonan político. (Juan 17:16) Sin embargo, siguiendo Pablo su conseho pa haci bon “specialmente na nos famia di creyentenan,” nan ta cla pa duna yudansa na nan compañénan cristian den áreanan azotá dor di guera. (Galatio 6:​10, Beck) Segun cu e winter di 1993-94 tabata yega cerca, Testigonan di Austria i Croatia a risca nan bida pa yuda nan famia di creyentenan na Bosnia. Lo siguiente ta nan informe.

For di mart pa october di 1993, no tabatin chens di manda cargamentu cu suministro di yudansa pa Bosnia. Sin embargo, na cuminsamentu di october, e autoridadnan a indicá cu lo por ta posibel pa transportá mercancia. Tog esaki lo tabata un intento peligroso, ya cu tabatin bataya pisá den tur zona di conflicto di Bosnia.

No obstante, djamars, 26 di october, 1993, nos truknan a sali for di Viena hibando 16 ton di cuminda i carbon pa compañénan cristian na Bosnia. Nos tabatin nos karchinan di identificacion di congreso di distrito bistí.

Ora nos a yega n’e frontera di Croatia i Bosnia, nos a ser escoltá pa un base militar unda nos truknan a ser listrá cuidadosamente. Nos peticion pa biaha dor di teritorio servio a ser rechasá. Pasamentu lo a ser permití solamente via centro di Bosnia​—⁠net dor dje zona di combate!

Esfuersonan Enbano?

Segun cu escoltanan militar a hiba nos for di un punto di control pa otro, nos a tende explosionnan durísimo for di tankinan di guera i arma di candela. Durante anochi, nos a core dor dje mondinan escoltá dor di dos tanki di guera i un jeep. Nos truknan a move lentamente dor dje zona di conflicto mes! Tur cos a bai bon te mainta ora bala a cuminsá skeiru riba nos cabes i nos mester a sconde tras di un ceru. Despues di un ratu e tiramentu a stop, i nos a sigui nos biahe.

Ora nos a yega na un campamentu, e comandante a puntra nos ken nos tabata i kico nos tabata kier. “Boso empeño ta destiná na fracaso,” el a bisa despues cu nos a splica nos propósito. “Boso no tin chens di sali bibu for dje campamentu, ni pa bai un par di meter. Tin asina tantu escases di cuminda den e pais cu hende lo atacá boso i horta boso mercancia.” El a insta nos pa bira i bai bek.

Nos esfuersonan tabata “destiná na fracaso”? Tabata enbano pa spera cu nos lo por a biaha dor di áreanan azotá pa guera i scarcedad di cuminda i tog preservá nos mercancia i nos bida? Nos tabatin cu tuma un decision serio. Nos a tende caba tirunan di arma di candela i explosion di bom durísimo. Segun cu nos a pasa anochi cu e soldatnan, nos por a mira cu nan tabata prepará p’e rigornan di bataya. Nan tabatin vest anti-bala bistí i tabata fuertemente armá. Asta e koki tabatin un metrayùr cargá riba su lomba. I ata nos aki, bistí cu camisa, dashi i karchi di identificacion! Tabata sabí pa nos sigui?

Yegada na Travnik

A parce cu nos único speransa tabata pa negoshá cu e di tres partido den e guera aki. E siguiente mainta nos a puntra un señora hóben si e tabata sa unda nos por a haña e sede caminda e partido tabata stacioná. “E no ta masha leu,” el a bisa. “Djis despues dje mondi boso lo haña un edificio cu un tempu tabata un hospital.” Nos tabata ansioso pa bai. E soldatnan a keda asombrá cu nos a risca bandoná e campamentu sin arma.

Loke tabata un hospital tabata den ruina, pero tabatin un oficial presente. El a bai di acuerdo pa yuda, consehando nos pa papia promé cu su comandante. El a hiba nos den su auto maltratá i a core cu velocidad haltu banda dje zona di combate. Nos a para na un edificio unda e comandante a ricibí nos den su cuarto scur.

“Ayera nochi nos kier a cuminsá tira riba boso,” el a bisa. “Kico boso kier?”

“Nos ta Testigonan di Jehova, i nos kier hiba mercancia di suministro di yudansa pa nos rumannan.”

E tabata basta sorprendí​—⁠i impresioná​—⁠siendo cu pa simannan largu ningun truk cu suministro di yudansa a risca drenta den Bosnia. Despues cu nos a ser listrá cuidadosamente, nos a haña un confirmacion por escrito. E anochi anterior nos a pensa cu nos lo no tabatin chens di sigui cu nos biahe, i awor nos por a sigui sin escolta!

Nos a core dor dje mondinan pasando di un punto di control pa otro, i algun biaha nos a core banda dje zonanan di combate. Apesar dje peliger, nos a yega sano i salbo na Travnik. Un soldat cu a tende di nos yegada a core bai na un cas unda nos rumannan a reuní. “Boso hendenan ta aki cu e truknan!” el a grita. Bo por imaginá nan goso. Nos a hiba cuminda den e cas, papia un par di palabra, pero mester a sigui unbes. Tabata birando scur, i un recorido peligroso di 32 kilometer tabata nos dilanti.

Riba Caminda pa Zenica

Un auto di escolta a guia nos dor dje mondinan na un velocidad haltu. Algun hende a bisa cu hamas nos lo yega Zenica, pero nos a yega sí. A parce cu un ambiente desalentador a baha riba e stad. No tabatin lus i no tabatin auto riba caya. Zenica a ser sitiá na tur banda, resultando den gran scarcedad di cuminda i desesperacion.

Segun cu nos a core riba caya, nos a mira un cos asombroso​—⁠dos ruman muher cristian dunando testimonio! Nos a haña sa cu e dia anterior na nan reunion, e rumannan a dicidí cu e ruman hombernan lo tabatin cu bai mondi pa busca cuminda, ya cu tur cos a caba. Nos a yega net na tempu! Nos a descargá un dje truknan cuat’or di mardugá, miéntras no tabatin ningun hende riba caya.

E siguiente dia nos a bishitá un general, kende tabata basta sorprendí cu a nos a logra yega Zenica. Awor nos a busca informacion riba con pa yega nos siguiente destinacion, Sarajevo.

“Ningun hende a risca bai ei cu truk pa lunanan largu,” e general a bisa. Finalmente el a duna nos permit pa biaha dor dje cerunan. “Pero mi ta bisa boso, e ta difícil,” el a spierta. “Mi no ta sigur cu boso truknan ta suficiente fuerte pa alcansá boso destinacion.”

E general no a exagerá. Ora nos tabata solamente 40 kilometer for di Sarajevo, nos tabatin cu haci un desviacion di 140 kilometer dor dje mondinan! Nunca nos lo lubidá e recorido for di Zenica via Sarajevo pa Jablanica cu a tuma tres dia i dos anochi, hopi biaha na un velocidad di solamente cincu kilometer pa ora. E “caya” tabata mas bien un caminda creá dor di pasamentu constante di vehículonan blindá. Nos a pasa riba baranca i den buracunan spantoso. Frecuentemente nos tabatin cu core sin lus, i na dos ocasion nos truknan casi a slip for di cerunan traicionero. Un truk militar cu tabata siguiendo nos grupo di truk a djis cende su lusnan pa un momento i nan a tira mesora riba dje. Tin biaha nos tabatin cu repará brugnan dañá i drecha tirenan.

Ora nos a yega n’e distrito parti pafó di Sarajevo, nos a pidi pa papia cu e general na mando. Miéntras nos tabata sperando, nos a mira un truk riba caya cargando dies cadaver i un sacu cu cabes; e soldatnan tabata negoshando e entrega dje cadavernan​—⁠un bista desagradabel en berdad, haciendo nos anhelá p’e dia ora guera lo caba.​—⁠Isaías 2:⁠4.

Pa 10:00 a.m., un di nos finalmente a haña un oportunidad pa papia cu e general i su oficialnan haltu den un kamber scur, lusá solamente dor di un bela.

“Ken boso ta?” e general a puntra.

“Nos ta Testigonan di Jehova. Nos kier hiba cuminda pa nos compañénan Testigo den Sarajevo.”

“Boso sa cu tin hopi Testigo di Jehova den Sarajevo?”

“Sí, ta p’esei nos ta aki.”

E ora ei e general a mencioná nomber di un Testigo. “Bo conoc’é?”

“Sí, e ta nos amigu.”

“E ta mi amigu tambe,” e general a bisa. “Nos a bai scol huntu. Desde cu el a bira un Testigo, mi ta apreci’é asta mas. El a haci hopi pa boso hendenan. Por fabor, conta nos mas tocante Testigonan di Jehova.”

Un discusion di un ora largu a sigui, despues di cua mas cu un dozijn di revista i foyeto a ser lagá. Despues di un di dos reunion, e general a bai di acuerdo pa haci areglo special pa asina e mercancia di suministro di yudansa por a ser entregá n’e rumannan sarajevo.

Esaki no tabata cualkier trabou. Rond di 30 persona, incluyendo algun no-Testigo, a carga pakinan cu a pisa rond di 27 kilo cada un. Nan a traha for di 8:00 p.m. te 5:00 a.m. riba dos anochi separá​—⁠un total di 18 ora. Un anciano a conta cu su bisiñanan tabata asina conmoví dor dje esfuersonan di yudansa cu nan a hinca rudia huntu cu e rumannan i a gradicí Jehova! Naturalmente, nan tambe a ricibí un tiki cuminda.

Imaginá e goso di nos rumannan ora nan a ricibí rond di 11.000 kilo di mercancia di yudansa! E situacion tabata di desesperacion. Localmente, un kilo di ariña a costa entre NAƒ540 pa NAƒ1.190. Un sacu di carbon a costa rond di NAƒ470 i un liter di gasoil a costa NAƒ36.

Tabata manera cos cu pa cada peliger cu nos a enfrentá na caminda, nos a ser recompensá awor. Tabata un deleite pa nos contemplá e goso di nos rumannan ora nan a ricibí e cargamentu di yudansa aki. E tabata un experencia cu nan​—⁠i nos​—⁠lo no lubidá nunca. Pero awor nos tabatin cu cuminsá pensa riba e desafio di regresá cas.

Regresando Cas

“Ki ruta nos ta coge pa bolbe bek?” nos a puntra e general.

“E mésun caminda cu boso a bini,” el a contestá.

Nos tabata agotá, sin muchu combustibel, i no tabatin tire di reserva. A cuminsá yobe, i nos no por a biaha dor di lodo. Nos a puntra e general si nos lo por a biaha pa sur.

“Tin batayanan pisá ei,” el a bisa. “Ni un raton por pasa bibu dor di dje.” Sin embargo, despues di un ratu, el a reconsiderá e asuntu. “Purb’é,” el a bisa. “Al fin i al cabo, boso a logra bin aki.”

Nos mester a laga un truk atras i distribuí su combustibel entre e otro tres truknan. Nos a sali meianochi i atrobe nos a core den e mondinan.[25]

Nos biahe di regreso no tabata sin problema. Nos a topa un truk di ehército drumí riba su banda, obstaculisando parcialmente un brug cu nos mester a crusa. Nos a mira cu si nos lo por a kita solamente un di su wielnan, lo tabatin suficiente espacio pa pasa.

Nos a haci e peticion na un soldat armá. “Nos por kita e wiel i pegu’é bek despues cu nos crusa e brug?”

“Si boso mishi cu e wiel, mi metrayùr lo haña cos di haci,” e soldat a contestá, apuntando su arma.

Nos a pensa cu kisas tabata mihó pa nos traha poco cofi i ofrecé e soldat un copi. Pa algun ora, nos a cont’é tocante e congresonan internacional di 1991, manera esun cu a ser tené na Zagreb. Despues di esei, su actitud a suavisá, i el a permití nos kita e wiel.

Na Jablanica un di nos a papia cu un comandante tocante e ruta cu nos kier a biaha. E no por a kere loke nos kier a haci. “Boso kier bai dor dje Vaye di Neretva?”

Tabata di comprendé cu e tabata preocupá. E bandanan di ceru dje Vaye di Neretva tabata ocupá dor di diferente ehército. Nan tabata tirando constantemente riba otro. Pa casi 16 kilometer, e caminda ta peligroso. “Ta asina cosnan ta,” e general a bisa, “i tog boso kier sigui?”

Despues di a evaluá e asuntu, e general a bisa cu nos lo por a bai​—⁠pero solamente si nos a ser compañá dor di oficialnan. Sin embargo, e oficialnan aki no tabata dispuesto pa bai cu nos! Finalmente, nos a pidi pa nan simplemente tuma contacto cu e otro banda i anunciá nos pasamentu. Nos lo crusa sin escolta e siguiente mainta.

Cu letter grandi, nos a pega sticker riba nos truknan como transportando yudansa humanitario. Despues di haci un oracion, nos a core drenta den e vaye. Nos a cumbiní cu si tirunan lo a cai, nos lo no a aumentá nos velocidad i lanta sospecho.

Nos a crusa e brug pa pasa n’e otro banda dje riu i a sigui dor dje siguiente vaye, pasando forbij di cadavernan di animal i truk i tankinan di guera destruí. Di ripiente nos a nota minanan di tera riba caya, haciendo imposibel pa nos pasa. Nos a pita e truk te ora dos soldat a lur for di tras di un baranca. “Ken boso ta? Kico boso kier?” nan a puntra.

Despues di a identificá nos mes, nos a puntra si nan lo por a habri e caya, i nan a bai di acuerdo. Finalmente, nos a yega n’e otro banda.

E soldatnan aya tabata masha asombrá pa mira nos. Nan a sali lentamente for di nan lugánan di sconde, acercando e truk cu nan armanan dirigí directamente riba nos. Nos a mustra nos papelnan di permit huntu cu nos plachinan di number di truk, cuanan nos a kita pa motibunan di siguridad ora nos tabata coriendo dor dje zona di guera.

“Ningun hende tabata sperando boso,” un soldat a bisa. “Con boso por a logra pasa?”

Contrali na nos peticion, ningun hende n’e puestonan militar aki a ser informá cu nos tabata biniendo! E oficial a continuá: “Nos a hala e gai di nos metrayùrnan, i nos tabata na punto di cuminsá tira.”

Nos a puntra pakico nan no a haci’é.

“Mi no tin idea,” e soldat a contestá. “Mi ta kere cu esei tabata boso destino. Pero ora nos a mira boso dor di nos ‘verrekijker,’ nos a mira e sticker ‘yudansa humanitario,’ i nos no tabata sa kico pa haci cu boso. Asina boso a yega sano i salbo.” Mas despues nos a ofrecé un oracion sincero di gratitud na Jehova pa su proteccion.

Aunke nan circunstancianan ta severo, e spiritu di nos rumannan di Bosnia ta inspirador. Nan ta compartí e cosnan material cu nan ta poseé i tambe hopi palabra di fe i animacion. Na Zenica, tin 40 Testigo activo, incluyendo 2 pionero special, 11 pionero auxiliar i 14 persona recientemente bautisá. E 65 Testigonan huntu cu 4 pionero auxiliar cu a sobra ainda den e stad di Sarajevo ta conduciendo 134 studio bíblico. E Testigonan ta dedicá un promedio di 20 ora pa luna papiando cu otronan tocante e bon nobo dje Reino di Dios.

Berdaderamente, Testigonan di Jehova ta forma un famia mundial di creyentenan. Nan ta risca nan bida boluntariamente pa haci bon na esnan relacioná cu nan den fe​—⁠asta esnan cu nan nunca a topa anteriormente. Pakico? Pasobra nan ta stima nan. Jesucristo a bisa: “Cu esaki tur hende lo sa cu boso ta mi disipelnan, si boso tin amor entre boso.” (Juan 13:35) Siguramente esaki tabata e caso cu nos famia di creyentenan na Bosnia.

[Caption on page 24]

Hibando yudansa pa Bosnia i Herzegovina

[Caption on page 24]

AUSTRIA

[Caption on page 24]

SLOVENIA

[Caption on page 24]

HUNGRIA

[Caption on page 24]

CROATIA

[Caption on page 24]

BOSNIA

[Caption on page 24]

SERVIA

[Caption on page 24]

Travnik

[Caption on page 24]

Zenica

[Caption on page 24]

Sarajevo

[Caption on page 24]

Laman Adriático

[Caption on page 26]

Pasando poco poco banda di un truk di boltu