Informe di Proclamadornan di Reino

E Pueblo di Dios Ta Ofrecé Su Mes Boluntariamente

SU NOMBER tabata José, i e tabata un nativo dje isla di Chipre. E tabata entre e cristiannan di promé siglo cu a bende tereno i cas p’e por a contribuí financieramente n’e adelanto di cristianismo. Debí na su curason afectuoso i generosidad, el a bira conocí como Barnabas, nificando “Yu di Consuelo.”​—⁠Echonan 4:34 -37.

Tal interes genuino den otronan semper tabata un rasgo distintivo dje berdadero adoradornan di Jehova. Testigonan di Jehova djawe no ta diferente, manera e siguiente experencia for di Islanan Sálomon ta resaltá.

Un grupo di mas cu 60 Testigo for di Australia i Nueva Zelandia a biaha pa Honiara, e capital di Islanan Sálomon na Guadalcanal. Nan a bini pa yuda cu e construccion di un Salon di Asamblea pa reunionnan cristian grandi. A tuma nan solamente mas o ménos dos siman pa construí un edificio cu un capacidad pa rond di 1.200!

Rond dje mésun tempu, e autoridadnan local dje pueblo chikitu di Munda, riba e isla di New Georgia, a otorgá e congregacion di Testigonan di Jehova un pida tereno net den e centro dje pueblo. Nan kier a edificá un Salon di Reino, un lugá di adoracion. I nan di berdad tabatin mester di un. Nan tabata reuní den e sala di un cas chikitu di blachi, pero nan no tabatin recurso pa traha un Salon di Reino.a E congregacion tabata consistí principalmente di hende di edad avansá i hende enfermo i mucha, i no tabatin ningun cu experencia den e ramo di construccion.

Rond di 380 kilometer mas leu, riba e isla di Guadalcanal, e Testigonan den e stad di Honiara a ofrecé nan mes boluntariamente. (Salmo 110:⁠3) Nan a razoná: “Si nos rumannan den otro paisnan tabata dispuesto pa construí un Salon di Asamblea pa nos den dos siman, e ora ei nos siguramente por yuda nos rumannan na Munda i construí un Salon di Reino pa nan den dos siman.”

Esei ta net loke a sosodé. Riba un dia un ferry cargá cu boluntarionan Testigo contentu i ansioso a yega Munda. Homber i muher, bieu i yong, tur a duna un man pa baha nan cargamentu i a prepará nan mes pa cuminsá traha cu e palu, cement, heru pa dak i otro materialnan cu a yega Munda promé cu nan.

Pronto despues cu e trabou a cuminsá, un maltempu severo cu bos i weerlicht a interumpí e suministro di awa dje pueblo. Sin embargo, esaki no a resultá di ta un problema insuperabel. E Testigonan a coba un pos cu a suministrá awa durante henter e proyecto di construccion. Kico di cuminda pa tur e trahadornan? Esei no tabata un problema tampoco. E boluntarionan for di Honiara a haña bastante cuminda pa bai cuné for dje congregacionnan di Honiara. Nan a asta trece nan mes kokinan!

E bisiñanan a observá e progreso dje proyecto cu asombro. Un di nan a bisa: “Cosnan no ta sosodé den un par di dia aki. Nan ta tuma añanan.” Un otro bisiña, un lider religioso, a admití cu su misa ta den construccion p’e último 20 añanan i cu ainda e no a ser completá. Na contraste, e Salon di Reino nobo di Testigonan di Jehova na Munda a ser completá den solamente dies dia!

[Notanan]

[Maps na página 24]

(For fully formatted text, see publication)

Océano Sur Pacífico

ISLANAN SALOMON

Munda

GUADALCANAL

Honiara

[Map]

AUSTRALIA

NUEVA ZELANDIA